ជម្លោះកូរ៉េខាងត្បូងនិងជប៉ុនអាចជាបញ្ហាចោទចំពោះយុទ្ធសាស្រ្តរបស់ឥណ្ឌា
ចុះផ្សាយនៅថ្ងៃ៖
ស្តាប់ - ០៤:០៨
កាលពីសប្តាហ៍មុន ឥណ្ឌាបានទទួលស្វាគមន៍ប្រធានាធិបតីកូរ៉េខាងត្បូង នៅក្នុងដំណើរទស្សនកិច្ចផ្លូវរដ្ឋដ៏សំខាន់មួយ សម្រាប់ទំនាក់ទំនងជាដៃគូយុទ្ធសាស្រ្ត រវាងប្រទេសទាំងពីរ។ សម្រាប់ឥណ្ឌា ទំនាក់ទំនងជាមួយកូរ៉េខាងត្បូង គឺជាផ្នែកមួយនៃយុទ្ធសាស្រ្តរយៈពេលវែង ក្នុងការពង្រីកឥទ្ធិពលក្នុងតំបន់ ជាពិសេស ដើម្បីប្រជែងជាមួយចិន។ ក៏ប៉ុន្តែ បញ្ហាប្រឈមដ៏ធំសម្រាប់ឥណ្ឌា គឺជម្លោះដែលតែងតែកើតមានឥតឈប់ រវាងកូរ៉េខាងត្បូង និងជប៉ុន ដែលជាដៃគូយុទ្ធសាស្រ្តដ៏សំខាន់មួយដែររបស់ឥណ្ឌា។
ជាទូទៅ គេសង្កេតឃើញថា កន្លងមក ឥណ្ឌាផ្តោតនយោបាយការបរទេសរបស់ខ្លួនច្រើនតែទៅលើតំបន់អាស៊ីអាគ្នេយ៍ ដែលឥណ្ឌាចាត់ទុកថាជាតំបន់ដែលខ្លួនមានឱកាសច្រើនក្នុងការពង្រីកឥទ្ធិពលផង និងជាតំបន់ដែលមានកំណើនសេដ្ឋកិច្ចខ្ពស់ ដែលអាចជាប្រយោជន៍ដល់ការអភិវឌ្ឍសេដ្ឋកិច្ចរបស់ឥណ្ឌាផង។
ក៏ប៉ុន្តែ បន្តិចម្តងៗ នៅពេលដែលឥណ្ឌាមានសេដ្ឋកិច្ចកាន់តែរីកលូតលាស់ខ្លាំង ឥណ្ឌាចាប់ផ្តើមសំឡើងមើលកាន់តែឆ្ងាយ រហូតទៅដល់តំបន់អាស៊ីបូព៌ា ជាពិសេស ឥណ្ឌាផ្តោតលើការពង្រឹងដៃគូជាយុទ្ធសាស្រ្តជាមួយប្រទេសជប៉ុន និងកូរ៉េខាងត្បូង។
បច្ចុប្បន្ននេះ ឥណ្ឌាមានទំនាក់ទំនងយ៉ាងជិតស្និទ្ធជាមួយនឹងជប៉ុនរួចទៅហើយ។ ការពង្រឹងទំនាក់ទំនងជាមួយកូរ៉េខាងត្បូងមួយបន្ថែមទៀតនឹងជួយពង្រឹងសមត្ថភាពរបស់ឥណ្ឌា ដើម្បីអាចក្លាយជាតួអង្គចម្បងមួយ នៅក្នុងតំបន់អាស៊ីបូព៌ា ដែលជាទីតាំងដ៏សំខាន់មួយ នៃការប្រជែងឥទ្ធិពលគ្នា រវាងមហាអំណាចក្នុងសតវត្សរ៍ទី២១នេះ។
►សូមអាន៖ ជប៉ុន និងឥណ្ឌាចុះកិច្ចព្រមព្រៀងពាណិជ្ជកម្ម
កូរ៉េខាងត្បូង គឺជាមហាអំណាចសេដ្ឋកិច្ចលំដាប់ទី៤ នៅអាស៊ី បន្ទាប់ពីចិន ជប៉ុន និងឥណ្ឌា។ សំខាន់ជាងនេះទៅទៀត សម្រាប់ឥណ្ឌា កូរ៉េខាងត្បូង គឺជាប្រទេសដែលមានបច្ចេកវិទ្យា និងឧស្សាហកម្មយោធាដ៏ជឿនលឿន។ បច្ចេកវិទ្យាខាងផ្នែកមីស៊ីល និងខាងទ័ពជើងទឹករបស់កូរ៉េត្បូង គឺជាបច្ចេកវិទ្យាដ៏ទំនើប ដែលគេទទួលស្គាល់ជាអន្តរជាតិ ហើយជាបច្ចេកវិទ្យា ដែលឥណ្ឌាត្រូវការ ក្នុងការពង្រឹងសមត្ថភាពយោធារបស់ខ្លួន។
សម្រាប់កូរ៉េខាងត្បូងវិញ ឥណ្ឌា ដែលមានប្រជាជនរហូតដល់ទៅជាង១ពាន់លាននាក់ ហើយដែលមានសេដ្ឋកិច្ចកំពុងរីកលូតលាស់យ៉ាងលឿនមួយនោះ គឺជាទីផ្សារប្រកបដោយសក្តានុពលមួយ។ កាលពីសប្តាហ៍មុន លោកស្រីប៉ាក់ គុនហេ ប្រធានាធិបតីកូរ៉េខាងត្បូង បានបញ្ជាក់យ៉ាងច្បាស់ៗថា គោលដៅសំខាន់នៃដំណើរទស្សនកិច្ចរបស់លោកស្រី នៅឥណ្ឌា គឺដើម្បីស្វះស្វែងរកទីផ្សារ សម្រាប់ឧស្សាហកម្មកូរ៉េខាងត្បូង។
ត្រង់ចំណុចនេះ គេអាចនិយាយបានថា ឥណ្ឌា និងកូរ៉េខាងត្បូង មានផលប្រយោជន៍រួមគ្នា ដែលជាកត្តាសំខាន់ ក្នុងការពង្រឹងទំនាក់ទំនងជាដៃគូយុទ្ធសាស្រ្ត។
បើនិយាយខាងភូមិសាស្រ្តនយោបាយវិញ យើងឃើញថា កូរ៉េខាងត្បូង និងឥណ្ឌា ក៏មានបញ្ហាប្រឈមរួមគ្នាដ៏ធំមួយដែរ គឺកូរ៉េខាងជើង។ របបកុម្មុយនិស្តព្យុងយ៉ាង ដែលជាគូសត្រូវរបស់កូរ៉េខាងត្បូង មានជាប់សង្ស័យថា បានលួចលក់បច្ចេកវិទ្យាមីស៊ីល និងនុយក្លេអ៊ែរទៅឲ្យប៉ាគីស្ថាន ដែលជាគូសត្រូវរបស់ឥណ្ឌា។ ហេតុដូច្នះហើយបានជាគេសង្កេតឃើញថា ឥណ្ឌាតែងតែបានដើរតួនាទីយ៉ាងសកម្ម ក្នុងការអនុវត្តទណ្ឌកម្មអន្តរជាតិទៅលើកូរ៉េខាងជើង។
ចំពោះទំនាក់ទំនងជាមួយចិនវិញ (ចិនដែលជាគូប្រជែងរបស់ឥណ្ឌា) ឥណ្ឌាក៏រំពឹងថានឹងអាចរកចំណុចរួមជាមួយនឹងកូរ៉េខាងត្បូងដែរ។ ចិន គឺជាសម្ព័ន្ធមិត្តរបស់កូរ៉េខាងជើង ដែលជាគូសត្រូវរបស់កូរ៉េខាងត្បូង។ ចំណែកកូរ៉េខាងត្បូង គឺជាសម្ព័ន្ធមិត្តដ៏ជិតស្និទ្ធរបស់អាមេរិក ដែលជាគូប្រជែងរបស់ចិន។ ក៏ប៉ុន្តែ ទោះបីជាយ៉ាងនេះក៏ដោយ នៅក្នុងការពិតជាក់ស្តែង គេសង្កេតឃើញថា អ្វីៗហាក់ដូចជាមិនសាមញ្ញ ដូចការរំពឹងចង់បានរបស់ឥណ្ឌានោះទេ។
►សូមអាន៖ តើចិនអាចប្រជែងឈ្នះឥណ្ឌាក្នុងការគ្រប់គ្រងមហាសមុទ្រឥណ្ឌាឬទេ?
ថ្វីដ្បិតតែចិន និងកូរ៉េខាងត្បូង ដើរផ្លូវផ្សេងគ្នា នៅក្នុងសំណុំរឿងកូរ៉េខាងជើង និងក្នុងទំនាក់ទំនងជាមួយសហរដ្ឋអាមេរិក ក៏ប៉ុន្តែ គេឃើញថា ប្រទេសទាំងពីរនេះក៏មានផលប្រយោជន៍រួមគ្នាច្រើនដែរ។ ការដោះដូរពាណិជ្ជកម្ម និងការវិនិយោគ រវាងចិន និងកូរ៉េខាងត្បូងចេះតែបន្តកើនឡើងយ៉ាងខ្លាំងឥតឈប់។ ម្យ៉ាងទៀត ប្រទេសទាំងពីរនេះមានចំណងប្រវត្តិសាស្រ្តរួមគ្នាមួយ គឺការរងគ្រោះដោយអំពើឈ្លានពានរបស់ជប៉ុន ក្នុងសម័យសង្រ្គាម។
គេឃើញថា នៅពេលដែលលោកស្ហ៊ីនហ្សូ អាបេ នាយករដ្ឋមន្រ្តីជប៉ុន ធ្វើដំណើរទៅគោរពវិញ្ញានក្ខន្ធ នៅវិហារយ៉ាស៊ូគូនី កាលពីខែធ្នូ ចិន និងកូរ៉េខាងត្បូងបានមូលមាត់គ្នាថ្កោលទោសទង្វើនេះ។ កាលពីថ្ងៃអាទិត្យ ១៩មករា កន្លងទៅថ្មីៗនេះ ចិនបានសម្ពោធស្តូបមួយឧទ្ទិសដល់យុវជនកូរ៉េ ដែលបានធ្វើឃាតនាយករដ្ឋមន្រ្តីជប៉ុន កាលពីឆ្នាំ១៩០៩។
►សូមអាន៖ ចិនសម្ពោធស្តូបឧទ្ទិសចំពោះឃាតករសម្លាប់នាយករដ្ឋមន្រ្តីជប៉ុនក្នុងឆ្នំា ១៩០៩
ជាការពិត ភាពចម្រូងចម្រាស រវាងជប៉ុន និងកូរ៉េខាងត្បូង ទាក់ទងនឹងរឿងរ៉ាវអតីតកាល គឺជាបញ្ហាចោទដ៏ធំមួយ សម្រាប់ឥណ្ឌា ពីព្រោះថា ឥណ្ឌាចង់រក្សាទំនាក់ទំនងជាយុទ្ធសាស្រ្តទាំងជាមួយជប៉ុន និងជាមួយកូរ៉េខាងត្បូង។
អ្វីដែលគួរឲ្យកត់សម្គាល់ យើងឃើញថា ប្រមុខដឹកនាំកូរ៉េខាងត្បូង និងប្រមុខដឹកនាំជប៉ុន សុទ្ធសឹងជាភ្ញៀវដ៏សំខាន់ដែលឥណ្ឌាទទួលស្វាគមន៍ នៅក្នុងខែមករា ដើមឆ្នាំថ្មីនេះ។ កាលពីសប្តាហ៍មុន ឥណ្ឌាក្រាលព្រំទទួលប្រធានាធិបតីកូរ៉េខាងត្បូង។ នៅសប្តាហ៍ក្រោយ គឺលោកនាយករដ្ឋមន្រ្តីជប៉ុន ស្ហ៊ីនហ្សូ អាបេ ដែលនឹងត្រូវអញ្ជើញជាភ្ញៀវកិត្តិយស ក្នុងពិធីបុណ្យជាតិឥណ្ឌា នៅថ្ងៃទី២៦មករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ