ថៃដំណើរការបោះឆ្នោត ដោយការិយាល័យខ្លះប្រកាសបិទទ្វារ
នៅអាទិត្យទី២កុម្ភៈនេះ ប្រទេសថៃកំពុងរៀបចំការបោះឆ្នោតឡើងវិញមួយ ដែលប្រព្រឹត្តទៅមិនរលូនឡើយ។ ប៉ូលីស និងទាហានត្រូវបានពង្រាយនៅទូទាំងប្រទេសប្រទេស ពិសេសក្នុងរាជធានីបាងកក ដើម្បីធានាសន្តិសុខក្នុងថ្ងៃបោះឆ្នោត។ ប៉ុន្តែការិយាល័យបោះឆ្នោតនៅតាមបណ្តាខេត្តជាច្រើនត្រូវបានប្រកាសបិទទ្វារ ដោយសារតែគ្មានសន្លឹកឆ្នោត ដែលត្រូវរាំងស្ទះដោយក្រុមបាតុករប្រឆាំងនឹងការបោះឆ្នោត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
នាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត់ បានទៅបោះឆ្នោតនៅក្នុងសង្កាត់ដែលលោកស្រីរស់នៅ។ តែលោកអាប់ភីស៊ីត វេចាជីវ៉ា ប្រធានគណបក្សប្រជាធិបតេយ្យ ដែលជាគណបក្សប្រឆាំងនោះបានប្រកាសមិនទៅបោះឆ្នោតឡើយ នៅថ្ងៃអាទិត្យទី២កុម្ភៈនេះ។ ចរន្តនយោបាយផ្ទុយគ្នានេះកំពុងតែបង្អាក់ដំណើរការបោះឆ្នោត នៅថ្ងៃអាទិត្យនេះដែរ។
តាំងពីថ្ងៃសៅរ៍ ការប៉ះទង្គិចគ្នារវាងក្រុមអ្នកគាំទ្រគណបក្សភឿថៃ និងក្រុមបាតុករប្រឆាំងនឹងការរៀបចំការបោះឆ្នោត បានកើតឡើង ដែលបានធ្វើអោយមានអ្នករបួសជាច្រើននាក់។ នៅថ្ងៃអាទិត្យនេះ មន្ត្រីប៉ូលីស១០ម៉ឺននាក់ និង យោធាជាង៥ពាន់នាក់ត្រូវបានពង្រាយនៅទូទាំងប្រទេស ពិសេសក្នុងទីក្រុងបាងកក។
បើទោះជាពលរដ្ឋថៃជាច្រើនលាននាក់បានតម្រង់ជួរគ្នាចូលបោះឆ្នោតនៅក្នុងការិយាល័យបោះឆ្នោតមួយចំនួន នៅព្រឹកថ្ងៃអាទិត្យនេះ ក៏មានការិយាល័យបោះឆ្នោតនៅក្នុងបណ្តាខេត្តជាច្រើនត្រូវបានប្រកាសបិទទ្វារដែរ។ មានមូលហេតុពីរដែលការិយាល័យបោះឆ្នោតទាំងនោះមិនអាចបើកទ្វារបាន។ ទីមួយ ក្រុមអ្នកប្រឆាំងការបោះឆ្នោតបានរាំងខ្ទប់ ផ្លូវ ដើម្បីបង្អាក់រថយន្តដឹកជញ្ជូនសម្ភារៈបោះឆ្នោតទៅកាន់ការិយាល័យបោះឆ្នោត និងទី២ គឺមានមន្ត្រីនៅការិយាល័យបោះឆ្នោត ដែលសុំលាឈប់ពីការងារតែម្តង។
នៅត្រឹមព្រឹកថ្ងៃអាទិត្យនេះ គេមិនដឹងថា តើរដ្ឋាភិបាលថៃនឹងត្រូវសម្រេចយ៉ាងណាចំពោះកលិយុគដែលកំពុងកើតឡើងនៅថ្ងៃបោះឆ្នោតនោះ នៅឡើយទេ។ ភាពចលាចលរបស់ប្រទេសថៃនៅថ្ងៃនេះ ក៏កំពុងក្លាយទៅជាប្រធានបទក្តៅចំពោះសារព័ត៌មាននៅក្នុងពិភពលោកដែរ។
គួរបញ្ជាក់ថា ក្រុមមេដឹកនាំគណបក្សប្រឆាំងមួយចំនួន បានចេញមុខដឹកនាំគណៈកម្មាធិការកំណែទម្រង់ប្រជាធិបតេយ្យរបស់ប្រជាជន ដើម្បី ប្រឆាំង និងទាមទារឱ្យលោកស្រីយីងឡាក់ ស៊ីណាវ៉ាត់ចុះចេញពីអំណាច និងបោះឆ្នោតឡើងវិញ។ ក្រោយមកទៀត ក្រុមអ្នកតវ៉ាដែលមិនចង់ឃើញរបបថាក់ស៊ីន នៅដឹកនាំប្រទេសថៃទៀតនោះ ក៏ប្រឆាំងនឹងការបោះឆ្នោតសាឡើងវិញ នៅថ្ងៃទី២កុម្ភៈនេះទៀតដែរ។
ក្រុមអ្នកតវ៉ាបានទាមទារអោយមានក្រុមប្រឹក្សាប្រជាជនមួយជាអ្នកដឹកនាំប្រទេសថៃបណ្តោះអាសន្ន មុនដល់ការរៀបចំការបោះឆ្នោតជាថ្មី តែមិនមែនជាការបោះឆ្នោតនៅថ្ងៃទី២កុម្ភៈនេះឡើយ។ គួររម្លឹកផងដែរថា ចាប់តាំងពីមានចលនាប្រឆាំង និងគាំទ្រលោកថាក់ស៊ីន ស៊ីណាវ៉ាត់ក្នុងឆ្នាំ២០០៦មក ហេតុការណ៍ហិង្សាជាច្រើនលើកបានកើតមានឡើង ដែលបានធ្វើមនុស្សស្លាប់មិនតិចជាង១០០នាក់ឡើយ ហើយក៏មានអ្នករងរបួសជាច្រើនរយនាក់ដែរ នៅក្នុងចំណោមនោះ មេដឹកនាំចលនាបាតុកម្មទាំងសងខាងតែងតែត្រូវបានគេលួចបាញ់ប្រហារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ