ស៊ីរី៖សហគមន៍អន្តរជាតិផុសផុលថ្កោលទោសការវាយប្រហារដែលមានដានអាវុធគីមី
ចុះផ្សាយនៅថ្ងៃ៖
ស្តាប់ - ០៥:០៦
ប្រទេសលោកខាងលិចបានបញ្ចេញប្រតិកម្មភ្លាមៗ ថ្កោលទោសចំពោះការវាយប្រហារដោយអាវុធគីមី ភាគពាយព្យស៊ីរី ដែលបានសម្លាប់មនុស្សយ៉ាងហោច៧២នាក់ និងបង្ករបួសជាង១០០នាក់ នៅថ្ងៃអង្គារម្សិលមិញ។ ប្រទេសលោកខាងលិច និងក្រុមឧទ្ទាមស៊ីរី បានទំលាក់កំហុសទៅលើកងទ័ពស៊ីរី តែរដ្ឋាភិបាលក្រុងដាម៉ាសបដិសេធការចោទប្រកាន់ និងទំលាក់កំហុសនេះទៅខាងក្រុមឧទ្ទាមវិញ។
ថ្ងៃពុធនេះ ក្រុមប្រឹក្សាសន្តិសុខអង្គការសហប្រជាជាតិកោះប្រជុំបន្ទាន់ ដើម្បីពិភាក្សាពីការ វាយប្រហារនេះ។ ម្សិលមិញ បារាំង អង់គ្លេស និងអាមេរិក បានបង្ហាញគម្រោងសេចក្តីសម្រេចចិត្តថ្កោលទោសការវាយប្រហារ និងទាមទារអោយមានការស៊ើបអង្កេតអោយឆាប់រហ័ស ពេញលេញ ចំពោះការវាយប្រហារនេះ។
ការវាយប្រហារនេះ អាចជាស្នាដៃរបស់កងទ័ពស៊ីរីទេ ?
ប្រតិកម្មជុំទិសថ្កោលទោសការវាយប្រហារ នៅក្រុងKhan Sheikhoun នៅស៊ីរីពេលនេះ គឺដោយសារតែការវាយប្រហារនេះ មានដានថាបានប្រើប្រាស់អាវុធគីមី។ ក្រុមគ្រូពេទ្យប្រាប់ថា ជនរងគ្រោះមានរន្ធប្រស្រីភ្នែករីកខ្លាំង មានអាការៈប្រកាច់ បែកពពុះមាត់។ ការវាយប្រហារបែបនេះ ធ្វើអោយគេនឹកដល់ការវាយប្រហារអាវុធគីមីនៅស៊ីរី កាលពីឆ្នាំ២០១៣ ដែលបានសម្លាប់ជនស៊ីវិលរាប់រយនាក់។
កងទ័ពស៊ីរីធ្លាប់រងការចោទប្រកាន់ច្រើនដងហើយថា បានប្រើអាវុធគីមីវាយប្រហារភូមិជាច្រើន ក្នុងឆ្នាំ២០១៤ និង២០១៥។ សម្រាប់ក្រុមប្រឆាំងស៊ីរី ការវាយប្រហារមានដានអាវុធគីមីលើកនេះ គឺជាស្នាដៃរបស់កងទ័ពលោកអាសាដទាំងស្រុង។
សម្រាប់ក្រុមប្រឆាំង ការវាយប្រហារនេះប៉ះពាល់ដល់នយោបាយចរចារវាងក្រុមប្រឆាំងនិងរដ្ឋាភិបាលលោកអាសាដ។ ក្រុមប្រឆាំងស៊ីរីបានបន្ទោសសហគមន៍អន្តរជាតិថា មិនបានថ្កោលទោសការវាយប្រហារអាវុធគីមីឆ្នាំ២០១៣ សោះ។ អញ្ចឹងហើយទើបពេលមានការវាយប្រហារលើកនេះ គ្រប់គ្នាមានទំនោរចោទប្រកាន់កងទ័ពស៊ីរីតែម្តង។ តែសួរថា តើកងទ័ពស៊ីរីពិតជាបានប្រើអាវុធគីមីវាយប្រហារមែនទេ
ក្រសួងការពារជាតិរុស្ស៊ីប្រាប់ថា កងទ័ពស៊ីរីពិតជាបានវាយប្រហារតាមផ្លូវអាកាស នៅតំបន់រងគ្រោះ ភាគពាយព្យមែន។ តែជាការទំលាក់គ្រាប់បែកលើស្តុកផ្ទុកអាវុធគីមីរបស់ក្រុមឧទ្ទាម។ កន្លែងស្តុកអាវុធនេះ មានរោងជាងមួយកន្លែង សម្រាប់ផលិតមីន និងសារធាតុពុលផ្សេងៗ។ អាវុធគីមីទាំងនេះ ផលិតសម្រាប់យកទៅជួយក្រុមប្រយុទ្ធនៅអ៊ីរ៉ាក់។ អញ្ចឹងហើយ ទើបការទំលាក់គ្រាប់បែកទៅលើស្តុកអាវុធគីមីនោះ ធ្វើអោយជនរងគ្រោះរងផលវិបាកបែបនេះ។ បើស្តាប់តាមព័ត៌មានរបស់រុស្ស៊ី កងទ័ពស៊ីរីមិនបានប្រើអាវុធគីមីវាយប្រហារទេ។ ជនរងគ្រោះទទួលផលវិបាកពីសារធាតុគីមី ដែលសាយភាយចេញពីស្តុកអាវុធដែលរងការទំលាក់គ្រាប់បែកនោះទៅវិញទេ។ ដូច្នេះ សម្រាប់រុស្ស៊ីវាមិនមែនជាកំហុសរបស់កងទ័ពស៊ីរីទេ។
ដោយឡែក រុស្ស៊ីមិនបានបញ្ជាក់ថាតើកងទ័ពស៊ីរី បានដឹងមុនទេថា កន្លែងនោះមានស្តុកអាវុធ ស្តុកសារធាតុគីមី ដែលពុំគួរវាយប្រហារ។ បើកងទ័ពស៊ីរីដឺងមុន នោះជាកំហុសកងទ័ពហើយ ព្រោះសារធាតុគីមី ប៉ះពាល់ធ្ងន់ធ្ងរដល់ជនរងគ្រោះ។ ពេលនេះ អង្គការហាមឃាត់អាវុធគីមីកំពុងប្រមូលព័ត៌មានពីគ្រប់ប្រភពទាំងអស់ ដើម្បីអាចអង្កេតលើការវាយប្រហារនេះ។
គម្រោងសេចក្តីសម្រេចថ្កោលទោសស៊ីរី
ក្រោយការវាយប្រហារនៅស៊ីរី ម្សិលមិញ បារាំង អង់គ្លេសនិងអាមេរិកបានបង្ហាញសេចក្តីសម្រេចថ្កោលទោសការវាយប្រហារ និងចែកចាយអោយសមាជិកក្រុមប្រឹក្សាសន្តិសុខអង្គការសហប្រជាជាតិ។ បារាំង អង់គ្លេស និងអាមេរិកគ្រោងដាក់សេចក្តីសម្រេចចិត្តនេះ ទៅអោយបោះឆ្នោត ក្នុងកិច្ចប្រជុំបន្ទាន់របស់អង្គការសហប្រជាជាតិថ្ងៃពុធនេះ។ សេចក្តីសម្រេចនេះចែងទាមទារអោយស៊ីរីបង្ហាញពីផែនទីហោះហើរ និងព័ត៌មានទាក់ទងសកម្មភាពយោធាក្នុងពេលមានការវាយប្រហារនេះ។ សេចក្តីសម្រេច ក៏គំរាមដាក់ទណ្ឌកម្មស៊ីរីផងដែរ។
មិនដឹងថា ការពិភាក្សានៅអង្គការសហប្រជាជាតិថ្ងៃពុធនេះ អាចយ៉ាងណាទេ ព្រោះកន្លងមក រុស្ស៊ីនិងចិនធ្លាប់ប្រើវេតូ ប្រឆាំងសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលចង់ដាក់ទណ្ឌកមុ្មប្រឆាំងស៊ីរី។ អង់គ្លេសបានទាមទារអោយសមាជិកក្រុមប្រឹក្សាសន្តិសុខ ដែលធ្លាប់ប្រើវេតូ អោយប្តូរជំហរទៅវិញ។ សម្រាប់អង់គ្លេស ការវាយប្រហារមានជាប់ដានអាវុធគីមី ម្សិលមិញនេះ ជាបទឧក្រិដ្ឋសង្គ្រាមច្បាស់ណាស់។ អ៊ីស្រាអែលវិញក៏បានប្រតិកម្មទាមទារអោយសហគមន៍អន្តរជាតិគោរពតាមកិច្ចព្រមព្រៀងឆ្នាំ២០១៣ គឺត្រូវតែដកហូតអាវុធគីមីចេញអោយអស់ពីស៊ីរី។
អាមេរិកក៏បានប្រតិកម្មថ្កោលទោសកងទ័ពស៊ីរីដែរ តែគេនៅតែមិនដឹងច្បាស់ពីជំហរនយោបាយលោកដូណាល់ ត្រាំ ចំពោះស៊ីរី
សមាជិកសភា ពិសេសសមាជិកសភាបក្សរបស់លោកត្រាំ បានទាមទារអោយលោកត្រាំ អោយបង្ហាញជំហរនយោបាយពិតប្រាកដទាក់ទងនឹងវិបត្តិស៊ីរី។ កន្លងមក លោកត្រាំមិនបង្ហាញជំហរយ៉ាងណាៗទេ។ គេគ្រាន់តែដឺងថា រដ្ឋបាលលោកត្រាំផ្តោតតែលើបេសកកម្មប្រឆាំងភេរវកម្មនៅស៊ីរីប៉ុណ្ណោះ។ ថ្មីៗនេះទៀត អាមេរិកក៏ទើបនឹងប្តូរជំហរ ថាមិនចង់ផ្តោតតែលើអំណាចលោកអាសាដ ក្នុងការស្វែងរកដំណោះស្រាយស៊ីរី។ តាមរយៈជំហរនេះ គេវាយតម្លៃថា អាមេរិកប្រហែលចង់ផ្គាប់ចិត្តរុស្ស៊ី ដែលជាសម្ព័ន្ធមិត្តរបស់របបដឹកនាំក្រុងដាម៉ាស។
ឥឡូវនេះ មានការវាយប្រហារដោយអាវុធគីមី ដែលគ្រប់គ្នាសង្ស័យលើកងទ័ពស៊ីរី លោកត្រាំចេះចេញមុខប្រតិកម្មនឹងគេនឹងឯង ថ្កោលទោសការវាយប្រហារដែលសម្លាប់ជនស្លូតត្រង់ មានស្ត្រីនិងកុមារស៊ីរី។ ប្រមុខការទូតអាមេរិកវិញ បានព្រមានថា លោកអាសាដ ត្រូវទទួលខុសត្រូវការវាយប្រហារអាវុធគីមី។ ប្រមុខការទូតអាមេរិកថែមទាំងសុំអោយរុស្ស៊ី និងអ៊ីរ៉ង់ដាក់ឥទ្ធិពលលើរដ្ឋាភិបាលក្រុងដាម៉ាស ចំពោះរឿងនេះទៀតផង។ អ្នកនាំពាក្យរបស់លោកត្រាំវិញ បញ្ចេញយោបល់ថា បើគ្មានជម្រើសអ្វីផ្លាស់ប្តូររបបដឹកនាំស៊ីរីទេ លោកអាសាដមិនគួរកាន់អំណាចទេ។
លោកដូណាល់ ត្រាំ មិនបង្ហាញជំហរពិតប្រាកដទាក់ទងស៊ីរី តែលោកឆ្លៀតបន្ទោសរដ្ឋាភិបាលលោកអូបាម៉ាអាណត្តិមុន ចោទថា លោកអូបាម៉ាមិនម៉ឹងម៉ាត់ទេ ចំពោះការវាយប្រហារអាវុធគីមី នៅស៊ីរី កាលពីឆ្នាំ២០១៣។ កាលនោះ រដ្ឋបាលលោកអូបាម៉ាត្រៀមវាយប្រហាររបបដឹកនាំស៊ីរី តែមិនបាន វាយប្រហារទេ បែរជាដាក់សេចក្តីសម្រេចវាយប្រហារនេះ ទៅអោយសភាបោះឆ្នោតទៅវិញ។ ទីបំផុតទៅ ក៏បោះបង់គំនិតវាយប្រហាររបបស៊ីរីនេះទៅទៀត ដោយសារតែកាលនោះ រុស្ស៊ីចេញសំណើអោយបំផ្លាញអាវុធគីមីនៅស៊ីរីអោយអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ