គ្រោះថ្នាក់ធ្លាក់យន្តហោះនៅរុស្ស៊ីសម្លាប់មនុស្ស ៤៤នាក់ និងរបួស៨នាក់
សោកនាដកម្មនេះ បានកើតឡើងនៅពាក់កណ្តាលអធ្រាត្រយប់ថ្ងៃចន្ទ ទី ២០ មិថុនា ឆ្នាំ ២០១១ ពេលដែល យន្តហោះរុស្ស៊ីធុន Tupolev-134 ដឹកមនុស្ស ៥២នាក់ ហោះចេញពីម៉ូស្គូទៅ សំដៅ ទៅក្រុង Petrozavodsk ទីរួមខេត្ត Karelia នៅចម្ងាយប្រមាណ៨០០គ.ម.ខាងជើង រដ្ឋធានីរុស្ស៊ី។លុះនៅ សល់តែ៧០០ម៉ែត្រ គឺដល់ព្រលានយន្តហោះក្រុងនោះ តួខ្លួនវា ស្រាប់តែ អុកយ៉ាងគំហុកចំលើផ្លូវរថយន្តនៅក្បែរនោះ បណ្តាលឲ្យតួខ្លួនយន្តហោះដាច់ដោច បែកជាបំណែកៗ ទាំងឆេះទ្រលោមតែម្តង។ ក្នុងចំណោមអ្នកស្លាប់ មានទាំងជាតិបរទេស ៤នាក់ផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ធាតុអាកាសចុះអ័ព្ទខ្លាំងពិបាកមើលឃើញ ឬមួយកំហុស អ្នកបើកយន្តហោះ ឬមួយខ្សែផ្លូវចុះចត នៃព្រលានយន្តហោះ ស្រាប់តែងងឹត ឥតបំភ្លឺដោយចង្កៀង ឬមួយ ម៉ាស៊ីនយន្តហោះផ្ទាល់ ដើរមិនស្រួល។ ទំាងនេះអាចជាមូលហេតុ នៃការចុះចតដោយអុកតួខ្លួនយន្តហោះ យ៉ាងគំហុកបែបនេះចំលើដី។ នេះបើតាមការបកស្រាយរបស់”ទីភ្នាក់ងារអាកាសចរណ៍ស៊ីវិលរុស្ស៊ី ”RosAviation”។
ទោះយ៉ាងណាក្តី ប្រអប់ពណ៌លឿងទុំទាំង២ របស់យន្តហោះ ៖ មួយថតសំឡេង អ្នកបើកយន្តហោះ មួយទៀតថតជីពចរម៉ាស៊ីនយន្តហោះ ដែលបានត្រូវក្រុមសង្គ្រោះរកឃើញទៅហើយ នឹងដំណាល ឲ្យដឹងពុំខាន អំពីមូលហេតុពិតប្រាកដនៃសោកនាដកម្មនោះ។
ក្នុងចំណោមមនុស្ស ៥២នាក់ជិះ ក្នុងយន្តហោះ Tupolev-134 នោះ ៤៣នាក់ ជាអ្នកដំណើរ និង ៩នាក់ជាក្រុមអ្នកបើកបរ អភ័ព្វស្លាប់ទៅ គឺអស់៤៤នាក់ ក្នុងនោះ មាន៤នាក់ជាជាតិបរទេស (ជនជាតិស៊ុយអែតម្នាក់ ជាតិហូឡង់ម្នាក់ ជាតិអ៊ុយក្រែន ២នាក់) មិនតែប៉ុណ្ណោះ មាន ៤នាក់ទៀត កាន់លិខិតឆ្លងដែន ជាពលរដ្ឋរុស្ស៊ីផង និងស.រ.អា.ផង។
ចំណែកអ្នកមានភ័ព្វសំណាង នៅរស់ ៨នាក់ សុទ្ធតែរបួសធ្ងន់ ក្នុងនោះ មានកុមារម្នាក់ផង កំពុងស្នាក់ព្យាបាល នៅមន្ទីរពេទ្យ។
អភិបាលខេត្ត Karelia ជាទីដែលមានគ្រោះថ្នាក់យន្តហោះនោះកើតឡើង ទើបបានចេញ បទបញ្ជាឲ្យផ្តល់ប្រាក់ឧបត្ថម្ភ ដល់គ្រួសារអ្នកស្លាប់ម្នាក់ៗ គឺ១លានរូប្ល ឬស្មើនឹង ជិត ៣ម៉ឺន ៦ពាន់ ដុល្លារអាមេរិក និង ដល់អ្នករបួសម្នាក់ៗ គឺ៥សែនរូប្ល ឬស្មើនឹងជិត ១ម៉ឺន៨ពាន់ដុល្លារ។
យន្តហោះធុន Tupolev-134 តែងត្រូវពួកអ្នកបើកយន្តហោះ រុស្ស៊ី ចាត់ទុកជាយន្តហោះដើរយ៉ាងកក់ក្តៅណាស់។ គិតពីឆ្នាំ១៩៦៣មក វាបានត្រូវផលិត ចំនួន៨៥២គ្រឿង។
សម័យសូវៀត ក្រុមហ៊ុនអាកាសចរណ៍រដ្ឋ ឈ្មោះ Aeroflot មានយន្តហោះនេះ ដល់៦០០គ្រឿង ហើយវាមិនដែលបណ្តាលឲ្យកើតឡើងជាឧប្បត្តិហេតុ អ្វីណាទេ។
ចាប់ពីឆ្នាំ ១៩៨៤មក វាបានត្រូវគេឈប់ផលិត។ បច្ចុប្បន្ន ក្នុងលំហនៃអតីតសហភាពសូវៀត នៅមានសល់យន្តហោះនេះ ហោះហើរប្រមាណ ១០០គ្រឿង។ ធ្លាប់មានគ្រោះថ្នាក់កើតឡើងម្តង ជាមួយយន្តហោះនេះ គឺក្នុងឆ្នាំ ២០០៧ ដែលកាលណោះបានបណ្តាលឲ្យមនុស្សស្លាប់ ៤នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ