តុលាការយុត្តិធម៌អន្តរជាតិ បញ្ជាឱ្យ ប៉ាគីស្ថាន ជំនុំជម្រះក្តីឡើងវិញចំពោះទោសប្រហារជីវិតលើបុរសឥណ្ឌាម្នាក់
ថ្ងៃពុធ ទី១៧កក្កដា, ពីក្រុងឡាអេ, តុលាការយុត្តិធម៌អន្តរជាតិ បានចេញបញ្ជាឱ្យភាគីប៉ាគីស្ថាន កាត់ក្តីសាជាថ្មី ចំពោះការសម្រេចកាត់ទោសប្រហារជីវិត ទៅលើជនជាតិឥណ្ឌាម្នាក់ ។ សូមរម្លឹកជូនថា កាលពីខែមេសា ឆ្នាំ២០១៧ តុលាការសឹករបស់ប៉ាគីស្ថាន ដោយផ្អែកលើបទល្មើសចារកិច្ច បានសម្រេចកាត់ទោសប្រហារជីវិតទៅ លើបុរសឥណ្ឌាម្នាក់។ ក៏ប៉ុន្តែ ភាគីឥណ្ឌា ពុំសុខចិត្ត ហើយបានរៀបចំពាក្យប្តឹងច្រានចោលសេចក្តីសម្រេចនេះ ទៅកាន់តុលាការយុត្តិធម៌អន្តរជាតិ។
ចុះផ្សាយនៅថ្ងៃ៖
បុរសឥណ្ឌាដែលត្រូវតុលាការសឹករបស់ប៉ាគីស្ថាន កាត់ទោសប្រហារជីវិតនោះ មានឈ្មោះថា ហ្សាតហាវ (Kulbhushan Sudhir Jadhav)។ លោកគឺបុត្ររបស់មន្ត្រីប៉ូលីសឥណ្ឌា ហើយក្នុងវ័យ៤៨ឆ្នាំ លោកមានកូនពីរនាក់ក្នុងបន្ទុក។ កាសែតបារាំងមួយចំនួន រាយការណ៍ថា លោក ហ្សាតហាវ បានចូល បណ្ឌិត្យសភានគរបាលជាតិឥណ្ឌា នៅចុងទសវត្សរ៍១៩៨០ ហើយនៅដើមឆ្នាំ១៩៩១ លោកក៏បានត្រូវ កងទ័ពជើងទឹកឥណ្ឌា ជ្រើសរើសឱ្យចូលបម្រើការងារ ជាវិស្វករ។ ក្រោយមកទៀត លោកក៏ស្រាប់តែទៅបង្កើតក្រុមហ៊ុនមួយ រកស៊ីនៅប្រទេសអ៊ីរ៉ង។
ខណៈពេលចំណងទូតរវាងឥណ្ឌានិងប៉ាគីស្ថានមិនសូវមាំល្អ គឺខែមេសាឆ្នាំ២០១៦ អាជ្ញាធរប៉ាគីស្ថាន បានចាប់ឃាត់ខ្លួនលោក ហ្សាតហាវ នៅភាគនីរតីនៃផ្ទៃប្រទេស ហើយបានចោទប្រកាន់រូបលោកថាបានធ្វើការជាចារបុរសឥណ្ឌា និងលួចស៊ើបការសម្ងាត់ពីប៉ាគីស្ថានទៅឱ្យឥណ្ឌា ហើយក៏ត្រូវតុលារការសឹកប៉ាគីស្ថានកាត់ទោសប្រហារជីវិត នៅខែមេសា ឆ្នាំ២០១៧។ ប៉ុន្តែឥណ្ឌាមិនសុខចិត្ត ក៏ប្តឹង។ ហើយនៅទីបំផុត សាលាជម្រះក្តីយុត្តិធម៌អន្តរជាតិ បញ្ជាឱ្យប៉ាគីស្ថានពិនិត្យឡើងវិញចំពោះសេចក្តីសម្រេចរបស់តុលាការសឹក ហើយប្រធានចៅក្រមអន្តជាតិ ក៏បានសម្រេចឱ្យភាគីប៉ាគីស្ថាន ពន្យារពេល ឬព្យួរចោលតែម្តងនូវការសម្រេចកាត់ទោសប្រហារជីវិតនោះ។
ក្រៅពីនេះ តុលាការអន្តរជាតិ ក៏យល់ឃើញថា ប៉ាគីស្ថាន រំលោភលើសន្ធិសញ្ញាក្រុងវីយ៉ែន ស្តីពីទំនាក់ទំនងការទូត ហើយចៅក្រមស្នើឱ្យប៉ាគីស្ថានចាប់ផ្តើមចរចាជាមួយឥណ្ឌាឡើងវិញ។ ឥណ្ឌា បានសារទចំពោះការសម្រេចដូច្នេះ ហើយឥណ្ឌាយល់ថា ពលរដ្ឋរបស់ខ្លួន គួរតែត្រូវបានការទទួលការពារដោយស្ថានទូតឥណ្ឌា និងទទួលបានសិទ្ធិមានមេធាវីការពារក្តីជាដើម។
គួរកត់សម្គាល់ផងថា ការសម្រេចរបស់តុលាការយុត្តិធម៌អន្តរជាតិ ខាងលើនេះ គឺគ្មានផ្តល់សិទ្ធឱ្យប្តឹងឧទ្ធរណ៍នោះទេ។ ពោលគឺជាសេចក្តីសម្រេចបិទផ្លូវតវ៉ា។ បើទោះបីជាសេចក្តីសម្រេចនេះ មានលក្ខខណ្ឌចាប់បង្ខំឱ្យអនុវត្ត ក៏ពិតមែន ក៏ប៉ុន្តែតុលាការគ្មានមធ្យោបាយបង្ខំឱ្យភាគីនីមួយៗអនុវត្តនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ