ក្រោយការដកតំណែងលោកស្រីយីងឡាក់ ក្រុមបាតុករអាវលឿងត្រៀមបង្កើតរដ្ឋាភិបាលរបស់ខ្លួន
នៅថ្ងៃព្រហស្បតិ៍ ទី៨ ឧសភានេះ ក្រុមបាតុករអាវលឿងប្រឆំាងរដ្ឋាភិបាលបានប្រកាសឲ្យដឹងថា ពួកបានត្រៀមខ្លួនដើម្បីបង្កើតរដ្ឋាភិបាលថ្មីមួយដាច់ដោយឡែករបស់ខ្លួន។ ការប្រកាសរបស់ក្រុមអាវលឿងពេលនេះត្រូវបានធ្វើឡើង បន្ទាប់ពីតុលាការធម្មនុញ្ញបានដកលោកស្រីយីងឡាក់ចេញពីតំណែងនាយករដ្ឋមន្រ្តីចំាផ្ទះ។ ពួកបាតុករអាវលឿងបានយល់ឃើញថា រដ្ឋាភិបាលចំាផ្ទះដែលដឹកនំាដោយលោកនាយករដ្ឋមន្រ្តីនីវ៉ាត់ទំរ៉ុង ប៊ូនសុងប៉ៃសាន (Niwattumrong Boonsongpaisan) មិនមែនជារដ្ឋាភិបាលស្របច្បាប់ទេ។
ចុះផ្សាយនៅថ្ងៃ៖
ស្តាប់ - ០២:២៣
គេត្រូវរង់ចំានៅថ្ងៃសុក្រ ទី៩ ឧសភាស្អែកទើបដឹងថា តើរដ្ឋាភិបាលដែលត្រៀមនឹងបង្កើតឡើងដោយក្រុមបាតុករអាវលឿងនោះនឹងមានរចនាសម្ព័ន្ធយ៉ាងដូចម្តេច។ តែអ្វីដែលគេអាចនិយាយបាននៅពេលនេះគឺថា នេះពិតជាសេណារីយ៉ូថ្មីស្រឡាងលើកទីមួយដែលគេមិនធ្លាប់បានឮ និងក៏មិនបានឃើញដែរនៅក្នុងប្រទេសថៃ។ កន្លងមក ក្រុមបាតុករអាវលឿងធ្លាប់បានប្រកាសឲ្យដឹងពីបំណងរបស់ខ្លួនក្នុងការបង្កើតក្រុមប្រឹក្សាប្រជាជនមួយដោយគ្មានការបោះឆ្នោតសម្រាប់ដឹកនំាប្រទេសថៃ។ តែបំណងនេះត្រូវបានទទួលការប្រឆំាងយ៉ាងដាច់អហង្ការពីសំណាក់គណបក្សភឿថៃដោយគេយល់ថា វាផ្ទុយទំាងស្រុងនឹងច្បាប់រដ្ឋធម្មនុញ្ញ។
ក្រុមអ្នកវិភាគវិបត្តិយោបាយថៃបានយល់ឃើញជាទូទៅថា សេណារីយ៉ូរបស់ក្រុមអាវលឿងដែលត្រៀមបង្កើតរដ្ឋាភិបាលថ្មីដាច់ដោយឡែករបស់ខ្លួន គឺជាសេណារីយ៉ូមួយដែលមិនគួរនឹងធ្វើ ព្រោះវានឹងបង្កើតឲ្យមានគ្រោះហានិភ័យកាន់តែធ្ងន់ធ្ងរបន្ថែមទៀតចំពោះប្រទេសជាតិ។ អ្វីដែលក្រុមអ្នកវិភាគកំពុងបារម្ភខ្លំាងនៅថ្ងៃខាងមុខនោះ គឺការប្រឈមមុខដាក់គ្នាយ៉ាងខ្លំាងដូចដែលគេធ្លាប់បានឃើញកន្លងមករវាងក្រុមបាតុករអាវលឿង និងក្រុមបាតុករអាវក្រហម។
សូមរម្លឹកជូនថា នៅថ្ងៃពុធ ទី៧ ឧសភា តុលាការធម្មនុញ្ញបានដកលោកស្រីយីងឡាក់ចេញពីតំណែងនាយករដ្ឋមន្រ្តីចំាផ្ទះ ដោយមិនបានរំលាយរដ្ឋាភិបាលចោលទេ។ ភ្លាមៗ គណបក្សភឿថៃក៏បានដាក់លោកនីវ៉ាត់ទំរ៉ុង ប៊ូនសុងប៉ៃសានឲ្យជំនួសកន្លែងលោកស្រីយីងឡាក់។ តែក្រុមបាតុករអាវលឿងនៅមិនសុខចិត្ត ដោយពួកគេចង់ទម្លាក់រដ្ឋាភិបាលរបស់ពួកអាវក្រហមឲ្យដល់បាតតែម្តង ពិសេសតាមបោសសំអាតក្រុមបក្សពួកលោកអតីតនាយករដ្ឋមន្រ្តីថាក់ស៊ីនឲ្យផុតពូជ ព្រោះថា លោកនាយករដ្ឋមន្រ្តីចំាផ្ទះថ្មីក៏ជាមនុស្សជំនិតម្នាក់របស់លោកថាក់ស៊ីនដែរ។
សេចក្តីសង្ឃឹមរបស់ក្រុមបាតុករអាវលឿង គឺការបន្តប្រើប្រព័ន្ធតុលាការដែលកាន់ជើងខាងខ្លួនដើម្បីជម្រះបញ្ជីជាមួយបក្សពួកលោកថាក់ស៊ីន។ បន្ទាប់ពីតុលាការធម្មនុញ្ញ ក្រុមអាវលឿងក៏កំពុងរង់ចំាការសម្រេចចិត្តរបស់គណៈកម្មការប្រឆំាងអំពើពុករលួយនាពេលខាងមុខទាក់ទងនឹងកម្មវិធីជំនួយទិញស្រូវពីប្រជាកសិករ។ ប្រសិនបើគណៈកម្មការរកឃើញពីកំហុសឆ្គងរបស់រដ្ឋាភិបាល នោះអាចមានជាប់ពាក់ព័ន្ធនឹងរដ្ឋមន្រ្តីជាច្រើនរូបដែលនឹងអាចបិទសិទ្ធិមិនឲ្យធ្វើនយោបាយរយៈពេល ៥ឆ្នំា រួមទំាងលោកស្រីយីងឡាក់ និងលោកនីវ៉ាត់ទំរ៉ុង ប៊ូនសុងប៉ៃសានដែលទើបបានតែងតំាងជានាយករដ្ឋមន្រ្តីចំាផ្ទះថ្មីថ្មោងទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ