លោកអូបាម៉ាទើសទាល់ខ្លាំងដោយសាររឿងអាស្រូវលួចស្តាប់តាមទូរស័ព្ទ
ចុះផ្សាយនៅថ្ងៃ៖
ស្តាប់ - ០៥:២៥
កាលពីពេលថ្មីៗនេះ សេតវិមានធ្លាប់រិះគន់ថា រដ្ឋាភិបាល និងស្ថាប័នយោធាចិនជាអ្នកនៅពីក្រោយខ្នងក្រុមចោរលួច តាមព័ត៌មានវិទ្យា ប៉ុន្តែ ពេលនេះ ហាក់ដូចជាជាន់កែងខ្លួនឯងទៅវិញ ព្រោះថា រដ្ឋបាលរបស់លោកអូបាម៉ា ខ្លួនឯងក៏កំពុងរងព្យុះរិះគន់ពីអង្គការការពារសិទ្ធិមនុស្ស និងអ្នកកាសែត ពីរឿងដែលទីភ្នាក់ងារស៊ើបការណ៍សម្ងាត់អាមេរិកបានចូលលួចយកព័ត៌មានរបស់ប្រជាជនអាមេរិក តាមរយៈអ៊ិនធ័រណេត ឬលួចស្តាប់ខ្សែរទូរស័ព្ទ។
នៅចុងសប្តាហ៍មុននេះ កាសែតអាមេរិកាំង The Washington post និងកាសែតអង់គ្លេសThe Guardian ទើបបានចុះផ្សាយរបាយការណ៍ដ៏គួរឲ្យព្រឺខ្លួនមួយ ដែលបង្ហាញពីកម្មវិធីពីររបស់រដ្ឋបាលលោកអូបាម៉ា ដែលកំពុងលួចយកការណ៍ពីប្រជាជនអាមេរិក។ លួចយកការណ៍ពីប្រជាជនអាមេរិក ព្រោះបើតាមកាសែត The Washington Post ទូរស័ព្ទរបស់ប្រជាជនអាមេរិកាំង ១០លាននាក់ត្រូវភ្នាក់ងារស៊ើបការណ៍សម្ងាត់អាមេរិកលួចស្តាប់ជារៀងរាល់ថ្ងៃ។
មួយវិញទៀត ទីភ្នាក់ងារសន្តិសុខជាតិរបស់អាមេរិកដែលជាអ្នកគ្រប់គ្រងកម្មវិធីនេះផ្ទាល់ ក៏បានប្រើកម្មវិធីស៊ើបការណ៍សម្ងាត់មួយទៀត ឈ្មោះ Prism ដើម្បីចូលទៅយកព័ត៌មានសម្ងាត់របស់បុគ្គល ដែលជាអតិថិជនរបស់ក្រុមហ៊ុនអ៊ិនធ័រណេតធំៗចំនួន ៩ ដូចជា Google ឬYoutube Yahoo Facebook ឬក៏Skype។ ក្រុមហ៊ុនGoogle Facebook Microsoft បានចេញមុខបដិសេធ ក្រោយលេចឮព័ត៌មាននេះ។ អ្នកនាំពាក្យរបស់ក្រុមហ៊ុនអះអាងថា គេមិនបានអនុញ្ញាតឲ្យភ្នាក់ងារស៊ើបការណ៍សម្ងាត់អាមេរិកចូលមើល ព័ត៌មានរបស់អតិថិជនរបស់ពួកគេ ដោយផ្ទាល់ ឬជារៀងរាល់ ថ្ងៃ ដូចដែលរបាយការណ៍បានចុះនោះទេ។ ប៉ុន្តែ យ៉ាងណាក៏ដោយ ក្រុមហ៊ុនក៏មិនបានបដិសេធ ពីការសហការកន្លងមក ជាមួយអាជ្ញាធរអាមេរិក ក្នុងករណីមានដីកាពីតុលាការ និងក្នុងករណីដែលគេបញ្ជាក់ថា ពិតជាមានតម្រូវការចាំបាច់នូវព័ត៌មានរបស់អតិថិជនណាមួយ ដើម្បីគោលដៅសន្តិសុខជាតិ។
ទោះជាក្រុមហ៊ុនអ៊ិនធ័រណេតបដិសេធ ប៉ុន្តែ របាយការណ៍សម្ងាត់ ដែលបញ្ចេញដោយអតីតបុគ្គលិករបស់ទីភ្នាក់ងារស៊ើបការណ៍សម្ងាត់អាមេរិក បង្ហាញយ៉ាងច្បាស់ថា មន្រ្តីរបស់លោកអូបាម៉ា ពិតជាលួចតាមដានយ៉ាងសម្ងាត់ ទៅលើជីវិតឯកជនរបស់ប្រជាជនអាមេរិកាំង ដែលជាអតិថិជនរបស់ក្រុមហ៊ុនអ៊ីនធ័រណេត។ សេតវិមានមិនបានបដិសេធពីវត្តមានរបស់កម្មវិធីPrism។
ប្រធានក្រុមស៊ើបការណ៍សម្ងាត់អាមេរិក លោកJames Clapper ទទួលស្គាល់ថា ពិតជាមានការចូលយកព័ត៌មានពីខ្សែទូរស័ព្ទរបស់ប្រជាជននៅក្នុងអាមេរិកមែន ប៉ុន្តែ លោកបានបញ្ជាក់យ៉ាងដាច់ណាត់ថា ភ្នាក់ងារស៊ើបការណ៍អាមេរិកគ្រាន់តែចូលយកលេខទូរស័ព្ទ រយៈពេលសន្ទនា និងឈ្មោះអ្នកនិយាយឆ្លើយឆ្លងម្នាក់ទៀត ពោល គឺកម្មវិធីនេះធ្វើឡើងដើម្បីត្រួតពិនិត្យតាមដានលើជនបរទេស នៅក្រៅទឹកដីអាមេរិក ប៉ុន្តែ មិនមែនតាមដានដោយផ្ទាល់ទៅលើពលរដ្ឋអាមេរិកាំង ឬអ្នកដែលរស់នៅលើទឹកដីអាមេរិកទេ។
កាលពីថ្ងៃសុក្រ លោកប្រធានាធិបតីអាមេរិក បារ៉ាក់ អូបាម៉ា បានបញ្ជាក់បន្ថែម ដោយថា គ្មាននរណាម្នាក់លួចស្តាប់ទូរស័ព្ទរបស់ប្រជាជនអាមេរិកាំងទេ ហើយនេះមិនមែនទិសដៅរបស់គោលនយោបាយរបស់លោកដែរ។ ប៉ុន្តែ សួរថា ហេតុអ្វីបានជាលោកអូបាម៉ាទើបចេញមុខមកបកស្រាយនៅពេលនេះទៅវិញ? រឿងអាស្រូវទាក់ទងនឹងរឿងលួចស្តាប់ទូរស័ព្ទរបស់ប្រជាជនអាមេរិកបានបែកខ្ចរខ្ចាយ ជាយូរមកហើយ ដោយចុងក្រោយនេះ គឺអ្នកយកព័ត៌មានរបស់កាសែត The New York times និងទីភ្នាក់ងារព័ត៌មានAP ជាជនរងគ្រោះ។ ប៉ុន្តែ លោកអូបាម៉ាមិនបានចេញមុខបកស្រាយចំៗពីបញ្ហានេះទេ។ មើលទៅ លើកនេះ ទំនងជាឯកសារចុះផ្សាយ របស់កាសែត ដែលជាភស្តុតាងច្បាស់នឹងភ្នែក មិនអាចប្រកែកបាន ដែលជំរុញឲ្យលោកបារ៉ាក់ អូបាម៉ា ចេញមុខមកបកស្រាយនៅពេលនេះ។ ពីមុន គេគ្រាន់តែដឹងថា មានមនុស្សមួយក្រុម ឬអង្គការមួយចំនួនដែលត្រូវភ្នាក់ងារស៊ើបការណ៍សម្ងាត់អាមេរិក តាមដាន លួចស្តាប់យកការណ៍ប៉ុណ្ណោះ ប៉ុន្តែ នៅពេល របាយការណ៍ត្រូវគេចុះផ្សាយថា ប្រជាជនអាមេរិកាំងរាប់លាននាក់ កំពុងស្ថិតនៅក្នុងសំណាញ់ លបស្តាប់ជារៀងរាល់ថ្ងៃរបស់អាជ្ញាធរអាមេរិក កម្មវិធីស៊ើបការណ៍សម្ងាត់របស់អាមេរិក លែងសម្ងាត់ទៀតហើយ។
យោងតាមច្បាប់អាមេរិក ប្រជាជនអាមេរិកាំងត្រូវបានទទួលការពារដោយច្បាប់ ជីវិតឯកជនរបស់ពួកគេមិនអាចត្រូវតាមដានលួចយកការណ៍សម្ងាត់ ដោយគ្មានដីការបស់តុលាការទេ។ នៅពេលនេះ គេទាមទារឲ្យលោកអូបាម៉ាចេញមុខមកពន្យល់ពីសំណុំរឿង ដែលរដ្ឋាភិបាលអាមេរិកបានលាក់ជាយូរមកហើយ។
បើតាមលោកអូបាម៉ាសកម្មភាពលបស្តាប់ខ្សែទូរស័ព្ទរបស់ប្រជាជនអាមេរិកាំងមិនមែនជារឿងសម្ងាត់ទេ ព្រោះសមាជិកសភា និងព្រឹទ្ធសភាបានដឹងរឿងនេះទាំងអស់។ សមាជិកព្រឹទ្ធសភាបានដឹងពីវត្តមាន និងសកម្មភាពរបស់តុលាការពិសេស ដែលបង្កើតឡើងតាំងពីសម័យលោកBush មកម្ល៉េះ។
លោកអូបាម៉ា ដែលអាចប្រឈម នឹងការបាត់បង់ជំនឿទុកចិត្តពីប្រជាជនត្រូវបង្ខំចិត្តចេញមកបកស្រាយជូនមហាជនអាមេរិក ជាពិសេសអ្នកដែលបានបោះឆ្នោតឲ្យរូបលោកអស់ពីរអាណត្តិមកហើយ។ គេនៅចាំបានថា នៅពេលយុទ្ធនាការឃោសនាបោះឆ្នោតកន្លងមក លោកអូបាម៉ា ធ្លាប់បានសន្យាការពារសិទ្ធិជីវិតឯកជនរបស់ប្រជាជនអាមេរិកាំង ហើយ កាលនៅជាសមាជិកព្រឹទ្ធសភា លោកធ្លាប់ចេញមុខប្រឆាំងនយោបាយរបស់រដ្ឋបាលលោកBush ដែលបានបង្កើតភ្នាក់ងារតាមដានស្តាប់ខ្សែទូរស័ព្ទរបស់បុគ្គល។ នៅក្រោយអំពើភេរវកម្ម១១ កញ្ញា ២០០១ លោកBushបានបង្កើតកម្មវិធីស៊ើបការណ៍សម្ងាត់នេះឡើង នៅឆ្នាំ ២០០៦ ដើម្បីប្រយុទ្ធប្រឆាំងនឹងក្រុមភេរវនិយម ដែលចង់វាយប្រហារប្រទេសអាមេរិក។
បើតាមលោកអូបាម៉ា ការដែលលោកបានសម្រេចចិត្តបន្តនយោបាយរបស់លោកBush ក៏ព្រោះតែ នយោបាយនេះពិតជាបានជួយឲ្យអាមេរិកជៀសផុតពីការប៉ុនប៉ងធ្វើភេរវកម្មបានពិតមែន នាពេលកន្លងមក។ ដោយនិយាយការពារខ្លួន លោកអូបាម៉ាបានអះអាងកាលពីថ្ងៃសុក្រមុនថា លោកបានពិចារណាថ្លឹងថ្លែង រវាងសេរីភាពជីវិតឯកជនរបស់ប្រជាជនអាមេរិក និងសន្តិសុខជាតិ។ “អ្នកមិនអាចបាន សន្តិសុខ ១០០ភាគរយ ហើយឲ្យគេគោរពសិទ្ធិឯកជនបាន១០០ភាគរយដែរ ដោយគ្មានចន្លោះខ្វះខាតនោះទេ។ មានពេលខ្លះ គេត្រូវធ្វើការជ្រើសរើស” នេះជាការថ្លែងរបស់លោកអូបាម៉ា។ ការអះអាងរបស់លោកអូបាម៉ាទំនង មិនទាន់អាចបញ្ចុះបញ្ចូលប្រជាជនអាមេរិកាំង បានទេ នៅពេលនេះ ព្រោះថា ក្នុងប្រទេសបិតាប្រជាធិបតេយ្យដូចជាអាមេរិក ជីវិតឯកជនរបស់ប្រជាជនអាមេរិកាំង គឺជារឿងរសើបមួយ ដែលគេមិនអាចប៉ះពាល់បាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ