ក្នុងនាមជាម្ចាស់ផ្ទះរៀបចំការប្រកួតបាល់ទាត់ពិភពលោក ឆ្នាំ២០២២ ប្រទេសកាតា បានទទួលយកពលករបរទេសយ៉ាងសន្ធឹកសន្ធាប់ អោយចូលមកធ្វើការសាងសង់ហេដ្ឋារចនាសម្ព័ន្ធ ក្នុងទឹកដីខ្លួន។ ប៉ុន្តែ កាតាជាប្រទេសអ្នកមានដ៏ល្បីល្បាញក្នុងពិភពលោកនោះ មិនមែនជាកន្លែងផ្តល់ប្រាក់ខែខ្ពស់អោយដល់ពលករបរទេសនោះទេ។ ពលករបរទេសត្រូវបានគេរំលោភសិទ្ធិធ្ងន់ធ្ងរ ពលករច្រើននាក់ថែមទាំងត្រូវបានបាត់បង់ជីវិត ក្នុងពេលបំពេញការងារនៅកាតាទៀតផង។
ក្នុងនាមជាម្ចាស់ផ្ទះរៀបចំការប្រកួតបាល់ទាត់ពិភពលោក ឆ្នាំ២០២២ ប្រទេសកាតាបាននាំពលករបរទេសយ៉ាងច្រើនសន្ធឹកសន្ធាប់អោយចូលមកក្នុងទឹកដីខ្លួន ដើម្បីសាងសង់ហេដ្ឋារចនាសម្ព័ន្ធ បែបយ៉ាងផ្លូវរថភ្លើង អាកាសយានដ្ឋាន សណ្ឋាគារ រឺក៏ទីលានកីឡាជាដើម។ ពលករបរទេសនៅកាតា មានរហូតដល់១លាន៤សែននាក់។ ពលករមកពីអាស៊ីអាគ្នេយ៍មាន ៨០ភាគរយ ក្នុងចំណោមប្រជាជន២លាននាក់ នៅកាតា ហើយ ភាគច្រើនជាជនជាតិឥណ្ឌា ស្រីលង្កា នេប៉ាល់ និងបង់ក្លាដែស។
ពលករបរទេសមកបំរើការងារនៅកាតា សុទ្ធតែស្រមៃនិងសង្ឃឹមថា អាចផ្ញើប្រាក់ខែដែលខ្លួនរកបាននៅកាតា យកទៅជួយគ្រួសារក្នុងទឹកដីកំណើត រឺក៏សន្សំប្រាក់ខែដណ្តឹងប្រពន្ធ សាងសង់ផ្ទះជាដើម។ ប៉ុន្តែ នៅកាតា ក្តីស្រមៃនិងក្តីសង្ឃឹមទាំងអស់នេះ បានរលាយដូចអំបិលត្រូវទឹក។ មូលហេតុគឺថា សិទ្ធិពលករបរទេស ពុំត្រូវបានគេគោរពពេញលេញនោះទេ។ កាតាជាប្រទេសអ្នកមានមែនពិត តែប្រាក់ខែមធ្យមដែលពលករទទួលបានមានត្រឹមតែ១៥០ដុល្លារប៉ុណ្ណោះ។ បណ្តាក្រុមហ៊ុនដែលជ្រើសរើសមនុស្សអោយទៅបំរើការនៅកាតា បានទៅរកមនុស្សនៅតាមភូមិដាច់ស្រយាលនៅប្រទេសនេប៉ាល់ ឥណ្ឌា រឺក៏ស្រីលង្កាជាដើម។ ពលករបរទេសទាំងនេះ ត្រូវបានក្រុមហ៊ុនទុច្ចរិត កិបកេងប្រយោជន៍។ ពេលចុះពីយន្តហោះទៅដល់កាតា ពលករបរទេសត្រូវបង់ផលចំណេញ៣០ភាគរយ អោយទៅក្រុមហ៊ុនការងារទាំងនេះ។ លើសពីនេះ ថ្លៃសំបុត្រយន្តហោះ និងវីសាគឺជាបន្ទុករបស់ពលករផ្ទាល់ ដូច្នេះពលករត្រូវបង្ខំចិត្តជំពាក់បំណុល ដើម្បីដោះស្រាយបញ្ហានេះ។
ដោយឡែក ពេលបានបំរើការនៅកាតារួចមក ពលករបរទេសច្រើននាក់ នៅមិនទាន់មានក្រដាសស្នាមស្របច្បាប់នោះទេ។ ថៅកែបានកិបកេងប្រាក់ខែ រឺមិនបើកអោយពួកគេបានគ្រប់ចំនួន តាមពេលវេលាកំណត់។ ថៅកែខ្លះបានដកហូតទិដ្ឋាការឆ្លងដែនពលករទុក ដើម្បីកុំអោយពួកគេរត់គេចពីការងារ។
ប្រាកដណាស់ ដើម្បីកសាងផ្លូវរថភ្លើង សណ្ឋាគារ ដ៏មហាសាល លើកស្ទួយមុខមាត់ប្រទេសកាតា ក្នុងការរៀបចំការប្រកួតបាល់ទាត់ពិភពលោក ឆ្នាំ២០២២ ពលករបរទេសត្រូវគេបង្ខំអោយធ្វើការហួសកម្លាំង ក្រោមកំដៅថ្ងៃ៥០អង្សា គ្មានម៉ោងសម្រាកគ្រប់គ្រាន់ ប្រៀបបានទៅនឹងទាសករ។ ពួកគេគ្មានកន្លែងស្នាក់នៅសមស្រប កម្មករជាង១០នាក់ ដេកក្នុងបន្ទប់តែមួយ ហើយថៅកែមួយមិនបានផ្តល់ភួយ កន្ទេលអោយពួកគេនោះទេ។
ដោយសារធ្វើការបាក់កម្លាំង ពលករច្រើននាក់បានធ្លាក់ខ្លួនឈឺរហូតស្លាប់។ ក្នុងក្របខណ្ឌការងារនៅកាតា មានប្រព័ន្ធមួយឈ្មោះថា កាឡាហ្វា បានប្រព័ន្ធផ្តល់សិទ្ធិអោយថៅកែហាមឃាត់ពលករ មិនអោយបំរើការងារកន្លែងផ្សេង អោយថៅកែដកហូតលិខិតឆ្លងដែនពលករទុកបាន។ នៅកាតា ពលករគ្មានសិទ្ធិធ្វើកូដកម្មអ្វីនោះទេ។ ដូច្នេះ ពលករទោះជាមកពីប្រទេសលោកខាងលិចក៏ដោយចុះ ពិបាកនឹងរត់ចេញពីកាតាបានស្រួលណាស់។
កាសែតប្រចាំថ្ងៃអង់គ្លេស ឈ្មោះថា The Gardian ធ្លាប់បានចុះផ្សាយថា ចន្លោះខែមិថុនា និងខែសីហា ឆ្នាំ២០១៣ កម្មករជនជាតិនេប៉ាល់ ៤៤នាក់ ដែលបំរើការងារការដ្ឋានសំណង់នៅកាតា បានបាត់បង់ជីវិត។ ពលករឥណ្ឌាស្លាប់ នៅកាតា ក្នុងឆ្នាំ២០១២ មាន២៣៧នាក់។ សម្រាប់៩ខែដំបូងក្នុងឆ្នាំ២០១៣ ពលករនេប៉ាល់ដែលស្លាប់នៅកាតាវិញ មានដល់១៥៩នាក់។ ប្រភពមិនបញ្ចេញអត្តសញ្ញាណអាចយកជាការបានមួយ បានប្រាប់ថា ការស្លាប់របស់ពលករ៥០ទៅ៦០ភាគរយ គឺបណ្តាលមកពីបញ្ហាបេះដូង។
កន្លងមក សមាជិកសហជីពការងារផ្នែកសំណង់និងឈើ ត្រូវបានក្រុមហ៊ុនសាងសង់បារាំងមួយ បដិសេធមិនអោយចូលទៅត្រួតពិនិត្យលក្ខខណ្ឌការងារនៅការដ្ឋានខ្លួន។ ការត្រួតពិនិត្យស៊ើបអង្កេតលើការរំលោភសិទ្ធិការងារនៅកាតា ពិបាកនឹងធ្វើបានស្រួល អ្នកស៊ើបអង្កេតមិនទាន់មានចំនួនគ្រប់គ្រាន់ ហើយប្រព័ន្ធច្បាប់នៅកាតាទៀតសោត នៅយឺតយ៉ាវ ដូច្នេះ ការរំលោភសិទ្ធិមនុស្ស បំពានសិទ្ធិពលករការងារ នៅតែកើតមានជាប្រចាំ។
ផ្ទុយទៅវិញ នៅចំពោះមុខស្ថានភាពទាំងនេះ អាជ្ញាធរកាតាបែរជាបិទភ្នែក ហើយថែមទាំងចោទកាសែតអង់គ្លេសដែលបានចុះផ្សាយពីការស្លាប់របស់ពលករនេប៉ាល់នោះ ថាបានបំផ្លើសព័ត៌មានទៀតផង។ ក្រសួងការងារកាតាថែមទាំងអួត ថា បណ្តាសហគ្រាសមានវត្តមាននៅកាតា បានគោរពលក្ខខណ្ឌការងារបាន៩៩ភាគរយឯណោះ។
ក្រោយពេលរឿងអាស្រូវស្លាប់ពលករបរទេសបានផ្ទុះឡើង រហូតដល់មានប្រតិកម្មពីអង្គការសហប្រជាជាតិ រដ្ឋាភិបាលកាតាបានដុតដៃដុតជើង ធ្វើកំណែទម្រង់សម្រេចបាននូវកាតិកាសញ្ញាកែលម្អលក្ខខណ្ឌការងារមួយ កាលពីថ្ងៃ១១កុម្ភៈថ្មីៗនេះ។ ប៉ុន្តែ កាតិកាសញ្ញានេះមិនបានចែងទាក់ទងប្រព័ន្ធកាហ្វាឡា ដែលបានគាបសង្កត់សិទ្ធិពលករ ហើយដែលអង្គការសហប្រជាជាតិធ្លាប់សុំអោយលុបចោលនោះទេ។
គួរបញ្ជាក់ដែរថា ដោយសារការរំលោភសិទ្ធិពលករបរទេសនេះ កន្លងមក ធ្លាប់មានការទាមទារជាច្រើនអោយផ្លាស់ប្តូរប្រទេសរៀបចំការប្រកួតបាល់ទាត់ពិភពលោកទៀតផង។ ទន្ទឹមនេះដែរ កន្លងមក កាតាធ្លាប់បានគេសង្ស័យថា បានសូកប៉ាន់ទិញសន្លឹកឆ្នោតពីសមាជិកមួយចំនួននៃសហព័ន្ធហ្វ៊ីហ្វា ដើម្បីជាប់ឈ្មោះជាម្ចាស់ផ្ទះរៀបចំការប្រកួតបាល់ទាត់ពិភពលោកនេះ។ ប៉ុន្តែ នៅសប្តាហ៍មុននេះ សហព័ន្ធបាល់ទាត់អន្តរជាតិFIFA ប្រាប់ថា ការប្រកួតបាល់ទាត់ពិភពលោកឆ្នាំ២០២២ នឹងប្រព្រឹត្តទៅនៅកាតា ដូចការគ្រោងទុកដដែល។
ដូច្នេះ គេអាចនិយាយបានថា ក្នុងនាមជាប្រទេសអ្នកមានដូចកាតា អ្នកណាអ្នកណាក៏ញញើតដែរ។ ទោះជាបានមើលឃើញថា ពលករបរទេសត្រូវបានគេរំលោភសិទ្ធិធ្ងន់ធ្ងរនៅកាតាក៏ដោយចុះ សហព័ន្ធFIFA ប្រាប់ថា មិនអាចលូកដៃចូលកិច្ចការផ្ទៃក្នុងកាតានោះទេ តែសហព័ន្ធសង្ឃឹមថា ព្រឹត្តិការណ៍ពិភពលោកមួយនេះអាចជួយកែលម្អស្ថានភាពសិទ្ធិមនុស្សក្នុងប្រទេសនេះបាន។ សរុបសេចក្តីទៅមុនការប្រកួតបាល់ទាត់ពិភពលោកនេះ ពលករបរទេសមានតែធ្មេចភ្នែកបន្តធ្វើជាជនរងគ្រោះ រង់ចាំកិច្ចសន្យាការងារផុតកំណត់ប៉ុណ្ណោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ