តើធាតុវិទ្យុសកម្មអាចបង្កផលវិបាកអ្វីខ្លះដល់សុខភាពមនុស្ស?
អាជ្ញាធរជប៉ុនបានប្រកាសថា កម្រិតវិទ្យុសកម្ម នៅមជ្ឈមណ្ឌលនុយក្លេអ៊ែរហ្វ៊ូគូស្ហ៊ីម៉ា (Fukushima) បានកើនឡើងខ្លាំង កាលពីថ្ងៃអង្គារ ១៥ មីនា ២០១១ ក្រោយពីមានការផ្ទុះរ៉េអាក់ទ័រនុយក្លេអ៊ែរចំនួន ៤ ជាបន្តបន្ទាប់គ្នា។ តើធាតុវិទ្យុសកម្មអាចធ្វើឲ្យមានគ្រោះថ្នាក់អ្វីខ្លះដល់សុខភាព? តើកម្ពុជាអាចនឹងត្រូវទទួលផលប៉ះពាល់ពីការលេចធ្លាយធាតុវិទ្យុសកម្ម នៅហ្វ៊ូគូស្ហ៊ីម៉ា ដែរឬទេ?
ចុះផ្សាយនៅថ្ងៃ៖ កែប្រែថ្ងៃទី៖
ការពន្យល់របស់សេង ឌីណា
តើអ្នកទទួលរងធាតុវិទ្យុសកម្ម អាចមានបញ្ហាសុខភាពអ្វីខ្លះ?
ការប៉ះពាល់ដល់សុខភាព គឺអាស្រ័យទៅនឹងបរិមាណនៃវិទ្យុសកម្ម ដែលយើងទទួល។ អ្នកដែលទទួលរងធាតុវិទ្យុសកម្មក្នុងកម្រិតធ្ងន់ធ្ងរ អាចនឹងគ្រោះថ្នាក់ដល់ជីវិត ក្នុងរយៈពេលខ្លី (គេចាត់ទុកថាស្លាប់ដោយពុលធាតុវិទ្យុសកម្ម)។ អ្នកដែលទទួលរងក្នុងកម្រិតធ្ងន់មធ្យម អាចត្រូវប្រឈមមុខនឹងជំងឺមហារីកធ្ងន់ធ្ងរ ដែលអាចបង្កគ្រោះថ្នាក់ដល់អាយុជីវិតទៅថ្ងៃអនាគត។
ធាតុវិទ្យុសកម្មអាចមាននៅស្ទើរតែគ្រប់ទីកន្លែង ក្នុងបរិយាកាស គ្រាន់តែមានក្នុងកម្រិតទាប។ ជាទូទៅ មនុស្សម្នាក់ៗទទួលធាតុវិទ្យុសកម្ម ប្រមាណជា ២មីលីស៊ីវែរត៍ ក្នុងមួយឆ្នាំ។ ការថតកាំរស្មីអ៊ិច (X-Ray) ក៏បណ្តាលឲ្យយើងទទួលធាតុវិទ្យុសកម្មដែរ ប៉ុន្តែ ទទួលក្នុងរយៈពេលខ្លី និងកម្រិតទាប ដែលមិនបង្កគ្រោះថ្នាក់ដល់សុខភាព។
អ្នកដែលទទួលធាតុវិទ្យុសកម្ម ចាប់ពីកម្រិត ១ស៊ីវែរត៍ទៅ (ស្មើនឹង១ពាន់មីលីស៊ីវែរត៍) ត្រូវចាត់ទុកជាអ្នកជំងឺវិទ្យុសកម្ម។ អ្នកជំងឺអាចត្រូវប្រឈមមុខនឹងជំងឺមហារីកខ្លាំង ប៉ុន្តែ នៅអាចមានលទ្ធភាពព្យាបាលបាន។
អ្នកដែលទទួលធាតុវិទ្យុសកម្ម ចាប់ពី ៥ស៊ីវែរត៍ មានអត្រាស្លាប់ ៥០% បើសិនជាបានទទួលការព្យាបាលត្រឹមត្រូវ។ អត្រាស្លាប់អាចនឹងកើនឡើង រហូតដល់ ៩០% ឬ ១០០% ប្រសិនបើគ្មានការព្យាបាល។
អ្នកដែលទទួលធាតុវិទ្យុសកម្មចាប់ពី ៨ស៊ីវែរត៍ទៅ មានអត្រាស្លាប់ ១០០% មានន័យថា អ្នកជំងឺនឹងត្រូវស្លាប់ បើទោះជាមានការព្យាបាលត្រឹមត្រូវក៏ដោយ។
តើធាតុវិទ្យុសកម្មនៅហ្វ៊ូគូស្ហ៊ីម៉ានៅពេលនេះមានកម្រិតប៉ុណ្ណា?
យោងតាមអាជ្ញាធរជប៉ុន នៅក្នុងរោងចក្រនុយក្លេអ៊ែរហ៊្វូគូស្ហ៊ីម៉ា បច្ចុប្បន្ននេះ កម្រិតវិទ្យុសកម្ម មានពី១០០ ទៅ៤០០ មីលីស៊ីវែរត៍។ កម្រិតនេះនៅទាបជាង ១០០០មីលីស៊ីវែរត៍ ដែលជនរងគ្រោះត្រូវចាត់ទុកថាជាអ្នកជំងឺវិទ្យុសកម្ម។ ក៏ប៉ុន្តែ បរិមាណវិទ្យុសកម្ម ដែលមនុស្សម្នាក់ទទួល គឺវាអាស្រ័យនឹងបរិមាណវិទ្យុសកម្មនៅក្នុងបរិយាកាសផង និងរយៈពេលដែលគាត់ស្ថិតនៅកន្លែងមានវិទ្យុសកម្មផង។
ដូច្នេះ អ្នកដែលនៅក្នុង ឬនៅក្បែរមជ្ឈមណ្ឌលនុយក្លេអ៊ែរកាន់តែយូរ នឹងត្រូវទទួលរងធាតុវិទ្យុសកម្មកាន់តែច្រើន។
តើធាតុវិទ្យុសកម្ម ដែលលេចធ្លាយចេញពីមជ្ឈមណ្ឌលនុយក្លេអ៊ែរជប៉ុន អាចសាយភាយទៅដល់ប្រទេសកម្ពុជាដែរឬទេ?
តើធាតុវិទ្យុសកម្ម នៅហ្វ៊ូគូស្ហ៊ីម៉ា អាចសាយភាយទៅដល់ណា គឺជារឿងដែលមិនមានអ្នកណាម្នាក់អាចព្យាករដឹងជាមុនបានច្បាស់ទេ។ គេគ្រាន់តែដឹងថា វិទ្យុសកម្មមានទម្ងន់ធ្ងន់ជាងខ្យល់។ ដូច្នេះ វិទ្យុសកម្មដែលសាយភាយឡើងក្នុងបរិយាកាស នឹងត្រូវធ្លាក់ចុះមកដីវិញបន្តិចម្តងៗ។
ដូច្នេះ រយៈចម្ងាយនៃការសាយភាយវិទ្យុសកម្មអាស្រ័យនឹងកត្តាធំៗបី៖
- តើធាតុវិទ្យុសកម្ម ដែលលេចធ្លាយទៅក្នុងបរិយាកាស មានបរិមាណប៉ុណ្ណា?
- តើធាតុវិទ្យុសកម្មលេចធ្លាយចេញទៅដល់កម្រិតកម្ពស់ណា? តើគ្រាន់តែលេចធ្លាយចេញ ឬក៏មានកម្លាំងផ្ទុះរុញវិទ្យុសកម្មឲ្យឡើងទៅលើខ្ពស់?
- តើខ្យល់បក់ទៅទិសណា?
នៅពេលនេះ ប្រព័ន្ធខ្យល់នៅតំបន់ហ្វ៊ូគូស្ហ៊ីម៉ាមានទិសដៅទៅទិសខាងត្បូងឆៀងខាងកើត។ ដូច្នេះ ធាតុវិទ្យុសកម្ម នៅហ៊្វូគូស្ហ៊ីម៉ា កំពុងត្រូវខ្យល់បក់ផាត់ចេញទៅក្នុងមហាសមុទ្រប៉ាស៊ីហ្វ៊ិក។ ចំណែកប្រទេសកម្ពុជាវិញ គឺស្ថិតនៅខាងត្បូង ឆៀងខាងលិចប្រទេសជប៉ុន។ ម្យ៉ាងទៀត កម្ពុជាស្ថិតនៅចម្ងាយជាង ៤ពាន់គីឡូម៉ែត្រឯណោះ ពីហ្វ៊ូគូស្ហ៊ីម៉ា។
គួរបញ្ជាក់ថា កាលពីឆ្នាំ១៩៨៦ គ្រោះថ្នាក់នៅ Tchernobyle មានទំហំធំធេងជាងនៅហ្វ៊ូគូស្ហ៊ីម៉ាពេលនេះទៅទៀត។ ក៏ប៉ុន្តែ ធាតុវិទ្យុសកម្មបានសាយភាយតែនៅក្នុងរង្វង់តិចជាង២ពាន់គីឡូម៉ែត្រប៉ុណ្ណោះ។
ដូច្នេះ បើមើលទៅលើទិសខ្យល់ និងទំហំគ្រោះមហន្តរាយនៅហ្វ៊ូគូស្ហ៊ីម៉ា និងដោយផ្អែកទៅលើបទពិសោធន៍ពីអតីតកាល កម្ពុជាមិនគួរព្រួយបារម្ភ អំពីគ្រោះថ្នាក់ដែលបង្កឡើងដោយធាតុវិទ្យុសកម្មនៅហ្វ៊ូគូស្ហ៊ីម៉ានោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ