អ៊ូសបេគីស្ថានភ្ជាប់ខ្លួនមកនឹង”តំបន់ពាណិជ្ជកម្មសេរី” របស់សហគមន៍រដ្ឋឯករាជ្យ
ការនេះ មានចែងក្នុងកិច្ចព្រមព្រៀងចុះល្ងាចមិញនៅទីក្រុង Tachkent ដោយ លោកប្រធានាធិបតីរុស្ស៊ីពូទីននិងសមភាគី អ៊ូសបេគីស្ថានលោកប្រធានាធិបតី ការីម៉ូវ។ អ៊ូសបេគីស្ថានដែលស្ថិតនៅតំបន់អាស៊ីកណ្តាលជាដំណាក់ទី១នៃទស្សនកិច្ចលោកពូទីន ក្នុងអាណត្តិថ្មីបស់គាត់តាមទិសទៅខាងកើតដោយរួមទាំងប្រទេសចិននិងកាហ្សាកស្ថាន។
ចុះផ្សាយនៅថ្ងៃ៖
ស្តាប់ - ០២:៣០
ម្សិលមិញ គ្រាន់តែចូលរួម ក្នុងជំនួបកំពូលរុស្ស៊ី-សហភាពអឺរ៉ុប នៅក្រុង Saint-Petersbourg ចប់រួចរាល់ភ្លាម លោកប្រមុខរដ្ឋរុស្ស៊ីពូទីន បានផ្តើមទស្សនកិច្ចនៅអ៊ូសបេគីស្ថាន ទៅហើយ។ ទោះបីទស្សនកិច្ចនេះ មានរយៈពេលតែប៉ុន្មានម៉ោងក្តីក៏ថ្នាក់ដឹកនាំប្រទេសនេះនៃតំបន់អាស៊ីកណ្តាល បានផ្តល់ឋានៈដលទស្សនកិច្ចលោកពូទីន ថាជា”ទស្សនកិច្ចផ្លូវការ”។
តាមប្រសាសន៍លោកពូទីន អ៊ូសបេគីស្ថានជា”ដៃគូប្រកបដោយអាទិភាពកំរិតខ្ពស់” របស់រុស្ស៊ី។ ជាលទ្ធផលនៃកិច្ចចរចា លោកប្រធានាធិបតីរុស្ស៊ី ពូទីន និងលោកប្រធានាធិបតីអ៊ូសបេគីស្ថាន ការីម៉ូវបានចុះហត្ថលេខាលើអនុស្សរណៈដែលប្រមើលនូវការភ្ជាប់ខ្លួនរបស់ អ៊ូសបេគីស្ថានមកនឹងសន្ធិសញ្ញាស្តីអំពី លំហពាណិជ្ជកម្មសេរី របស់សហគមន៍រដ្ឋឯករាជ្យ ហៅកាត់ថា CEI។
គួរនិយាយថា ពីក្នុងចំណោម ១១ រដ្ឋក្នុងCEI មាន ៨ ប្រទេសទៅហើយចូលក្នុង“តំបន់ពាណិជ្ជកម្មសេរី”នេះ ពោលគឺ Russie Armenie Belarus Kazakhstan , Kirghizistan Moldavie Tadjikistan និង Ukraine។ ការភ្ជាប់ខ្លួនរបស់អ៊ូសបេគីស្ថាន មកក្នុងលំហនេះ មាន ន័យថា ទំនិញប្រទេសនេះ ដែលនាំចូលទីផ្សាររុស្ស៊ី នឹងពុំត្រូវហូតពន្ធឡើយ រួចវានឹងធូរថ្លៃ សម្រាប់អ្នកទិញនៅរុស្ស៊ី។
ប្រមុខរដ្ឋរុស្ស៊ី និង អ៊ូសបេគីស្ថាន ក៏បានចេញ “សេចក្តីថ្លែងការណ៍រួម ឆ្ពោះទៅស៊ីជម្រៅ សហប្រតិបត្តិការជាយុទ្ធសាស្ត្រ” រវាងប្រទេសទាំងពីរ។ គូភាគី សំដែងដូចគ្នា នូវក្តីកង្វល់ចំពោះ ស្ថានការណ៍ក្នុងប្រទេសអាហ្វហ្កានីស្ថានជិតខាង ក្រោយពីកងកម្លាំងអន្តរជាតិ នាំមុខដោយ ស.រ.អា. បញ្ចប់បេសកកម្មខ្លួននៅទីនោះ ក្នុង២ឆ្នាំទៀត។ ខណៈនោះ អាចសកម្មឡើងវិញ គឺពួកភេរវនិយម និង ពួកអ៊ីស្លាមជ្រុលនិយម។ ទាំងចរាចរណ៍ខុសច្បាប់នៃគ្រឿងញៀន ហូរចេញ ពី អាហ្វហ្កានីស្ថាន នឹងរឹតតែពិបាកជំនះ បានដូចចិត្ត។ ចំហាយនៃ អកុសលនេះ មុខជានឹងរង ទទួលមុនគេ គឺដោយ តំបន់អាស៊ីកណ្តាលតែម្តង។
ម៉្លោះហើយ បានជាសេចក្តីថ្លែងការណ៍រួម សង្កត់ធ្ងន់ទៅលើ បញ្ហាធានាសន្តិសុខសម្រាប់តំបន់។
ជាការកត់សម្គាល់ អ៊ូសបេគីស្ថានផ្ទាល់ ជាប្រទេសកាន់សាសនាអ៊ីស្លាម និកាយ Sunnit ដែលមានវិន័យ តឹងជាងនិកាយ Chiit។ នៅរុស្ស៊ី មានជាតិអ៊ូសបេក រស់នៅប្រមាណ ៣សែននាក់ ពីក្នុងនោះពាក់កណ្តាល គឺក្នុងរដ្ឋធានីម៉ូស្គូផ្ទាល់។
ហើយជាតិរុស្ស៊ីវិញដែលរស់នៅ អ៊ូសបេគីស្ថាន គឺមានចំនួន ប្រមាណ៦សែននាក់ ពីក្នុងនោះ ៤សែន៣ម៉ឺននាក់ រស់នៅក្នុង រដ្ឋធានី Tachkent៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ