រដ្ឋមន្ត្រីការបរទេសចិន ជួបប្រមុខរដ្ឋាភិបាល ប្រមុខការទូត និងថ្នាក់ដឹកនាំហ៊្វុនស៊ិនប៉ិច ស្ដីពីទំនាក់ទំនងប្រទេសទាំងពីរ
លោក វ៉ាង យី រដ្ឋមន្ត្រីការបទេសចិន បានផ្តើមទស្សនកិច្ច ២ថ្ងៃនៅកម្ពុជា កាលពីថ្ងៃ អង្គារ ទី២០ សីហា។ នៅព្រឹកថ្ងៃពុធនេះ ប្រមុខការទូតចិន លោក វ៉ាង យី បានជួបជាបន្តបន្ទាប់ ដាច់ដោយឡែកពីគ្នា ជាមួយលោកនាយករដ្ឋមន្ត្រី ហ៊ុន សែន លោក ហោ ណាំហុង និងថ្នាក់ដឹកនាំគណបក្សហ៊្វុនស៊ិនប៉ិច។ ជាកិច្ចប្រជុំដើម្បីបង្កើនទំនាក់ទំនង រវាងប្រទេសកម្ពុជានិងចិន ក៏ដូចជាការពង្រឹងទំនាក់ទំនងគណបក្សកុម្មុយនិស្តចិន និងគណបក្សប្រជាជនកម្ពុជា ព្រមទាំងគណបក្សហ៊្វុនស៊ិនប៉ិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ស្របពេលនៃការប្រារព្ធខួបអនុស្សាវីយ៍លើកទី៥៥ នៃការបង្កើតទំនាក់ទំនងការទូតរវាងកម្ពុជា និងចិន នៅឆ្នាំ២០១៣នេះ ប្រមុខការទូតចិន លោក វ៉ាង យី រដ្ឋមន្ត្រីការបរទេស បានបំពេញទស្សនកិច្ចពីរថ្ងៃ នៅកម្ពុជា ចាប់ផ្តើមពីថ្ងៃទី២០សីហា។ ទស្សនកិច្ចរដ្ឋមន្ត្រីការបរទេសចិន ក៏កំពុងប្រព្រឹត្តទៅ នៅក្នុងបរិយាកាសតានតឹងផ្នែកនយោបាយនៅកម្ពុជា ក្រោយការបោះឆ្នោត។
នៅព្រឹកថ្ងៃពុធទី២១ សីហានេះ លោករដ្ឋមន្ត្រីការបរទេសចិន បានជួបលោកនាយករដ្ឋមន្ត្រី ហ៊ុន សែន នៅវិមានសន្តិភាព កាលពីម៉ោង ៩ ព្រឹក។ នៅម៉ោង ១០ លោក វ៉ា យី បានជួបជាមួយថ្នាក់ដឹកនាំហ៊្វុនស៊ិនប៉ិច និងនៅម៉ោង ១១ រដ្ឋមន្ត្រីការបរទេសចិន បានជួបរដ្ឋមន្ត្រីការបរទេស លោក ហោ ណាំហុង។
សម្រាប់កិច្ចប្រជុំរវាងរដ្ឋមន្ត្រីការបរទេសចិន និងថ្នាក់ដឹកនាំហ៊្វុនស៊ិនប៉ិច ត្រូវបានលោក ញឹក ប៊ុនឆៃ អគ្គលេខាធិការគណបក្សហ៊្វុនស៊ិនប៉ិច បានប្រាប់វិទ្យុបារាំងថា ជាកិច្ចប្រជុំដើម្បីពង្រឹង ទំនាក់ទំនងរវាងគណបក្សហ៊្វុនស៊ិនប៉ិច និងគណបក្សកុម្មុយនិស្តចិន ក៏ដូចជាការពង្រឹងទំនាក់ទំនងកម្ពុជា-ចិន។ ទំនាក់ទំនងរវាងហ៊្វុនស៊ិនប៉ិច និងគណបក្សកុម្មុយនិស្តចិន ដែលកើតឡើង ចាប់តាំងពីហ៊្វុនស៊ិនប៉ិច នៅជារណសិរ្សតស៊ូ ក្រោមការដឹកនាំរបស់សម្តេចព្រះមហាវីរក្សត្រ មុនការបោះឆ្នោតឆ្នាំ១៩៩៣។
បន្ទាប់ពីកិច្ចប្រជុំជាង ២ម៉ោង ចាប់ពីម៉ោងជាង ៩ព្រឹក រវាងលោកនាយករដ្ឋមន្ត្រី ហ៊ុន សែន និងរដ្ឋមន្ត្រីការបរទេសចិន លោក ប្រាក់ សុខុន រដ្ឋលេខាធិការទីស្តីការគណៈរដ្ឋមន្ត្រី បាននាំពាក្យប្រាប់អ្នកកាសែតថា ចិនបានសាទរនូវការបោះឆ្នោតនៅកម្ពុជា ដែលគណបក្សប្រជាជនកម្ពុជាបានឈ្នះកៅអីភាគច្រើន នៅក្នុងរដ្ឋសភា។
សភាពការណ៍បោះឆ្នោត ក៏ត្រូវបានលោក ប្រាក់ សុខុន លើកឡើងថា ត្រូវបានពិភាក្សា ក្នុងកិច្ចប្រជុំ ដោយចិនមើលឃើញពីការប្រសើរ ហើយរដ្ឋមន្ត្រីការបរទេសចិន ជំរុញឲ្យកម្ពុជា ដោះស្រាយបញ្ហាបោះឆ្នោតដោយសន្តិវិធី តាមរយៈការជជែកចរចា សម្រាប់រកច្រកចេញពីវិបត្តិនយោបាយ ក្រោយការបោះឆ្នោត។ ប៉ុន្តែយ៉ាងណាក៏ដោយ លោក ប្រាក់ សុខុន អះអាងពីជំហររបស់រដ្ឋាភិបាល និងគណបក្សប្រជាជនកម្ពុជា គឺដូចអ្វីដែលលោកនាយករដ្ឋមន្រ្តី បានប្រកាស នោះគឺគ្មានអ្វីផ្លាស់ប្តូរទេ។ ពោលគឺកិច្ចប្រជុំរដ្ឋសភាលើកដំបូង និងការបង្កើតរដ្ឋាភិបាល នឹងប្រព្រឹត្តទៅដូចការគ្រោងទុក ដោយគ្មានការជាប់គាំងនយោបាយឡើយ។
ក្រោយជួបលោកនាយករដ្ឋមន្ត្រី ហ៊ុន សែន រួចមក រដ្ឋមន្ត្រីការបរទេសចិន បានជួបជាមួយរដ្ឋមន្ត្រីការបរទេស លោក ហោ ណាំហុង នៅក្នុងជំនួបអាហារថ្ងៃត្រង់ នៅសណ្ឋាគារ អាំងទែរ កុងទីណង់តាល់ ដើម្បីជជែកពិស្តារពីកិច្ចសហប្រតិបត្តិការរវាងប្រទេសកម្ពុជា និងចិន មុននឹងប្រមុខការទូតទាំងពីរ ចេញសេចក្តីថ្លែងការណ៍រួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ