ស៊ីរី-លីបង់៖ សង្រ្គាមរវាងក្រុមនិកាយសាសនាអ៊ីស្លាមឈីអ៊ីត ក្រុមនិកាយសាសនាអ៊ីស្លាមស៊ុយនីត!
ចុះផ្សាយនៅថ្ងៃ៖
ស្តាប់ - ០៤:៤៧
នៅក្នុងប្រទេសស៊ីរី សង្រ្គាមរវាងកងកម្លំាងរដ្ឋាភិបាល និងក្រុមប្រឆំាងបាននិងកំពុងបន្តយ៉ាងខ្លំាងក្លាពីមួយថ្ងៃ ទៅមួយថ្ងៃ។ ថ្មីៗចុងក្រោយនេះ ព្រឹត្តិការណ៍នៃការដណ្តើមគ្នាកាន់កាប់ទីក្រុង Qousseir ត្រូវបានគេចាត់ទុកជាការវាយប្រហារគ្នាដ៏ខ្លាំងក្លាបំផុតមួយមិនធ្លាប់មានរវាងទាហានរដ្ឋាភិបាល និងក្រុមឧទ្ទាមស៊ីរី ចាប់តាំងពីថ្ងៃផ្ទុះសង្រ្គាមស៊ីវិលមក។ ប៉ុន្តែ និងអ្វីដែលបានធ្វើឲ្យគ្រប់គ្នាមានការភ្ញាក់ផ្អើលខ្លំាងនោះ គឺការចូលរួមយ៉ាងសកម្មរបស់ក្រុមទាហ៊ាន Hezbollah លីបង់ ដើម្បីជាជំនួយដល់កងកម្លាំងរបស់លោកប្រធានាធិបតីស៊ីរីបាស្ហា អាល់អាសាដ។ ការចូលរួមរបស់ក្រុម Hezbollah លីបង់ជួយប្រយុទ្ធខាងរបបទីក្រុងដាម៉ាសដែលបានធ្វើឲ្យគេបារម្ភពីការផ្ទុះសង្រ្គាមរវាងក្រុមនិកាយសាសនាអ៊ីស្លាមឈីអ៊ីត និងក្រុមនិកាយសាសនាអ៊ីស្លាមស៊ុយនីត។
គឺវត្តមានរបស់ក្រុម Hezbollah លីបង់ អ្នកកាន់សាសនាអ៊ីស្លាមនិកាយឈីអ៊ីតនៅក្នុងជម្លោះស៊ីរីពេលនេះឯង ដែលបាននិងកំពុងជម្រុញឲ្យប្រទេសលីបង់ក្លាយជាសមរភូមិនៃការប្រឈមមុខដាក់គ្នារវាងក្រុមនិកាយសាសនាអ៊ីស្លាមឈីអ៊ីត និងក្រុមនិកាយសាសនាអ៊ីស្លាមស៊ុយនីត។ ប្រកាសពីប្រទេសហ្ស៊កដានី លោក Mohamed Al-Chalabi អ្នកតំណាងឲ្យក្រុមជ្រុលនិយមស៊ីរី ហ្យ៉ាបា អាល់ណូស្រា (Jabhat Al-Nosra) អ្នកកាន់សាសនាអ៊ីស្លាមនិកាយស៊ុយនីតបានពន្យល់ថា ក្រុមរបស់គេបានសម្រេចចិត្តធ្វើការវាយប្រហារលើសមាជិករបស់ក្រុម Hezbolah ដោយមិនរើសមុខនៅទូទំាងទឹកដីស៊ីរី។ ការប្រកាសរបស់លោក Mohamed Al-Chalabi បានធ្វើឡើង ដើម្បីឆ្លើយតបទៅនឹងពាក្យសម្តីរបស់លោក Hassan Nasrallah ប្រមុខចលនា Hezbollah លីបង់ដែលថា Hezbollah នឹងជួយគំាទ្ររបបស៊ីរីរបស់លោកប្រធានាធិបតីបាស្ហា អាល់អាសាដ។
តែបញ្ហានៅត្រង់ថា ក្រុមឧទ្ទាមស៊ីរី និងក្រុមជ្រុលនិយមស៊ីរី ហ្យ៉ាបា អាល់ណូស្រាបានចាត់ទុកពាក្យសម្តីរបស់លោក Hassan Nasrallah ថា ជាការប្រកាសសង្រ្គាមដោយចំហប្រឆំាងនឹងពួកគេ។ ក្រោមភ្នែកច្រមុះរបស់ក្រុមឧទ្ទាមស៊ីរី និងក្រុមជ្រុលនិយមស៊ីរី ហ្យ៉ាបា អាល់ណូស្រា ចលនា Hezbollah លីបង់ និងប្រទេសអ៊ីរ៉ង់ គឺជាតួអង្គគន្លឹះនៅក្នុងវិបត្តិស៊ីរីបច្ចុប្បន្ន។ ក្រុមជ្រុលនិយមស៊ីរី ហ្យ៉ាបា អាល់ណូស្រាបានយល់ឃើញថា បើក្រុមឧទ្ទាមស៊ីរីចង់ដណ្តើមជ័យជំនះលើរដ្ឋាភិបាលស៊ីរី គេគួរតែធ្វើការវាយប្រហារលើពួក Hezbollah ជាជាងលើរដ្ឋាភិបាលរបស់លោកបាស្ហា អាល់អាសាដ។ ដូច្នេះឃើញថា វាហាក់ដូចជាមិនមានអ្វីគួរឲ្យភ្ញាក់ផ្អើលទេ ដែលក្រុមជ្រុលនិយមស៊ីរី ហ្យ៉ាបា អាល់ណូស្រាបានសម្រេចជ្រើសរើសយកចលនា Hezbollah មកធ្វើជាផ្ទំាងស៊ីបនៃការវាយប្រហាររបស់ខ្លួន។
អាទិភាពទីមួយរបស់ក្រុមជ្រុលនិយមស៊ីរី ហ្យ៉ាបា អាល់ណូស្រា គឺមិនមែនដើម្បីរំដោះប្រទេសស៊ីរីឲ្យរួចផុតពីកណ្តាប់ដៃគ្រប់គ្រងផ្តាច់ការរបស់លោកបាស្ហា អាល់អាសាដ ដើម្បីកសាងរបបលទ្ធិប្រជាធិបតេយ្យមួយនៅស៊ីរីទេ។ តែគឺដើម្បីស្ថាបនាឲ្យមានឡើងវិញនូវឯកភាពនៃសហគមន៍អ្នកកាន់សាសនាអ៊ីស្លាមដែលថា Umma។ តាមរយៈទង្វើនេះ ក្រុមជ្រុលនិយមស៊ីរី ហ្យ៉ាបា អាល់ណូស្រានឹងអាចកាច់បំបាក់សត្រូវគ្រប់ប្រភេទរបស់ Umma នៅគ្រប់ទីកន្លែងទំាងអស់ ទំាងនៅក្នុងប្រទេសស៊ីរី និងប្រទេសលីបង់។ ដូច្នេះឃើញថា ចង់ ឬមិនចង់ ក្រុមអ្នកកាន់សាសនាអ៊ីស្លាមនិកាយឈីអ៊ីតក្នុងប្រទេសលីបង់បាននិងកំពុងក្លាយជាផ្ទំាងស៊ីបនៃការវាយប្រហាររបស់ក្រុមជ្រុលនិយមស៊ីរី ហ្យ៉ាបា អាល់ណូស្រា និងក្រុមអ្នកកាន់សាសនាអ៊ីស្លាមស៊ុយនីតផ្សេងៗទៀត។
ជាក់ស្តែង ជួនចំពេលដែលក្រុម Hezbollah លីបង់បានបញ្ជូនយុទ្ធជនរបស់ខ្លួនទៅកាន់ប្រទេសស៊ីរី ដើម្បីជាជំនួយដល់កងកម្លាំងរបស់លោកប្រធានាធិបតីបាស្ហា អាល់អាសាដនោះ ក្រុមអ្នកកាន់សាសនាអ៊ីស្លាមនិកាយស៊ុយនីត លីបង់ក៏បានបញ្ជូនក្រុមរបស់គេឲ្យទៅជួយច្បំាងនៅខាងក្រុមឧទ្ទាមស៊ីរីដែរ។ តើរូបភាពទំាងអស់នេះ មិនមែនជាការផ្ទុះសង្រ្គាមរវាងសហគមន៍អ្នកកាន់សាសនាអ៊ីស្លាមឈីអ៊ីត និងស៊ុយនីតទេ ឬយ៉ាងណា ?។ ចម្លើយ ពិតជាកើតមានហើយនៅក្នុងប្រទេសស៊ីរី និងដែលអាចនឹងកើតមាននៅកន្លែងផ្សេងទៀត មុនគេ គឺនៅក្នុងប្រទេសលីបង់តែម្តង។
តាមពិតទៅ ក្រុមជ្រុលនិយមស៊ីរី ហ្យ៉ាបា អាល់ណូស្រាមិនមានរចនាសម្ព័ន្ធត្រឹមត្រូវ និងកម្លំាងគ្រប់គ្រាន់ដើម្បីធ្វើសង្រ្គាមទល់ចលនា Hezbollah លីបង់ទេ។ ប៉ុន្តែក្រុមនេះអាចនឹងបង្កឲ្យមានសោកនាដកម្ម និងមហន្តរាយខ្លំាងក្លា តាមរយៈការបង្កភេរវកម្មអត្តឃាតបំផ្ទុះគ្រាប់បែកនៅតាមទីតំាងរបស់ចលនា Hezbollah និងនៅតាមទីធ្លាសាធារណៈមួយចំនួននៅតាមខេត្តប៉ែកខាងត្បូងទីក្រុងបេរូត ឬមួយក៏នៅប៉ែកខាងត្បូងប្រទេសលីបង់ជាដើម។ ដូច្នេះឃើញថា សហគមន៍អ្នកកាន់សាសនាអ៊ីស្លាមនិកាយស៊ុយនីត និយាយជារួម និងចលនា Hezbollah លីបង់ និយាយដោយឡែក ហាក់ដូចជាបាននិងកំពុងប្រឈមមុខនឹងគ្រោះថ្នាក់ហើយ។
អ៊ីចឹងហើយបានជានៅក្នុងប្រទេសលីបង់ពេលនេះ មានផ្ទុះឡើងនូវក្បួនបាតុកម្មប្រឆំាងនឹងការចូលរួមរបស់យុទ្ធជន Hezbollah នៅក្នុងប្រទេសស៊ីរី និងការអំពាវនាវឲ្យមានអន្តរាមន៍របស់ទាហានលីបង់ដើម្បីទប់ស្កាត់កុំឲ្យយុទ្ធជន Hezbollah ឆ្លងចូលទៅក្នុងទឹកដីស៊ីរី។ នៅក្នុងក្បួនបាតុកម្មនោះ គេសង្កេតឃើញមានការលើកបដាសរសេរថា « Hezbollah ត្រូវតែដកចេញពីប្រទេសស៊ីរី។ អ្វីដែល Hezbollah កំពុងធ្វើនេះ គឺមិនត្រឹមត្រូវទេ ព្រោះថា តំាងពីដើមមក មិនដែលមានចលនាប្រដាប់អាវុធលីបង់ណាមួយចូលរួមធ្វើសង្រ្គាមនៅក្នុងប្រទេសផ្សេងទេ »។
សរុបមកវិញ វិបត្តិក្នុងប្រទេសស៊ីរីបច្ចុប្បន្នហាក់ដូចជាបាននិងកំពុងពុះចែកប្រជាជនលីបង់ជាពីរបក្ស នៅម្ខាង គឺប្រជាជនលីបង់ អ្នកគំាទ្រលោកប្រធានាធិបតីស៊ីរីបាស្ហា អាល់អាសាដ និងនៅម្ខាងទៀត អ្នកប្រឆំាងនឹងលោកបាស្ហា អាល់អាសាដ។ ជាមួយគ្នានេះ វិបត្តិស៊ីរីក៏បាននិងកំពុងបង្កឲ្យមានតានតឹងរវាងសហគមន៍អ្នកកាន់សាសនាអ៊ីស្លាមនិកាយឈីអ៊ីត និងស៊ុយនីតផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ