សន្តិសុខត្រូវបានបង្កើន ខណៈដែលបាតុកម្មមិនគោរពការណែនាំ
សន្តិសុខសណ្តាប់ធ្នាប់ត្រូវបានអាជ្ញាធរមានសមត្ថកិច្ចរឹតបណ្តឹង និងការពារយ៉ាងយកចិត្តទុកដាក់ ខណៈដែលគណបក្សសង្គ្រោះជាតិនៅតែចចេសធ្វើមហាបាតុកម្មអហិង្សា រយៈពេលបីថ្ងៃ ដែលអាចមានការហែក្បួនពេញទីក្រុង ជាការខុសទៅនឹងការអនុញ្ញាតរបស់ក្រសួងមហាផ្ទៃ។ យ៉ាងណាក្តី កម្លាំងសមត្ថកិច្ចអាចធ្វើការបង្ក្រាប ប្រសិនបើបាតុកម្មនោះឈានដល់អំពើហិង្សា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៤
អាជ្ញាធរមានសមត្ថកិច្ចបានបង្កើនសន្តិសុខការពារ សម្រាប់មហាបាតុកម្មរបស់គណបក្សសង្គ្រោះជាតិ ដែលចាប់ផ្តើមធ្វើនៅថ្ងៃអាទិត្យស្អែកនេះ។ ជាការបង្កើនសន្តិសុខ ក្រោយពីគណបក្សប្រឆាំងមួយនេះប្រកាសធ្វើបាតុកម្មដោយដេកនៅនឹងកន្លែង នៅទីលានប្រជាធិបតេយ្យ និងដង្ហែក្បួនក្នុងទីក្រុង។
លោក ខេង ទីតូ អ្នកនាំពាក្យកងរាជអាវុធហត្ថលើផ្ទៃប្រទេស បានប្រាប់វិទ្យុបារាំងអន្តរជាតិថា កម្លាំងអាវុធហត្ថទាំងអស់នៅទីក្រុងភ្នំពេញ ត្រូវបានប្រាប់ឲ្យបង្កើនស្មារតីប្រុងប្រយ័ត្នខ្ពស់សម្រាប់ការពារសន្តិសុខនៅក្នុងរាជធានីភ្នំពេញ នៅពេលដែលគណបក្សសង្គ្រោះជាតិប្រកាសធ្វើបាតុកម្ម ដោយមិនគោរពទៅតាមសេចក្តីណែនាំរបស់សាលារាជធានីភ្នំពេញ និងក្រសួងមហាផ្ទៃនោះ។
លោកបន្តថា កម្លាំងអាវុធហត្ថត្រូវបានដាក់ពង្រាយនៅតាមគោលដៅការពារសំខាន់ៗ នៅក្នុងទីក្រុង និងជាយក្រុង ពិសេសនៅម្តុំទីលានប្រជាធិបតេយ្យ ទីកន្លែងដែលការប្រមូលផ្តុំមហាបាតុកម្មរបស់គណបក្សសង្គ្រោះជាតិធ្វើនៅទីនោះ។
ប៉ុន្តែ ការបង្កើនកម្លាំងការពារនេះ ក៏ត្រូវបានគេមើលឃើញផងដែរថា បានធ្វើឡើងក្រោយពីអង្គភាពកំចាត់មីនស៊ីម៉ាក់បានធ្វើការកំទេចគ្រាប់បែកកែច្នៃ និងគ្រាប់កាំភ្លើង M-79 នៅពីរកន្លែងផ្សេងគ្នា ដែលត្រូវបានប្លុងចោលដោយជនមិនស្គាល់មុខ កាលពីថ្ងៃសុក្រ។ ការរកឃើញនិងការកំទេចគ្រាប់ទាំងអស់នោះ គឺបានកើតឡើងពីរថ្ងៃប៉ុណ្ណោះ មុនបាតុកម្មគណបក្សសង្គ្រោះជាតិ ដែលគ្រោងធ្វើ នៅថ្ងៃអាទិត្យស្អែកនេះ។
គួរបញ្ជាក់ថា ក្រសួងមហាផ្ទៃនិងសាលារាជធានីភ្នំពេញ បានសំរេចរួចហើយ ថានឹងអនុញ្ញាតអោយគណបក្សសង្គ្រោះជាតិធ្វើបាតុកម្មតែមួយថ្ងៃ គឺថ្ងៃទី១៥កញ្ញា និងរយៈពេលតែ១២ម៉ោងប៉ុណ្ណោះ។ ហើយក៏មិនអនុញ្ញាតឲ្យដើរហែក្បួន ឬក៏បោះជំរុំស្នាក់នៅ លើទីលាននោះផងដែរ។ ប៉ុន្តែ លោក កឹម សុខា អនុប្រធានគណបក្សសង្គ្រោះជាតិ ដែលបានថ្លែងនៅក្នុងសន្និសីទកាសែតនៅថ្ងៃសៅរ៍នេះ នៅតែអះអាងថា បាតុកម្មនៅតែធ្វើឡើងដូចការគ្រោងទុកក្នុងរយៈពេលបីថ្ងៃដដែល ក្នុងទ្រង់ទ្រាយធំជាងលើកទីមួយ ដោយមានការដើរហែក្បួន ក្នុងទីក្រុងថែមទៀតផង។
បែបណាក៏ដោយ បើតាមលោក ខេង ទីតូ ប្រសិនបើបាតុកម្មរបស់គណបក្សសង្គ្រោះជាតិធ្វើខុសនឹងនិតិវិធីច្បាប់ ហើយបង្កឲ្យមានអំពើហិង្សាកើតឡើងនោះ កងកម្លាំងអាចនឹងធ្វើការទប់ស្កាត់និងបង្ក្រាប ដើម្បីការពារសន្តិសុខ សណ្តាប់ធ្នាប់សង្គម និងភាពចលាចលផ្សេង។
នៅថ្ងៃសៅរ៍នេះ រោងតង់នៅលើទីលានប្រជាធិបតេយ្យ ត្រូវបានគណបក្សសង្គ្រោះជាតិសង់ឡើងដែលមានប្រវែងប្រហែល២០០ម៉ែត្រ និងទទឹង៦ម៉ែត្រ ដោយមានអ្នកយាមការពារយ៉ាងហ្មត់ចត់របស់សកម្មជនគណបក្សសង្គ្រោះជាតិ ខណៈដែលបាតុកម្មជាលើកទីពីរ ចាប់ផ្តើមនៅព្រឹកថ្ងៃអាទិត្យស្អែកនេះ។
លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ បានថ្លែងថា អាជ្ញាធរកំពុងប្រជុំពិចារណាចាត់វិធានការ ចំពោះការសាងសង់រោងប្រក់កៅស៊ូតង់ របស់គណបក្សសង្គ្រោះជាតិនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ