ពិភពលោកភ័យខ្លាចកាន់តែខ្លាំង ខណៈអ្នកស្លាប់ដោយមេរោគអេបូឡា កើនឡើងដល់៤ពាន់នាក់
ចំនួនអ្នកស្លាប់ដោយសារមេរោគអេបូឡា បានកើនឡើងដល់៤ពាន់នាក់។ នេះបើតាមការឲ្យដឹងពីអង្គការសុខភាពពិភពលោក នៅថ្ងៃសុក្រ ទី១០ខែតុលា។ អ្នកសម្របសម្រួលរបស់អង្គការសហប្រជាជាតិ ពាក់ព័ន្ធនឹងមេរោគអេបូឡា បានឲ្យដឹងថា ករណីឆ្លងមេរោគអេបូឡា បានកើនឡើងទ្វេដងជារៀងរាល់៣ ឬ៤សប្ដាហ៍។ ចំនួនអ្នកស្លាប់ដ៏ច្រើនលើសលុបនេះ បានធ្វើឲ្យអាជ្ញាធរទូទាំងពិភពលោក ព្យាយាមទប់ស្កាត់ការភ័យស្លន់ស្លោ នៅចំពោះមុខមេរោគរាតត្បាតអេបូឡាដ៏កាចសាហាវនេះ។
ចុះផ្សាយនៅថ្ងៃ៖
ស្តាប់ - ០២:១១
អង្គការសុខភាពពិភពលោក បានឲ្យដឹងនៅថ្ងៃសុក្រ ទី១០ខែតុលាថា មានមនុស្សចំនួន៤ពាន់៣៣នាក់ បានស្លាប់ដោយសារមេរោគអេបូឡា ខណៈដែលករណីឆ្លងមានរហូតដល់ទៅ៨ពាន់៣៩៩ករណី នៅប្រទេសចំនួន។ ក្រៅពីបណ្ដាប្រទេសនៅអាហ្វ្រិកខាងលិចដែលរងគ្រោះខ្លាំងជាងគេដោយមេរោគអេបូឡា ពិភពលោកទាំងមូលបានចាប់ផ្ដើមភ័យស្លន់ស្លោកាន់តែខ្លាំងនៅចំពោះមុខការកើនឡើងនៃចំនួនអ្នកស្លាប់ដោយសារមេរោគអេបូឡានេះ។
រាប់តាំងពីប្រទេសអូស្ត្រាលី ទៅដល់ហ្ស៊ីមបាវេ និងពីម៉ាសេដូន ទៅដល់ប្រទេសអេស្ប៉ាញ មនុស្សដែលបង្ហាញសញ្ញាណនៃការក្ដៅខ្លួន ឬមានប្រវត្តិទាក់ទងជាមួយនឹងអ្នកជំងឺអេបូឡា ត្រូវបានគេដាក់ឲ្យនៅដាច់ដោយឡែកពីគេនៅមន្ទីរពេទ្យ ឬផ្ទះរបស់ពួកគេ ដើម្បីតាមដានពីស្ថានភាពជំងឺ។ ការព្រួយបារម្ភធ្ងន់ធ្ងរកើតមាននៅប្រទេសអេស្ប៉ាញ ខណៈដែលគិលានុបដ្ឋាយិកាដែលឆ្លងមេរោគអេបូឡា កំពុងតែសម្រាកព្យាបាលខ្លួន នៅមន្ទីរពេទ្យកាឡូទី៣ នៅប្រទេសអេស្ប៉ាញ។
អ្នកសម្របសម្រួលរបស់អង្គការសហប្រជាជាតិ ពាក់ព័ន្ធនឹងមេរោគអេបូឡា លោក David Nabarro បានឲ្យដឹងថា ករណីឆ្លងមេរោគអេបូឡា បានកើនឡើងទ្វេដងជារៀងរាល់៣ ឬ៤សប្ដាហ៍។ និងថា ការខិតខំប្រឹងប្រែងដ៏ធំធេងមួយ ត្រូវការជាចាំបាច់ ដើម្បីកម្ចាត់មេរោគរាតត្បាតអេបូឡាដ៏កាចសាហាវនេះ។ បើតាមលោក David Nabarro ប្រសិនបើគ្មានចលនាកម្រិតពិភពលោកទេនោះ គេមិនអាចគ្រប់គ្រងការរាតត្បាតនៃមេរោគអេបូឡាបានឆាប់រហ័សនោះទេ ហើយពិភពលោកនឹងត្រូវរស់នៅជាមួយមេរោគអេបូឡាជារៀងរហូត។
អង្គការសហប្រជាជាតិ ត្រូវការថវិកាមួយរយកោដិដុល្លារសហរដ្ឋអាមេរិក ដើម្បីប្រឆាំងនឹងមេរោគអេបូឡានៅទូទាំងពិភពលោក។ ប៉ុន្តែនៅថ្ងៃសុក្រទី១០ខែតុលា អង្គការសហប្រជាជាតិ បានប្រកាសឲ្យដឹងថា ជំនួយហិរញ្ញវត្ថុដែលបានទទួល មានត្រឹមតែ២០លានដុល្លារ ហើយការសន្យាផ្ដល់ជំនួយកំពុងតែធ្លាក់ចុះជាលំដាប់។ បើតាមអង្គការសហប្រជាជាតិ ការប្រយុទ្ធប្រឆាំងនឹងមេរោគអេបូឡា ជាប់ពាក់ព័ន្ធនឹងគ្រប់ប្រទេសទាំងអស់នៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ