តាមរយៈបេកកម្មរបស់យាន Philae ពិភពលោកអាចនឹងស្គាល់ប្រវត្តិពិតនៃការកកើតប្រភពជីវិតមនុស្សលោកសព្វថ្ងៃ
ចុះផ្សាយនៅថ្ងៃ៖
ស្តាប់ - ០៥:០១
គឺនៅថ្ងៃពុធ ទី១២ វិច្ឆិកានេះឯងដែលបេសកកម្មរបស់យានអវកាសរ៉ូសេតា (Rosetta) បានឈានចូលដល់ដំណាក់ទី២ ដែលពិភពលោកចាត់ទុកជាដំណាក់កាលដ៏សំខាន់នៅក្នុងប្រវត្តិអវកាស។ ដូចដែលបានគ្រោងទុក យានអវកាសរ៉ូសេតា (Rosetta) ទើបបានទម្លាក់យានតូចមួយទៀតឈ្មោះ ហ្វីឡាអេ (Philae) ទៅក្នុងលំហអាកាស និងដែលហ្វីឡាអេកំពុងធ្វើដំណើរឆ្ពោះទៅចុះចតលើផ្ទៃផ្កាយដុះកន្ទុយដែលគេហៅថាជូរី (Churyumou-Gerasimenko)។ យានហ្វីឡាអេត្រូវការពេល ៧ម៉ោងដើម្បីអាចទៅដល់ផ្កាយដុះកន្ទុយជូរី។
បេសកកម្មអវកាសនេះ ជាបេសកកម្មដែលបានរៀបចំធ្វើឡើងដោយទីភ្នាក់ងារអវកាសអឺរ៉ុប និងដែលបានត្រូវចំណាយលុយសរុប ១ ៣០០លានអឺរ៉ូសម្រាប់រយៈពេល ២០ឆ្នំា។ កាលពី ១០ឆ្នំាមុន ពោលក្នុងខែមីនា ឆ្នំា ២០០៤ ទីភ្នាក់ងារអវកាសអឺរ៉ុបបានបាញ់បញ្ជូនយានអវកាសរ៉ូសេតា (Rosetta) ដោយនំាទៅជាមួយនូវយានតូចមួយទៀតឈ្មោះ ហ្វីឡាអេ (Philae) ដែលមានទម្ងន់ប្រមាណជា ១០០គីឡូក្រាម និងដែលមានបំពាក់ដោយឧបករណ៍វិទ្យាសាស្រ្ត ឬមួយក៏ប្រដាប់វាស់ស្ទង់ជាច្រើនទៀត។ គោលដៅរបស់ទីភ្នាក់ងារអវកាសអឺរ៉ុប គឺបញ្ជូនយានហ្វីឡាអេទៅចុះចតនៅលើផ្ទៃផ្កាយដុះកន្ទុយដែលមានឈ្មោះថា ជូរី (Tchourioumov-Guérassimenko)។ ឈ្មោះនេះយកតាមឈ្មោះតារាវិទូអ៊ុយក្រែនពីររូបដែលបានរកឃើញផ្កាយដុះកន្ទុយនេះកាលពីឆ្នាំ១៩៦៩។
កាលពីនៅថ្ងៃពុធ ទី៦ សីហា ឆ្នំា ២០១៤ និងក្រោយពីបានធ្វើដំណើរអស់រាប់ពាន់លានគីឡូម៉ែត្រនៅក្នុងគន្លងជុំវិញព្រះអាទិត្យមក ទីភ្នាក់ងារអវកាសអឺរ៉ុបបានប្រកាសឲ្យដឹងពីការចូលក្នុងគន្លងនៃផ្កាយដុះកន្ទុយជូរីរបស់យានអវកាសរ៉ូសេតា។ នៅថ្ងៃពុធ ទី១២ វិច្ឆិកានេះ និងជាង៣ខែក្រោយពីបានចូលក្នុងគន្លងនៃផ្កាយដុះកន្ទុយជូរីមក យានអវកាសរ៉ូសេតាទើបបានទម្លាក់កូនយានហ្វីឡាអេទៅក្នុងលំហអាកាសប្រកបដោយជោគជ័យក្នុងចម្ងាយជាង ២២គីឡូម៉ែត្រពីផ្កាយដុះកន្ទុយជូរី។ នៅពេលនេះ កូនយានហ្វីឡាអេកំពុងធ្វើដំណើរដោយខ្លួនឯងក្នុងល្បឿនជាង ៣គីឡូម៉ែត្រក្នុងមួយម៉ោងឆ្ពោះទៅចុះចតលើផ្ទៃផ្កាយដុះកន្ទុយជូរី។ បើអ្វីៗមានដំណើរការល្អដូចបានគ្រោងទុក យានហ្វីឡាអេនឹងត្រូវទៅដល់ផ្កាយដុះកន្ទុយជូរីក្នុងថ្ងៃទី១២ វិច្ឆិកានេះ។
អ្វីទៅ ជាបេសកកម្មរបស់យានហ្វីឡាអេ (Philae) ទៅកាន់ផ្កាយដុះកន្ទុយជូរី?
បេសកកម្មរបស់យានហ្វីឡាអេគឺស្វែងយល់អំពីប្រវត្តិពិតរបស់ផ្កាយដុះកន្ទុយជូរី ពោលគឺសំដៅសិក្សាឲ្យកាន់តែច្បាស់អំពីសណ្ឋានដី និងធាតុផ្សំនៃផ្កាយដុះកន្ទុយនោះ។ សព្វថ្ងៃនេះ ផ្កាយដុះកន្ទុយជូរីកំពុងស្ថិតចម្ងាយជាង ៥០០លានគីឡូម៉ែត្រពីភពផែនដី និងជិត ២០០លានគីឡូម៉ែត្រពីព្រះអាទិត្យ។ បើធៀបនឹងភពផ្សេងៗទៀតដែលកំពុងមានវត្តមាននៅជុំវិញភពផែនដី ភពផ្កាយដុះកន្ទុយជូរីមានពណ៌ខ្មៅដូចធ្យូង មានទំហំមិនធំទេ និងមានបណ្តោយប្រមាណជា ៤គីឡូម៉ែត្រ។ ក៏ប៉ុន្តែ វាជាភពមួយដែលក្រុមអ្នកវិទ្យាសាស្រ្តកំពុងនំាគ្នាយកចិត្តទុកដាក់យ៉ាងខ្លំាង ពិសេសគឺក្រុមតារាវិទូតែម្តង។ មូលហេតុ មកពីផ្កាយដុះកន្ទុយជូរីមួយនេះជាវត្ថុធាតុដើមដែលសល់ពីការបង្កើតប្រព័ន្ធព្រះអាទិត្យកាលពី ៤ ៦០០លានឆ្នំាមុន។
ក្រុមអ្នកវិទ្យាសាស្រ្ត ក៏ដូចជាក្រុមតារាវិទូបានចោទសួរថា តើផ្កាយដុះកន្ទុយជូរីមិនមែនជាបិតានៃការបង្កើតភពផែនដី និងជីវិតមនុស្សលោក សត្វលោកសព្វថ្ងៃទេ ឬយ៉ាងណា?។ បើមិនដូច្នោះ តើវត្តមាននៃភពផែនដី និងព្រះអាទិត្យបានកើតឡើងយ៉ាងដូចម្តេច និងមានប្រភពចេញមកពីណា?។ តើវត្តមានម៉ូឡេគុលទឹកដែលមាននៅលើភពផែនដីសព្វថ្ងៃនេះ មិនមែនមានប្រភពដើមចេញពីផ្កាយដុះកន្ទុយ ទេ ឬយ៉ាងណា?។ គឺមានតែបេសកកម្មរបស់យានហ្វីឡាអេទេដែលអាចឆ្លើយនឹងសំណួរទំាងអស់នេះបាន។
ការដែលគេនំាគ្នាផ្តោតសំខាន់លើផ្កាយដុះកន្ទុយជូរីក៏ដោយសារថា តំាងពី ៤ ៦០០លានឆ្នំាកន្លងទៅ វត្ថុធាតុដើមដែលសល់ពីការបង្កើតប្រព័ន្ធព្រះអាទិត្យមួយនេះបានរក្សាទុកពត៌មានដើម និងអាថ៌កំបំាងជាច្រើនដែលអាចបញ្ជាក់ពីវត្តមានទឹក និងជីវិតរបស់មនុស្សលោកសព្វថ្ងៃ។ នេះក៏ដោយសារថា សីតុណ្ហភាពនៅផ្ទៃក្នុងផ្កាយដុះកន្ទុយជូរីនោះនៅឋេរ គឺ ២៧០អង្សារក្រោមសូន្យ។ គឺជាកម្រិតសីតុណ្ហភាពមួយដែលអនុញ្ញាតឲ្យផ្កាយដុះកន្ទុយអាចរក្សាភាពដើមរបស់ខ្លួនសឹងតែទំាងស្រុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ