ការប្រលងបាក់ឌុបលើកទី២ជាឱកាសសម្រាប់សិស្សប៊ិះជាប់
ចុះផ្សាយនៅថ្ងៃ៖
ស្តាប់ - ០៥:១៦
មានទស្សនៈជាច្រើនពីក្រុមបញ្ញវន្ត ហាក់ស៊ីសង្វាក់គ្នាថា ការត្រៀមប្រលងបាក់ឌុបលើកទី២ ដែលនឹងប្រព្រឹត្តិទៅនៅពាក់កណ្តាលខែតុលាខាងមុខ នឹងមិនសង្ឃឹមថា សិស្សអាចត្រៀមលក្ខណៈបានល្អជាទូទៅឡើយ។ ពេលវេលាដ៏ខ្លីរួមផ្សំនឹងសិស្សខ្វះមូលដ្ឋានគ្រឹះផងនោះនឹងជម្រុញឲ្យសិស្សនៅតែជាប់តិចតួចដូចជាការប្រលងលើកទីមួយដែរ ពោលគឺការប្រលងលើកទី២នេះ គ្រាន់តែជាជាការផ្តល់ឱកាសដល់សិស្សដែលមានពិន្ទុប៊ិះជាប់នៅក្នុងការប្រលងលើកទី១ប៉ុណ្ណោះ តែសិស្សដែលខ្សោយជាប្រពៃណីទៅហើយនោះ មិនមានចំណុចណាមួយជាការសង្ឃឹមនោះទេ។
ការប្រលងសញ្ញាបត្រទុតិយភូមិឬប្រលងបាក់ឌុបលើកទី២ ដែលទទួលបានការគាំទ្រពីប្រមុខរដ្ឋាភិបាលកម្ពុជា និងក្រសួងអប់រំជាតិនោះ វាហាក់ដូចជាស៊ីគ្នាទៅនឹងសុភាសិតបុរាណខ្មែរមែនទែន ដែលថា«ក្របីបាត់ទើបធ្វើរបង ដល់ពេលប្រលងទើបខំរៀន»។
តាមរយៈសុភាសិតនេះ ភាគច្រើននៃកូនសិស្សខ្មែរបានបើកចំហររបងរបស់ពួកគេជាង១០ឆ្នាំមកហើយ ហើយទើបតែឆ្នាំចុងក្រោយរបស់គេទេទើបពួកគេចាប់ផ្តើមស្វះស្វែងរកឈើមកធ្វើរបង ក៏ប៉ុន្តែអ្វីៗបានបាត់បង់រួចទៅហើយ រួមទាំងក្របី ដែលជាទ្រព្យដ៏ចាំបាច់ក្នុងការជួយទៅដល់ជីវភាពស្រែចំការផងដែរ។
តើការអនុញ្ញាតឲ្យប្រលងបាក់ឌុបជាលើកទី២ ដោយគ្រាន់តែត្រៀមលក្ខណៈត្រឹមតែមួយខែកន្លះនោះ វាមានសារៈសំខាន់ជាទូទៅបែបណាខ្លះ? ពិតជាមានតិចតួចណាស់ ដោយសារអ្វីៗវាហួសពេលអស់ទៅហើយ កុំថាឡើយមានប្រលងលើកទីពីរ សូម្បីទីបី ឬទីច្រើនជាងនេះ ក៏ហួសដែរ ដោយសារតែមិនមានមូលដ្ឋានគ្រឹះពីថ្នាក់ក្រោមមក។
ក្រុមសាស្ត្រាចារ្យ និងអ្នកជំនាញខាងការសិក្សាអប់រំ បានយល់ដូចៗគ្នាថា មិនមានឱកាសច្រើនទៀតទេ ហើយសំណាងក៏គ្មានសេសសល់សំណាងអ្វីដែរសម្រាប់សិស្សានុសិស្សដែលមិនបានប្រឹងប្រែង ចាក់គ្រឹះរបស់ខ្លួនឲ្យបានរឹងមាំតាំងពីថ្នាក់ក្រោមមក។
ការចង្អុលបង្ហាញផ្លូវឲ្យរៀនត្រៀម ដោយក្រសួងអប់រំចាប់តាំងពីប្រកាសលទ្ធផលនៃការប្រលងលើកទីមួយ កាលពីដំណាច់ខែមុន មិនមានឥទ្ធិពលសម្រាប់សិស្សដែលមិនបានត្រៀមខ្លួនឯងកាលពី១០ឆ្នាំមកហើយនោះទេ។តែវាមានប្រយោជន៍សម្រាប់សិស្សានុសិស្ស ដែលប្រលងធ្លាក់លើកទី១ មួយចំនួនដែលបានពិន្ទុប៊ិះជាប់។
មានន័យថាពួកគេក៏ជាសិស្សដែលរៀនគ្រាន់បើនៅក្នុងថ្នាក់ដែរ ក៏ប៉ុន្តែគេអាចភ្លាត់ស្នៀតម្តងម្កាល។ដូច្នេះការភ្លាត់ស្នៀតរបស់ពួកគេដោយនឹកស្មានមិនដល់ ការប្រលងលើកទី២ក៏អាចជាការផ្តល់ឱកាសដល់សិស្សប្រភេទនេះលុបលាងនូវបរាជ័យរបស់ពួកគេ ដោយគ្រាន់តែបំពេញបន្ថែមបន្តិចបន្ទួចប៉ុណ្ណោះនូវអ្វីដែលពួកគេខ្វះខាត កាលពីប្រលងលើកមុន គេក៏នឹងអាចក្លាយជាបេក្ខជនជ័យលាភីផងដែរនៅថ្ងៃទី១៣ខែតុលាខាងមុខនេះ។
ផ្ទុយទៅវិញចំពោះសិស្សដែលមិនបានត្រៀមខ្លួនពីតូចមកនោះ គឺចប់ហើយ ហើយមានតែពាក្យស្តាយក្រោយប៉ុណ្ណោះ។ នេះមិនមែនជាការបំបាក់ស្មារតីយុវជនខ្មែរនោះទេ ក៏ប៉ុន្តែការទាញសម្មិតកម្មទាំងអម្បាលមានខាងលើ គឺដោយផ្អែកទៅលើលក្ខណៈវិទ្យាសាស្ត្រ និងស្ថានភាពជាក់ស្តែងរបស់នៃការសិក្សានៅប្រទេសកម្ពុជា។
ជាមួយនឹងការបត់បែននឹកស្មានមិនដល់លើវិស័យអប់រំបែបនេះ មិនមែនធ្វើឲ្យសិស្សមួយចំនួនដែលមិនយកចិត្តទុកដាក់ក្នុងការសិក្សាខកចិត្តនៅដំណាក់កាលចុងក្រោយនៃការសិក្សាថ្នាក់ទុតិយភូមិរបស់ពួកគេនោះទេ គឺពួកគេបាត់បង់ក្តីសង្ឃឹមអស់រលីងចាប់តាំងពីមានការប្រកាសកែទម្រង់ដូចផ្លេកបន្ទោររបស់ក្រសួងអប់រំ នៅពេលដែលកុង្សីយ៍ថ្មីរបស់ក្រសួងនេះឡើងដឹកនាំកាលពីឆ្នាំទៅមកម្ល៉េះ។
គ្រាន់តែឮថាការប្រលងបាក់ឌុប នឹងត្រូវធ្វើឡើងដោយតឹងតែង ក្រោមការចូលរួមឃ្លាំមើលពីស្ថាប័នប្រឆាំងអំពើពុករលួយ និង អ្នកស្ម័គ្រចិត្តអង្គការសង្គមស៊ីវិល កាលពីដើមឆ្នាំសិក្សាសិស្សដែលពឹងផ្អែកទៅលើកំលាំងធនធានហិរញ្ញវត្ថុម៉ែ-ឳ អ្នកដែលជំនាញខាងចំលងតាមគេនិងសិស្សដែលពឹងពាក់លើសំណៅឯកសារ ដូចដែលកើតមានកាលពីជំនាន់លោក អតីត
រដ្ឋមន្ត្រីអប់រំ អ៊ឹម សុធី នោះ បាត់បង់អស់រលីងនូវក្តីសង្ឃឹមជាស្រេចទៅហើយ។
នេះនិយាយមួយឆ្នាំមុន ប្រលងផង ចុះទម្រាំទុកពេលឲ្យពួកគេមួយខែកន្លះទៀត គ្មាននរណាម្នាក់រំពឹងថា ខ្មោចដែលងាប់ទៅហើយនោះអាចរស់ឡើងវិញភ្លាមៗ បែបនេះបានទេ ខណៈដែលក្រសួងអប់រំនៅតែបង្ហាញឆន្ទៈក្នុងការរៀបចំប្រលងដូចអ្វីដែលបានកើតមានកាលពីថ្ងទី៤ ទី ៥ ខែសីហាកន្លងទៅនេះ។ មានន័យថាការសិក្សាមិនអាចចាប់បញ្រកដូចជាកូនក្មេងខ្លាចថ្នាំពេទ្យបានទេ។
ទោះជាយ៉ាងនេះក្តី ការប្រលងបាក់ឌុបលើកទី២ខាងមុខនេះត្រូវគេរំពឹងថា អាចនឹងជាប់ក្នុងរង្វង់ពី១០ ទៅ ២០ ភាគរយបន្ថែមទៀត។ ហើយបន្ទាប់ពីនេះគេត្រូវងាកទៅរកចំណុចខ្សោយទាំងសិស្សទាំងគ្រូទាំងមន្ត្រីជាន់ទាបនឹងជាន់ខ្ពស់នៃវិស័យអប់រំ ថាតើត្រូវកែលម្អយ៉ាងដូចម្តេចខ្លះ? ជាការពិត នៅពេលដែលមានសិស្សជាប់តិចតួចពោលគឺប្រលងដល់ទៅពីរដងមិនបានជាប់ ពាក់កណ្តាលទេនោះ នោះគេត្រូវសំលឹងមើលទៅលើការបណ្តុះបណ្តាលវិញម្តង។អ្វីដែលត្រូវកែសម្រួលនោះគឺ សមត្ថភាពគ្រូបង្រៀននិងប្រាក់បៀវត្ស វិធីសាស្ត្របង្រៀន ឯកសារសម្រាប់គាំទ្រការរៀន និងបង្រៀន និងបរិស្ថានសាលាជាដើម។
ការចាប់ផ្តើមឡើងវិញទាំងអស់នេះ គឺចាំបាច់ត្រូវមានការចូលរួមពីមាតាបិតាសិស្សផងដែរ។
ហើយអ្វីដែលសិស្សខ្លួនឯងត្រូវកែប្រែនោះ គឺបញ្ចប់ការផ្តេកផ្តួលទៅលើអ្នកដទៃ មានអាណាព្យាបាល ប្រាក់កាស និងអន្តរាគមន៍ផ្សេងៗ ព្រមទាំងសិក្សាប្រកបដោយមានជំនឿជឿជាក់លើខ្លួនឯង។ នៅឲ្យឆ្ងាយពីស្នេហា និងសំភារៈនិយម។កុំយកពេលវេលាសិក្សាដ៏មានតំលៃទៅជួបជុំគ្នា ផឹកស្រា ធ្វើបងធំតាមដងផ្លូវ កាត់បន្ថយការប្រើហ្វេសប៊ុក និងប្រព្រឹត្តិអំពើអប្បាយមុខផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ