សម្តេចប៉ាបជូនពរណូអែលឱ្យមានយុត្តិធម៌សង្គម និងសន្តិភាព
ថ្ងៃនេះ ជាថ្ងៃបុណ្យណូអែល ឬថ្ងៃបុណ្យ Christmas កំណើតព្រះយេស៊ូ ! សម្តេចប៉ាប ហ្វ្រង់ស័រ តាំងពីយប់មិញ បានប្រារព្ធពិធីបុណ្យសូត្រធម៌ណូអែល នៅវិហារ។ ពិធីបុណ្យដែលផ្សាយបន្តផ្ទាល់ ដោយទូរទស្សន៍ជាតិ ចំនួន ៦៥ប្រទេសនៅលើពិភពលោក។ ខ្លី សាមញ្ញ សម្តេចប៉ាប បានពន្យល់អំពី អត្តសញ្ញាណអ្នកកាន់សាសនាគ្រិស្ត និងបានអំពាវនាវឱ្យគ្រិស្តសាសនិកជន ធ្វើដំណើរទៅកាន់ទីភ្លឺ ទៅរកធម៌។ ប្រឆាំងនឹងអំពើហិង្សា នៅស៊ីរី នៅអាហ្វ្រិក បញ្ឈប់ការយកជីវិតមនុស្សមកធ្វើល្បែង សោកនាដកម្មលើជនភៀសខ្លួន ... នេះជាសារ ជូនពររបស់សម្តេចប៉ាប ក្នុងថ្ងៃបុណ្យណូអែល។
ចុះផ្សាយនៅថ្ងៃ៖
ស្តាប់ - ០១:១៧
តាមទម្លាប់ នៅថ្ងៃទី ២៥ធ្នូ នេះ សម្តេចប៉ាប នឹងថ្លែងសារជូនពរណូអែល Urbi et Orbi ទៅកាន់ « ក្រុងនិងពិភពលោក » ទាំងមូល ដោយទាញចំណាប់អារម្មណ៍ទៅលើវិបត្តិនិងភាពអយុត្តិធម៌ នៅលើលោក។ សម្រាប់ឆ្នាំនេះ សារសំខាន់របស់សម្តេចប៉ាប ហ្វ្រង់ស័រ សំដៅប្រឆាំងនឹងអំពើហិង្សានៅស៊ីរី នៅអាហ្វ្រិក អាហ្វ្រិកកណ្តាល ស៊ូដង់ គ្រិស្តសាសនិកជននៅបូព៌ា ប្រឆាំងនឹងការប្រមាថជីវិតមនុស្ស ...
« ព្រះជាម្ចាស់ សូមក្រលេខមើល កុមារជាច្រើន ដែលត្រូវគេចាប់ជំរិត របួស សម្លាប់ ក្នុងជម្លោះប្រដាប់អាវុធ ចាប់ធ្វើជាកូនទាហាន មិនស្គាល់រសជាតិជីវិតជាកុមារភាព សូមបញ្ឈប់ការបំផ្លាញ ជីវិតមនុស្ស មិនថាកុមារ ជនភៀសខ្លួន។ ប្រមាថជីវិត គឺបទល្មើសធ្ងន់ធ្ងរប្រឆាំងនឹងមនុស្សជាតិ។»
នេះជាពិធីបុណ្យណូអែល លើកទីមួយ របស់សម្តេចប៉ាប ហ្វ្រង់ស័រ ក្នុងនាមជាប្រមុខសាសនាកាតូលិក។ ក្នុងពេលសូត្រធម៌ ទាំងខ្លី ទាំងសាមញ្ញ កាលពីយប់មិញ (នៅម៉ោង៩ និង៣០នាទីយប់) សម្តេចប៉ាបបានរំលឹកថា ក្នុងខ្សែជីវិតរបស់មនុស្ស ពន្លឺ និងភាពងងឹតតែងឆ្លាស់។ ដូច្នេះបើស្រលាញ់គោរពព្រះ និងបងប្អូន ត្រូវធ្វើដំណើរទៅរកទីភ្លឺ ទីដែលមានធម៌។ បើបិទបេះដូង នោះគឺធ្លាក់នរកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ