កិច្ចព្រមព្រៀងដែលនៅចែងមិនទាន់ច្បាស់ពីជោគវាសនារបស់លោក Bachar Al Assad
ចុះផ្សាយនៅថ្ងៃ៖
ស្តាប់ - ០៧:០៥
នៅក្នុងសន្និសីទអន្តរជាតិស្តីពីវិបត្តិស៊ីរី នៅទីក្រុងហ្សឺណែវ កាលពីថ្ងៃសៅរ៍ទី ៣០មិថុនា ប្រទេសមហាអំណាចទាំងប្រាំ និងប្រទេសជិតខាងរបស់ស៊ីរី នៅទីបំផុត បានយល់ព្រមគ្នា ចុះហត្ថលេខាលើកិច្ចព្រមព្រៀងស្តីពីការបង្កើតរដ្ឋាភិបាលស៊ីរីអន្តរកាល ដែលមានការចូលរួមពីសមាជិករដ្ឋាភិបាលបច្ចុប្បន្ន និងក្រុមបក្សប្រឆាំងស៊ីរី។ នៅថ្ងៃនេះ ក្រុមបក្សប្រឆាំងស៊ីរីវាយតម្លៃ ផែនការថ្មីរបស់កូហ្វី អាណាន់ មិនសូវជាមានលក្ខណៈចាប់បង្ខំ ហើយ គេក៏មិនបាននិយាយពីការចុះចេញពីអំណាច របស់លោកប្រធានាធិបតីBachar Al Assad។ ទោះជារុស្ស៊ី និងចិនដែលធ្លាប់ប្រឆាំងមិនឲ្យគេអន្តរាគមន៍យោធា និងលូកដៃចូលក្នុងកិច្ចការនយោបាយស៊ីរី នៅទីបំផុតបានចុះហត្ថលេខាលើកិច្ចព្រមព្រៀង ប៉ុន្តែ អាមេរិក និងរុស្ស៊ី នៅតែខ្វែងគំនិតពីជោគវាសនារបស់លោក Bachar Al Assad។
ប្រមុខការបរទេសអាមេរិកបាននិយាយថា កិច្ចព្រមព្រៀងនឹងធ្វើឲ្យលោក Bachar Al Assadចាកចេញពីអំណាចជាប្រាកដ។ ប៉ុន្តែ បើតាមរុស្ស៊ី ក្នុងឯកសារនៃកិច្ចព្រមព្រៀង គ្មានចំណុចត្រង់ណាមួយដែលបញ្ជាក់ថា លោក Bachar Al Assad នឹងត្រូវធ្លាក់ចេញ ពីអំណាចទេ។ តាមមន្រ្តីការទូតម្នាក់ដែលសុំមិនបញ្ចេញឈ្មោះ រុស្ស៊ីបានស្នើសុំទៅកិច្ចប្រជុំ កាលពីថ្ងៃម្សិលមិញថា គេត្រូវយល់ព្រមរក្សាលោក Bachar Al Assad ឲ្យនៅក្នុងតំណែងប្រធានាធិបតី រហូតដល់ចប់អាណត្តិរបស់គាត់ ឆ្នាំ ២០១៤ ហើយសន្តិសុខរបស់ក្រុមគ្រួសាររបស់គាត់ ត្រូវតែធានាដោយសហគមន៍អន្តរជាតិ។
រឿងប្រាកដថា លោកBachar Al Assad នៅតែកាន់អំណាចបន្ត ជាប្រធានាធិបតីស៊ីរី ឬត្រូវគេផាត់ចេញពីរដ្ឋាភិបាលចម្រុះថ្មី យ៉ាងណានោះ នៅតែគេមិនទាន់ដឹងច្បាស់នៅឡើយទេ។
នៅក្នុងផែនការរបស់លោកកូហ្វី អាណាន់ វិញ គេបានលើកឡើងពីការបង្កើតរដ្ឋាភិបាលចម្រុះ សម្រាប់រយៈកាលអន្តរកាល ដែលមានការចូលរួមពី ក្រុមបក្សប្រឆាំង និងរដ្ឋាភិបាលបច្ចុប្បន្ន។ ការចូលរួមពីមន្រ្តីរដ្ឋាភិបាលបច្ចុប្បន្ន អាចឲ្យគេគិតថា លោក Bachar Al Assad នឹងអាចមានវត្តមាន ដឹកនាំ នៅក្នុងរដ្ឋាភិបាលចម្រុះថ្មីនេះ។ ប៉ុន្តែ បើតាមលោកកូហ្វី អាណាន់ លោក Bachar Al Assad នឹងមានមុខ នៅក្នុងរដ្ឋាភិបាលចម្រុះ ឬ ក៏អត់ គឺអាស្រ័យទៅលើឆន្ទះនិងការសម្រេចរបស់ប្រជាជនស៊ីរី តែប៉ុណ្ណោះ។ លោកប្រេសិតអង្គការសហប្រជាជាតិមិនជឿថា ប្រជាជនស៊ីរី ដែលមានសមត្ថភាព និងស្រឡាញ់លទ្ធិប្រជាធិបតេយ្យ នឹងជ្រើសរើសក្រុមមនុស្ស ដែលមានដៃប្រលាក់ឈាម យកមកដឹកនាំពួកគេនោះទេ។
ជារួម បើតាមកិច្ចព្រមព្រៀង រដ្ឋាភិបាលចម្រុះថ្មីនេះ នឹងកើតចេញមកពីការយល់ព្រមព្រៀងគ្នាទៅវិញ ទៅមក និងការធ្វើសម្បទាន ទាំងពី ភាគីទាំងពីរ គឺរដ្ឋាភិបាលស៊ីរីបច្ចុប្បន្ន និងក្រុមប្រឆាំង។ ហើយ ក្រុមប្រទេសមហាអំណាច និងក្រុមប្រទេសជិតខាងស៊ីរី ជាអ្នកជំរុញឲ្យភាគីទាំងពីរយល់ព្រមធ្វើតាម កិច្ចព្រមព្រៀង។ ទេសលោកខាងលិច រួមទាំងប្រទេសអារ៉ាប់ ជំរុញឲ្យក្រុមប្រឆាំងបោះបង់ចោលអាវុធ និងចូលមកចាប់ដៃបង្កើតរដ្ឋាភិបាល។ ចំណែករុស្ស៊ី និងចិន មានភារកិច្ចបញ្ចុះបញ្ចូលរដ្ឋាភិបាលលោកBachar Al Assad បញ្ឈប់អំពើហិង្សា និងយល់ព្រមចរចា ជាមួយក្រុមប្រឆាំង ដើម្បីបង្កើតរដ្ឋាភិបាលចម្រុះ។
យោងតាមកិច្ចព្រមព្រៀង រដ្ឋាភិបាលចម្រុះនឹងមានអំណាចប្រតិបត្តិពេញទី ចំណែកអំណាចប្រធានាធិបតីនឹងត្រូវគេបន្ថយមកវិញ។ ក្នុងដំណាក់កាលនេះ គេត្រូវអនុវត្តផែនការ៦ចំណុចរបស់កូហ្វី អាណាន់ ដែលមាននិយាយពីការគោរពបទឈប់បាញ់ និងការផ្តល់ជំនួយដល់ជនរងគ្រោះ ដោយអំពើហិង្សា។ បន្ទាប់មក គេនឹងបង្កើតការចរចាថ្នាក់ជាតិ ដើម្បីបញ្ចប់អំពើហិង្សាទាំងស្រុងក្នុងប្រទេស។ គេត្រូវសើរើ និងសរសេរឡើងវិញ រដ្ឋធម្មនុញ្ញ និងប្រព័ន្ធច្បាប់ ដោយមានការយល់ព្រមពីប្រជាជនស៊ីរី។ តាមរយៈរដ្ឋធម្មនុញ្ញថ្មី គេនឹងអាចរៀបចំការបោះឆ្នោត មួយដោយសេរី និងយុត្តិធម៌ ដើម្បីជ្រើសរើសប្រធានាធិបតីថ្មី និងរៀបចំរដ្ឋាភិបាលថ្មី ស៊ីរី។
គេនៅមិនទាន់ដឹងទេថា តើរដ្ឋាភិបាលលោក Bachar Al Assad នឹងព្រមទទួលយកអនុវត្តកិច្ចព្រមព្រៀងដែលរៀបចំដោយប្រទេសខាងក្រៅ។ រហូតមកដល់ពេលនេះ គេមិនទាន់ឃើញមានប្រតិកម្មយ៉ាងណាពីទីក្រុងដាម៉ាស ទេ នៅក្រោយសន្និសីទអន្តរជាតិ កាលពីថ្ងៃម្សិលមិញ។ ប៉ុន្តែ នៅមុនសន្និសីទនេះមួយថ្ងៃ លោកប្រធានាធិបតី Bachar Al Assadធ្លាប់បានផ្តល់បទសម្ភាសន៍ទៅឲ្យទូរទស្សន៍អ៊ីរ៉ង់ ដោយថា រដ្ឋាភិបាលរបស់លោកនឹងមិនចុះញ៉មនឹងសម្ពាធពីបរទេស ហើយ ក៏មិនទទួលយកផែនការ ឬកិច្ចព្រមព្រៀង ដោយដាក់កំហិតឲ្យអនុវត្តពីសំណាក់ប្រទេសខាងក្រៅដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ