ហេតុអ្វីបានជានិស្សិតកាណាដាធ្វើបាតុកម្មជាង៣ខែ?
ចុះផ្សាយនៅថ្ងៃ៖
ស្តាប់ - ០៧:០៧
ខេត្តQuebec របស់ប្រទេសកាណាដាកំពុងរញ្ជួយដោយមហាបាតុកម្មរបស់និស្សិតរាប់ម៉ឺននាក់ ដែលកើតមានជាង៣ខែមកហើយ។ និស្សិតកាណាដាទាំងនោះធ្វើបាតុកម្មប្រឆាំងនឹងការដំឡើងថ្លៃសាលា ដែលរដ្ឋាភិបាលខេត្ត Quebecទើបអនុម័តដាក់ឲ្យប្រើប្រាស់ចាប់ពីឆ្នាំ ២០១២នេះទៅ។ កាលពីយប់ថ្ងៃពុធ ឈានចូលដល់ថ្ងៃព្រហស្បតិ៍ទី ២៤ ឧសភា ប៉ូលិសបានចាប់ឃាត់ខ្លួន បាតុករជាង ៧០០នាក់។
បើគិតមកដល់ថ្ងៃសុក្រនេះ បាតុកម្មរបស់និស្សិតកាណាដាមានរយៈពេល ១០៣គត់។ ជាង បីខែហើយ គេនៅមិនទាន់មានដំណោះស្រាយចេញរួចទៀត។ ការចរចារវាងមន្រ្តីរដ្ឋាភិបាល ជាមួយតំណាងសមាគម និងសហជីព និស្សិត គ្រូបង្រៀន ត្រូវបរាជ័យជាច្រើនលើក ដោយនិស្សិត នៅតែមិនយល់ព្រមជាមួយដំណោះស្រាយរបស់រដ្ឋាភិបាល។
គឺនៅឆ្នាំ ២០១១កន្លងទៅ ក្នុងពេលបោះឆ្នោតកញ្ចប់ថវិការដ្ឋ នាយករដ្ឋមន្រ្តីប្រចាំខេត្ត Québec បានសម្រេចដំឡើងថ្លៃបង់សាលារៀនរដ្ឋ ប្រមាណ៣២៥ដុល្លារ ក្នុងមួយឆ្នាំៗ។ បច្ចុប្បន្ន និស្សិតកាណាដាត្រូវបង់ថ្លៃសាលារៀន ២១៦៨ដុល្លារ។ បើរដ្ឋទារដំឡើងថ្លៃសាលារៀន ៣២៥ដុល្លារ ក្នុងមួយឆ្នាំៗ នោះ នៅឆ្នាំ ២០១៧ ខាងមុខ និស្សិតត្រូវបង់ថ្លៃសាលារៀន ៣៧៩៣ដុល្លារក្នុងមួយឆ្នាំ។
នាយករដ្ឋមន្រ្តីប្រចាំខេត្ត Québec បានការពារច្បាប់ថ្មីថា ជានយោបាយទប់ទល់ឧុនភាពថវិការដ្ឋ។ រដ្ឋាភិបាលខេត្ត Québec ចង់ឲ្យប្រាក់ចំណូលរបស់សកលវិទ្យាល័យកើនឡើង ២៥ភាគរយពីពេលនេះ ដល់ឆ្នាំ ២០១៧។ នៅពេលសកលវិទ្យាល័យមានប្រាក់ចំណូលខ្ពស់ រដ្ឋនឹងអាចកាត់បន្ថយចំណាយរបស់ខ្លួន ទៅលើកញ្ចប់ថវិកាសម្រាប់សកលវិទ្យាល័យ។ តាមរដ្ឋមន្រ្តីសេដ្ឋកិច្ច និស្សិតត្រូវបង់ថ្លៃសាលារៀនថ្លៃជាងមុន តែបន្តិចបន្តួច គឺការចូលរួមបង់ថ្លៃសាលារបស់ពួកគេ នឹងកើនពី១២ ទៅ ១៦ភាគរយប៉ុណ្ណោះ ព្រោះក្រៅពីនោះ ជាបន្ទុករបស់រដ្ឋ និងរបស់សា្ថប័នឯកជន។
ម្យ៉ាងវិញទៀត រដ្ឋនឹងជួយបន្ធូរការប្រាក់របស់និស្សិតដែលត្រូវខ្ចីលុយពីធនាគារសម្រាប់បង់ថ្លៃសាលារៀន។ និយាយបែបម្យ៉ាង គឺរដ្ឋចង់សម្រាលដកខ្លួនចេញពីគ្រប់គ្រងវិស័យអប់រំតែម្នាក់ ដោយធ្វើឯកជនភាវូបនីយកម្ម លើសាលារៀនរដ្ឋ។
ប្រជាជន Québecបង់ថ្លៃពន្ធដាច្រើនជាងគេ បើប្រៀបធៀបនឹងខេត្តផ្សេង នៅក្នុងប្រទេសកាណាដា ដោយសារតែប្រជាជនបង់ពន្ធច្រើន ដូច្នេះ តម្លៃបង់ថ្នាក់រៀន នៅសកលវិទ្យាល័យក្នុងខេត្ត Québecក៏ត្រូវមានតម្លៃថោកជាងគេ ។ ដូច្នេះ នៅពេលរដ្ឋលែងចង់ធានាជួយដូចមុន គឺចង់ដំឡើងថ្លៃបង់សាលារៀន បន្ថែមទៀតគឺសឹងតែកើនទ្វេរដង ទើបនិស្សិត និងគ្រូបង្រៀនខឹងសម្បារ។ ពួកគេតវ៉ា ដើម្បីឲ្យរដ្ឋបញ្ឈប់ផែនការដំឡើងថ្លៃសាលារៀន ព្រោះថា ផែនការនេះនឹងធ្វើឲ្យនិស្សិតដែលគ្មានលទ្ធភាព និងដែលកំពុងរងគ្រោះដោយអតិផរណាសង្គម ត្រូវបង្ខំចិត្តបោះបង់ចោលការសិក្សា។
បាតុកម្មរបស់និស្សិតដើម្បីទាមទារឲ្យរដ្ឋាភិបាលបញ្ឈប់នយោបាយដំឡើងថ្លៃសាលារៀន បានក្លាយជាបាតុកម្មរបស់ប្រជាជនកាណាដា ប្រឆាំងរដ្ឋាភិបាលបន្ទាប់ពីរដ្ឋាភិបាលបានបង្កើតច្បាប់ពិសេសថ្មី ឈ្មោះច្បាប់លេខ ៧៨ពិសេស កាលពីសប្តាហ៍មុន។ ក្នុងច្បាប់ថ្មីនេះដែលមានសុពលភាព រហូតដល់ខែកក្កដា ឆ្នាំ ២០១៣ គេបានចែង ហាមមិនឲ្យមានការជួបជុំគ្នាលើសពីមនុស្ស៥០នាក់ នៅក្បែរសាលារៀន។ ហើយបើចង់ធ្វើបាតុកម្ម ត្រូវជូនដំណឹងទៅប៉ូលិសឲ្យបាន៨ម៉ោងមុន។ ប៉ុន្តែ ក្រុមនិស្សិត និងគណបក្សប្រឆាំងដែលចាត់ទុក ច្បាប់នេះ ថា ជាការហាម បិទសិទ្ធិសេរីភាពរបស់បាតុករ បានផ្គើន និងចេញធ្វើបាតុកម្មកាន់តែច្រើន ប្រឆាំងនឹងរដ្ឋាភិបាល។
នៅខេត្ត Québec ទាំងមូល ក្នុងបាតុកម្ម ដែលឈានទៅដល់ការប្រឈមមុខហិង្សា ជាមួយប៉ូលិស។ កាលពីយប់ថ្ងៃពុធ ចូលដល់ថ្ងៃព្រហស្បតិ៍ ដោយចាត់ទុកថា បាតុកម្មធ្វើឡើងដោយខុសច្បាប់ គ្មានការសុំអនុញ្ញាតិអាជ្ញាធរ ប៉ូលិសបានចាប់ឃាត់ខ្លួនមនុស្សជាង៧០០នាក់។ តាមច្បាប់ថ្មី អ្នកដែលគេចាប់ខ្លួនត្រូវបង់ពិន័យប្រាក់ ប្រមាណ ៦០០ដុល្លារ មុននឹងត្រូវប៉ូលិសដោះលែងទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ