ថ្ងៃសុក្រ ថ្ងៃកំហឹង ក្រុមភាតរអ៊ីស្លាមអេហ្ស៊ីបមិនព្រមចុះចាញ់
នៅថ្ងៃសុក្រនេះ ភាពតានតឹងនៅតែបន្តមាន នៅប្រទេសអេហ្ស៊ីប។ ក្រុមភាតរអ៊ីស្លាមគាំទ្រអតីតប្រធានាធិបតីមរស៊ី បានអំពាវនាវអោយប្រជាជនយកថ្ងៃសុក្រនេះ ធ្វើជាថ្ងៃកំហឹង ប្រឆាំងនឹងការបង្ក្រាបបាតុករដែលធ្វើឡើងដោយកងទ័ពអេហ្ស៊ីប កាលពីថ្ងៃពុធកន្លងទៅ ដែលបានបណ្តាលអោយមានមនុស្សជាង៦០០នាក់ស្លាប់ និងរងរបួសរាប់ពាន់នាក់។ ការអំពាវនាវនេះ អាចនឹងធ្វើអោយមានអំពើហិង្សាសារជាថ្មី ព្រោះថា នៅពេលនេះ កងទ័ពអេហ្ស៊ីបបានទទួលបញ្ជាអោយបាញ់ប្រហារទៅលើរាល់បណ្តាជន ដែលហ៊ានបំផ្លាញសម្បត្តិសាធារណៈ។ ដោយឡែក នៅថ្ងៃសុក្រនេះ សកម្មជនម្ខាងទៀតដែលគាំទ្ររដ្ឋាភិបាលយោធាអេហ្ស៊ីប ក៏មានគំរោងចុះបាតុកម្មការពាររាល់សម្បត្តិសាធារណៈក្នុងប្រទេសផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ក្រុមភាតរអ៊ីស្លាមអេហ្ស៊ីប មិនព្រមចុះចាញ់ឡើយ នៅចំពោះមុខកងទ័ពអេហ្ស៊ីបដែលបានបង្ក្រាបក្បួនបាតុករក្រុមខ្លួន កាលពីថ្ងៃពុធកន្លងទៅ ដែលការបង្ក្រាបបានសម្លាប់បាតុករច្រើនរាប់រយនាក់។ នៅថ្ងៃសុក្រនេះ ក្រុមភាតរអ៊ីស្លាមគ្រោងនឹងបន្តចុះបាតុកម្ម តាមដងផ្លូវសារជាថ្មី ប្រឆាំងនឹងការបង្ក្រាបដ៏ព្រៃផ្សៃរបស់កងទ័ពអេហ្ស៊ីបនេះ។
តាមគំរោង ក្បួនបាតុកម្មនឹងដង្ហែចាកចេញពីវិហារជាង៣០កន្លែង នៅក្រុងគែរ។ លើកនេះ សកម្មជនភាតរអ៊ីស្លាមនឹងមិនហែក្បួនតាមទីលាន រ៉ាបា អាល់អាដាវីយ៉ា នោះទេ។ ពួកគេនឹងហែទៅកាន់ទីលានរ៉ាំសែស នៅកណ្តាលទីក្រុងវិញ។ នៅម្ខាងទៀតនោះ សកម្មជននានាមកពីរណសិរ្សស្វាគមជាតិ ដែលគាំទ្រយោធាអេហ្ស៊ីប ក៏មានគំរោងចុះតាមដងផ្លូវ ធ្វើបាតុកម្មផងដែរ។ ប៉ុន្តែ មូលហេតុបាតុកម្មរបស់ក្រុមនេះ គឺដើម្បីការពាររាល់ទ្រព្យសម្បតិ្តសាធារណៈ អោយចៀសផុតពីការបំផ្លាញរបស់សកម្មជនភាតរអ៊ីស្លាម។ រាល់ក្បួនបាតុកម្មនៅថ្ងៃនេះ ធ្វើអោយមានការបារម្ភថា អាចនឹងផ្ទុះអំពើហិង្សាសារជាថ្មី ព្រោះថានៅពេលនេះ យោធាអេហ្ស៊ីបបានទទួលបញ្ជាអោយបាញ់ប្រហាររាល់បណ្តាជនដែលហ៊ានកំទេចសម្បត្តិសាធារណៈ។
បន្ទាប់ពីមានការបង្ក្រាបយោធានៅថ្ងៃពុធមក គណបក្សភាតរអ៊ីស្លាមបានប្រាប់ថា អ្នកដឹកនាំគណបក្សខ្លួនភាគច្រើនត្រូវបានចាប់ខ្លួន ហើយខ្លះទៀតបានរត់ភៀសខ្លួន។ ឯកអគ្គមគ្គុទេសក៍អេហ្ស៊ីបនៃក្រុមភាតរអ៊ីស្លាម ម៉ូហាមេដ បាឌី សន្យាថានឹងសងសឹករាល់ជនដៃដល់ដែលបានសម្លាប់បាតុករខ្លួន កាលពីថ្ងៃពុធកន្លងទៅ។
សហគមន៍អន្តរជាតិបានថ្កោលទោស ការបង្ក្រាបបាតុកម្មធ្វើឡើងដោយកងទ័ពអេហ្ស៊ីប កាលពីថ្ងៃពុធ។ អង្គការសហប្រជាជាតិបានអំពាវនាវអោយរាល់ភាគីអេហ្ស៊ីប អត់ធ្មត់អោយបានកម្រិតអតិបរមា។ ក្រុមប្រឹក្សាសន្តិសុខអង្គការសហប្រជាជាតិក៏បានទាមទារអោយមានការស៊ើបអង្កេតលើទង្វើបង្ក្រាបបាតុកររបស់កងទ័ពអេហ្ស៊ីបផងដែរ។ នៅថ្ងៃសុក្រនេះ ប្រធានាធិបតីបារាំង ហ្វ្រង់ស៊័រ ហូឡង់ បានជួបពិភាក្សាពីបញ្ហាអេហ្ស៊ីប ជាមួយនាយករដ្ឋមន្ត្រីអង់គ្លេស ដាវីដ ខាំម៉ឺរូន និងប្រមុខដឹកនាំអាល្លឺម៉ង់ អេនហ្កឺឡា មែរគេល។ ប្រធានាធិបតីអាមេរិក អូបាម៉ា ក៏បានថ្កោលទោសការបង្ក្រាបរបស់យោធាអេហ្ស៊ីប និងបរិហាររដ្ឋាភិបាលអេហ្ស៊ីបដែលបានដាក់ប្រទេសក្នុងស្ថានភាពប្រកាសអាសន្នផងដែរ។ អាមេរិកបានលុបចោលសមយុទ្ធយោធារួមជាមួយអេហ្ស៊ីប ប៉ុន្តែមិនបានកាត់ផ្តាច់ជំនួយប្រចាំឆ្នាំ១ពាន់លាន៥សែនដុល្លារ សំរាប់ប្រទេសនេះនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ