តើនឹងមានកិច្ចព្រមព្រៀងស្តីពីនុយក្លេអ៊ែរអ៊ីរ៉ង់ក្នុងកិច្ចចរចាជាថ្មីដែរ ឬទេ?
ចុះផ្សាយនៅថ្ងៃ៖
ស្តាប់ - ០៥:១៣
នៅថ្ងៃពុធទី២០ វិច្ឆិកានេះ សំណុំរឿងនុយក្លេអ៊ែររបស់ប្រទេសអ៊ីរ៉ង់បានវិលត្រឡប់ទៅកាន់តុចរចាជាថ្មីនៅក្នុងទីក្រុងហ្សឺណែវ ប្រទេសស្វីស។ កិច្ចចរចា ៦ភាគីជាថ្មីថ្ងៃនេះបានធ្វើឡើង បន្ទាប់ពីកិច្ចចរចាចុងក្រោយមិនបានសម្រេចកាលពីថ្ងៃទី៩ វិច្ឆិកាកន្លងទៅ។ យ៉ាងណាក៏ដោយ កិច្ចចរចាថ្ងៃនេះត្រូវបានគ្រប់គ្នាសង្ឃឹមថា នឹងអាចទទួលបានកិច្ចព្រមព្រៀងជាប្រវត្តិសាស្រ្តមួយស្តីពីបញ្ហានុយក្លេអ៊ែរអ៊ីរ៉ង់ដ៏ចម្រូងចម្រាស។
អ្វីៗបានស្តែងឡើងតាមរយៈកិច្ចចរចាកាលពីថ្ងៃទី៩ វិច្ឆិកាកន្លងទៅ។ កាលណោះ គេសង្កេតឃើញមានសញ្ញាវិជ្ជមានជាច្រើនដែលគួរឲ្យកត់សម្គាល់ និងដែលហៀបនឹងនំាឲ្យមានការអនុម័តនូវកិច្ចព្រមព្រៀងលើកទី១ ស្តីពីសំណុំរឿងនុយក្លេអ៊ែរដ៏ចម្រូងចម្រាស។
ចាប់តំាងពីថ្ងៃចរចាកាលពី ១០ថ្ងៃមុនមិនបានជោគជ័យមក ភាគីពាក់ព័ន្ធនីមួយៗបានផ្តើមបេសកកម្មការទូតទៅកាន់ប្រទេសផ្សេងៗ ឬមួយក៏ហៅទូរស័ព្ទទៅកាន់ថ្នាក់ដឹកនំាមួយចំនួនដើម្បីនិយាយបញ្ចុះបញ្ចូលបន្ថែម ក៏ដូចជាបង្ហាញនូវជំហររបស់ខ្លួនទាក់ទងនឹងសំណុំរឿងនុយក្លេអ៊ែរអ៊ីរ៉ង់នេះ។ កន្លងមក គេឃើញមានទស្សនកិច្ចរបស់លោកប្រធានាធិបតីបារំាង François Hollande ទៅកាន់ប្រទេសអ៊ីស្រាអែល និងទស្សនកិច្ចរបស់លោកប្រមុខការទូតអ៊ីរ៉ង់នៅក្នុងប្រទេសអ៊ីតាលីជាដើម។ នៅយប់មិញ ពោលប៉ុន្មានម៉ោងមុនការផ្តើមកិច្ចចរចាជាថ្មីក្នុងថ្ងៃនេះ លោកនាយករដ្ឋមន្រ្តីអង់គ្លេស David Cameron បានទូរស័ព្ទនិយាយជាមួយលោកប្រធានាធិបតីអ៊ីរ៉ង់ហាស់សាន រ៉ូហានី។
នេះពិតជាកាយវិការមួយដែលគេមិនធ្លាប់ឃើញមានទេ ក្នុងរយៈពេល ១០ឆ្នំាកន្លងទៅរវាងអង់គ្លេស និងអ៊ីរ៉ង់។ ក្រៅពីនិយាយពីទំនាក់ទំនងដែលកំពុងបោះជំហានទៅមុខរវាងទីក្រុងឡុងដ៏ និងតេហេរ៉ង់នារយៈពេលចុងក្រោយ ថ្នាក់ដឹកនំាអង់គ្លេស និងអ៊ីរ៉ង់ក៏បានកត់សម្គាល់ឃើញពីការចម្រើនទៅមុខនៅក្នុងកិច្ចចរចារឿងនុយក្លេអ៊ែរអ៊ីរ៉ង់កាលពី ១០ថ្ងៃមុនដែរ។ ទន្ទឹមគ្នានេះ លោកប្រមុខរដ្ឋាភិបាលអង់គ្លេសក៏បានគូសបញ្ជាក់ពីភាពចំាបាច់របស់អ៊ីរ៉ង់ក្នុងការឆ្លើយតបទៅនឹងក្តីបារម្ភរបស់សហគមន៍អន្តរជាតិទាក់ទងនឹងរឿងនុយក្លេអ៊ែររបស់ខ្លួន។
ក្នុងថ្ងៃនេះទៀត ចិនដែលជាសម្ព័ន្ធមិត្តរបស់អ៊ីរ៉ង់ ក៏បានជម្រុញឲ្យអ៊ីរ៉ង់ឆ្មក់យកឱកាសដ៏ល្អនៃកិច្ចចរចានេះដើម្បីបង្កើនទំនាក់ទំនងជាមួយសហគមន៍អន្តរជាតិ។ អ្នកដែលមានសុទិដ្ឋិនិយមខ្លំាងជាងគេថានឹងមានកិច្ចព្រមព្រៀងនោះ គឺភាគីអ៊ីរ៉ង់តែម្តង។
អ៊ីស្រាអែលបន្តបេសកកម្មការទូតប្រឆំាងអ៊ីរ៉ង់រហូតដល់នាទីចុងក្រោយ
តំាងពីក្រោយបរាជ័យនៅក្នុងកិច្ចចរចាកាលពី ១០ថ្ងៃមុនមក លោកនាយករដ្ឋមន្រ្តីអ៊ីស្រាអែល Benjamin Netanyahu បានដើរបញ្ចុះបញ្ចូលភាគីពាក់ព័ន្ធនៅក្នុងកិច្ចចរចានោះកុំឲ្យចុះកិច្ចព្រមព្រៀងជាមួយអ៊ីរ៉ង់ឲ្យសោះ។ កន្លងមក លោក Netanyahu បានទៅសហរដ្ឋអាមេរិកដើម្បីនិយាយប្រាប់លោកប្រធានាធិបតីអូបាម៉ាកុំឲ្យចាញ់បោកជំហររបស់អ៊ីរ៉ង់ និងក្តីបារម្ភរបស់ប្រជាជនអ៊ីស្រាអែល ក្នុងករណីណាដែលអាមរិកយល់ព្រមចុះហត្ថលេខាលើកិច្ចព្រមព្រៀងណាមួយជាមួយអ៊ីរ៉ង់។ បន្ទាប់មក នៅក្នុងដំណើរទស្សនកិច្ចរបស់លោកប្រធានាធិបតីបារំាង François Hollande ក្នុងទឹកដីអ៊ីស្រាអែល លោកប្រមុខរដ្ឋាភិបាលអ៊ីស្រាអែលក៏បាននិយាយប្រាប់លោក Hollande អំពីក្តីបារម្ភរបស់អ៊ីស្រាអែលដូចគ្នានេះដែរ។ នៅថ្ងៃនេះទៀត និងចំថ្ងៃបើកកិច្ចចរចាជាថ្មីក្នុងទីក្រុងហ្សឺណែវ លោក Netanyahu បានធ្វើដំណើរជាបន្ទាន់ទៅកាន់ប្រទេសរុស្ស៊ីដើម្បីជួបនិយាយជាមួយលោកប្រធានាធិបតីពូទីន។
វាពិតជារឿងធម្មតាទេដែលអ៊ីស្រាអែលកំពុងព្រួយបារម្ភខ្លំាងពីការដែលសហគមន៍អន្តរជាតិ និងអ៊ីរ៉ង់កំពុងរំកិលរកគ្នានោះ ហើយអ៊ីស្រាអែលកាន់តែបារម្ភថែមទៀត នៅពេលដែលឃើញអាមេរិក និងអ៊ីរ៉ង់កំពុងល្អូតល្អឺនដាក់គ្នាខ្លាំងនោះ។ ចូរកុំភ្លេចថា អាមេរិក និងអ៊ីស្រាអែល ជាសម្ព័ន្ធមិត្តចាក់ទឹកមិនលេចរវាងគ្នា តែអ៊ីស្រាអែល និងអ៊ីរ៉ង់ជាជាសត្រូវស៊ីសាច់ហុតឈាម និងស៊ូពូជគ្មានថ្ងៃនឹងជានានឹងគ្នាបានឡើយ។
បើតាមមើលទៅ បេសកកម្មការទូតរបស់លោកប្រមុខរដ្ឋាភិបាលអ៊ីស្រាអែល Netanyahu ហាក់ដូចជាពិបាកនឹងផ្លាស់ប្តូរឥរិយាបទសម្របសម្រួលរបស់របស់សហគមន៍អន្តរជាតិបន្តិច ព្រោះថា ពួកគេក៏បានរង់ចំាជាយូរមកហើយនូវឱកាសដ៏ល្អសម្រាប់ដោះស្រាយសំណុំរឿងនុយក្លេអ៊ែរអ៊ីរ៉ង់ដ៏ស្មុគស្មាញ និងអូសបន្លាយមកដល់បច្ចុប្បន្ន។ តែគេក៏មិនត្រូវភ្លេចទេថា ដើម្បីអាចឲ្យមានកិច្ចព្រមព្រៀងមួយបាន លុះត្រាណាតែសហគមន៍អន្តរជាតិយល់ព្រមឲ្យអ៊ីរ៉ង់មាននុយក្លេអ៊ែរស៊ីវិល ដូចដែលអ៊ីរ៉ង់បានទាមទារជាយូរមកហើយ។ រីឯអ៊ីរ៉ង់វិញ ត្រូវតែហ៊ានបង្ហាញការពិតថា កម្មវត្ថុនៃកម្មវិធីនុយក្លេអ៊ែររបស់ខ្លួនមិនមែនក្នុងគោលដៅផលិតគ្រាប់បែកបរមាណូដូចដែលសហគមន៍អន្តរជាតិកំពុងសង្ស័យនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ