OMS ចោទ តង់សានី ថាលាក់បាំងព័ត៌មានពីការរីករាយដាលមេរោគអេបូឡា
អង្គការសុខភាពពិភពលោក OMS បានចោទប្រកាន់ប្រទេសតង់សានី ថាបានលាក់បាំងព័ត៌មាន ស្តីពីករណីឆ្លងមេរោគអេបូឡា។ នេះបើតាមសេចក្តីប្រកាសព័ត៌មាន ចុះផ្សាយពីថ្ងៃសៅរ៍ ទី២១កញ្ញា។ ចំពោះអង្គការសុខភាពពិភពលោក, ការលាក់បាំងព័ត៌មានពីករណីជំងឺឆ្លងអេបូឡា គឺបង្កផលលំបាកក្នុងការរកវិធានការបង្ការនិងទប់ស្កាត់ការរីករាយដាលនៃដ៏កាចសាហាវមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
នៅទ្វីបអាហ្វ្រិកកាល អង្គការសុខភាពពិភពលោក បានរកឃើញមេរោគអេបូឡាមួយករណី នៅតង់សានី តាមរយៈការធ្វើតេស្តរោគវិនិច្ឆ័យទៅលើអ្នកជំងឺម្នាក់ នៅគ្លីនិកឯកជនមួយកន្លែង នៃក្រុងកំពង់ផែ Der es Salaam។ អង្គការសុខភាពពិភាព មានក្តីសង្ស័យពីការផ្ទុះរីករាលដាលនៃជំងឺនេះ និងបានបញ្ចូនដំណឹងទៅរដ្ឋាភិបាលតង់សានី ជាបន្ទាន់ ក៏ប៉ុន្តែអាជ្ញាធរតង់សានី ស្រាប់តែបដិសេធ ដោយថាគ្មានករណីជំងឺអេបូឡានៅក្នុងប្រទេសរបស់ខ្លួននោះទេ។
ចម្លើយនេះ ធ្វើឱ្យមន្ត្រីរបស់អង្គការសុខភាពពិភពលោក ខកចិត្ត និងយល់ថា ការបំបិទការពិតដូច្នេះ គឺបង្កជាទុក្ខលំបាកសម្រាប់ប្រជាជនអ្នករងគ្រោះ និងអ្នកឆ្លងជំងឺ។ ដ្បិតថា មេរោគនេះ អាចរីករាយដាលដល់មនុស្សផ្សេងដទៃទៀត។ ក្នុងសេចក្តីប្រកាសព័ត៌មានរបស់អង្គការសុខភាពពិភពលោក បញ្ជាក់បន្ថែមថា កង្វះកិច្ចសហការនិងការមិនព្រមផ្តល់ព័ត៌មានលម្អិតពីករណីមានជំងឺអេបូឡានៅក្នុងស្រុកតង់សានីនេះ គឺធ្វើឱ្យអ្នកជំនាញលំបាកវាយតម្លៃពីហានិភ័យនៃជំងឺ។ ចំណែកអ្នកដែលឆ្លងរោគរួចហើយ គឺពុំបានដឹងខ្លួននិងបានធ្វើដំណើរពេញប្រទេស នេះជាហេតុឱ្យរឹតតែលំបាកក្នុងការសន្និដ្ឋានពីគ្រោះថ្នាក់ ដែលអាចនឹងកើតឡើង។
គួរជ្រាបថា តង់សានី ជាប្រទេសមួយក្នុងទ្វីបអាហ្វ្រិកខាងកើត ដែលនៅជាប់ព្រំដែននឹងប្រទេសកុងហ្គោ។ កុងហ្គោ បានឆ្លងជំងឺអេបូឡា និងរីករាលដាល សម្លាប់មនុស្សអស់ជាង ២ពាន់១រយនាក់ ក្នុងរយៈពេលតែជាងមួយឆ្នាំ។ នៅប្រទេសអូហ្គាន់ដា បានធ្វើតេស្តវិនិច្ឆ័យរោគ និងរកឃើញមានបួនករណីលើពលរដ្ឋ ហើយអ្នកជំងឺទាំងបួននេះ បានស្លាប់បាត់ទៅហើយ។ នៅប្រទេសហ្គីណេ, ស៊ីរ៉ាឡេអូន និងលីប៉េរីយ៉ា មានមនុស្សស្លាប់ជាង១ពាន់១រយនាក់ ដោយជំងឺអេបូឡា ក្នុងចន្លោះ ឆ្នាំ២០១៤ ដល់២០១៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ