សភាបារាំងបោះឆ្នោតស្តីពីការបន្តអន្តរាគមន៍យោធាខ្លួន នៅអាហ្វ្រិកកណ្តាល
នៅថ្ងៃអង្គារនេះ សភាបារាំងបើកអង្គប្រជុំដើម្បីពិភាក្សា និងបោះឆ្នោតសម្រេចថា តើត្រូវបន្តវត្តមានខ្លួន នៅសាធារណរដ្ឋអាហ្វ្រិកកណ្តាលទៀត រឺយ៉ាងណា។ នាយករដ្ឋមន្ត្រី ហ្សង់ម៉ាក អៃរ៉ូល Jean-Marc Ayrault នឹងឡើងការពារវត្តមានយោធាបារាំង នៅអាហ្វ្រិក កណ្តាល។ ពេលនេះបារាំងកំពុងចោទសួរខ្លួនឯង ពីការផុងខ្លួនក្នុងការធ្វើអន្តរាគមន៍យោធា ឈ្មោះថា Sangari សង់ហ្ការី នៅអាហ្វ្រិកកណ្តាល។ នៅទីនោះ កងទ័ពប្រទេសលោក ខាងលិច ដែលចុះជួយជ្រោមជ្រែងទ័ពបារាំង មិនសូវមានចំនួនច្រើននោះទេ។
ចុះផ្សាយនៅថ្ងៃ៖
ស្តាប់ - ០១:៤៨
នៅរសៀលថ្ងៃអង្គារនេះ តំណាងរាស្ត្របារាំងប្រហែលជាអាចបោះឆ្នោតគាំទ្រអោយកងទ័ពបារាំង បន្តអន្តរាគមន៍យោធា ឈ្មោះថា សង់ហ្ការី នៅអាហ្វ្រិកកណ្តាលទៀត ទោះជាមានការរិះគន់ពីបក្សប្រឆាំងក៏ដោយចុះ។ លោក អេរិក វើត មកពីបក្សប្រឆាំងស្តាំនិយម UPM របស់អតីតប្រធានាធិបតី សាកូហ្ស៊ី បានបរិហារថា បញ្ហាអាហ្វ្រិកកណ្តាលនៅមិនទាន់បានដោះស្រាយនៅឡើយទេ ការបង្ហូរឈាមនៅតែកើតមាននៅទីនោះ។
គួររំលឹកថា កងទ័ពបារាំង១៦០០នាក់បានចុះទៅអន្តរាគមន៍នៅសាធារណរដ្ឋអាហ្វ្រិកកណ្តាល កាលពីខែធ្នូ ឆ្នាំ២០១៣។ ដោយឃើញថា អន្តរាគមន៍យោធាបារាំងប្រយុទ្ធក្រុមឧទ្ទាម នៅម៉ាលី ទទួលបានជោគជ័យ ប្រធានាធិបតីបារាំងបានរំពឹងទុកថា អន្តរាគមន៍បារាំងសង្គ្រោះអាហ្វ្រិកកណ្តាលលើកនេះ នឹងសម្រេចលទ្ធផលឆាប់រហ័ស។ ប៉ុន្តែ ដំណើរការបេសកកម្មទ័ពបារាំង មិនបានប្រព្រឹត្តទៅដូចការគ្រោងទុកនោះទេ។ ការដាក់អាវុធចុះនៅមានព្រំដែនកំណត់ អំពើហិង្សានៅតែបន្តមាន។ អំពើហិង្សារវាងក្រុមអ្នកកាន់គ្រិស្តសាសនា និងក្រុមអ្នកកាន់សាសនាអ៊ីស្លាម បានធ្វើអោយអ្នកកាន់សាសនាអ៊ីស្លាមរាប់ម៉ឺននាក់ភៀសខ្លួនទៅភាគខាងជើង។ បារាំងញញើតនឹងបន្ថែមទ័ពខ្លួនទៅអាហ្វ្រិកកណ្តាល រហូតដល់មានសំណូមពរពីអង្គការសហប្រជាជាតិ ទើបបារាំងសម្រេចបញ្ជូនទ័ព៤០០នាក់បន្ថែម នាពេលថ្មីៗនេះ ទៅទីនោះ។ សហភាពអឺរ៉ុបធ្លាប់សន្យាដាក់កម្លាំងទ័ពប្រមាណមួយពាន់នាក់ នៅអាហ្វ្រិកកណ្តាល តែរហូតមកដល់ពេលនេះ នៅតែមិនទាន់មានកងទ័ពចុះទៅទីនោះទេ។
ប្រធានាធិបតីអន្តរកាលអាហ្វ្រិកកណ្តាល លោកស្រី សាំបា ប៉ាន់ហ្សា ចង់អោយបារាំងបន្តវត្តមានខ្លួន រហូតដល់អាហ្វ្រិកកណ្តាលសម្រេចបានការបោះឆ្នោត នៅដើមឆ្នាំ២០១៥។ ពេលនេះ ក្នុងពេលកំពុងរង់ចាំកងទ័ពមួកខៀវអង្គការសហប្រជាជាតិ ចុះមកបន្តបេសកកម្មពីបារាំង កងទ័ពបារាំងចង់បន្តពង្រឹងសន្តិសុខ នៅអាហ្វ្រិកកណ្តាលទៀត។
បក្សប្រឆាំងនានា ចោទរដ្ឋាភិបាលបារាំងថា មានមោទនភាពជ្រុលហួស និងមិនបានធ្វើសកម្មភាពដិតដល់ដើម្បីជម្រុញបណ្តាប្រទេសសហភាពអឺរ៉ុបអោយបញ្ជូនទ័ពទៅជួយបារាំងនៅអាហ្វ្រិកកណ្តាល។ ពេលនេះ បារាំងកំពុងតែទទួលបន្ទុកផ្នែកថវិកាក្នុងការអន្តរាគមន៍ពង្រឹងសន្តិសុខនៅទីនោះ តែម្នាក់ឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ