ម៉ូស្គូអះអាងថា អូតង់ជាគ្រោះថ្នាក់ដល់រុស្ស៊ី
ចុះផ្សាយនៅថ្ងៃ៖
ស្តាប់ - ០៥:៤៧
ពេញមួយសប្តាហ៏កន្លងទៅ តាំងពីអូតង់ ក្នុងជំនួបកំពូល ថ្ងៃ៨-៩កក្កដា នៅក្រុងវ៉ារសូវី បានអនុម័តសេចក្តីសម្រេច ពង្រឹងទីតាំងយោធានៅតាមព្រំប្រទល់ខាងកើតរបស់ខ្លួន ដោយប្រកាស ដាក់ឲ្យឈរជើងប្រចាំការជាអចិន្ត្រៃយ៏ ចាប់ពីឆ្នាំ២០១៧ ទៅគឺអង្គភាពទ័ពពហុជាតិ របស់បណ្តាប្រទេសសមាជិកអូតង់ ចំនួនដល់ទៅ៤កងវរសេនាតូច ឬ ៤.០០០នាក់ នៅជាប់នឹងព្រំដែនខាងលិចរបស់រុស្ស៊ីផ្ទាល់ ដើម្បីទប់នឹង“ការគម្រាមពីខាងរុស្ស៊ី” - បញ្ហានេះ ញ៉ាំងឲ្យកើតឡើង ជាប្រតិកម្មពុះខ្ជោល ពីខាងមជ្ឈដ្ឋានប្លែកៗនៃប្រទេសរុស្ស៊ី ដែលមើលឃើញ ការពង្រាយទ័ពអូតង់នេះ ជាគ្រោះថ្នាក់ដល់សន្តិសុខជាតិរុស្ស៊ីតែម្តង។
ជាបឋម គឺប្រតិកម្មវិមានក្រេមឡាំង។ អ្នកនាំពាក្យផ្លូវការរបស់ប្រធានាធិបតីរុស្ស៊ី គឺលោកឌ្មីទ្រី ពេស្កូវ កត់សម្គាល់ថា ៖
-សេចក្តីថ្លែងការណ៍ក្តែងៗរបស់អូតង់ ស្តីអំពីការ”គម្រាម” ពីខាងរុស្ស៊ី គឺគ្រាន់តែជាលេសប្រឌិតចេញមកសម្រាប់លាក់បំបាំងសកម្មភាពបក្សសម្ព័ន្ធនេះ ដើម្បីរំកិល ហេដ្ឋារចនាសម្ព័ន្ធយោធារបស់អូតង់ផ្ទាល់ មកកាន់តែជិតនឹងព្រំប្រទល់រុស្ស៊ី ហើយសកម្មភាពនេះ ប្រាកដជាញ៉ាំងឲ្យមានសកម្មភាពបកវិញចៀសមិនផុតទេពីខាងក្រុងម៉ូស្គូ ដ្បិតវាជាគ្រោះថ្នាក់ដល់ សន្តិសុខរុស្ស៊ី។
-ការពង្រាយទ័ពអូតង់ឲ្យឈរជើងប្រចាំការជាអចិន្ត្រៃយ៏ នៅប៉ូឡូញ និង៣ប្រទេសបាល់ទ៏គឺ ឡេតូនី លីទុយអានី អេស្តូនី មានព្រដែនជាប់ផ្ទាល់នឹងរុស្ស៊ី វាមិនមែនជាគម្រោងផែនការថ្មីទេ វាត្រូវបានអូតង់ចិញ្ចឹមទុកអស់រាប់ទសវត្សរ៍មកហើយ ម៉្លោះហើយ បានជាញ៉ាំងឲ្យមានតែ ការសោកស្តាយប៉ុណ្ណោះ។ ទោះយ៉ាងណាក្តី រុស្ស៊ីត្រូវតែបង្ខំចិត្តឈានជំហានតបវិញ ដើម្បីស្តារឲ្យមានតុល្យភាពនិងយុគភាពឡើងវិញ - តុល្យភាពនិងយុគភាពដែលត្រូវការជាចាំបាច់។
-ប្រទេសរុស្ស៊ី ដែលកំពុងងើបឡើងវិញ មិនពាំនាំជាការគម្រាមអ្វីណាដល់នរណាឡើយ ហើយតែងប្រកាន់យកយ៉ាងខ្ជាប់ខ្ជួន បន្ទាត់ឆ្ពោះទៅធ្វើសហប្រតិបត្តិការដែលនាំជាគុណ ប្រយោជន៍ទៅវិញទៅមក ដោយគោរពផលប្រយោជន៍នៃរាល់ប្រទេសដៃគូខ្លួន ព្រមទាំង ចេញមុខធ្វើដំណោះស្រាយស្ថានការណ៍ជម្លោះដោយរួមជាមួយសាមីភាគីទាំងអស់។
-ប៉ុន្តែសកម្មភាពណាក៏ដោយ ដែលជាគ្រោះថ្នាក់ត្រង់ផ្ទាល់ ឫដែលបង្កប់ទៅដោយ គ្រោះថ្នាក់ ដល់ផលប្រយោជន៍ជាតិរុស្ស៊ី មិនអាចត្រូវក្រុងម៉ូស្គូ ទុកឲ្យនៅបណ្តែតបណ្តោយ ឡើយ។
ជាការរំលឹក ថ្លែងក្នុងថ្ងៃ២២មិថុនាកន្លងទៅ ដែលជាទិវាខួប ៧៥ឆ្នាំនៃការវាយលុកឈ្លានពានយ៉ាងគំហុកដោយកងទ័ពអាល្លឺម៉ង់ហ្វាស៊ីស្ត មកលើសហភាពសូវៀត លោកពូទីនប្រមុខរដ្ឋរុស្ស៊ី ជាប្រទេសបន្តកេរ្ត៏ពីសហភាពនេះបានរិះគន់ថា ៖
-បក្សសម្ព័ន្ធអូតង់ ចេះតែដំឡើងគ្មានឈប់វោហាឈ្លានពាន និងបង្កើនសកម្មភាពឈ្លានពាននៅក្បែរព្រំប្រទល់រុស្ស៊ីតែម្តង ម៉្លោះហើយបានជារុស្ស៊ី ត្រូវតែផ្តោតការយកចិត្តទុកដាក់ពិសេសទៅលើការពង្រឹងសមត្ថភាពការពារប្រទេសរបស់ខ្លួន។ ព្រមជាមួយនេះ លោកពូទីន បានចោទអូតង់ថាចេះតែអូសទាញប្រទេសរុស្ស៊ីទៅក្នុងការរត់ប្រណាំងបំពាក់សព្វាវុធយ៉ាងវក់វី និងថាអូតង់មានចេតនាបំផ្លាញ“សមតាយោធា” ដែលសណ្ឋិតនៅសព្វថ្ងៃនៅអឺរ៉ុប ក្រោយពីសហភាពសូវៀតលែងមានអត្ថិភាពទៅ។
ចំណែកលោកហ្គ័របាឆេវ ជាអតីតប្រធានាធិបតីសហភាពសូវៀត ដែលឥឡូវមានជន្មាយុ៨៥ឆ្នាំ និងល្បីខាងធ្វើកំណែទម្រង់រដ្ឋនេះ លុះទាល់តែវារលំរលាយទៅ បានថ្លែងថា៖
-វោហាដែលមានបន្លឺឡើង ក្នុងជំនួបកំពូលអូតង់នៅក្រុងវ៉ារសូវី មួយសប្តាហ៏មុន គឺសឲ្យឃើញថាបក្សសម្ព័ន្ធនេះ កំពុងរៀបចំធ្វើសង្គ្រាមក្តៅតែម្តង ទល់នឹងរុស្ស៊ីបច្ចុប្បន្ន ពីព្រោះសម្តីរបស់ពួកគេ ដែលខាងសំបកក្រៅនិយាយតែអំពីការការពារ ប៉ុន្តែតាមធាតុពិតដែលមាន គឺឆ្លុះឲ្យឃើញពីការត្រៀមទុកជាក់លាក់មែន សកម្មភាពវាយលុកនៅចាំតែថ្ងៃ ប្រកាសសង្គ្រាមទល់នឹងរុស្ស៊ីប៉ុណ្ណោះ។
លោករដ្ឋមន្ត្រីកាបទេសរុស្ស៊ីស៊ែរហ្គៃ ឡាវ្រ៉ូវ ថ្លែងក្នុងសន្និសីទកាសែតថ្ងៃ១២កក្កដាកន្លងទៅ បានទាមទារពីអូតង់ឲ្យពន្យល់បំភ្លឺអំពីសេចក្តីសម្រេចផងទាំងឡាយ ដែលបក្សសម្ព័ន្ធនេះបានអនុម័តយក ក្នុងជំនួបកំពូលនៅក្រងវ៉ារសូវី ជុំវិញការពង្រាយទ័ពខ្លួន ចំនួន៤កងវរសេនាតូច ឲ្យប្រចាំការជាប់ជាអចិន្ត្រៃយ៏ នៅក្បែរព្រំដែនខាងលិចរបស់រុស្ស៊ី ចាប់ពីឆ្នាំ២០១៧ទៅ។ តាមសម្តីប្រមុខការទូតរុស្ស៊ី អូតង់កំពុងគ្របដណ្តប់ ដោយគំនិត បកស្រាយអំពីប្រទេសរុស្ស៊ីថាជាខ្មាំង ដើម្បីដោយឈរលើមូលដ្ឋាននេះ ប្រមូលផ្តុំជួរខ្លួន ឲ្យរួមគ្នាជាធ្លុងមួយ។
ថ្លែងទៅពួកអ្នកកាសែត នៅក្រុងព្រុចសែល បន្ទាប់ពីកិច្ចប្រជុំរុស្ស៊ី-អូតង់ ថ្ងៃ១៣កក្កដា លោក អគ្គរដ្ឋទូត Alexandre Grushko តំណាងអចិន្ត្រៃយ៏របស់រុស្ស៊ីប្រចាំនៅអូតង់ កត់សម្គាល់ថា ផ្លូវឆ្ពោះទៅផ្តល់ស្ថិរភាពដល់ស្ថានការណ៍នៅអឺរ៉ុប ត្រូវឆ្លងកាត់តាមរយៈការបន្ទាបឲ្យបាន មែនទែនហានិភ័យនៃគ្រោះថ្នាក់ឧប្បត្តិហេតុយោធា ក្នុងន័យថា ត្រូវបង្កកទុកទៅសេចក្តី សម្រេចអនុម័តយកដោយជំនួបកំពូលអូតង់ពេលថ្មីៗ ខាងពង្រាយទ័ពនៅអឺរ៉ុបខាងកើត នៅ ជាប់នឹងព្រំប្រទល់រុស្ស៊ី ត្រូវបញ្ឈប់ភាពសកម្មយោធានៅទីនោះ ហើយដកចេញទៅវិញទៅ អង្គភាពទ័ពណា ដែលមានពង្រាយទៅហើយ ដើម្បីបង្កើតជាបរិយាកាសជឿទុកចិត្តគ្នា។
ក្រោយពីឮសេចក្តីសម្រេចចេញពេលថ្មីៗ ដោយជំនួបកំពូលអូតង់ ពេលថ្លែងតាមកាណាល់ ទូរទស្សន៍របស់សាលាក្រុងម៉ូស្គូ លោកអនុប្រធានគណៈកម្មការព្រឹទ្ធសភារុស្ស៊ីខាងកិច្ចការ អន្តរជាតិ Andrei Klimov បានបរិហារកលល្បិចបក្សសម្ព័ន្ធនេះ ដែលស្ថិតនៅក្រោម ខ្សែញាក់របស់ស.រអា.។ កលល្បិចនេះ គឺនៅត្រង់អូតង់ខំរកវិធីដោះសាអត្ថិភាពខ្លួន ទោះបី បច្ចុប្បន្នលែងមានសហភាពសូវៀត លែងមានអង្គការកតិកាសញ្ញាវ៉ារសូវី ដឹកនាំដោយសូវៀត ដែលជាលេសនាំឲ្យលេចចេញមកជាបក្សសម្ព័ន្ធអូតង់សម្រាប់តទល់។
ម៉្លោះហើយបានជាអូតង់ប្រឌិតជា “ទីងមោងរុស្ស៊ី” បំភ័យពិភពលោក។ ឥឡូវ អូតង់តម្រូវឲ្យប្រទេសនិមួយៗជាសមាជិក ចំណាយមិនតិចជាង២%ឡើយនៃ GDP ខ្លួន សម្រាប់បំពាក់អាវុធប្រឈមនឹងទីងមោងនេះ ហើយអាវុធដែលគេទិញនោះ គឺទិញពីអាមេរិកតែម្តង ដើម្បីឆ្លើយឲ្យបានស្របនឹងស្តង់ដារអូតង់ ដែលបង្កើតឡើងដោយស.រ.អា.។ ជាសក្ខីកម្ម ក្នុងឆ្នាំមុន អាមេរិកបន្តជាប់ចំណាត់ថ្នាក់ទី១ ដដែលនៅក្នុងលោក ខាងលក់សព្វាវុធ បានទឹកប្រាក់ដល់ ៤៦.៨០០លានដុល្លារឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ