តើរដ្ឋាភិបាលលោកស្រីយីងឡាក់អាចឈរជើងជាប់បានរហូតដល់ពេលណា ?
ចុះផ្សាយនៅថ្ងៃ៖
ស្តាប់ - ០៥:២៩
កម្លាំងបាតុកម្មប្រឆាំងនឹងរដ្ឋាភិបាល ហាក់មានសន្ទុះក្លៀវក្លាខ្លាំង នារយៈពេលប៉ុន្មានចុងក្រោយនេះ ! មានស្លាប់យ៉ាងហោចណាស់បីនាក់ និងរបួសជាងសែសិបនាក់។ បើតាមប៉ូលិស សកម្មជនបក្សប្រឆាំងស្និទ្ធនឹងរាជវាំង បានដណ្តើមកាន់កាប់ស្ថានីយ៍ទូរទស្សន៍ជាតិ និងប្រព័ន្ធផ្សព្វផ្សាយព័ត៌មានរបស់រដ្ឋាភិបាលទាំងស្រុង នៅព្រឹកថ្ងៃអាទិត្យទី១ធ្នូនេះ។ ពេលនេះភាពតានតឹងនិងពុះកញ្ជ្រោលកំពុងបុកខ្លាំងនៅមុខវិមានរដ្ឋាភិបាល។ ប៉ូលិសថៃបានស្នើសុំអន្តរាគមន៍ពីយោធា ដោយបានបញ្ចេញទាហានប្រមាណបីពាន់ជួយការពារសន្តិសុខ។
អន្តរាគមន៍យោធា
រដ្ឋាភិបាលលោកស្រីយីងឡាក់ ថ្ងៃនេះ រងសម្ពាធខ្លាំងណាស់ ! លោកស្រីវិះតែនឹងត្រូវបានប្រឈមមុខ តទល់ជាមួយក្រុមបាតុករដែលឡោមព័ទ្ធមជ្ឈមណ្ឌលកីឡារបស់ប៉ូលិសផង។ ហើយជាលើកដំបូងតាំងពីចលនាបាតុកម្មប្រឆាំងច្បាប់លើកលែងទោស រាលដាលទៅបាតុកម្មទម្លាក់ប្រមុខរដ្ឋាភិបាល ថ្ងៃទី ៣១តុលាមក ដែលក្រុមយោធាបានចេញមុខប្រកាន់ជំហរជាសាធារណៈដូច្នេះ។ មេបញ្ជាការកងទ័ពជើងគោកថៃ លោក ប្រាយុទ្ធ ចាន់អូចា បានប្រកាសជាសាធារណៈនៅថ្ងៃនេះថា មិនអាចឈរទ្រាំនៅស្ងៀមមើលក្រុមប៉ូលិសគប់គ្រាប់បែកផ្សែងលើហ្វូងបាតុករបានទៀតឡើយ។
នេះជាសញ្ញាដ៏សំខាន់មួយ បញ្ជាក់ថាយោធាចាប់ផ្តើមប្រកាន់ជំហរ ! កាលពីពីរថ្ងៃមុន ក្រុមបាតុករដដែលនេះ បានទម្លុះចូលលុកលុយក្នុងទីអគ្គបញ្ជាការដ្ឋានយោធាជើងគោក និងបានប្រគល់លិខិតមួយច្បាប់ទៅលោក ប្រាយុទ្ធ ចាន់អូចា ឱ្យជួយធ្វើអន្តរាគមន៍ដោះស្រាយវិបត្តិ និងឈប់សហការជាមួយរដ្ឋាភិបាល។
សម្រាប់ប្រទេសថៃ គ្មានអ្វីគួរឱ្យភ្ញាក់ផ្អើលទេ គេបានដឹងរួចជាស្រេចថា យូរឬឆាប់ ក្រុមយោធានឹងចូលធ្វើអន្តរាគមន៍។ ប៉ុន្តែមកទល់ពេលនេះ ម៉ោងនេះ យើងមិនទាន់និយាយបានទេប្រទេសថៃកំពុងដើរមកដល់មាត់ជ្រោះនៃរដ្ឋប្រហារ ព្រោះលោកប្រាយុទ្ធចាន់អូចា បានស្នើសុំដើរតួនាទីអន្តរការី ពោលគឺយោធានឹងធ្វើអ្នកសម្រុះសម្រួលរវាងរដ្ឋាភិបាល និងក្រុមបាតុករ ព្រមទាំងបក្សប្រឆាំងទាំងអស់។ យោធានឹងដើរតួនាទីយ៉ាងសំខាន់ក្នុងការដោះស្រាយវិបត្តិនយោបាយថៃ។ ថៃដែលស្គាល់ការប៉ុនប៉ង និងធ្វើរដ្ឋប្រហារដល់ទៅ១៨ដង តាំងពីឆ្នាំ១៩៣២មក។ រដ្ឋប្រហារយោធាចុងក្រោយគេគឺនៅឆ្នាំ២០០៦ ទម្លាក់លោកថាក់ស៊ីន ស៊ីណាវ៉ាត់ និងដែលបានរុញច្រានប្រទេសឱ្យស្គាល់ភាពប្រេះឆា បែងចែកសង្គមថៃយ៉ាងជ្រៅរវាងក្រុមអាវលឿងអ្នកក្រុងគាំទ្ររាជានិយម និងអាវក្រហមអ្នកជនបទគាំទ្ររដ្ឋាភិបាលត្រកូលស៊ីណាវ៉ាត់។
យុទ្ធសាស្ត្រស្រទន់ និងភាពស្ងប់ស្ងាត់របស់ក្រុមអាវក្រហម
គំរូអាក្រក់នៃការប្រើកម្លាំងបង្ក្រាបបាតុករ កាលពីឆ្នាំ២០១០ ដែលកម្លាំងប៉ូលិសបានយុទ្ធនាការបណ្តេញបាតុករអាវក្រហមដែលកាន់កាប់ស្ថាប័នរដ្ឋ ស្លាប់មនុស្សជាង៩០នាក់ និងជិតពីរនាក់រងរបួស រហូតរាលដាលជាអំពើហិង្សានិងរុញប្រទេសថៃឱ្យធ្លាក់ក្នុងវិបត្តិដ៏ធ្ងន់ធ្ងរមិនធ្លាប់មាន មិនទាន់រសាត់ទៅណាឆ្ងាយទេ។ លោកស្រីយីងឡាក់ មិនចង់ធ្លាក់ក្នុងគន្លងចាស់ ទើបចង់បញ្ជៀសវិធីហិង្សានេះឱ្យបាន។ លោកស្រីមិនលាលែងចេញពីតំណែង ហើយក៏មិនរៀបចំការបោះឆ្នោតជាថ្មីដែរ ព្រោះបើតាមអ្នកវិភាគ ការបោះឆ្នោតនឹងនាំគណបក្សលោកស្រីឱ្យឈ្នះឆ្នោតជាថ្មីទៀត ដូច្នេះសរុបទៅបាតុករអាវលឿង (ដែលកំពុងធ្វើបាតុកម្មពេលនេះ) នៅតែមិនសប្បាយចិត្តដដែល។
ប៉ុន្តែអាចចាត់ទុកថាជាសំណាងម្យ៉ាងដែរ សម្រាប់លោកស្រីយីងឡាក់។ ដោយជាចៃដន្យល្អ ក្នុងរយៈពេលពីរបីថ្ងៃទៀត ពោលគឺថ្ងៃទី៥ ធ្នូ ជាថ្ងៃខួបកំណើតព្រះមហាក្សត្រ ថ្ងៃដែលបណ្តាជន ផ្អាកសកម្មភាពហ្មងសៅមិនធ្វើអ្វីផ្តេសផ្តាសហិង្សា ដើម្បីសម្តែងការគោរពព្រះរាជា។ លោកស្រីរំពឹងលើថ្ងៃនោះ ដើម្បីបិទបញ្ចប់បាតុកម្មដោយសន្តិវិធី។ បើទោះបីជានារយៈពេលប៉ុន្មានឆ្នាំចុងក្រោយនេះ ដោយភាពជរា និងព្យាធិ ព្រះមហាក្សត្រថៃ ព្រះបាទភូមិបុល ដែលធ្លាប់ជួយស្រង់ប្រទេសពីវិបត្តិកាលពីឆ្នាំ ១៩៧០ និង១៩៩០ មិនចេញមុខធ្វើអន្តរាគមន៍ជាសាធារណៈក៏ដោយ។
ម្យ៉ាងវិញទៀត ភាពស្ងប់ស្ងាត់របស់ក្រុមអាវក្រហម ជាអ្នកគាំទ្ររដ្ឋាភិបាល និងលោកថាក់ស៊ីន ស៊ីណាវ៉ាត់ ដែលមានគ្នាច្រើនជាងក្រុមអាវលឿង ក្នុងខណៈមានភាពតានតឹងដូច្នេះ អាចជួយសម្រួលច្រើនដល់រដ្ឋាភិបាល។ ព្រោះបើក្រុមអាវក្រហមនេះចេញមុខធ្វើបាតុកម្មដែរ នោះពិតដូចជាយកសាំងទៅចាក់លើភ្លើង ជាមិនខាន។ ជាក់ស្តែង នៅថ្ងៃម្សិលមិញ អំពើហិង្សាបានផ្ទុះ ឡើងបន្ទាប់ពីមានការប៉ះទង្គិចគ្នារវាងក្រុមសកម្មជនលឿងនិងក្រហមនេះឯង។ ដូច្នេះ ការសម្រេចបំបែកហ្វូងទៅផ្ទះរៀងខ្លួនៗរបស់ក្រុមអាវក្រហម នាពេលនេះ អាចកាត់បន្ថយគ្រោះថ្នាក់ហិង្សាបានច្រើន ប៉ុន្តែមិនមែនមានន័យថាហានិភ័យហិង្សាត្រូវបានបំបាត់ទាំងស្រុងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ