កម្ពុជាផ្តោតលើការអនុវត្តផែនការគ្រប់គ្រងបេតិកភណ្ឌពិភពលោកព្រះវិហារ
ថ្មីៗនេះ ប្រធានគណៈកម្មាធិការបេតិកភណ្ឌពិភពលោករបស់ថៃ លោក ភីតថាយ៉ា ភុកកាម៉ាន បានប្រកាសថា លោកនឹងជំទាស់ប្រឆាំងផែនការគ្រប់គ្រងសម្បតិ្តបេតិកភណ្ឌពិភពលោកប្រសាទព្រះវិហារដែលស្នើដោយកម្ពុជា។ ការលើកឡើងរបស់ភាគីថៃ នៅក្រោយការប្រកាសសាលដីកាតុលាការឡាអេនេះ មិនបានធ្វើអោយមន្ត្រីជំនាញរបស់កម្ពុជា ខ្វល់ខ្វាយនោះឡើយ។ មន្ត្រីជាន់ខ្ពស់កម្ពុជានិយាយថា សេចក្តីសម្រេចរបស់តុលាការឡាអេចុងក្រោយនេះហើយ ដែលរឹតតែអំណោយផលដល់កម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
មន្ត្រីរដ្ឋាភិបាលកម្ពុជាមិនបានសម្តែងអារម្មណ៍ភ្ញាក់ផ្អើលចំពោះសេចក្តីថ្លែងការណ៍ថ្មីៗនេះរបស់មន្ត្រីថៃអំពីគម្រោងជំទាស់ប្រឆាំងនឹងផែនការគ្រប់គ្រងតំបន់បេតិកភណ្ឌពិភពលោកប្រាសាទព្រះវិហាររបស់កម្ពុជានោះឡើយ។ ក្រោយពីការប្រកាសសាលដីការបស់តុលាការយុត្តិធម៌អន្តរជាតិ ប្រធានគណៈកម្មាធិការបេតិកភណ្ឌពិភពលោករបស់ថៃ លោក ភីតថាយ៉ា ភុកកាម៉ាន បានប្រកាសថា លោកនឹងជំទាស់ប្រឆាំងផែនការគ្រប់គ្រងសម្បតិ្តបេតិកភណ្ឌពិភពលោកប្រសាទព្រះវិហារដែលស្នើដោយកម្ពុជា ទៅគណៈកម្មការបេតិកភណ្ឌពិភពលោករបស់អង្គការយូណេស្កូ។
តាមពិត ផែនការគ្រប់គ្រង អភិរក្ស និងអភិវឌ្ឍន៍តំបន់បេតិកភណ្ឌពិភពលោកប្រាសាទព្រះវិហារត្រូវបានកម្ពុជាបញ្ជូនទៅអង្គការយូណេស្កូតាំងពីឆ្នាំ២០១១។
ត្រង់ចំនុចនេះ ទាំងអ្នកនាំពាក្យរដ្ឋាភិបាលកម្ពុជាលោក ខៀវ កាញារីទ្ធ និងលោកជុច ភឿន ប្រធានអាជ្ញាធរជាតិព្រះវិហារបានអះអាងដូចគ្នា ថាសាលដីកាចុងក្រោយរបស់តុលាការយុត្តិធម៌អន្តរជាតិថ្ងៃទី១១វិច្ឆិកានោះ រឹតតែអំណោយផល និងអនុញ្ញាតអោយកម្ពុជាអនុវត្តិផែនការគ្រប់គ្រងតំបន់ប្រាសាទព្រះវិហារបានដោយងាយស្រួល។
ទំនងជាចង់ចំអកអោយមន្ត្រីថៃ លោកខៀវ កាញារីទ្ធបានមានប្រសាសន៍ថា ភាគីថៃផ្លាស់ប្តូរមន្ត្រីញឹកញាប់ ហើយថាអ្វីៗក៏ជារឿងថ្មីសម្រាប់មន្ត្រីដែលមកដល់ថ្មីទាំងនោះ។
លោកជុច ភឿន ប្រធានអាជ្ញាធរជាតិព្រះវិហារវិញ បាននិយាយដល់ថា លោកមិនខ្វល់ខ្វាយអំពីសេចក្តីថ្លែងការណ៍នានារបស់មន្ត្រីថៃឡើយ ហើយលោកកំពុងតែបន្តការងារនីតិវិធីនៃផែនការគ្រប់គ្រង អភិរក្ស និងអភិវឌ្ឍន៍តំបន់បេតិកភណ្ឌរបស់មនុស្សជាតិ ប្រាសាទព្រះវិហារ។
ថ្លែងប្រាប់វិទ្យុបារាំងអន្តរជាតិ លោកជុច ភឿនបានប្រាប់អោយដឹងផងដែរថា រដ្ឋាភិបាលកម្ពុជាពិភាក្សា និងកៀងគរប្រទេសជាដៃគូអភិវឌ្ឍន៍ ទាំងក្នុងវិស័យបច្ចេកទេស និងហិរញ្ញវត្ថុដើម្បីអាចអនុវត្តផែនការគ្រប់គ្រង អភិរក្ស និងអភិវឌ្ឍន៍តំបន់ប្រាសាទព្រះវិហារនេះហើយ។
គួរបញ្ជាក់អោយដឹងថា យោងតាមការពន្យល់របស់ប្រធានអាជ្ញាធរជាតិព្រះវិហារ តំបន់ប្រាសាទព្រះវិហារដែលត្រូវគ្របដណ្តប់ដោយផែនការគ្រប់គ្រងនោះ មាន៤តំបន់។
លោកបន្តថា តំបន់ស្នូលសំខាន់ទីមួយមានទំហំជាង១១ហិចតា។ តំបន់ទ្រនាប់មានទំហំជាង២ម៉ឺនហិចតា។ តំបន់រណបទី៣មានទំហំជាង៤ម៉ឺនហិចតា និងតំបន់ទី៤ ដែលកាន់តែស្ថិតនៅឆ្ងាយពីប្រាសាទព្រះវិហារ អាចអនុញ្ញាតអោយមានពលរដ្ឋរស់នៅប្រកបរបរចិញ្ចឹមជីវិតបានធម្មតា។
ទោះយ៉ាងណាក៏ដោយ បើតាមមន្ត្រីជំនាញដដែនេះ នៅពេលនេះ គេនៅមិនទាន់អាចដឹងថា តើនឹងមានថវិកាប៉ុន្មានដែលគេត្រូវការសម្រាប់ការងារអភិរក្ស និងអភិវឌ្ឍន៍តំបន់បេតិកភណ្ឌពិភពលោកប្រាសាទព្រះវិហារនោះនៅឡើយទេ។ ហើយថា តើយន្តការនៃការអនុវត្តផែនការនេះ អាចនឹងត្រូវធ្វើដូចយន្តការ ICC-Angkor ដែរឬយ៉ាងណានោះ ក៏នៅមិនទាន់មានការសម្រេចយ៉ាងណានៅឡើយដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ