តើក្រុម« ភាតរអ៊ីស្លាម » នៅអេហ្ស៊ីបជានរណា និងមានកំណើតយ៉ាងដូចម្តេច ?
ចុះផ្សាយនៅថ្ងៃ៖
ស្តាប់ - ០៥:០០
នៅក្នុងប្រទេសអេហ្ស៊ីប ប៉ុន្មានថ្ងៃ ក្រោយពីក្រុមប៉ូលិសបានបើកប្រតិបត្តិការវាយបំបែកហ្វូងបាតុកររបស់ក្រុម « ភាតរអ៊ីស្លាម » មក ស្ថានការណ៍នយោបាយនៅបន្តតានតឹង និងរំជើបរំជួល។ សូមជម្រាបជូនថា វិបត្តិនយោបាយចុងក្រោយនៅអេហ្ស៊ីបបានកើតមានឡើង បន្ទាប់ពីមានរដ្ឋប្រហារយោធាទម្លាក់លោកប្រធានាធិបតីជាប់ឆ្នោតម៉រស៊ីចេញពីអំណាចកាលពីថ្ងៃទី៣ កក្កដា ឆ្នំា ២០១៣។ រដ្ឋប្រហារយោធាទម្លាក់លោកម័រស៊ីដែលក្រុម « ភាតរអ៊ីស្លាម » មិនអាចទទួលយកបានទេ។ តើក្រុម « ភាតរអ៊ីស្លាម » នៅអេហ្ស៊ីបជានរណា និងមានកំណើតយ៉ាងដូចម្តេច ?
ចលនា « ភាតរអ៊ីស្លាម » គឺជាចលនាមួយដែលមានវ័យចំណាស់ជាងគេ និងមានឥទ្ធិពលខ្លំាងនៅក្នុងប្រទេសអេហ្ស៊ីប។ បង្កើតឡើងក្នុងឆ្នំា ១៩២៨ ដោយលោកហាស់សាន អាល់ បានណា ចលនា « ភាតរអ៊ីស្លាម » ត្រូវបានបង្កើតដំបូងក្រោមរូបភាពជាសមាគមមួយយ៉ាងសាមញ្ញដើម្បីចូលរួមក្នុងសកម្មភាពសង្គម។ តែបន្តិចម្តងៗ ចលនាមួយនេះបានផ្តើមប្រែមុខមាត់ក្នុងគោលដៅនយោបាយ។ នៅក្នុងសមាជលើកទីមួយក្នុងឆ្នំា ១៩៣៣ ចលនា « ភាតរអ៊ីស្លាម » មានសមាជិក ២ ០០០នាក់ មួយឆ្នំាក្រោយមក មាន ៤០ ០០០នាក់ ១០ឆ្នំាបន្ទាប់មក ពោលក្នុងឆ្នំា ១៩៤៣ សមាជិករបស់ចលនាមួយនេះបានកើនជាង ២០ម៉ឺននាក់ ហើយមកដល់សព្វថ្ងៃ គឺមានរាប់សិបលាននាក់ឯណោះ។
គោលដៅសំខាន់របស់ចលនា « ភាតរអ៊ីស្លាម » គឺស្ថាបនារដ្ឋអ៊ីស្លាមតាមបែបប្រជាធិបតេយ្យដោយដាក់បញ្ចូលច្បាប់អ៊ីស្លាម « la charia » នៅក្នុងច្បាប់រដ្ឋធម្មនុញ្ញ។ បាវចនារបស់ចលនា « ភាតរអ៊ីស្លាម » ត្រូវបានសង្ខេបតាមឧត្តមគតិរបស់ពួកគេដូចខាងក្រោម៖ ព្រះអាឡា ជាទិសដៅរបស់យើង ព្យាការី ជាមេដឹកនំារបស់យើង គម្ពីរសាសនាកូរ៉ង់ ជារដ្ឋធម្មនុញ្ញរបស់យើង សង្រ្គាមជីហាត ជាផ្លូវរបស់យើង រីឯក្តីសង្ឃឹមរបស់យើង គឺការស៊ូស្លាប់ដើម្បីជំនឿ។
ក្រៅពីមានឥទ្ធិពលខ្លំាងនៅក្នុងប្រទេសអេហ្ស៊ីប ចលនា « ភាតរអ៊ីស្លាម » ក៏បានផ្សព្វផ្សាយលទ្ធិរបស់ខ្លួន ព្រមទំាងបានបង្កើតសាខាជាច្រើននៅក្នុងពិភពអ៊ីស្លាម និយាយជារួម និងនៅក្នុងបណ្តារប្រទេសដែលសម្បូរអ្នកកាន់សាសនាអ៊ីស្លាមរស់នៅ និយាយដោយឡែក។ ខុសពីអ្វីដែលបានសន្យាតស៊ូប្រយុទ្ធមិនប្រើអំពើហិង្សា ចលនា « ភាតរអ៊ីស្លាម » បានចូលរួមយ៉ាងសកម្មនៅក្នុងសង្រ្គាមប្រឆំាងប្រទេសអ៊ីស្រាអែលក្នុងឆ្នំា ១៩៤៨។ ក្នុងឆ្នំា ១៩៤៨ ដដែលនោះ ចលនាមួយនេះបានធ្វើឃាតលោក Mahmud Fahmi Nokrashi នាយករដ្ឋមន្រ្តីអេហ្ស៊ីបជំនាន់នោះ។ ជាការសងសឹកវិញ ចលនា « ភាតរអ៊ីស្លាម » ត្រូវបានរដ្ឋអំណាចអេហ្ស៊ីបបិទសកម្មភាព រីឯសា្ថបនិករបស់ចលនានេះ គឺលោកហាស់សាន អាល់ បានណា ក៏ត្រូវបានភ្នាក់ងារសម្ងាត់អេហ្ស៊ីបសំលេះចោលនៅថ្ងៃទី១២ កុម្ភៈ ឆ្នំា ១៩៤៩។
នៅពេលនោះឯង ដែលចលនា « ភាតរអ៊ីស្លាម » បានទទួលរងការវាយបង្រ្កាប និងធ្វើទុក្ខបុកម្នេញយ៉ាងហិង្សាពីកម្លំាងរដ្ឋាភិបាល។ នៅដើមទសវត្សឆ្នំា ៥០ សហរដ្ឋអាមេរិកបានផ្តើមទាក់ទងចលនា « ភាតរអ៊ីស្លាម » ដើម្បីប្រឆំាងនឹងលោកប្រធានាធិបតីអេហ្ស៊ីប Gamal Abdel Nasser ព្រមទំាងរបបកុម្មុយនិស្ត និងសង្គមនិយមក្នុងប្រទេសមួយចំនួននៅដើមបូព៌ានាសម័យនោះ។ ក្នុងរយៈពេលសម័យសង្រ្គាមត្រជាក់ ពោលចាប់ពីឆ្នំា ១៩៥៦ ចលនា « ភាតរអ៊ីស្លាម » បានទទួលជំនួយជាលុយកាក់ និងគ្រឿងសព្វាវុធយ៉ាងសំបើមពីក្រសួងស៊ើកការសម្ងាត់អាមេរិក CIA ដើម្បីធ្វើឲ្យខ្សោយ និងកាច់បំបាក់រដ្ឋអំណាចអេហ្ស៊ីបរបស់លោក Nasser ដែលគំាទ្រដោយសហភាពសូវៀត។
ចន្លោះឆ្នំា ១៩៥៤-១៩៧៤ លោក Nasser បានប្រើធម៌ក្តៅវាយបង្រ្កាបក្រុម « ភាតរអ៊ីស្លាម » ក្នុងថ្លុកឈាម ព្រមទំាងចាប់ពួកនេះញាត់គុកជាច្រើនពាន់នាក់។ ក្រោយមកក្នុងឆ្នំា ១៩៧១ ទើបអ្នកស្នងតំណែងពីលោក Nasser គឺលោក Anouar el-Sadate បានសម្រេចដោះលែង ព្រមទំាងលើកលែងទោសឲ្យសមាជិករបស់ចលនា « ភាតរអ៊ីស្លាម » ទំាងអស់។ តែចាប់ពីឆ្នំា ១៩៧៩ មក ក្រុម « ភាតរអ៊ីស្លាម » អ្នកជ្រុលនិយមបានផ្ទុះកំហឹង និងបានបាញ់សម្លាប់លោក Sadate ក្នុងឆ្នំា ១៩៨១ ដោយសារតែលោកបានចុះហត្ថលេខាលើកិច្ចព្រមព្រៀងសន្តិភាពជាមួយប្រទេសអ៊ីស្រាអែល។
ក្នុងឆ្នំា ១៩៨៤ ចលនា « ភាតរអ៊ីស្លាម » ត្រូវបានរដ្ឋាភិបាលថ្មីរបស់លោកប្រធានាធិបតីមូបារ៉ាក់ទទួលស្គាល់ត្រឹមតែជាអង្គការសាសនាមួយ ដោយមិនអនុញ្ញាតឲ្យចូលប្រឡូកក្នុងឆាកនយោបាយទេ។ តែបញ្ហានៅត្រង់ថា សមាជិករបស់ចលនាមួយនេះបានបញ្ជ្រៀតចូលក្នុងជីវិតនយោបាយដោយប្រើស្លាកសញ្ញារបស់គណបក្សផ្សេង។ ជាក់ស្តែងនៅក្នុងការបោះឆ្នោតសភាឆ្នំា ២០០៥ ចលនា « ភាតរអ៊ីស្លាម » ទទួលបានអសនៈ ៨៨ នៅក្នុងចំណោមអសនៈទំាង ៤៥៤ នៅក្នុងរដ្ឋសភា។
គួរជម្រាបជូនថា ចលនា « ភាតរអ៊ីស្លាម » ដែលត្រូវបានរដ្ឋអំណាចគ្រប់ជំនាន់តាមគាបសង្កត់ជាប់ជាប្រចំានោះ បានប្តូរយុទ្ធសាស្រ្តរបស់ខ្លួនតាមរយៈតួនាទីសង្គមយ៉ាងសកម្មជួយប្រជាជន ពិសេសប្រជាជនក្រីក្ររស់នៅតាមទីជនបទ។ ចលនា « ភាតរអ៊ីស្លាម » បានសាងសង់មន្ទីរពេទ្យ សាលារៀន ធនាគារ ព្រមទំាងមជ្ឈមណ្ឌលអប់រំផ្សេងៗទៀត។ គឺផ្តើមចេញពីចំណុចនេះហើយ ដែលចលនា « ភាតរអ៊ីស្លាម » ទទួលបានជោគជ័យនៅក្នុងការបោះឆ្នោតកាលពីឆ្នំា ២០១២។ តែឥឡូវនេះ និងបន្ទាប់ពីបានកាន់អំណាចបាន ១ឆ្នំាមក លោកប្រធានាធិបតីម៉រស៊ីក៏ត្រូវបានកងទ័ពកំចាត់ចេញពីអំណាចបាត់។ ការទម្លាក់លោកម៉រស៊ីចេញពីអំណាចដែលបានធ្វើក្រុម « ភាតរអ៊ីស្លាម » ក្តៅក្រហាយយ៉ាងខ្លំាងនាពេលនេះ។
តើប្រទេសអេហ្ស៊ីបកំពុងធ្វើដំណើរវិលទៅរកទ្រនំចាស់ មុនបដិវត្តន៍ឆ្នំា ២០១១ ឬយ៉ាងណា?។ គេគួរតែទុកឲ្យប្រជាជនអេហ្ស៊ីបជាអ្នកកំណត់ជោគវាសនាដោយខ្លួនឯងចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ