តើអាចមានអ្វីប្រែប្រួលក្នុងវិបត្តិស៊ីរីក្រោយពីអាមេរិកប្រកាសថាលោកអាសាដប្រើអាវុធគីមី?
ចុះផ្សាយនៅថ្ងៃ៖
គេនៅចាំបានថា ការប្រើអាវុធគីមី គឺជាបន្ទាត់ក្រហម ដែលលោកអូបាម៉ាបានគូសកំណត់កុំឲ្យលោកអាសាដបំពាន។ ក្រោយពីបានស្ទាក់ស្ទើរ អល់អែក អស់ប៉ុន្មានសប្តាហ៍ ឥឡូវនេះ អាមេរិកទើបនឹងបានប្រកាសទទួលស្គាល់ថា ពិតជាមានភស្តុតាងបញ្ជាក់ពិតប្រាកដមែនថា រដ្ឋាភិបាលស៊ីរីបានប្រើអាវុធគីមី មានន័យថា ខ្សែបន្ទាត់ក្រហមគូសដោយលោកអូបាម៉ាត្រូវបានរំលោភបំពាន ក៏ប៉ុន្តែ សំណួរសំខាន់ដែលចោទឡើង គឺត្រង់ថា តើអាមេរិកអាចនឹងធ្វើអន្តរាគមន៍រហូតដល់កម្រិតណា នៅក្នុងវិបត្តិស៊ីរី ដើម្បីឆ្លើយតបនឹងការរំលោភបំពាននេះ?
គិតមកត្រឹមថ្ងៃនេះ វិធានការ ដែលអាមេរិកប្រកាសជាផ្លូវការ គឺប្រកាស “ផ្តល់ជំនួយយោធាដោយផ្ទាល់” ដល់ក្រុមឧទ្ទាម។ ក៏ប៉ុន្តែ គ្មានការបញ្ជាក់ជាផ្លូវការឲ្យបានច្បាស់លាស់ថា តើ “ការផ្តល់ជំនួយយោធាដោយផ្ទាល់”នេះ នឹងត្រូវធ្វើក្នុងទម្រង់បែបណាឲ្យបានច្បាស់លាស់ទេ។
បើតាមកាសែតអាមេរិកដែលបានដកស្រង់ប្រភពពីមន្រ្តីរដ្ឋាភិបាលអាមេរិក ដែលសុំមិនបញ្ចេញឈ្មោះ អាមេរិកនឹងបញ្ជូនគ្រឿងសព្វាវុធទៅឲ្យក្រុមឧទ្ទាមស៊ីរី ក៏ប៉ុន្តែ គ្រឿងសព្វាវុធនេះ គឺមានត្រឹមតែជាអាវុធធុនស្រាលប៉ុណ្ណោះ។ ចំពោះអាវុធធុនធ្ងន់មួយចំនួន ដូចជា កាំភ្លើងធំ ឬមីស៊ីលសម្រាប់បាញ់រថក្រោះ ជាដើម ដែលក្រុមឧទ្ទាមស៊ីរីតែងតែទាមទារចង់បាន អាមេរិកកំពុងពិចារណា ហើយមិនទាន់សម្រេចថាឲ្យ ឬមិនឲ្យនៅឡើយទេ។
ក៏ប៉ុន្តែ មីស៊ីលលីលើស្មាសម្រាប់បាញ់យន្តហោះ (Stinger) ដែលក្រុមឧទ្ទាមស៊ីរីកំពុងតែទាមទារចង់បានខ្លាំងដែរនោះ អាមេរិកបានសម្រេចរួចហើយ គឺនឹងមិនបញ្ជូនទៅស៊ីរីទេ ដោយសារតែនៅក្នុងចំណោមក្រុមឧទ្ទាមស៊ីរី មានក្រុមអ៊ីស្លាមជ្រុលនិយមនៅចូលលាយឡំ ហើយអាមេរិកខ្លាចក្រែងមីស៊ីលសម្រាប់បាញ់យន្តហោះនេះធ្លាក់ទៅក្នុងក្រុមភេរវជន។
តាមការចុះផ្សាយរបស់កាសែតអាមេរិក ការបង្កើតតំបន់ហាមឃាត់ការហោះហើរ នៅមួយផ្នែកណាមួយ នៅស៊ីរី ក៏ជាជម្រើសមួយដែរ ដែលមេដឹកនាំយោធាអាមេរិកបានផ្តល់ជាអនុសាសន៍ទៅលោកអូបាម៉ា។
តាមអនុសាសន៍របស់មន្រ្តីយោធាអាមេរិក គេគួរបង្កើតតំបន់ហាមឃាត់ការហោះហើរនេះ ក្នុងដែនអាកាសស៊ីរី ប្រហែលជា ៤០គីឡូម៉ែត្រការ៉េ នៅបណ្តោយព្រំដែនជាមួយនឹងប្រទេសហ្សកដានី ដើម្បីការពារក្រុមឧទ្ទាម និងជនភៀសខ្លួនស៊ីរី ពីការវាយប្រហារតាមអាកាសពីសំណាក់កងកម្លាំងលោកអាសាដ ហើយក្នុងអំឡុងពេលនេះ អាមេរិកនិងសម្ព័ន្ធមិត្តបញ្ជូនគ្រឿងសព្វាវុធ ព្រមទាំងជួយហ្វឹកហ្វឺនក្រុមឧទ្ទាម ដើម្បីឲ្យពួកគេមានតុល្យភាពកម្លាំងទ័ពតទល់នឹងទាហានរដ្ឋាភិបាល ដែលឥឡូវនេះ មានជំនួយពីខាងក្រុម Hezbollah លីបង់បន្ថែមទៀត។
ការបង្កើតតំបន់គ្មានការហោះហើរ នៅជាប់នឹងព្រំដែនហ្សកដានី វាមានអំណោយផលខាងផ្នែកភស្តុភា សម្រាប់អាមេរិក ព្រោះអាមេរិកមានមីស៊ីល និងយន្តហោះចម្បាំងទំនើបៗ កំពុងស្ថិតក្នុងប្រទេសហ្សកដានីនេះស្រាប់ ឲ្យតែលោកអូបាម៉ាសម្រេច គឺអាមេរិកអាចនឹងចាប់ផ្តើមបើកប្រតិបត្តិការហាមឃាត់ការហោះហើរបានភ្លាមៗ។
ក៏ប៉ុន្តែ មន្រ្តីសេតវិមានបានបញ្ជាក់រួចហើយថា លោកអូបាម៉ាមិនបានធ្វើការសម្រេចចិត្តណាមួយនៅឡើយទេ ជុំវិញការបង្កើតតំបន់គ្មានការហោះហើរនៅស៊ីរីនេះ។
បញ្ហាដែលចោទ ចំពោះការបង្កើតតំបន់គ្មានការហោះហើរនៅស៊ីរីនេះ គឺវាជាប្រតិបត្តិការដែលមានលក្ខណៈស្មុគស្មាញខ្លាំង ពោលគឺ ស្មុគស្មាញជាងកាលពីករណីលីប៊ីឆ្ងាយណាស់ ពីព្រោះថា ស៊ីរីមានប្រព័ន្ធការពារដែនអាកាសទំនើបៗ ដែលបានមកពីរុស្ស៊ី ហើយយន្តហោះចម្បាំងរបស់ស៊ីរីក៏មានច្រើន ហើយទំនើបៗ បើធៀបនឹងលីប៊ី។ ដូច្នេះ អាមេរិកនឹងត្រូវចំណាយលុយច្រើន ហើយអាចទទួលការខូចខាតច្រើន នៅក្នុងប្រតិបត្តិការហាមឃាត់ការហោះហើរនៅស៊ីរី។
បញ្ហាចោទធំមួយទៀត គឺភ្លើងខៀវពីក្រុមប្រឹក្សាសន្តិសុខអ.ស.ប.។ កាលនៅលីប៊ី អាមេរិក រួមជាមួយនឹងសម្ព័ន្ធមិត្តក្នុងអង្គការអូតង់ ទទួលបាននូវការអនុញ្ញាតច្បាស់លាស់ ពីក្រុមប្រឹក្សាសន្តិសុខអ.ស.ប. ដើម្បីបង្កើតតំបន់គ្មានការហោះហើរនៅលីប៊ី។ ដូច្នេះ វាជាប្រតិបត្តិការមួយ ដែលស្របច្បាប់អន្តរជាតិ ក្នុងក្របខ័ណ្ឌអ.ស.ប.។
នៅស៊ីរីវិញ ចង់បានការអនុញ្ញាតពីក្រុមប្រឹក្សាសន្តិសុខអ.ស.ប. ក្នុងការបង្កើតតំបន់គ្មានការហោះហើរ គឺប្រហែលជាគ្មានសង្ឃឹមទេ ពីព្រោះ រុស្ស៊ី ដែលជាប្រទេសមានសិទ្ធិវ៉េតូ គឺជាសម្ព័ន្ធមិត្តជិតស្និទ្ធរបស់លោកអាសាដ ហើយកន្លងមក ត្រឹមតែអនុម័តសេចក្តីសម្រេច ដើម្បីថ្កោលទោសលោកអាសាដ ក្នុងការកាប់សម្លាប់ប្រជាជនស៊ីវិល ក៏រុស្ស៊ីធ្លាប់បានប្រើសិទ្ធិវ៉េតូរារាំងមិនឲ្យអនុម័តបានដែរ។ ទម្រាំតែអនុញ្ញាតឲ្យបង្កើតតំបន់គ្មានការហោះហើរទៀត ប្រាកដជាកាន់តែពិបាកទៅទៀត។
បើគ្មានការអនុញ្ញាតពីក្រុមប្រឹក្សាសន្តិសុខទេ ប្រទេសសម្ព័ន្ធមិត្តរបស់អាមេរិក រួមមាន បារាំង និងអង្គការអូតង់ ជាដើម ប្រហែលជាមិនទៅចូលរួមជាមួយអាមេរិក ដើម្បីបង្កើតតំបន់គ្មានការហោះហើរនៅស៊ីរីនេះទេ។ ម្យ៉ាងទៀត គេក៏មិនរំពឹងថា លោកអូបាម៉ាអាចនឹងសម្រេចបើកប្រតិបត្តិការនេះតែឯង គ្មានការចូលរួមពីសម្ព័ន្ធមិត្ត គ្មានភ្លើងខៀវពីក្រុមប្រឹក្សាសន្តិសុខនោះដែរ ព្រោះកន្លងមក លោកអូបាម៉ាធ្លាប់តែបានរិះគន់លោកប៊ូស ដែលបើកធ្វើសង្រ្គាមនៅអ៊ីរ៉ាក់ ដោយគ្មានការអនុញ្ញាតពីក្រុមប្រឹក្សាសន្តិសុខ។
មែនទែនទៅ បើយើងសង្កេតមើលពីជំហររួមរបស់លោកអូបាម៉ា យើងឃើញថា លោកអូបាម៉ាតែងតែព្យាយាមចៀសវាង មិនចង់ឲ្យអាមេរិកចូលធ្វើអន្តរាគន៍យោធា ក្នុងវិបត្តិស៊ីរីនេះទេ។ ការប្រកាសបញ្ជូនគ្រឿងសព្វាវុធទៅឲ្យក្រុមឧទ្ទាមស៊ីរី ពេលនេះ ក៏មើលទៅ ទំនងជាលោកអូបាម៉ាធ្វើដោយបង្ខំចិត្តដែរ។ បានជាជ្រុលសម្តីគំរាម គូសខ្សែបន្ទាត់ក្រហមថា កុំឲ្យបំពានរួចទៅហើយ ឥឡូវ លោកអាសាដបំពាន បើមិនធ្វើអ្វីសោះ ខ្លាចគេថា លេបសម្តីខ្លួនឯង។ ពេលខ្លះ គេសឹងតែអាចនិយាយបានថា លោកអូបាម៉ាប្រហែលជាកំពុងតែស្តាយក្រោយផងក៏មិនដឹង ដែលបានជ្រុលសម្តីព្រមាន គូសបន្ទាត់ក្រហម រឿងប្រើអាវុធគីមីនេះ រហូតធ្វើឲ្យជាប់មាត់ ជាប់ដៃ ទទួលសម្ពាធ ត្រូវបង្ខំចិត្តធ្វើអន្តរាគមន៍នៅស៊ីរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ