ក្រុមប្រឹក្សាសន្តិសុខអង្គការសហប្រជាជាតិអនុម័តឱ្យទ័ពអឺរ៉ុបទៅអាហ្វ្រិកកណ្តាល
ក្រុមប្រឹក្សាសន្តិសុខអង្គការសហប្រជាជាតិបានអនុម័ត ជាឯកច្ឆន្ទ នៅល្ងាចថ្ងៃអង្គារម្សិលមិញ លើសេចក្តីសម្រេចអនុញ្ញាតឱ្យដាក់ពង្រាយទាហានសហភាពអឺរ៉ុប នៅសាធារណរដ្ឋអាហ្វ្រិកកណ្តាល ។ អាហ្វ្រិកកណ្តាលដែលបាននិងកំពុងស្គាល់ភាពហិង្សាស្ទើរក្លាយជាការប្រល័យពូជសាសន៍ទៅហើយ។
ចុះផ្សាយនៅថ្ងៃ៖
នៅក្នុងសេចក្តីសម្រេចចិត្តលេខ ២៣១៤ ក្រុមប្រឹក្សាសន្តិសុខអង្គការសហប្រជាជាតិ មិនបានបញ្ជាក់អំពីសញ្ជាតិរបស់ទាហានអឺរ៉ុប ឬ កាលបរិច្ឆេទច្បាស់លាល់ ដែលក្រុមទាហានទាំងនោះត្រូវទៅដល់ទឹកដីអាហ្វ្រិកកណ្តាលទេ។ ប៉ុន្តែ ក្រុមប្រឹក្សាសន្តិសុខបានកំណត់បេសកកម្មអឺរ៉ុប សម្រាប់រយៈពេលត្រឹម៦ខែ និងផ្តល់អំណាចដល់ទាហានទាំងអស់នោះ ប្រើកម្លាំងទ័ពក្នុងករណីចាំបាច់។ បើតាមឯកអគ្គរដ្ឋទូតបារាំងប្រចាំអង្គការសហប្រជាជាតិ ទាហានសហភាពអឺរ៉ុប នឹងត្រូវមានភារកិច្ចរក្សាសុវត្ថិភាពឱ្យក្រុមជនភៀសខ្លួននៅអាកាសយានដ្ឋានក្រុងបង់ហ្គី ហើយទាហានបារាំងនឹងត្រូវពង្រាយក្នុងទ្រង់ទ្រាយធំការពាររដ្ឋធានី និងតំបន់ជុំវិញ។
ទាហានអឺរ៉ុបប្រមាណ៥០០នាក់ (បើតាមតួលេខផ្តល់ដោយសហភាពអឺរ៉ុប កាលពីសប្តាហ៍មុន) នឹងចុះទៅជួយពង្រឹងកម្លាំងទ័ពបារាំង ទាំង១៦០០នាក់ ដែលឈរជើងស្រាប់នៅក្រុងបង់ហ្គី និងទាហានអាហ្វ្រិក Misca (ទាហានអាហ្វ្រិកក្នុងបេសកកម្មអន្តរជាតិនៅអាហ្វ្រិកកណ្តាល)ចំនួន៥ពាន់នាក់ ដែលមិនអាចគ្រប់គ្រង់ស្ថានការណ៍ឱ្យវិលត្រលប់មករកភាពស្ងប់ស្ងាត់បាន។ ទាហានអាហ្វ្រិក ដែលប្រធានាធិបតីអាហ្វ្រិកកណ្តាលស្តីទីថ្មី និងភាគីបារាំងបានស្នើសុំឱ្យក្លាយទៅជាបេសកកម្មក្នុងក្របខ័ណ្ឌអង្គការសហប្រជាជាតិ។
ក្នុងពេលបច្ចុប្បន្ននេះ មានទាហានសរុបប្រមាណ៦ពាន់នាក់កំពុងបំពេញបេសកកម្មនៅអាហ្វ្រិកកណ្តាល ប៉ុន្តែចំនួននេះតិចតួចខ្លាំងសម្រាប់ស្ថានការណ៍ដុនដាប ក្នុងប្រទេសដ៏ធំទូលាយដូច្នេះ។ ប្រតិបត្តិការយោធានៅអាហ្វ្រិកកណ្តាលកាន់តែស្មុគស្មាញនិងលំបាកខ្លាំង ដោយហេតុតែសហគមន៍អ៊ីស្លាមសេឡេកា និង ក្រុមអង់ទីបាឡាកា អ្នកគ្រិស្តសាសនា ស្អប់ខ្ពើមគ្នា ចាត់ទុកគ្នាជាសត្រូវស៊ីសាច់ហុតឈាម ដែលទាមទារជាចាំបាច់ឱ្យមានការគាំទ្រពីអង្គការសហប្រជាជាតិ និងសហភាពអាហ្វ្រិក ដើម្បីធានាសន្តិភាព។
សេចក្តីសម្រេចចិត្តរបស់ក្រុមប្រឹក្សាសន្តិសុខ ក៏បានអនុម័តផងដែរ ឱ្យអាហ្វ្រិកកណ្តាល ការរៀបចំបោះឆ្នោត យ៉ាងយូរនៅខែកុម្ភៈ២០១៥។ ការិយាល័យអង្គការសហប្រជាជាតិ នឹងត្រូវរក្សាទុក ក្នុងប្រទេសរហូតដល់ឆ្នាំក្រោយ ដើម្បីជួយអាជ្ញាធរអាហ្វ្រិកកណ្តាលឆ្លងកាត់អន្តរកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ