បាតុកម្មនៅអាមេរិកក្រោយពីជនសង្ស័យសម្លាប់យុវជនស្បែកខ្មៅត្រូវតុលាការកាត់ឲ្យរួចទោស
ចុះផ្សាយនៅថ្ងៃ៖
កាលពីថ្ងៃអាទិត្យម្សិលមិញ បាតុកម្មបានផ្ទុះឡើង នៅតាមបណ្តាក្រុងធំៗជាច្រើន ស្ទើរតែពាសពេញសហរដ្ឋអាមេរិក ដើម្បីប្រឆាំងនឹងសេចក្តីសម្រេចរបស់តុលាការរដ្ឋ Florida ដែលបានកាត់ឲ្យបុរសស្បែក ស George Zimmerman រួចទោស ពីបទសម្លាប់យុវជនស្បែកខ្មៅ Trayvon Martin។ លោកអូបាម៉ាបានអំពាវនាវឲ្យគ្រប់គ្នាមានការអត់ធ្មត់ និងធ្វើការពិចារណាដោយភាពស្ងប់ស្ងៀម។ លោកប្រធានាធិបតីអាមេរិកបានចាត់ទុកការស្លាប់របស់យុវជនស្បែកខ្មៅ Trayvon Martin ថា ជាសោកនាដកម្មមួយ ក៏ប៉ុន្តែថា ប្រទេសមានច្បាប់ ហើយតុលាការជាអ្នកសម្រេចសេចក្តី។
សំណួរ-តើដំណើររឿងហេតុពីដំបូងវាយ៉ាងម៉េចខ្លះ ដែលនាំមកដល់បញ្ហាចម្រូងចម្រាសនៅពេលនេះ?
ដំណើរឿងដំបូង កើតឡើង កាលពីយប់ថ្ងៃទី២៦ កុម្ភៈ ឆ្នាំ២០១២ នៅក្នុងរដ្ឋ Florida។ នៅយប់នោះ Trayvon Martin យុវជនអាមេរិកស្បែកខ្មៅ កំពុងដើរសំដៅទៅផ្ទះ ហើយ George Zimmerman ជនជាតិអាមេរិកស្បែក ស មានដើមកំណើតពីប្រទេសនិយាយភាសាអេស្ប៉ាញ (និងជាអ្នកស្ម័គ្រចិត្តធ្វើឆ្មាំចាំយាមសង្កាត់) ឃើញ Martin ក៏មានការសង្ស័យថាជាក្មេងខូច ក៏ទូរស័ព្ទប្រាប់ប៉ូលិស។
ប៉ូលិសបានប្រាប់ទៅ Zimmerman វិញថា កុំឲ្យគាត់តាមពីក្រោយយុវជន Martin ហើយទុកឲ្យប៉ូលិសជាអ្នកចាត់ការ ព្រោះភ្នាក់ងារប៉ូលិសកំពុងធ្វើដំណើរទៅកន្លែងនោះហើយ។ Zimmerman មិនស្តាប់ ក៏តាម Martin ពីក្រោយ។ បន្ទាប់មក មានការប្រតាយប្រតប់គ្នា ហើយ Zimmerman ដកកាំភ្លើងបាញ់សម្លាប់ Trayvon Martin។
នៅក្នុងការវាយប្រតាយប្រតប់គ្នានេះ រឿងពិតយ៉ាងម៉េចមិនមានអ្នកណាដឹងទេ ក្រៅតែពី Zimmerman ព្រោះមិនមានសាក្សីឃើញហេតុការណ៍ផ្ទាល់ភ្នែក ហើយ Trayvon Martin ស្លាប់បាត់ទៅហើយ។ អ្វីដែលគេដឹង គឺត្រឹមតែថា Martin ដៃទទេគ្មានអាវុធ ចំណែកឯ Zimmerman មានកាំភ្លើង ដែលគាត់កាន់កាប់ដោយស្របច្បាប់។
សំណួរ-អាមេរិកជាប្រទេសជើងឯកខាងប្រជាធិបតេយ្យ និងនីតិរដ្ឋ។ ហេតុអ្វីបានជាមានករណីតុលាការកាត់ឲ្យជនដៃដល់រួចទោស រហូតបង្កជាបាតុកម្មប្រឆាំងគគ្រឹកគគ្រេងបែបនេះ?
បញ្ហាដែលចោទ ក្នុងសំណុំរឿង Zimmerman នេះ វាជាបញ្ហាទាក់ទងនឹងការស៊ើបអង្កេតរបស់ប៉ូលិស ការខ្វះភស្តុតាង និងសាក្សីដាក់បន្ទុកលើ Zimmerman ជាជាងបញ្ហាអព្យាក្រឹត្យ ឬឯករាជ្យរបស់តុលាការ។
គួរបញ្ជាក់ថា ការសម្រេចឲ្យ Zimmerman រួចទោស គឺធ្វើឡើងដោយគណៈវិនិច្ឆ័យ ដែលមានគ្នា ៦នាក់ សុទ្ធសឹងជាប្រជាពលរដ្ឋសាមញ្ញធម្មតា។ បើតាមមើលទៅ ការសម្រេចរបស់គណៈវិនិច្ឆ័យទាំង ៦នាក់នេះ គឺធ្វើឡើងទៅតាមគោលការណ៍នៃច្បាប់ព្រហ្មទណ្ឌ ដែលថា “វិមតិសង្ស័យត្រូវបានជាប្រយោជន៍ដល់ជនជាប់ចោទ”។ នៅក្នុងច្បាប់អាមេរិកគោលការណ៍នេះ គេកំណត់ថា គេអាចកំណត់ថាជនណាមួយមានទោសបាន លុះត្រាតែគេមានមូលដ្ឋានសំអាងជាក់លាក់បំផុត ដោយគ្មានមន្ទិលសង្ស័យ (Reasonable Doubt)។
នៅក្នុងសំណុំរឿង Zimmerman នេះ គណៈវិនិច្ឆ័យបានជជែកដេញដោលគ្នាអស់រយៈពេល ១៦ម៉ោងកន្លះ ហើយគេមើលឃើញថា ភស្តុតាងដាក់បន្ទុកលើ Zimmerman មានមិនគ្រប់គ្រាន់ ដែលធ្វើឲ្យគេនៅមានមន្ទិលសង្ស័យលើពិរុទ្ធភាពរបស់គាត់ ទើបគេសម្រេចឲ្យគាត់រួចទោស។
សំណួរ-គេដឹងថា មនុស្សពីរនាក់ប្រតាយប្រតប់គ្នា ម្នាក់មានកាំភ្លើង ម្នាក់ទៀតដៃទទេ ហើយអ្នកមានកាំភ្លើង បាញ់សម្លាប់ អ្នកដៃទទេ។ តើមានអ្វីដែលជាចំណុចគួរឲ្យមន្ទិលសង្ស័យទៀត?
តាមពិត ចំណុចដែលគួរឲ្យមន្ទិលសង្ស័យ មិនមែននៅត្រង់ថា តើ Zimmerman បានបាញ់សម្លាប់ Trayvon Martin ដែរឬក៏អត់ទេ។ Zimmerman ពិតជាបានបាញ់សម្លាប់ Martin មែន។ Zimmerman ខ្លួនឯងផ្ទាល់ក៏បានទទួលស្គាល់ ហើយថែមទាំងបានទូរស័ព្ទទៅប្រាប់ប៉ូលិសផង ក្រោយពីបាញ់សម្លាប់ Martin រួចហើយ។ ក៏ប៉ុន្តែ Zimmerman បានអះអាងថា គាត់បាញ់សម្លាប់ Trayvon Martin នេះ ក្នុងសិទ្ធិការពារខ្លួន ព្រោះ Martin បានវាយប្រហារមកលើរូបគាត់ ចាប់គាត់ផ្តួល ជាន់ពីលើគាត់ ហើយបោកក្បាលគាត់ទៅដី ទើបគាត់ដកកាំភ្លើងបាញ់ ដើម្បីការពារអាយុជីវិតខ្លួនឯង។
ចំណុចដែលគណៈវិនិច្ឆ័យនៅមន្ទិលសង្ស័យ ហើយដែលមានភស្តុតាង និងសាក្សីមកបញ្ជាក់ច្បាស់លាស់ គឺនៅត្រង់ចំណុចថា តើ Zimmerman ដកកាំភ្លើងបាញ់សម្លាប់ Trayvon Martin ដោយកំហឹង ដោយសម្អប់ ឬក៏ដោយសារតែការពារខ្លួនពិតប្រាកដមែន?
បញ្ហាមួយដែលចោទ គឺនៅត្រង់និយមន័យនៃសិទ្ធិការពារខ្លួន។ បើនៅក្នុងច្បាប់ព្រហ្មទណ្ឌខ្មែរ ក៏ដូចជា ច្បាប់បារាំង សិទ្ធិការពារខ្លួនអាចប្រើបាន តែនៅពេលណា ដែលយើងមិនមានមធ្យោបាយអ្វីផ្សេង ដើម្បីទប់ទល់ ឬគេចពីការវាយប្រហារពីអ្នកដទៃបាន ហើយមធ្យោបាយការពារខ្លួននេះចាំបាច់ត្រូវតែឲ្យសមាមាត្រនឹងអំពើវាយប្រហារ។
ចំពោះករណី Zimmerman នេះ យើងឃើញថា Trayvon Martin ដៃទទេ ហើយ Zimmerman ប្រើកាំភ្លើង ដូច្នេះ ជាមធ្យោបាយការពារខ្លួនដែលមិនសមាមាត្រ ហើយជាពិសេសទៅទៀត Zimmerman ជាអ្នកដេញតាម Trayvon Martin។ ប៉ូលិសប្រាប់ថា កុំឲ្យដេញតាម គាត់នៅតែដេញតាមទៀត។ ដូច្នេះ បើតាមច្បាប់ខ្មែរ ឬច្បាប់បារាំង គាត់ពិបាកនឹងលើកយកសិទ្ធិការពារខ្លួនមកប្រើនៅមុខតុលាការ។
ក៏ប៉ុន្តែ នៅអាមេរិក សិទ្ធិការពារខ្លួននេះ វាខុសពីច្បាប់ខ្មែរ ឬច្បាប់បារាំង។ ជាពិសេស នៅក្នុងរដ្ឋ Florida ក៏ដូចជា រដ្ឋប្រហែលជា ២០ផ្សេងទៀត គេបង្កើតច្បាប់មួយ ដែលគេឲ្យឈ្មោះថា « Stand Your Ground »។ ច្បាប់នេះអនុញ្ញាតឲ្យជនណាក៏ដោយ ដែលទទួលរងនូវការវាយប្រហារ ឬក៏យល់ថា មានការគំរាមកំហែងដល់អាយុជីវិតដល់ខ្លួន អាចប្រើកម្លាំងតបតវិញភ្លាមៗ ដោយមិនចាំបាច់ព្យាយាមរត់គេចទេ ហើយមធ្យោបាយតបតនោះអាចប្រើបាន បើទោះបីជាវាអាចប៉ះពាល់ដល់អាយុជីវិតក៏ដោយ។
ដូច្នេះ បើនិយាយឲ្យចំទៅ បញ្ហាចម្រូងចម្រាស ទាក់ទងនឹងសំណុំរឿង Zimmerman នេះ វាជាបញ្ហាច្បាប់ ច្រើនជាងបញ្ហាតុលាការ ពោលគឺ បញ្ហាច្បាប់ស្តីពីសិទ្ធិការពារខ្លួន និងបញ្ហាច្បាប់ស្តីពីការគ្រប់គ្រងការកាន់កាប់អាវុធ។
ក៏ប៉ុន្តែ អ្នកដែលនាំគ្នាចេញធ្វើបាតុកម្ម ប្រឆាំងនឹងសេចក្តីសម្រេចឲ្យ Zimmerman រួចទោស គេគិតថា ដោយសារតែ Trayvon Martin ជាជនជាតិស្បែកខ្មៅ ទើប Zimmerman យល់ថាជាក្មេងខូច ហើយដេញតាម រហូតនាំឲ្យមានការប្រតាយប្រតប់គ្នា។ ម្យ៉ាងទៀត គេយល់ថា បើសិនជា Zimmerman ជាជនជាតិស្បែកខ្មៅ ហើយ Trayvon Martin ជាជនជាតិស្បែក ស វិញ ប្រហែលជាតុលាការកាត់ឲ្យ Zimmerman ចាប់ទោសបានទៅហើយ។ ដូច្នេះ គេនាំគ្នាគិតថា នេះវាជាបញ្ហាទាក់ទងនឹងការរើសអើងប្រកាន់ពណ៌សម្បុរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ