លោក សួន សេរីរដ្ឋា មានគម្រោងអញ្ជើញលោក ហ៊ុន សែន មកសួរដេញដោល បន្ទាប់ពីលោក សម រង្ស៊ី
លោក សួន សេរីរដ្ឋា ប្រធានគណបក្សអំណាចខ្មែរ បានសរសេរនៅលើទំព័រហ្វេសបុកផ្លូវការរបស់លោកនៅថ្ងៃនេះថា លោកមានគម្រោងអញ្ជើញលោកនាយករដ្ឋមន្រ្តី ហ៊ុន សែន មកសួរដេញដោលគ្នានៅលើវេទិការនយោបាយមួយ បន្ទាប់ពីការអញ្ជើញលោក សម រង្ស៊ី ប្រធានគណបក្សប្រឆាំង។ ប៉ុន្តែក្រុមអ្នកវិភាគបានមើលឃើញថា វេទិការនេះ ទំនងជាមិនអាចទៅរួចនោះទេ។
ចុះផ្សាយនៅថ្ងៃ៖
ស្តាប់ - ០២:០៦
លោក សួន សេរីរដ្ឋា ដែលកំពុងចូលរួមនៅក្នុងវេទិការមួយនៅខេត្តកំពង់ស្ពឺ បានឆ្លើយតបទៅនឹងសំណួរនៅលើទំព័រហ្វេសបុករបស់លោក កាលពីថ្ងៃទី១៦តុលាថា ហេតុអ្វីបានជាគណបក្សអំណាចខ្មែរ មិនអញ្ជើញលោកនាយករដ្ឋមន្រ្តី ហ៊ុន សែន ឲ្យមកឡើងវេទិកាដេញដោលគ្នា ដូចដែលលោកបានអញ្ជើញលោក សម រង្ស៊ីប្រធានគណបក្សសង្រ្គោះជាតិ?
លោក សួន សេរីរដ្ឋា បានឆ្លើយតបថា លោក ហ៊ុន សែន ក៏ត្រូវតែអញ្ជើញមកសួរដេញដោលដែរ តែមិនមែនពេលនេះទេ។ បើតាមប្រធានគណបក្សអំណាចខ្មែររូបនេះ គម្រោងនៃការអញ្ជើញលោកនាយករដ្ឋមន្រ្តី ហ៊ុន សែន នឹងធ្វើឡើង បន្ទាប់ពីការអញ្ជើញលោកសម រង្ស៊ីព្រោះថា លោកហ៊ុន សែន បច្ចប្បន្ន ប្រៀបដូចជាម្ចាស់ខ្សែក្រវ៉ាត់ទៅហើយ ដែលត្រូវការជើងខ្លាំងម្នាក់ទៅដណ្តើម។
សូមបញ្ជាក់ថា កាលពីថ្ងៃទី១៦តុលា លោក សួន សេរីរដ្ឋា បានប្រកាសនៅលើទំព័រហ្វេសបុករបស់លោកថា គណបក្សអំណាចខ្មែរ នឹងអញ្ជើញលោក សម រង្ស៊ី មេដឹកនាំគណបក្សសង្គ្រោះជាតិ ដែលជាគណបក្សមានកៅអីក្នុងសភា ឡើងវេទិកាមួយដែលមានឈ្មោះថា «ភាពជាអ្នកនយោបាយ» ដែលគ្រោងនឹងរៀបចំឡើងនៅថ្ងៃទី ៧ វិច្ឆិកា ២០១៥ ខាងមុខ។
វេទិការនេះ គឺដើម្បីផ្តល់ឱកាសឲ្យអ្នកចូលរួម បានសួរដេញដោលដោយសេរី ក្នុងនាមជាបេក្ខជននាយករដ្ឋមន្ត្រីនៃគណបក្សសង្គ្រោះជាតិ។ ប៉ុន្តែ លោក យឹម សុវណ្ណ អ្នកនាំពាក្យគណបក្សសង្រ្គោះជាតិបានឆ្លើយតបតាមរយៈទំព័រហ្វេសបុកភ្លាមថា មេដឹកនាំបក្សសង្គ្រោះជាតិនឹងមិនចំណាយពេលចូលរួមពិភាក្សាជាមួយបក្សអំណាចខ្មែរ ដែលជាបក្សគ្មានអាសនៈក្នុងរដ្ឋសភានោះទេ។ ដូចគ្នាអញ្ចឹងដែរ លោក មុត ចន្ថា ប្រធានខុទ្ទកាល័យរបស់លោក កឹម សុខា បានហៅការអញ្ជើញនេះថា ជាយុទ្ធសាស្រ្តចង់ល្បីឈ្មោះរបស់លោក សួន សេរីរដ្ឋា តែប៉ុណ្ណោះ។
យ៉ាងណាក៏ដោយ លោកទេព វីរៈ អ្នកនាំពាក្យគណបក្សអំណាចខ្មែរបានបញ្ជាក់ថា គណបក្សនៅតែរក្សាគម្រោងបង្កើតវេទិការនេះដដែល ហើយការបដិសេធយ៉ាងណានោះ គឺទុកឲ្យប្រជាពលរដ្ឋជាអ្នកវាយតម្លៃ។
គួរកត់សំគាល់ថា លោក សួន សេរីរដ្ឋា ដែលទើបវិលត្រលប់មកដល់ប្រទេសកម្ពុជាវិញ កាលពីថ្ងៃទី១ខែតុលាឆ្នាំ២០១៥នេះ បានធ្វើសកម្មភាពគួរឲ្យកត់សំគាល់ជាច្រើន។ គេនៅចាំបានថា គ្រាន់តែមកដល់កម្ពុជាភ្លាម ប្រធានគណបក្សអំណាចខ្មែររូបនេះ បានប្រកាសចងសម្ព័ន្ធភាពជាមួយគណបក្សតូចៗដែលគ្មានអាសនៈនៅក្នុងសភា និងគណបក្សដែលទើបតែបង្កើតថ្មី ដើម្បីតស៊ូគោលនយោបាយរួម។ ប៉ុន្តែគម្រោងនោះមិនទទួលបានការឆ្លើយតបជាវិជ្ជមាននោះទេ ហើយគេមិនរំពឹងទេថា ការចងសម្ព័ន្ធភាពបែបនេះ នឹងទទួលបានជោគជ័យនោះដែរ ព្រោះថា ក្នុងបរិបទនយោបាយកម្ពុជាបច្ចុប្បន្ន សម្ព័ន្ធភាពបែបនេះមិនចាំបាច់នោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ