ឥណ្ឌានិងប៉ាគីស្ថានបាញ់គ្នាសាជាថ្មី បណ្តាលអោយទាហានប៉ាគីស្ថានម្នាក់ស្លាប់
ឥណ្ឌានិងប៉ាគីស្ថានបានទាញកាំភ្លើងបាញ់គ្នាសាជាថ្មីទៀតហើយ កាលពីយប់ថ្ងៃអង្គារចូលព្រឹកថ្ងៃពុធនេះ នៅតំបន់ជម្លោះកាស្មៀរ ធ្វើអោយទាហានប៉ាគីស្ថានម្នាក់ស្លាប់។ នេះបើយោងតាមការរាយការណ៍របស់អាជ្ញាធរយោធាប៉ាគីស្ថាន នៅថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
ទាហានឥណ្ឌា និងទាហានប៉ាគីស្ថានបានប្រយុទ្ធគ្នាអស់រយៈពេលពីរសប្តាហ៍មកហើយ នៅតំបន់Shakma តាមខ្សែបន្ទាត់ត្រួតពិនិត្យព្រំដែនរវាងប្រទេសទាំងពីរ ស្ថិតក្នុងតំបន់ជម្លោះកាស្មៀរ។ យោងតាមទាហានប៉ាគីស្ថាន ការប្រយុទ្ធគ្នារវាងទាហានប្រទេសទាំងពីរ កាលពីយប់ថ្ងៃអង្គារឈានចូលព្រឹកថ្ងៃពុធ បានធ្វើអោយទាហានប៉ាគីស្ថានម្នាក់បាត់បង់ជីវិត និងម្នាក់ទៀតរងរបួសធ្ងន់។ ខាងទាហានប៉ាគីស្ថានបានប្រាប់ថា ទាហានឥណ្ឌាជាអ្នកចាប់ផ្តើមបាញ់ពន្យុះមុន ទើបទាហានប៉ាគីស្ថានបាញ់តបទៅវិញតាមក្រោយ។
ផ្ទុយទៅវិញ មេដឹកនាំយោធាឥណ្ឌាម្នាក់ ដែលទទួលបន្ទុកប៉ែកកាស្មៀរឥណ្ឌា បានប្រាប់ថា មិនបានទទួលព័ត៌មានអ្វីទាក់ទងនឹងការបាញ់ប្រហារគ្នានេះសោះឡើយ។ គួរបញ្ជាក់ថា ទាហានឥណ្ឌានិងទាហានប៉ាគីស្ថានតែងចោទគ្នាទៅវិញទៅមកថា ខ្លួនបាញ់តបតទៅភាគីម្ខាងទៀត ក៏ព្រោះតែភាគីម្ខាងទៀតនោះជាអ្នកផ្តើមបាញ់មុន។
នាយករដ្ឋមន្ត្រីប៉ាគីស្ថាន Nawaz Sharif ធ្លាប់បានអំពាវនាវអោយមានការអត់ធ្មត់ និងសុំអោយមានការចរចាគ្នា រវាងប្រទេសទាំងពីរ។ ប៉ុន្តែ ការប្រយុទ្ធគ្នានៅតែបន្តមាន នៅតំបន់កាស្មៀរ។ រដ្ឋាភិបាលឥណ្ឌាបានប្រាប់ទៅវិញថា ការចរចាគ្នាអាចធ្វើឡើងបានលុះត្រាតែស្ថានការណ៍មានលក្ខណៈអនុគ្រោះជាមុនសិន ពោលគឺមិនត្រូវមានអំពើភេរវកម្ម ឬហិង្សានោះទេ។
ចាប់តាំងពីទទួលបានឯករាជ្យផុតពីអាណានិគមអង់គ្លេស នៅឆ្នាំ១៩៤៧មក ឥណ្ឌានិងប៉ាគីស្ថានបានធ្វើសង្គ្រាមនឹងគ្នាបីដងមកហើយ ក្នុងនោះ សង្គ្រាមចំនួនពីរបានធ្វើឡើងដោយសារតែជម្លោះតំបន់កាស្មៀរ។ តំបន់កាស្មៀរបានបែងចែកជាពីរសំរាប់ប្រទេសនីមួយៗ។ ប៉ុន្តែទាំងឥណ្ឌា ទាំងប៉ាគីស្ថាន សុទ្ធតែចង់បានតំបន់កាស្មៀរទាំងមូល ជាកម្មសិទ្ធិជាតិរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ