នាវាម៉ាឡេស៊ីដឹកជំនួយទៅឲ្យជនជាតិរ៉ូហ៊ីងយ៉ាភូមាត្រូវទទួលស្វាគមន៍ដោយបាតុកម្ម
ក្រុមអ្នកប្រឆាំងនឹងជនជាតិរ៉ូហ៊ីងយ៉ាបានប្រមូលផ្តុំគ្នានៅថ្ងៃព្រហស្បតិ៍នេះ នៅឯកំពង់ផែក្រុងរ៉ង់ហ្គូន ដើម្បីតវ៉ាប្រឆាំងនឹងការមកដល់នៃកប៉ាល់របស់ម៉ាឡេស៊ីដឹកជំនួយទៅឲ្យជនជាតិភាគតិចរ៉ូហ៊ីងយ៉ា ដែលកំពុងរត់ភៀសខ្លួនពីផ្ទះសម្បែង ដើម្បីគេចចេញអំពើហិង្សា។ គេសង្កេតឃើញថា ម៉ាឡេស៊ីដែលជាប្រទេសមានប្រជាជនភាគច្រើនលើសលុបកាន់សាសនាអ៊ីស្លាម គឺជាប្រទេសដែលតែងតែបានបញ្ចេញសំឡេងខ្លាំងជាងគេ ក្នុងការបរិហាររិះគន់ភូមា ទាក់ទងនឹងការធ្វើទុក្ខបុកម្នេញទៅលើពួករ៉ូហ៊ីងយ៉ា ដែលជាជនជាតិភាគតិចកាន់សាសនាអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
កប៉ាល់ដឹកជំនួយជាអង្ករ ថ្នាំពេទ្យ និងសម្លៀកបំពាក់ គិតជាសរុបប្រមាណជាជាង២ពាន់តោន រួមជាមួយនឹងមន្រ្តីមនុស្សធម៌រាប់រយនាក់ បានចាកចេញពីប្រទេសម៉ាឡេស៊ី កាលពីសប្តាហ៍មុន ហើយគ្រោងចូលសំចតនៅកំពង់ផែនក្រុងរ៉ង់ហ្គូន ដើម្បីយកជំនួយមួយផ្នែកទៅជួយជនជាតិរ៉ូហ៊ីងយ៉ានៅឯរដ្ឋអារ៉ាកាន់ មុននឹងបន្តដំណើរយកជំនួយមួយផ្នែកទៀតទៅជួយពួករ៉ូហ៊ីងយ៉ាដែលរត់ភៀសខ្លួនទៅកាន់ប្រទេសបង់ក្លាដែស។
ទៅដល់កំពង់ផែក្រុងរ៉ង់ហ្គូន កប៉ាល់ដឹកជំនួយនេះត្រូវទទួលស្វាគមន៍ដោយបាតុកម្មប្រឆាំង ពីសំណាក់ព្រះសង្ឃ និងទាំងអ្នកកាន់ពុទ្ធសាសនាជ្រុលនិយមមួយក្រុម ដៃកាន់ទង់ជាតិភូមា ព្រមទាំងពាក្យស្លោកប្រឆាំងនឹងជនជាតិរ៉ូហ៊ីងយ៉ា។
កាលពីដំបូង សូម្បីតែរដ្ឋាភិបាលភូមាក៏ប្រឆាំងនឹងការដឹកជំនួយនេះដែរ ដោយបានបដិសេធមិនឲ្យកប៉ាល់ម៉ាឡេស៊ីធ្វើដំណើរចូលទៅក្នុងដែនទឹកភូមា។ ក៏ប៉ុន្តែ ក្រោយមក ភូមាក៏បានផ្លាស់ប្តូរជំហរវិញ ដោយអនុញ្ញាតឲ្យម៉ាឡេស៊ីដឹកជំនួយចូល តែតម្រូវឲ្យគោរពតាមលក្ខខណ្ឌពីរ។ ទីមួយ កប៉ាល់នេះមិនអាចធ្វើដំណើរដោយផ្ទាល់ទៅដល់រដ្ឋអារ៉ាកាន់នោះទេ គឺត្រូវចូលចតត្រឹមក្រុងរ៉ង់ហ្គូន ហើយជំនួយត្រូវដឹកជញ្ជូនទៅរដ្ឋអារ៉ាកាន់តាមផ្លូវគោក។ លក្ខខណ្ឌទី២ ជំនួយនេះត្រូវតែធ្វើការចែកចាយទាំងទៅដល់ជនជាតិរ៉ូហ៊ីងយ៉ា និងអ្នកកាន់ពុទ្ធសាសនា។
គួរបញ្ជាក់ថា ការដឹកជំនួយរបស់ម៉ាឡេស៊ីទៅឲ្យជនជាតិរ៉ូហ៊ីងយ៉ានេះត្រូវបានធ្វើឡើងតែប៉ុន្មានថ្ងៃប៉ុណ្ណោះ ក្រោយពីអ.ស.ប.បានចេញផ្សាយរបាយការណ៍មួយ បរិហាររិះគន់យ៉ាងធ្ងន់ៗទៅលើកងកម្លាំងប្រដាប់អាវុធភូមាថា បានធ្វើយុទ្ធនាការប្រឆាំងនឹងពួករ៉ូហ៊ីងយ៉ា ដោយបានធ្វើសកម្មភាពរំលោភ ទារុណកម្ម និងការសម្លាប់រង្គាល។ ក្រុមស៊ើបអង្កេតរបស់អ.ស.បក៏បានលើកឡើងផងដែរថា សកម្មភាពអស់ទាំងនេះ គឺធ្វើឡើងនៅក្នុងក្របខ័ណ្ឌនៃគោលនយោបាយរបស់កងទ័ពភូមាក្នុងការប្រឆាំងនឹងពួករ៉ូហ៊ីងយ៉ា ហើយដែលអាចត្រូវចាត់ទុកជាយុទ្ធនាការ “សម្អាតជាតិសាសន៍”។
ដូចជារៀងរាល់លើក របាយការណ៍ស៊ើបអង្កេតនេះត្រូវបានច្រានចោលដោយអាជ្ញាធរភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ