អតីតប្រធានាធិបតីស៊ូដង់ ត្រូវកាត់ទោសជាប់ពន្ធនាគារ ២ឆ្នាំ ពីបទពុករលួយ
ថ្ងៃសៅរ៍ ទី១៤ធ្នូ លោក Omar el-Béchir អតីតប្រមុខរដ្ឋស៊ូដង់ បានត្រូវតុលាការសម្រេចកាត់ទោសឱ្យជាប់មន្ទីរឃុំឃាំង ចំនួន២ឆ្នាំ ពីបទល្មើសពុករលួយ។ លោកធ្លាក់ចុះពីតំណែង ដោយសារតែកម្លាំងយោធា តាមសម្រែកទាមទាររបស់បាតុកម្មមហាជន កាលពីខែមេសា កន្លងទៅ។ ការសម្រេចកាត់ទោសឱ្យជាប់ពន្ធនាគារនៅក្នុងស្រុក គឺនៅមិនទាន់ចប់នោះទេ ក្រុមអ្នកមួយចំនួន ចង់ជំរុញបញ្ជូនខ្លួនលោកអតីតប្រធានាធិបតីស៊ូដង់ ទៅទទួលទោសបន្ថែមទៀតនៅក្នុងរង្វង់ក្រចកសេះ របស់តុលាការព្រហ្មទណ្ឌអន្តរជាតិ ក្រុងឡាអេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៣
ពាក់វ៉ែនតាមីញ៉ូម ក្នុងសម្លៀកបំពាក់ប្រពៃណីស៊ូដង់ រ៉ូបពណ៌ស លោក Omar el-Béchirឋិតនៅពីក្រោយចម្រឹងដែកពណ៌ខ្មៅ។ មានវ័យ៧៥ឆ្នាំ អតីតបុរសខ្លាំងស៊ូដង់ មានសម្បូរខ្មៅ និងជូតក្បាលដោយកន្សែងស។ លោកអតីតប្រធានាធិបតីស៊ូដង់ ត្រូវតុលាការរដ្ឋធានីខារទុំ ដាក់ទោសពីបទឧក្រិដ្ឋពុករលួយ និងបទកាន់កាប់រូបិយបណ្ណបរទេស គឺជាលុយដែលលោកទទួលបានពីសំណូករបស់មន្ត្រីថ្នាក់ដឹកនាំផ្សេងៗ រួមទាំងលុយដែលបានពីស្តេចអារ៉ាប៊ីសាអូឌីតផង។ ទ្រព្យទាំងនេះ ត្រូវតុលាការសម្រេចរឹបអូស។ នៅពីខាងក្រៅរបងតុលាការពិសេស, មនុស្សម្នាដែលនៅមានសមានចិត្តស្តាយស្រណោះអតីតថ្នាក់ដឹកនាំរបស់ខ្លួន បានស្រែកថា «គ្មាននរណាល្អជាងព្រះទៀតទេ!» អ្នកមួយចំនួនថា«ត្រូវតែប្តឹងតទៅឧទ្ធរណ៍ ប្តឹងទៅតុលាការកំពូលថែមទៀត»។ អ្នកខ្លះទៀតក៏សម្តែងមតិថា«គ្មានជំនឿលើការកាត់ក្តីរបស់ប្រព័ន្ធតុលាការស៊ូដង់ឡើយ»។
អតីតប្រមុខរដ្ឋរូបនេះ ឡើងកាន់អំណាចដោយសារតែការធ្វើរដ្ឋប្រហារ ឆ្នាំ១៩៨៩ ប៉ុន្តែ លោកកាន់អំណាចបាន៣០ឆ្នាំ ត្រឹមឆ្នាំ២០១៩ ក៏ត្រូវកម្លាំងមហាជននិងយោធា ដេញឱ្យធ្លាក់ពីតំណែងទៅវិញ។ គួរជ្រាបថា កាលពីឆ្នាំ២០០៩និង២០១០ បុរសខ្លាំង Omar el-Béchir បានត្រូវតុលាការព្រហ្មទណ្ឌអន្តរជាតិ បានចេញដីកាចាប់ខ្លួន ចំនួនពីរ ទាក់ទងនឹងបទឧក្រិដ្ឋសម្លាប់មនុស្ស ក្នុងជម្លោះប្រដាប់អាវុធ រវាងក្រុមឧទ្ទាមនិងអ្នកគាំទ្ររដ្ឋអំណាច ដែលបណ្តាលឱ្យស្លាប់មនុស្ស ជាង៣០ម៉ឺននាក់ និងជាង២លាន៥សែននាក់ ត្រូវរត់ភៀសខ្លួនចោលផ្ទះសម្បែង។ តុលាការព្រហ្មទណ្ឌអន្តរជាតិ ពេលនោះ បានចោទប្រកាន់រូបលោក ពីបទឧក្រិដ្ឋកម្មសង្គ្រាម, បទឧក្រិដ្ឋប្រឆាំងមនុស្សជាតិ និងបទប្រល័យពូជសាសន៍ នៅតំបន់ Darfour ខែត្រភាគខាងលិចស៊ូដង់។ រហូតមកទល់នឹងពេលនេះ រដ្ឋាភិបាលអន្តរកាលរបស់ស៊ូដង់ នៅមិនទាន់ហារស្តីថាយ៉ាងទេ ពីការបញ្ចូនខ្លួន អតីតប្រធានាធិបតីលោក Omar el-Béchir ទៅជម្រះក្តី នៅក្រុងឡាអេ។ ក៏ប៉ុន្តែ បើសួរ«កងកម្លាំងចលនាដើម្បីសេរីភាពនិងការផ្លាស់ប្តូរ» ដែលជាកម្លាំងបាតុករទាមទារទម្លាក់ប្រធានធិបតី គឺក្រុមពួកគេអះអាងថា «គ្មានអ្វីត្រូវបដិសេធក្នុងការបញ្ចូនខ្លួននោះឡើយ»។
គួរបញ្ជាក់ថា ក្រោយពីចៅក្រមតុលាការពិសេស បានសម្រេចប្រកាសសាលក្រមដាក់ទោសពន្ធនាគារ២ឆ្នាំរួចមក អតីតប្រមុខរដ្ឋលោក Omar el-Béchir ក៏ត្រូវប៉ូលីសនាំខ្លួនទៅកាន់«មជ្ឈមណ្ឌលកែប្រែសម្រាប់មនុស្សចាស់» តែព័ត៌មានខ្លះ ថា«ដាក់ឃុំឃាំងនៅក្នុងផ្ទះ» ពីព្រោះថា តាមច្បាប់របស់ស៊ូដង់ ជនល្មើសដែលមានអាយុលើសពី៧០ឆ្នាំឡើងទៅ គឺមិនត្រូវដាក់នៅក្នុងគុកធម្មតានោះទេ។ ចំពោះអ្នកខ្លះ គេយល់ថា ទោស២ឆ្នាំ នៅស្រាលណាស់ បើពិនិត្យមើលកំហុសរបស់លោក ចំនួន៣ទសវត្សរ៍មកនេះ។ ទោះយ៉ាងណាក្តី លោក Omar el-Béchir ក៏នឹងត្រូវប្រឈមមុខនឹងបទចោទប្រកាន់ផ្សេងៗបន្ថែមទៀត ជាអាទិ៍ សំណុំរឿងហិង្សាបង្ក្រាបទៅលើហ្វូងបាតុករជាដើម ដែលតុលាការកំពុងតែស៊ើបអង្កេត ជាបន្តទៀតនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ