ជាប្រវត្តិសាស្រ្ត សម្តេចប៉ាបបានប៉ះជញ្ជាំងដែលពុះខណ្ឌចែកអ៊ីស្រាអែលពីទឹកដីប៉ាឡេស្ទីន
កាលពីថ្ងៃអាទិត្យ ទី ២៥ ឧសភា នៅក្នុងដំណើរទស្សនកិច្ចទៅBethléem ក្នុងទឹកដីប៉ាឡេស្ទីន សម្តេចប៉ាបហ្វ្រង់ស័របានធ្វើកាយវិការគួរឲ្យភ្ញាក់ផ្អើលមួយដោយ ព្រះអង្គបានប៉ះកាន់ជញ្ជាំង ដែលកសាងឡើង ដោយអ៊ីស្រាអែល ដើម្បីពុះចែក ខ័ណ្ឌឲ្យដាច់ពីទឹកដីប៉ាឡេស្ទីន។ ប្រមុខសាសនារបស់បុរីវ៉ាទីកង់បានអំពាវនាវផងដែរដល់គូភាគី បញ្ចប់ជម្លោះ ដែលមិនគួរឲ្យទទួលយកបានមួយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ចេញពីប្រទេសហ្សកដានី សម្តេចប៉ាបធ្វើដំណើរតាមឧទ្ធម្ភាគចក្រ ដើម្បីចុះចតនៅBethléem ទឹកដីរបស់ប៉ាឡេស្ទីន។ Bethléemដែលជាទឹកដីកំណើតរបស់ព្រះយេស៊ូ។ ព្រះអង្គត្រូវបានទទួលយ៉ាងអធិកអធមពីអាជ្ញាធរប៉ាឡេស្ទីន ជាពិសេស ពីលោកម៉ាមូដ អាបាស ប្រធានរដ្ឋប៉ាឡេស្ទីន។
គួរដឹងថា បុរីវ៉ាទីកង់ដែលជារដ្ឋឯករាជ្យ បានទទួលស្គាល់ប៉ាឡេស្ទីនជារដ្ឋមួយ។ នៅចំពោះមុខប្រមុខដឹកនាំបុរីវ៉ាទីកង់ដែលគាំទ្របុព្វហេតុរបស់ខ្លួន លោកប្រធានរដ្ឋប៉ាឡេស្ទីនបានឆ្លៀតបរិហារនយោបាយវាតទីរបស់អ៊ីស្រាអែល។ តាមលោកម៉ាមូដ អាបាស អ៊ីស្រាអែលបានព្យាយាមផ្លាស់ប្តូរអត្តសញ្ញាណរបស់ទីក្រុងជេរូសាឡឹមខាងកើត រំខានអុកឡុកប្រជាជនប៉ាឡេស្ទីន ដែលជាអ្នកកាន់សាសនាគ្រិស្ត និងអ៊ីស្លាម។ បំណងគឺដើម្បីឲ្យប្រជាជនប៉ាឡេស្ទីន ធុញទ្រាន់ មិនអាចអត់ទ្រាំរស់នៅបាន និងត្រូវចាកចេញពីជេរូសាឡឹមខាងកើត។
ប្រមុខរដ្ឋប៉ាឡេស្ទីនបានបញ្ជាក់ឲ្យសម្តេចប៉ាបធ្វើជាសាក្សីផងដែរពីរឿងសាងសង់ជញ្ជាំង ដែលភាគីអ៊ីស្រាអែលបានបង្ខំធ្វើ ដោយប្រើកម្លាំងបាយ។ សម្តេចប៉ាបបានអំពាវនាវសុំឲ្យប្រទេសទាំងអស់ទទួលស្គាល់សិទ្ធិមានរូបរាង របស់រដ្ឋទាំងពីរ និងសុំឲ្យរដ្ឋទាំងពីរបញ្ចប់ជម្លោះ និងងាកមកចុះសម្រុង ដើម្បីរស់មានសន្តិភាពជាមួយគ្នាឡើងវិញនៅក្នុងតំបន់ដើមបូព៌ា។
នៅតាមផ្លូវធ្វើដំណើរទៅកាន់កន្លែងបន់ស្រន់ នៅក្នុងទីក្រុងBethléem សម្តេចប៉ាបបានបញ្ជាឲ្យគេឈប់នៅកណ្តាលផ្លូវ។ នៅក្រោមក្រសែភ្នែករាប់រយគូរបស់ប្រជាជនប៉ាឡេស្ទីន ប្រមុខបុរីវ៉ាទីកង់ បានធ្វើដំណើរទៅកាន់ជញ្ជាំងដែលកសាងឡើងអាជ្ញាធរអ៊ីស្រាអែលដើម្បីពុះចែកអ៊ីស្រាអែលពីប៉ាឡេស្ទីន។ តាមអ្នកយកព័ត៌មានរបស់ទីភ្នាក់ងារបារាំង AFP សម្តេចប៉ាប ហ្វ្រង់ស័របានដើរសំដៅឆ្ពោះទៅផ្នែកនៃជញ្ជាំងមួយដែលសរសេរជាភាសាអង់គ្លេស និងមានន័យជាភាសាខ្មែរថា “សម្តេចប៉ាប ពួកយើងត្រូវការអ្នកណាម្នាក់ដើម្បីនិយាយពីយុត្តិធម៌”
សម្រាប់ប្រជាជនប៉ាឡេស្ទីន សម្តេចប៉ាបហ្វ្រង់ស័រ ខុសពីសម្តេចប៉ាបមុនៗ គឺព្រះអង្គជានិមិត្តរូបដែលជះពន្លឺនៅក្នុងភពងងឹត ដែលកំពុងគ្របដណ្តប់តំបន់ដើមបូព៌ា។
នៅក្រោយចប់ពិធីបុណ្យសាសនា សម្តេចប៉ាបនឹងធ្វើដំណើរបន្តទៅទឹកដីអ៊ីស្រាអែល ជាទីដែលលោកនឹងជួបលោកប្រធានាធិបតីស៊ីមន ប៉េរ៉េស។ នៅថ្ងៃចន្ទ សម្តេចប៉ាប នឹងជួប បន់ស្រន់ ជាមួយប្រមុខដឹកនាំសាសនាអូតូដុកនៅក្នុងពិភពលោក។ នៅដោយសារតែសម្តេចប៉ាបថ្មី ខុសពីសម្តេចប៉ាប គឺចូលចិត្តជិះរថយន្តដែលគ្មានកញ្ចក់ការពារគ្រាប់ អាជ្ញាធរអ៊ីស្រាអែលបានពង្រឹងខ្លាំងផ្នែកសន្តិសុខ។ កាលពីថ្ងៃអាទិត្យ អាជ្ញាធរអ៊ីស្រាអែលបានប្រកាសថា ខ្លួនចាប់បានមនុស្ស២៦នាក់ ដែលមកពីចលនាប្រឆាំងនឹងវត្តមានរបស់សម្តេចប៉ាប នៅលើភ្នំSion ក្នុងតំបន់ជេរូសាឡឹម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ