នាយករដ្ឋមន្ត្រីស្តីទីថៃបើកចំហការចរចាជាមួយក្រុមបាតុករ
នៅថ្ងៃចន្ទនេះ លោក នីវ៉ាតទំរ៉ុង ប៊ុនសុងប៉ៃសាន Niwattumrong Boonsongpaisan ដែលត្រូវបានតែងតាំង ជានាយករដ្ឋមន្ត្រីស្តីទីថៃ ក្រោយពេលតុលាការដកហូតតំណែងលោកស្រីយីងឡាក់ កន្លងទៅនោះ បានប្រកាសបើកចំហការចរចាជាមួយក្រុមបាតុករប្រឆាំងរដ្ឋាភិបាល។ ដោយឡែក នាយករដ្ឋមន្ត្រីស្តីទីថៃបានទាត់ចោលនូវគំនិតរបស់បក្សប្រឆាំងដែលចង់បង្កើតរដ្ឋាភិបាលមួយ ដោយមិនចាំបាច់ឆ្លងកាត់ការបោះឆ្នោត។ បក្សប្រឆាំងបានគំរាមអោយថៃយល់ព្រមបង្កើតរដ្ឋាភិបាលបែបនេះ ដោយទុកពេលវេលាកំណត់ចុងក្រោយ ដល់ត្រឹមថ្ងៃចន្ទ១២ឧសភានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
នាយករដ្ឋមន្ត្រីស្តីទីថៃ នីវ៉ាតទំរ៉ុង ប៊ុនសុងប៉ៃសាន បានថ្លែងប្រាប់សារព័ត៌មានអន្តរជាតិ នៅថ្ងៃចន្ទនេះថា រដ្ឋាភិបាលបើកចំហការចរចាជាមួយក្រុមបាតុករ។ ប៉ុន្តែ រដ្ឋាភិបាលថៃត្រូវការអ្នកដែលមានគោលជំហរពិតប្រាកដ ដើម្បីដោះស្រាយវិបត្តិក្នុងស្រុក។ ឆ្លើយតបទៅអ្នកសារព័ត៌មាន នាយករដ្ឋមន្ត្រីស្តីទីរូបនេះ បានលើកឡើងថា ប្រសិនបើមេដឹកនាំចលនាប្រឆាំងរដ្ឋាភិបាល ស៊ូថេប ត្រៀមខ្លួនចរចា នោះគឺជាសញ្ញាមួយដ៏ល្អ។
គួររំលឹកថា លោក នីវ៉ាតទំរ៉ុង ប៊ុនសុងប៉ៃសាន ធ្លាប់ធ្វើជាឧបនាយករដ្ឋមន្ត្រី និងរដ្ឋមន្ត្រីពាណិជ្ជកម្ម ត្រូវបានតែងតាំងជានាយករដ្ឋមន្ត្រីស្តីទី បន្ទាប់ពីតុលាការថៃដកហូតតំណែងលោកស្រីយីងឡាក់ពីអំណាច។ ប៉ុន្តែ ក្រុមបាតុករមិនព្រមទទួលស្គាល់នាយករដ្ឋមន្ត្រីស្តីទីនេះទេ ហើយក៏បដិសេធនូវការបោះឆ្នោតដែលត្រូវធ្វើនៅថ្ងៃ២០កក្កដា ខាងមុខនេះដែរ។ លោកស៊ូថេប មេដឹកនាំក្រុមប្រឆាំងរដ្ឋាភិបាលបានគំរាមអោយមានការបង្កើតរដ្ឋាភិបាលមួយ ដោយមិនចាំបាច់ឆ្លងកាត់ការបោះឆ្នោត ហើយចង់អោយប្រធានព្រឹទ្ធសភាជាអ្នកស្នើឈ្មោះនាយករដ្ឋមន្ត្រីថ្មី។ ក្រុមប្រឆាំងថៃចង់អោយថៃបោះឆ្នោត ក្នុងរយៈពេល១ឆ្នាំកន្លះទៀត ដោយដាក់លក្ខខណ្ឌអោយធ្វើកំណែទំរង់ជាមុនសិន។
នាយករដ្ឋមន្ត្រីស្តីទីបានទាត់ចោលគោលគំនិតបង្កើតរដ្ឋាភិបាលដែលមិនឆ្លងកាត់ការបោះឆ្នោត ដោយលើកឡើងថា ការគំរាមរបស់ក្រុមប្រឆាំងលើគោលគំនិតនេះ អាចនឹងធ្វើអោយថៃផ្ទុះអំពើហិង្សាសារជាថ្មី។ វិបត្តិនៃការប៉ះទង្គិចហិង្សាក្នុងបាតុកម្មកន្លងមក បានសម្លាប់មនុស្ស២៥នាក់ហើយនៅថៃ។ នាយករដ្ឋមន្ត្រីស្តីទី ប៊ុនសុងប៉ៃសាន រំលឹកឡើងវិញថា រដ្ឋាភិបាលស្តីទីគឺជារដ្ឋាភិបាលស្របច្បាប់ ក្នុងពេលដែលថៃកំពុងរង់ចាំបង្កើតរដ្ឋាភិបាលថ្មី ក្រោយថ្ងៃបោះឆ្នោត២០កក្កដា ខាងមុខនេះ។ លោក ប៊ុនសុងប៉ៃសាន បន្ថែមទៀតថា គឺច្បាប់ដែលបានកំណត់ថា ត្រូវតែមានការបោះឆ្នោតអោយបានមុនកំណែទម្រង់ មិនមែនរដ្ឋាភិបាលសព្វថ្ងៃនេះទេ។
ទោះជាក្រុមបាតុករមិនទទួលស្គាល់នាយករដ្ឋមន្ត្រីស្តីទីក៏ដោយ ក៏ការរង់ចាំបង្កើតរដ្ឋាភិបាលថ្មីក្រោយការបោះឆ្នោត អាចនឹងជួយដោះស្រាយវិបត្តិបានបន្តិចដែរ។ ការបើកចំហការចរចាពីសំណាក់រដ្ឋាភិបាលថ្ងៃចន្ទនេះ សបង្ហាញពីបំណងរបស់រដ្ឋាភិបាលក្នុងការចាប់ដៃជាមួយក្រុមបាតុករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ