ស្លាប់យ៉ាងតិច ៣១នាក់ ក្នុងភេរវកម្មដ៏ធំមិនធ្លាប់មាននៅស៊ីងជាំង
ចុះផ្សាយនៅថ្ងៃ៖
ស្តាប់ - ០៥:៤៥
នៅព្រឹកថ្ងៃព្រហស្បតិ៍នេះ ការវាយប្រហារភេរវកម្មដ៏ធំមួយបានកើតមានឡើង នៅក្នុងទីផ្សារមួយកន្លែង ក្នុងទីក្រុងអ៊ូរ៉ុមឈី តំបន់ស៊ីងជាំង ប្រទេសចិន ហើយបានបណ្តាលឲ្យមនុស្សយ៉ាងតិច ៣១នាក់ ត្រូវបាត់បង់ជីវិត និងជាង ៩០នាក់ផ្សេងទៀតត្រូវរងរបួស។ នេះគឺជាការវាយប្រហារភេរវកម្មដ៏ធំមិនធ្លាប់មានចាប់តាំងពីផ្ទុះអំពើបះបោរនៅស៊ីងជាំង។
ការវាយប្រហារភេរវកម្មបានកើតឡើង នៅវេលាម៉ោង ៧ និង៥០នាទីព្រឹក ម៉ោងក្នុងស្រុក។ មន្រ្តីអាជ្ញាធរតំបន់ស៊ីងជាំងបានឲ្យដឹងថា រថយន្តពីរគ្រឿងបានបើកសម្រុកចូលក្នុងទីផ្សារមួយកន្លែង ដោយបានបោះគ្រាប់បែកជាច្រើនគ្រាប់ចេញពីរថយន្តទៅលើហ្វូងមនុស្ស។ បន្ទាប់មករថយន្តមួយ ក្នុងចំណោមទាំងពីរគ្រឿងក៏ត្រូវផ្ទុះខ្លួនឯងផងដែរ។ យោងតាមសាក្សីនៅកន្លែងកើតហេតុ គេឮសូរសំឡេងផ្ទុះប្រមាណជាង ១០គ្រាប់ នៅក្នុងការវាយប្រហារនេះ។
រហូតមកទល់នឹងពេលនេះ គេនៅមិនទាន់ឃើញមានក្រុមណាចេញមុខប្រកាសទទួលខុសត្រូវ ក្នុងការវាយប្រហារនេះនៅឡើយទេ។ ក៏ប៉ុន្តែ គេសង្កេតឃើញជាទូទៅថា នៅក្នុងការវាយប្រហារជាបន្តបន្ទាប់គ្នាដែលពាក់ព័ន្ធនឹងអំពើហិង្សានៅស៊ីងជាំង ក្នុងមួយរយៈកាលចុងក្រោយនេះ គឺជាស្នាដៃរបស់ក្រុមបះបោរអ៊ុយហ្គួ។ ការវាយប្រហារ ដូចជា ការចូលកាប់សម្លាប់អ្នកដំណើរដោយឥតរើសមុខ នៅស្ថានីយ៍រថភ្លើងនៅគុនមីង និងការបើកឡានបុកអ្នកដំណើរ ហើយបន្ទាប់មកធ្វើអត្តឃាតខ្លួនឯង នៅទីលានធានអានមេន ក្នុងទីក្រុងប៉េកាំង ជាដើម ត្រូវបានអាជ្ញាធរចិនកំណត់មុខសញ្ញាថាជាក្រុមភេរវជនអ៊ុយហ្គួ។ ក៏ប៉ុន្តែ មានអង្គការ សមាគមអ៊ុយហ្គួខ្លះ ធ្លាប់បានលើកឡើងថា ការវាយប្រហារអស់ទាំងនេះអាចជាស្នាដៃក្រុមអ៊ុយហ្គួជ្រុលនិយមមួយក្រុមតូច ក៏ប៉ុន្តែ មិនមែនមានន័យថា ឲ្យតែជនជាតិអ៊ុយហ្គួ ដែលតវ៉ាប្រឆាំងនឹងរដ្ឋាភិបាលក្រុងប៉េកាំង សុទ្ធតែជាភេរវជនទាំងអស់ទេ។
នៅក្នុងមួយរយៈកាលចុងក្រោយនេះ គេសង្កេតឃើញថា អំពើហិង្សា ដែលពីដំបូងកើតចេញពីការបះបោរ នៅស៊ីងជាំង បានកើតមានឡើងកាន់តែញឹកញាប់ ហើយកំពុងតែរាលដាលទៅកាន់តំបន់ផ្សេងៗទៀត។ ការវាយប្រហារខ្លះ ស្ថិតនៅចម្ងាយរាប់ពាន់គីឡូម៉ែត្រពីស៊ីងជាំង ដូចជា ការវាយប្រហារនៅទីលានធានអានមេន នៅប៉េកាំង និងនៅស្ថានីយ៍រថភ្លើងគុនមីង ជាដើម។
►សូមអាន៖ ការវាយប្រហារនៅគុនមីងជាសញ្ញាបង្ហាញពីការវិវឌ្ឍនៃអំពើហិង្សានៅស៊ីងជាំង
ម្យ៉ាងទៀត ការវាយប្រហារនីមួយៗមានទម្រង់កាន់តែធំឡើង ហើយមានលក្ខណៈជាការវាយប្រហារភេរវកម្មអត្តឃាត ដូចដែលគេធ្លាប់ឃើញមាន នៅក្នុងសកម្មភាពរបស់ក្រុមភេរវជនអន្តរជាតិ ដូចជា អាលកៃដា ជាដើម។
ជាក់ស្តែង គេឃើញថា ការវាយប្រហារ នៅទីក្រុង Urumqi ព្រឹកថ្ងៃព្រហស្បតិ៍នេះ គឺជាការវាយប្រហារក្នុងទ្រង់ទ្រាយធំបំផុត ដែលគេមិនធ្លាប់ឃើញមាន ចាប់តាំងពីផ្ទុះអំពើបះបោរនៅស៊ីងជាំងមក។ ចំនួនអ្នកស្លាប់ និងរបួសក៏មានច្រើនមិនធ្លាប់មាន។ ទម្រង់នៃការវាយប្រហារក៏មានទ្រង់ទ្រាយធំ ហើយការវាយប្រហារដោយសំដៅទៅលើទីផ្សារដែលមានមនុស្សអ៊ូអរ មានន័យថា ភេរវជនមានចេតនាចង់បង្កឲ្យមានអ្នកស្លាប់ និងរបួស យ៉ាងច្រើនបំផុត តាមដែលអាចធ្វើទៅបាន។
កន្លងមក គេឃើញថា ការវាយប្រហារភេរវកម្មបែបអត្តឃាត ដែលសំដៅទៅលើទីផ្សារបែបនេះ តែងតែកើតឡើង នៅក្នុងប្រទេសអាហ្វហ្កានីស្ថាន ឬប៉ាគីស្ថាន ហើយវាជាអំពើភេរវកម្ម តាមបែបពួកតាលីបង់ ឬពួកអាល់កៃដា។
ក៏ប៉ុន្តែ លក្ខណៈពិសេសនៃអំពើភេរវកម្មនៅស៊ីងជាំង ហើយដែលអាចជាបញ្ហាឈឺក្បាលសម្រាប់អាជ្ញាធរចិន គឺគេមិនសូវជាមានព័ត៌មានច្បាស់លាស់ អំពីមេដឹកនាំ ឬអង្គការចាត់តាំងរបស់ក្រុមភេរវជននៅស៊ីងជាំងនេះទេ។ រាល់លើក នៅពេលដែលមានការវាយប្រហារភេរវកម្មម្តងៗ គេតែងតែឮអាជ្ញាធរចិនចោទថាជាស្នាដៃរបស់ក្រុមភេរវជនអ៊ុយហ្គួនៅស៊ីងជាំង ក៏ប៉ុន្តែ សួរថាតើក្រុមណាពិតប្រាកដ? ហើយអ្នកណាជាមេដឹកនាំ? បើនិយាយពីជនជាតិអ៊ុយហ្គួនៅស៊ីងជាំង គឺមានសរុបទាំងអស់ជាង ១០លាននាក់។ តើត្រូវចាត់ទុកជនជាតិអ៊ុយហ្គួទាំង ១០លាននាក់នេះជាជនសង្ស័យភេរវជនទាំងអស់ឬក៏យ៉ាងណា? នេះហើយជាបញ្ហាចោទដ៏ធំ របស់អាជ្ញាធរចិន ក្នុងការប្រយុទ្ធប្រឆាំងនឹងអំពើភេរវកម្មនៅស៊ីងជាំង។
►សូមអាន៖ មូលហេតុដែលនាំឲ្យមានការបះបោររបស់ពួកអ៊ុយហ្គួនៅស៊ីងជាំងប្រទេសចិន
ជាទូទៅ គេឃើញថា ដើម្បីទប់ទល់នឹងការវាយប្រហារភេរវកម្ម អាជ្ញាធរក្រុងប៉េកាំង តែងតែធ្វើការរឹតបន្តឹងសន្តិសុខ និងអនុវត្តនយោបាយតឹងរ៉ឹងទៅលើពួកអ៊ុយហ្គួ នៅស៊ីងជាំងទាំងមូល។ ជាក់ស្តែង ភ្លាមៗ ក្រោយពីមានការវាយប្រហារនៅអ៊ូរ៉ុមឈី នៅព្រឹកថ្ងៃព្រហស្បតិ៍នេះ លោកប្រធានាធិបតីចិន ស៊ី ជីនពីង បានបញ្ជាឲ្យកងកម្លាំងប្រដាប់អាវុធរឹតបន្តឹងសន្តិសុខ និងព្រមានថានឹងដាក់ទោសធ្ងន់ធ្ងរដល់ក្រុមភេរវជន។
ក៏ប៉ុន្តែ បើមើលទៅលើអ្វីដែលបានកើតឡើង មួយរយៈកាលចុងក្រោយនេះ វាបង្ហាញឲ្យឃើញច្បាស់ថា ការរឹតបន្តឹងសន្តិសុខ និងការប្រើវិធានការក្តៅបង្រ្កាបទៅលើក្រុមអ៊ុយហ្គួមិនមែនជាវិធានការមានប្រសិទ្ធភាពក្នុងការទប់ស្កាត់អំពើភេរវកម្មនោះទេ។ អាជ្ញាធរកាន់តែរឹតបន្តឹងសន្តិសុខ កាន់តែបង្រ្កាបដាក់ទោសលើពួកអ៊ុយហ្គួ អំពើហិង្សាកើតមានកាន់តែច្រើន មានទ្រង់ទ្រាយកាន់តែធំ ហើយរាលដាលចេញពីតំបន់ស៊ីងជាំងថែមទៀត។
តាមពិត វិធានការតឹងរ៉ឹងទៅលើពួកអ៊ុយហ្គួនេះ ក៏អាចជាមូលហេតុចម្បងមួយដែរ ដែលនាំឲ្យមានការរីករាលដាលនៃអំពើហិង្សានៅស៊ីងជាំង ពីព្រោះថា នៅពេលដែលអាជ្ញាធរធ្វើការបង្រ្កាបកាន់តែខ្លាំង ពួកអ៊ុយហ្គួកាន់តែច្រើននាំគ្នារត់គេចពីការបង្រ្កាប ហើយភៀសខ្លួននៅប្រទេសជិតខាង។ ខ្លះបានរត់ភៀសខ្លួនរហូតទៅដល់ប៉ាគីស្ថាន ឬអាហ្វហ្កានីស្ថាន ដែលសុទ្ធតែជាសម្បុករបស់ក្រុមភេរវជនអ៊ីស្លាមជ្រុលនិយម។ នេះគឺជាឱកាសមួយ ដែលអាចធ្វើឲ្យពួកអ៊ុយហ្គួខ្លះត្រូវធ្លាក់ចូលក្នុងគំនិតជ្រុលនិយម ហើយទទួលបានការហ្វឹកហ្វឺនពីក្រុមតាលីបង់ ឬអាលកៃដា រួចហើយក៏វិលត្រឡប់ចូលមកធ្វើសកម្មភាពក្នុងប្រទេសចិនវិញ។
ដូច្នេះ នៅពេលដែលអាជ្ញាធរចិនបង្រ្កាបកាន់តែខ្លាំង គឺដូចជាកាន់តែរុញពួកអ៊ុយហ្គួឲ្យធ្លាក់ទៅក្នុងគន្លងផ្លូវជ្រុលនិយមកាន់តែខ្លាំង ហើយចេះវិធីវាយប្រហារភេរវកម្មកាន់តែច្រើនជាងមុនទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ