លោកគីម ជុងអ៊ុនបញ្ជាឲ្យកងទ័ពត្រៀមខ្លួនចូលសមរភូមិ
ចុះផ្សាយនៅថ្ងៃ៖
យោងតាមការចុះផ្សាយរបស់ទីភ្នាក់ងារព័ត៌មានរដ្ឋ KCNA កាលពីថ្ងៃពុធ ទី ២៥ ធ្នូ លោកគីម ជុងអ៊ុន ប្រមុខដឹកនាំកូរ៉េខាងជើង បានបញ្ជា ឲ្យកងទ័ពត្រៀមលក្ខណៈជានិច្ចដើម្បីចូលសមរភូមិប្រយុទ្ធ ព្រោះថា តាម មេដឹកនាំកូរ៉េខាងជើង សង្រ្គាមអាចកើតឡើង នៅគ្រប់ពេលវេលា។ កូរ៉េខាងជើងតែងតែមានប្រពៃណី ប្រកាសគំរាមធ្វើសង្រ្គាមជាមួយកូរ៉េខាងត្បូង។ អាមេរិក និងកូរ៉េខាងត្បូង ដែលជាសត្រូវរបស់កូរ៉េខាងជើង តែងតែយកចិត្តទុកដាក់ ជានិច្ច តាមដានរាល់ជំហាន សកម្មភាពរបស់មេដឹកនាំកូរ៉េខាងជើង។
នៅពីរសប្តាហ៍ក្រោយប្រហារជីវិតឪពុកមារបស់ខ្លួន លោកគីម ជុងអ៊ុនបានបង្ហាញវត្តមានជាបន្តបន្ទាប់ ដើម្បីធានាបញ្ជាក់ស្ថិរភាព នៅកូរ៉េខាងជើង។ ប្រព័ន្ធផ្សព្វផ្សាយរបស់កូរ៉េខាងជើងបានបង្ហាញពីដំណើរចុះសួរសុខទុក្ខរបស់ លោកគីម ជុងអ៊ុន ដែល កាលពីថ្ងៃអង្គារ លោកបានចុះទៅសួរសុខទុក្ខកងពល លេខ៥២៦ ដែលឈរជើង នៅភាគខាងលិចប្រទេស។
ក្នុងកាលៈទេសៈ ដែលនយោបាយផ្ទៃក្នុងរបស់កូរ៉េខាងជើង កំពុងរង្គោះរង្គើ ចាប់តាំងពីលោកគីម ជុងអ៊ុន បានសម្រេចប្រហារជីវិតលោកចាង សុងថេក ដែលជាឪពុកមាថ្លៃ កាលពី ពីរសប្តាហ៍មុននេះ(ថ្ងៃទី ១២ ធ្នូ ២០១៣) អាមេរិក និងកូរ៉េខាងត្បូង បានសំដែងការព្រួយបារម្ភ ពីលទ្ធភាពផ្ទុះសង្រ្គាម នៅឧបទ្វីបកូរ៉េ។ កាលពីថ្ងៃម្សិលមិញ នៅក្នុងដំណើរចុះជួបកងទ័ព លោកស្រីប្រធានាធិបតីកូរ៉េខាងត្បូង ប៉ាក់ គុនហឺ បានអំពាវនាវកងទ័ពត្រៀមខ្លួន កុំឲ្យមានការខ្វះចន្លោះ ដើម្បីការពារសន្តិសុខកូរ៉េខាងត្បូង។
►សូមអាន៖ អគ្គមគ្គទេសន៍គីម ជុងអ៊ុនបន្តបោសសំអាតសត្រូវផ្ទៃក្នុងដើម្បីពង្រឹងអំណាចរបស់ខ្លួន
ការកាត់ទោសប្រហារជីវិតភ្លាមៗលោកចាង សុងថេក គឺជាព្រឹត្តិការណ៍ប្រវត្តិសាស្រ្ត ដែលមិនធ្លាប់មានទេ ពីមុនមក នៅកូរ៉េខាងជើង។ នៅក្នុងរវាងតែមួយសប្តាហ៍ លោកចាង សុងថេក ដែលជាមេដឹកនាំកំពូលទីពីរ បន្ទាប់ពីលោកគីម ជុងអ៊ុនត្រូវបានបក្សកុម្មុយនិស្តកូរ៉េខាងជើង កាត់ទោស និងប្រហារជីវិតភ្លាមៗ។ តាមទីភ្នាក់ងារព័ត៌មានកូរ៉េខាងត្បូង អ្នកស្និទ្ធនឹងលោកចាង សុងថេក ទាំងប៉ុន្មាន ក៏ត្រូវគេចាប់ខ្លួន និងប្រហារជីវិតចោលដែរ។
គេវាយតម្លៃថា លោកគីម ជុងអ៊ុនកំពុងបោសសម្អាតផ្ទៃក្នុង បក្សដើម្បីពង្រឹងអំណាចរបស់ខ្លួន នៅពីរឆ្នាំក្រោយបន្ទាប់ពីស្នងតំណែងបន្តពីឪពុក។ លោកបានកាត់ទោសប្រហារជីវិតលោកចាង សុងថេក ដែលគេធ្លាប់មើលឃើញ ជាមេដឹកនាំស្រមោល របស់កូរ៉េខាងជើង។ តាមអ្នកជំនាញនយោបាយកូរ៉េខាងជើង ការបោសសម្អាតផ្ទៃក្នុងបក្សមិនឈប់ត្រឹមណេះទេ។ ចង់ ឬមិនចង់ ការបោសសម្អាតនឹងអាចបង្កឲ្យមានការងើបរើបម្រះ។ ដូច្នេះ អាមេរិក និងកូរ៉េខាងត្បូង ខ្លាចថា ដើម្បីអាចទប់ទល់នឹងស្ថានការណ៍វឹកវរ ក្នុងស្រុក លោកគីម ជុងអ៊ុនអាចបង្វែរវិបត្តិក្នុងស្រុក ទៅជាបង្កជម្លោះសង្រ្គាមជាមួយប្រទេសខាងក្រៅ។ វាជាគ្រោះថ្នាក់ធំសម្បើម នៅក្នុងតំបន់ នៅពេលដែលកូរ៉េខាងជើង កំពុងផ្គើន លួចផលិតអាវុធនុយក្លេអ៊ែរ។
តើកូរ៉េខាងជើងពិតជាកំពុងជួបអស្ថិរភាពនយោបាយ?
អ្នកជំនាញនយោបាយកូរ៉េខាងជើង នៅតែខ្វែងគំនិតគ្នានៅឡើយ នៅចំណុចដែលថា កូរ៉េខាងជើង កំពុងជួបអស្ថិរភាពនយោបាយ ឬគ្មាន ។ សម្រាប់ក្រុមទីមួយ ដែលវាយតម្លៃថា កូរ៉េខាងជើង កំពុងជួបអស្ថិរភាព នយោបាយ គេមានអំណះអំណាងមួយចំនួនមកបញ្ជាក់។ ការកាត់ទោសប្រហារជីវិតស្រស់របស់មេដឹកនាំជាន់ខ្ពស់ទីពីររបស់កូរ៉េខាងជើង បានស្តែងពីជម្លោះ ការបែកបាក់ផ្ទៃក្នុងរបស់បក្សកុម្មុយនិស្តកូរ៉េខាងជើង ដែលធ្លាប់តែបង្ហាញមុខមាត់ រឹងមាំ និងសាមគ្គីភាព។ ប្រទេសកុម្មុយនិស្តខាងជើង មិនដែលបង្ហាញពីចំណុចខ្សោយរបស់បក្សទេ គឺមិនដែលបង្ហាញថា នៅក្នុងបក្សមានមនុស្សក្បត់នោះទេ។ បើបក្សធ្លាប់កាត់ទោស និងបោសសម្អាតផ្ទៃក្នុង គឺបក្សធ្វើដោយស្អាត់ៗ ប៉ុន្តែ មិនដែលបញ្ចេញឲ្យឃើញជាសាធារណៈ ដូចលើកនេះទេ។ មន្រ្តីជាន់ខ្ពស់ ដែលគេចាត់ទុកជាជនក្បត់ និងមិនដើរតាមគោលនយោបាយរបស់បក្ស គ្រាន់តែបាត់មុខពីបក្សតែប៉ុណ្ណោះ ប៉ុន្តែ មិនមែនត្រូវគេកាត់ទោសប្រហារជីវិត និងចាក់បញ្ចាំង តាមទូរទស្សន៍ ដូចគេបានធ្វើទៅលើលោកចាង សុងថេកទេ។ មួយវិញទៀត លោកចាង សុងថេក មិនមែនជាមន្រ្តីសាមញ្ញរបស់បក្សឯណា។ លោកធ្លាប់ត្រូវគេចាត់ទុកជាគ្រូប្រៀនប្រដៅ និងអ្នកមានឥទ្ធិពលខ្លាំងទៅលើប្រមុខដឹកនាំកូរ៉េខាងជើង លោកគីម ជុងអ៊ុន។
សម្រាប់ក្រុមអ្នកវិភាគផ្សេងទៀត កូរ៉េខាងជើង គ្មានជួបអស្ថិរភាពនយោបាយ អ្វីទេ។ លោកគីម ជុងអ៊ុនគ្រាន់តែចង់ពង្រឹងអំណាចរបស់លោក។ ការកាត់ទោស និងប្រហារជីវិតភ្លាមៗទៅលើលោកចាង សុងថេក អាចជាយុទ្ធសាស្រ្តរបស់លោកគីម ជុងអ៊ុន ដើម្បីបិទខ្ទប់ភ្លាមៗ រលកដែលប្រឆាំងនឹងលោក។ មន្រ្តីយោធាសំខាន់ៗមួយចំនួនក៏បានឆ្លៀត ការកាត់ទោសប្រហារជីវិតឪពុកមារបស់លោកគីម ជុងអ៊ុន ដើម្បីសុំចូលខ្លួន មកធ្វើជាគ្នីគ្នារបស់លោកគីម ជុងអ៊ុន ដែលនឹងធ្វើឲ្យលោកគីម ជុងអ៊ុន ដែលមានវ័យត្រឹមជាង៣០ឆ្នាំ រឹតតែក្លាយជាមេដឹកនាំក្មេង និងមានអំណាចកាន់តែខ្លាំង នៅកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ