លោកស្រីអ៊ុងសាន ស៊ូជីប្រាប់អាមេរិកកុំឲ្យទុកចិត្តលើការសន្យាធ្វើកំណែទម្រង់របស់រដ្ឋាភិបាលភូមា
លោកប្រធានាធិបតីអាមេរិក បារ៉ាក់ អូបាម៉ា នឹងត្រូវធ្វើដំណើរទៅចូលរួមក្នុងកិច្ចប្រជុំអាស៊ាន ដែលត្រូវធ្វើពីថ្ងៃទី ១២ និង ១៣ វិច្ឆិកា នៅក្នុងប្រទេសភូមា។ កាលពីថ្ងៃពុធទី ៥ វិច្ឆិកា គឺ នៅមួយសប្តាហ៍មុនជំនួបជាមួយលោកអូបាម៉ា លោកស្រីអ៊ុងសាន ស៊ូជី មេដឹកនាំបក្សប្រឆាំងភូមាបានអំពាវនាវកុំឲ្យអាមេរិកឆាប់មានសុទិដ្ឋិនិយមទៅលើការសន្យាធ្វើកំណែទម្រង់របស់រដ្ឋាភិបាលស៊ីវិល។
ចុះផ្សាយនៅថ្ងៃ៖
ស្តាប់ - ០១:៥៨
កំណែទម្រង់របស់រដ្ឋាភិបាលភូមាជាប់កកស្ទះ មិនដំណើរការទៅមុខ តាំង ពី ឆ្នាំ ២០១៣មក។ លោកស្រីប្រមុខបក្សប្រឆាំងភូមាធ្វើកំណត់សំគាល់យ៉ាងដូច្នេះ នៅក្នុងសន្និសីទកាសែតមួយ កាលពីថ្ងៃពុធម្សិលមិញ។ លោកស្រីថែមទាំងបានព្រមានកុំឲ្យសហរដ្ឋអាមេរិកឆាប់មានសុទិដ្ឋិនិយម ជឿទុកចិត្តទៅលើនយោបាយធ្វើកំណែទម្រង់ សន្យាដោយរដ្ឋាភិបាលភូមា។ កំណត់សំគាល់របស់លោកស្រីអ៊ុងសាន ស៊ូជី ធ្វើឡើងនៅមួយសប្តាហ៍ មុនដំណើរទស្សនកិច្ចរបស់លោកប្រធានាធិបតីអាមេរិក បារ៉ាក់ អូបាម៉ានៅភូមា និងនៅមួយសប្តាហ៍ក្រោយកិច្ចសន្ទនាតាមទូរស័ព្ទរវាងលោកអូបាម៉ា និងលោកប្រធានាធិបតីថេន សេន។
កាលពីសប្តាហ៍មុន លោកប្រធានាធិបតីអាមេរិក បានទូរស័ព្ទ ទៅសរសើរលោកប្រធានាធិបតីភូមាដែលបានបង្កើតជំនួបកំពូលជាមួយមេដឹកនាំបក្សប្រឆាំង។ តាមសេតវិមាន ប្រធានាធិបតីភូមាបានសន្យាទៅប្រធានាធិបតីថា នឹងរៀបចំការបោះឆ្នោតដែលគួរឲ្យជឿទុកចិត្តមួយ។
កាលពីសប្តាហ៍មុន រដ្ឋាភិបាលភូមាបានបង្ហាញការផ្លាស់ប្តូរដ៏គួរឲ្យកត់សំគាល់មួយ ដោយបានអញ្ជើញលោកស្រីអ៊ុងសាន ស៊ូជី ឲ្យចូលរួម ក្នុងជំនួបកំពូល ដែលមានការចូលរួមពីថ្នាក់ដឹកនាំសភា និងកងទ័ព។ នៅក្រោយកិច្ចប្រជុំអ្នកនាំពាក្យរបស់ប្រធានាធិបតីបានលើកឡើងពីលទ្ធភាពធ្វើកំណែទម្រង់រដ្ឋធម្មនុញ្ញ ដែលធ្វើឲ្យគេគិតថា នឹងអាចបើកផ្លូវឲ្យលោកស្រីអ៊ុងសាន ស៊ូជី អាចឈរឈ្មោះជាបេក្ខជនប្រធានាធិបតីនៅក្នុងការបោះឆ្នោតឆ្នាំក្រោយ។ ប៉ុន្តែ កាលពីថ្ងៃពុធម្សិលមិញ ប្រមុខដឹកនាំបក្សប្រឆាំងភូមា ទាត់ចោលរាល់ការរំពឹងទុក ដោយលោកស្រីបានអះអាងថា ជំនួបកាលពីសប្តាហ៍មុនបានបញ្ចប់ជាមួយលទ្ធផលតិចតួច មិនឆ្លើយតបនឹងការទន្ទឹងរង់ចាំរបស់បក្សប្រឆាំងនោះទេ។
អន្តរាគមន៍របស់មេបក្សប្រឆាំង កាលពីថ្ងៃពុធ ធ្វើឡើងផងដែរ នៅមួយសប្តាហ៍មុនដំណើរការពិភាក្សាស្តីពីការធ្វើវិសោធនកម្មរដ្ឋធម្មនុញ្ញ នៅរដ្ឋសភា ដែលធ្វើឡើង នៅជួនចំពេលដែលប្រធានាធិបតីអាមេរិកត្រូវធ្វើទស្សនកិច្ចនៅភូមា។ រដ្ឋាភិបាលស៊ីវិលភូមាដែលបានសន្យាធ្វើកំណែទម្រង់ដើម្បីបានការដកទណ្ឌកម្មសេដ្ឋកិច្ចពីអាមេរិក។
របបសឹកភូមាត្រូវបានរំលាយ និងបង្កើតរដ្ឋាភិបាលស៊ីវិល ចេញពីការបោះឆ្នោត ដើម្បីជាថ្នូរនឹងការដកទណ្ឌកម្មសេដ្ឋកិច្ចពីសហគមន៍អន្តរជាតិ។ មេដឹកនាំបក្សប្រឆាំងភូមាសង្ឃឹមប្រើគំនាបពីសហគមន៍អន្តរជាតិទៅលើរដ្ឋាភិបាលស៊ីវិលភូមា ដើម្បីជំរុញលទ្ធិប្រជាធិបតេយ្យនៅ ភូមា។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ