លោកអូបាម៉ាប្រកាសធ្វើកំណែទម្រង់ទីភ្នាក់ងារចារកិច្ច NSA ដែលកំពុងជាប់រឿងអាស្រូវ
ចុះផ្សាយនៅថ្ងៃ៖
ស្តាប់ - ០៥:៤៥
កាលពីល្ងាចថ្ងៃសុក្រម្សិលមិញ លោកអូបាម៉ាបានប្រកាសឲ្យដឹងអំពីគម្រោងធ្វើកំណែទម្រង់មួយ ដែលគេទន្ទឹងរង់ចាំមើលជាយូរមកហើយ គឺកំណែទម្រង់ទីភ្នាក់ងារចារកិច្ច NSA ដែលកំពុងប្រឈមមុខនឹងរឿងអាស្រូវជុំវិញការលួចស្តាប់ទូរស័ព្ទ និងការប្រមូលទិន្នន័យឯកជនពីអ្នកប្រើប្រាស់អ៊ីនធ័រនែត។ រឿងអាស្រូវដែលបានផ្ទុះឡើង ចាប់តាំងពីមានលេចធ្លាយព័ត៌មានសម្ងាត់ ពី Edward Snowden អតីតបុគ្គលិក NSA។
សំណួរ-តាំងពីដើមមក កាលណាគេនិយាយពីទីភ្នាក់ងារចារកិច្ចអាមេរិក គែធ្លាប់តែឮ CIA ហើយកម្រនឹងឮអំពី NSA។ តើរវាង NSA និង CIA មានចំណុចខុសគ្នាត្រង់ណាខ្លះ?
នៅសហរដ្ឋអាមេរិក មានទីភ្នាក់ងារចារកិច្ចសរុបទាំងអស់ រហូតដល់ទៅ ១៦។ CIA មានលក្ខណៈពិសេសជាងគេ នៅត្រង់ថា វាជាទីភ្នាក់ងារចារកិច្ចឯករាជ្យ ខុសពីទីភ្នាក់ងារចារកិច្ច ១៥ផ្សេងទៀត ដែលសុទ្ធតែចំណុះឲ្យក្រសួងណាមួយ។ NSA គឺជាទីភ្នាក់ងារចារកិច្ចចំណុះឲ្យក្រសួងការពារជាតិ។
CIA (Central Intelligence Agency) និង NSA (National Security Agency) សុទ្ធតែមានសកម្មភាពឈ្លបយកការណ៍សម្ងាត់ ទាក់ទងនឹងផ្នែកសន្តិសុខ និងយោធា។ អ្វីដែលខុសគ្នា គឺនៅត្រង់ថា CIA មានជំនាញខាងយកការណ៍ដោយប្រើធនធានមនុស្ស (Human Intelligence) គឺការដាក់ពង្រាយគិញសម្ងាត់ឲ្យទៅឈ្លបយកការណ៍សម្ងាត់ នៅបរទេស ហើយពេលខ្លះអាចបើកធ្វើប្រតិបត្តិការសម្ងាត់ ដូចជា ចាប់ខ្លួន ឬសម្លាប់មេដឹកនាំភេរវជន ឬលួចជួយក្រុមឧទ្ទាម ឬក្រុមប្រឆាំង ដើម្បីទម្លាក់រដ្ឋាភិបាលបរទេស ជាដើម។
ចំណែកឯ NSA មានជំនាញខាងយកការណ៍ផ្នែកអេឡិចត្រូនិច (Signal Intelligence) ដូចជាការលួចស្តាប់ការសន្ទនាតាមទូរស័ព្ទ និងការលួចទិន្នន័យក្នុងប្រព័ន្ធអ៊ីនធ័រនែត ជាដើម។
ចំណុចខុសគ្នាមួយទៀត គឺ CIA អាចធ្វើប្រតិបត្តិការឈ្លបយកការណ៍តែនៅបរទេសប៉ុណ្ណោះ ចំណែកឯ NSA វិញ អាចធ្វើសកម្មភាពលួចស្តាប់ទូរស័ព្ទ ឬប្រមូលទិន្នន័យអ៊ីនធ័រនែត ទាំងនៅក្រៅប្រទេស និងទាំងក្នុងសហរដ្ឋអាមេរិក។
ដោយហេតុនេះហើយបានជា ក្រោយពីមានលេចធ្លាយព័ត៌មានសម្ងាត់ ដោយ Edward Snowden មិនមែនតែរដ្ឋាភិបាលបរទេសទេ ដែលតវ៉ាប្រឆាំងនឹងសកម្មភាពរបស់ NSA។ បណ្តាអង្គការការពារសិទ្ធិសេរីភាពពលរដ្ឋអាមេរិក និងសមាជិកសភាអាមេរិកខ្លះក៏បាននាំគ្នាចេញមុខរិះគន់ NSA ព្រោះគេយល់ថា ការលួចស្តាប់សំឡេង និងប្រមូលព័ត៌មានដោយមិនរើសមុខបែបនេះ គឺជាការរំលោភបំពានទៅលើសិទ្ធិសេរីភាពឯកជនរបស់ពលរដ្ឋអាមេរិក។
សំណួរ-បើតាមការប្រកាសរបស់លោកអូបាម៉ា កាលពីថ្ងៃសុក្រម្សិលមិញនេះ តើអ្វីខ្លះជាកំណែទម្រង់ ដែលនឹងត្រូវទៅលើ NSA?
កំណែទម្រង់ធំបំផុត ដែលលោកអូបាម៉ា ប្រកាសម្សិលមិញនេះ គឺទាក់ទងនឹងការដាក់កម្រិតទៅលើសកម្មភាពរបស់ NSA ក្នុងការប្រមូល និងប្រើប្រាស់ទិន្នន័យទូរស័ព្ទ។
រាល់ការលួចស្តាប់ទូរស័ព្ទមេដឹកនាំប្រទេសជាមិត្តរបស់អាមេរិកត្រូវតែបញ្ឈប់ លែងឲ្យមាន។ ការលួចស្តាប់ ឬប្រមូលទិន្នន័យទូរស័ព្ទរបស់ប្រជាជនធម្មតាអាចបន្តធ្វើបាន ក៏ប៉ុន្តែ ត្រូវដាក់ឲ្យស្ថិតក្រោមការឃ្លាំមើលយ៉ាងដិតដល់ពីសំណាក់សភា និងតុលាការ។ ដើម្បីចូលមើលទិន្នន័យទូរស័ព្ទរបស់អ្នកណាមួយ NSA ចាំបាច់ត្រូវទៅសុំដីកាពីតុលាការជាមុនសិន លើកលែងតែក្នុងករណីចាំបាច់ និងបន្ទាន់។
ទាក់ទងនឹងពលរដ្ឋបរទេសវិញ ទិន្នន័យដែល NSA ប្រមូលបាន គេអាចយកមកប្រើប្រាស់តែក្នុងវិស័យសន្តិសុខតែមួយមុខប៉ុណ្ណោះ ដូចជា ការប្រយុទ្ធប្រឆាំងនឹងភេរវកម្ម និងសន្តិសុខតាមប្រព័ន្ធអ៊ីនធ័រនែត ជាដើម។ ម្យ៉ាងទៀត ទិន្នន័យនេះក៏មិនអាចត្រូវស្តុកទុកជាអចិន្រៃយ៍បានដែរ មានន័យថា នៅក្នុងរយៈពេលកំណត់ណាមួយ គេត្រូវតែលុបទិន្នន័យនេះចោល។
ចំពោះការរក្សាទុកទិន្នន័យជាទូទៅ (តើត្រូវរក្សាទុករយៈពេលប៉ុន្មាន? តើត្រូវទុករក្សាទុកនៅកន្លែងណា? ដោយស្ថាប័នណា?) លោកអូបាម៉ាមិនទាន់បានសម្រេចថានឹងត្រូវធ្វើយ៉ាងណានៅឡើយទេ ដោយចាត់ឲ្យរដ្ឋមន្រ្តីក្រសួងយុត្តិធម៌ធ្វើការសិក្សាលម្អិត និងធ្វើជាអានុសាសន៍ត្រឡប់មកវិញ នៅក្នុងរយៈពេល ២ខែទៀត។
សំណួរ-បើស្តាប់មើលទៅ កំណែទម្រង់ទាំងអស់នេះទាក់ទងតែនឹងការប្រមូលទិន្នន័យតាមទូរស័ព្ទ។ ចុះការប្រមូលទិន្នន័យតាមប្រព័ន្ធអ៊ីនធ័រនែតវិញ?
បើយោងតាមព័ត៌មានសម្ងាត់បញ្ចេញឲ្យដឹងដោយ Edward Snowden ការឆ្លើយឆ្លងតាមអ៊ីមែល និងព័ត៌មានផ្ទាល់ខ្លួនរបស់អ្នកប្រើប្រាស់អ៊ីនធ័រនែតនៅទូទាំងពិភពលោក ក៏ត្រូវទីភ្នាក់ងារ NSA លួចយកយ៉ាងសន្ធឹកសន្ធាប់ដែរ។
ក៏ប៉ុន្តែ ការធ្វើកំណែទម្រង់ ដែលលោកអូបាម៉ាប្រកាសឲ្យដឹង កាលពីថ្ងៃសុក្រម្សិលមិញនេះ ទាក់ទងតែចំពោះសកម្មភាពប្រមូល និងប្រើប្រាស់ទិន្នន័យតាមទូរស័ព្ទតែមួយមុខគត់ ដោយមិនមានការផ្លាស់ប្តូរចំពោះសកម្មភាពប្រមូលទិន្នន័យផ្សេងទៀតទេ។ និយាយឲ្យចំទៅ វាគ្រាន់តែជាកំណែទម្រង់មួយផ្នែកតូចប៉ុណ្ណោះ មិនមែនជាកំណែទម្រង់ទ្រង់ទ្រាយធំ ដែលអ្នកខ្លះរំពឹងទុកនោះទេ។
លោកអូបាម៉ាមិនបានស្តីបន្ទោស NSA ចំពោះសកម្មភាពកន្លងមកផងទេ ប៉ុន្តែ មានតែស្តីបន្ទោស Edward Snowden ដែលជាអ្នកទម្លាយឯកសារសម្ងាត់ទៅវិញ ដោយថា វាជាការហែកទ្រូងខ្លួនឯង ឲ្យសត្រូវដឹងពីសកម្មភាពចារកិច្ចរបស់ប្រទេសខ្លួនឯង។
បើពិនិត្យជារួម យើងឃើញថា លោកអូបាម៉ា ក្នុងឋានៈជាប្រធានាធិបតី បានប្រកាន់ជំហរមិនខុសពីមេដឹកនាំអាមេរិកមុនៗប៉ុន្មានទេ គឺប្រកាន់គោលការណ៍ថា សកម្មភាពចារកិច្ច គឺជាតម្រូវការចាំបាច់ ក្នុងការរក្សាសន្តិសុខជាតិរបស់អាមេរិក ដោយគ្រាន់តែលោកព្យាយាមធ្វើយ៉ាងណាឲ្យមានតុល្យភាព រវាងសន្តិសុខ និងសិទ្ធិសេរីភាពឯកជន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ