ក្រុមគណបក្សប្រឆំាងនៅលីបង់អំពាវនាវឲ្យមានមហាបាតុកម្មប្រឆំាងស៊ីរីក្នុងពិធីបុណ្យសពលោក Wissam al-Hassan
នៅថ្ងៃអាទិត្យ ទី២១ តុលានេះ សពអតីតប្រធានក្រសួងស៊ើបការណ៍សម្ងាត់លីបង់លោក Wissam al-Hassan ត្រូវដង្ហែយកទៅបញ្ចុះនៅទីស្មសានក្នុងទីក្រុងបេរូត។ លោក Hassan ដែលបានបាត់បង់ជីវិតជាមួយនឹងមនុស្សចំនួន ៧នាក់ផ្សេងទៀតនៅក្នុងអំពើភេរវកម្មបំផ្ទុះរថយន្តមួយកាលពីថ្ងៃសុក្រ ទី១៩ តុលា។ ក្រៅពីស្លាប់មនុស្ស ៨នាក់ អំពើភេរវកម្មដែលបានវាយប្រហារលើសង្កាត់អ្នកកាន់គ្រិស្តសាសនាក៏បានបណ្តាលឲ្យមានអ្នករងរបួសជាង ២០នាក់ដែរ។ ខណៈនេះ ប្រទេសស៊ីរីបានជាប់សង្ស័យថា ជាអ្នកនៅពីក្រោយអំពើភេរវកម្មនោះ។
ចុះផ្សាយនៅថ្ងៃ៖
ស្តាប់ - ០២:០២
នៅថ្ងៃអាទិត្យ ទី២១ តុលានេះ និងចំថ្ងៃពិធីបញ្ចុះសពអតីតប្រធានក្រសួងស៊ើបការណ៍សម្ងាត់លីបង់លោក Wissam al-Hassan ភាពតានតឹងបានឡើងដល់កំពូលនៅក្នុងទីក្រុងបេរូត ក៏ដូចជានៅទូទំាងប្រទេសលីបង់។ នៅក្នុងទីក្រុង ក្រុមយុវជនដែលកំពុងមានកំហឹងបាននំាគ្នាបិទផ្លូវសំខាន់ៗចេញ ចូលទីក្រុង ដោយនំាគ្នាដុតកង់ឡាន និងយកធុងសំរាមមកបិទបំាង។
ចំណែកនៅស្រុកទ្រីប៉ូលីដែលជាស្រុកកំណើតរបស់លោកនាយករដ្ឋមន្រ្តីលីបង់ ណាយីប មីកាទី (Najib Mikati) ឯណោះ គេបានឮសូរសម្លេងបាញ់ និងសម្លេងផ្ទុះគ្រាប់បែកពេញមួយយប់មិញ ពិសេសនៅតាមខ្សែបន្ទាត់ដែលខ័ណ្ឌចែកតំបន់រវាងក្រុមអ្នកកាន់សាសនាអ៊ីស្លាម sunnites និងក្រុមអ្នកកាន់សាសនាអ៊ីស្លាម alaouites។ នៅថ្ងៃសៅរ៍ ទី២០ តុលាម្សិលមិញ មានអ្នកកាន់សាសនាអ៊ីស្លាម sunnites ម្នាក់ដែលស្និទ្ធនឹងក្រុម Hezbollah បានបាត់បង់ជីវិត។
នៅថ្ងៃនេះ ក្រុមគណបក្សប្រឆំាងបានអំពាវនាវឲ្យសកម្មជនរបស់ខ្លួនចូលរួមឲ្យបានច្រើនកុះករនៅក្នុងពិធីក្បួនដង្ហែសពលោក Wissam al-Hassan ទៅបញ្ចុះនៅក្បែរផ្នូរលោកអតីតនាយករដ្ឋមន្រ្តីលីបង់ Rafic Hariri នៅក្នុងទីស្មសានស្ថិតប៉ែកកណ្តាលទីក្រុងបេរូត។ អ្វីជាការកត់សម្គាល់ ក្រុមគណបក្សប្រឆំាងបានឆ្លៀតយកឱកាសនៃកំហឹងរបស់ប្រជាជនដែលកំពុងក្តៅក្រហាយពីឃាតកម្មលើអតីតប្រធានក្រសួងស៊ើបការណ៍សម្ងាត់លោក Wissam al-Hassan ដើម្បីទម្លាក់រដ្ឋាភិបាលរបស់លោក ណាយីប មីកាទី (Najib Mikati) បច្ចុប្បន្នដែលក្រុមគេចោទថា ស្ថិតក្រោមការត្រួតត្រារបស់ប្រទេសស៊ីរី និងចលនា Hezbollah។
ប៉ុន្តែរហូតមកទល់ពេលនេះ លោកនាយករដ្ឋមន្រ្តី ណាយីប មីកាទី (Najib Mikati) បានបដិសេធលាចុះពីមុខតំណែង ដោយបានលើកឡើងថា លោកបន្តកាន់អំណាចដើម្បីប្រយោជន៍ជាតិ។
គួរជម្រាបជូនថា រដ្ឋាភិបាលលីបង់បច្ចុប្បន្នបានទទួលការគំាទ្រយ៉ាងពេញទំហឹងពីសំណាក់សហរដ្ឋអាមេរិក សហភាពអឺរ៉ុប និងបណ្តាប្រទេសអារ៉ាប់មួយចំនួននៅក្នុងឈូងសមុទ្រពែក។ អ៊ីចឹងហើយបានជាបណ្តាឯកអគ្គរដ្ឋទូត និងឯកអគ្គរាជទូតអាមេរិក បារំាង និងអង់គ្លេសប្រចំាទីក្រុងបេរូត បានអំពាវនាវឲ្យមានសាមគ្គីភាព និងឯកភាពរវាងប្រជាជនលីបង់ដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ