តើរដ្ឋាភិបាលភូមាមានចេតនាពិតប្រាកដដើម្បីធ្វើវិសោធនកម្មរដ្ឋធម្មនុញ្ញដែរឬទេ?
រដ្ឋាភិបាលភូមាបានបង្កើតភាពភ្ញាក់ផ្អើលមួយ ដោយលោកស្រីអ៊ុងសាន ស៊ូជីបានទទួលការអញ្ជើញពីលោកប្រធានាធិបតីភូមា ថេន សេន ឲ្យចូលរួមកិច្ចប្រជុំកំពូលមួយ នៅថ្ងៃសុក្រទី ៣១តុលា ដែលរៀបចំឡើង នៅទីក្រុងណៃពីដោ។ នៅក្រោយជំនួបកំពូលដែលមានរយៈពេលតែកន្លះថ្ងៃ អ្នកនាំពាក្យរដ្ឋាភិបាលបាននិយាយប្រាប់អ្នកសារព័ត៌មានជាតិ និងអន្តរជាតិថា សភានឹងពិភាក្សាទៅលើការធ្វើវិសោធនកម្មរដ្ឋធម្មនុញ្ញ។ បក្សប្រឆាំងទាមទារឲ្យធ្វើវិសោធនកម្ម ព្រោះមាត្រាមួយចំនួនក្នុងរដ្ឋធម្មនុញ្ញ ជាឧបសគ្គរារាំង មិនឲ្យលោកស្រីអ៊ុងសាន ស៊ូជី អាចក្លាយជាប្រមុខដឹកនាំភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ជាព្រឹត្តិការណ៍ដែលគេមិនធ្លាប់ឃើញមាន តាំងពីរបបសឹកភូមាបានរំលាយខ្លួន និងបង្កើតរដ្ឋាភិបាលស៊ីវិល តាមរយៈការបោះឆ្នោត។ នៅថ្ងៃសុក្រនេះ លោកស្រី អ៊ុងសាន ស៊ូជី ប្រមុខដឹកនាំបក្សប្រឆាំង ជាមួយលោកប្រធានាធិបតីកំណែទម្រង់ លោកថេន សេន បានធ្វើដំណើររួមគ្នា ចូលក្នុងបន្ទប់ប្រជុំ។ ជំនួបកំពូល នៅថ្ងៃនេះ ដែលមានការចូលរួមពី មេដឹកនាំសភា កងទ័ព មានគោលដៅបើកផ្លូវឲ្យមានការចរចារវាងថ្នាក់ដឹកនាំរដ្ឋាភិបាល និងមេដឹកនាំបក្សប្រឆាំង ជាពិសេស គឺជុំវិញច្បាប់រដ្ឋធម្មនុញ្ញដ៏ចម្រូងចម្រាសរបស់ភូមា។
ការអញ្ជើញជាប្រវត្តិសាស្រ្តរដ្ឋាភិបាល ឲ្យមេដឹកនាំបក្សប្រឆាំងចូលជួបចរចា ធ្វើឡើង បន្ទាប់ពីការបោះឆ្នោតសភា នឹងកាន់តែខិតចូលមកដល់។ កាលពីប៉ុន្មានថ្ងៃមុននេះ គណៈកម្មការជាតិរៀបចំការបោះឆ្នោតភូមាបានប្រកាសថា ការបោះឆ្នោតសភា នឹងត្រូវធ្វើនៅអំឡុងចុងខែតុលា ឆ្នាំក្រោយ ឆ្នាំ ២០១៥។
តាមអ្នកនាំពាក្យរបស់វិមានប្រធានាធិបតី នៅក្នុងជំនួបកំពូល គូភាគីចរចាបានយល់ព្រមព្រៀងគ្នា ឲ្យមានការជជែកពីការធ្វើវិសោធនកម្ម រដ្ឋធម្មនុញ្ញ នៅរដ្ឋសភា។ គេនឹងពិភាក្សាផងដែរទៅលើការផ្លាស់ប្តូរនៅក្នុងមាត្រាមួយចំនួន របស់រដ្ឋធម្មនុញ្ញ ដែលរហូតមកដល់ពេលនេះជាឆ្អឹងទទឹងក រារាំងមិនឲ្យប្រមុខដឹកនាំបក្សប្រឆាំងអាចឈរឈ្មោះជាបេក្ខជនប្រធានាធិបតី។
ច្បាប់រដ្ឋធម្មនុញ្ញ ដែលត្រូវបានតាក់តែងឡើង តាំងពីសម័យភូមាដឹកនាំដោយរបបសឹក និងអនុម័តដោយប្រជាមតិនៅឆ្នាំ ២០០៨ បានចែងហាមឃាត់មិនឱ្យជនណា ដែលរៀបការ ឬមានកូនសញ្ជាតិបរទេស ចូលកាន់តំណែងកំពូលរបស់ប្រទេស។ បើគ្មានវិសោធនកម្មរដ្ឋធម្មនុញ្ញ លោកស្រីអ៊ុងសាន ស៊ូជី ដែលមានមហិច្ឆតាចង់ដឹកនាំប្រទេស មិនអាចឈរឈ្មោះជាបេក្ខជនប្រធានាធិបតីភូមា នៅក្នុងការបោះឆ្នោត ឆ្នាំ២០១៥ខាងមុខបានទេ ព្រោះថា លោកស្រីមានស្វាមីជាជនជាតិអង់គ្លេស (ស្លាប់) និងមានកូនពីរនាក់ កាន់លិខិតឆ្លងដែនអង់គ្លេស។
សូមបញ្ជាក់ថា នេះមិនមែនជាលើកទីមួយទេ ដែលប្រធានាធិបតីភូមាបានសន្យាគំាំទ្រឲ្យមានវិសោធនកម្មរដ្ឋធម្មនុញ្ញ។ អស់រាប់ខែមកហើយ ដែលគណៈកម្មការសភា បានសិក្សាទៅលើលទ្ធភាពធ្វើកំណែទម្រង់រដ្ឋធម្មនុញ្ញ ប៉ុន្តែ គ្មានឃើញចេញលទ្ធផលអ្វីសោះ។
ជំនួបចរចារវាងថ្នាក់ដឹកនាំរដ្ឋាភិបាលភូមាជាមួយមេដឹកនាំ បក្សប្រឆាំង នៅថ្ងៃសុក្រនេះ ស្ថិតនៅក្រោមក្រសែភ្នែក តាមដានយ៉ាងយកចិត្តទុកដាក់របស់សហរដ្ឋអាមេរិក។ លោកអូបាម៉ាដែលត្រូវធ្វើដំណើរទៅចូលរួមក្នុងកិច្ចប្រជុំកំពូលអាស៊ាន នៅ ភូមា នាខែវិច្ឆិកាខាងមុខ បានបញ្ជាក់រួចហើយ ទៅលោកថេន សេន ពី សារៈសំខាន់នៃដំណើរការបោះឆ្នោត ដែលបើកទូលាយ និងគួរឲ្យជឿជាក់។ តាមលោកបារ៉ាក់ អូបាម៉ា ដែលបាននិយាយទូរស័ព្ទ ទៅលោកប្រធានាធិបតីភូមា នៅមុនជំនួបកំពូលថ្ងៃសុក្រនេះ លោកថេន សេនបានសន្យាឲ្យមានការបោះឆ្នោតដោយសេរីនៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ