ឆាកល្ខោននៃបទឈប់បាញ់មនុស្សធម៌១២ម៉ោង នៅហ្កាហ្សា ថ្ងៃសៅរ៍២៦កក្កដា
ចុះផ្សាយនៅថ្ងៃ៖
ស្តាប់ - ០៥:៣៨
ថ្ងៃសុក្រម្សិលមិញ អ៊ីស្រាអែលនិងក្រុមហាម៉ាសប៉ាឡេស្ទីនបានព្រមព្រៀងគ្នា អោយអនុវត្តបទឈប់បាញ់១២ម៉ោង នៅតំបន់ហ្កាហ្សា ដែលបានចូលជាធរមាននៅថ្ងៃសៅរ៍នេះ តាំងពីម៉ោង៨ព្រឹកមក ម៉ោងក្នុងស្រុក និងត្រូវបញ្ចប់វិញ នៅម៉ោង៨យប់ ម៉ោងក្នុងស្រុក។ បទឈប់បាញ់នេះ អនុញ្ញាតអោយប្រជាជនប៉ាឡេស្ទីននៅហ្កាហ្សាទទួលការព្យាបាលរបួស និងជំនួយស្បៀងអាហារ និងជួយផ្តល់សម្ភារៈផ្សេងៗដល់មន្ទីរពេទ្យ។ ប៉ុន្តែ ក្នុងរយៈពេល១២ម៉ោងនេះ អ៊ីស្រាអែលព្រមាន បន្តការវាយលុកកំទេចរូងក្រោមដី របស់សកម្មជនប៉ាឡេស្ទីន។ យប់មិញ អ៊ីស្រាអែលបានទាត់ចោលសំណើបទឈប់បាញ់មួយសប្តាហ៍ របស់ប្រមុខការទូតអាមេរិក ចន ឃែររី។ ពេលនេះ សហគមន៍អន្តរជាតិកំពុងជំរុញក្រុមហាម៉ាសនិងអ៊ីស្រាអែល អោយចរចាគ្នាទៀត។
នៅព្រឹកថ្ងៃសៅរ៍នេះ ក្រុងប៉ារីសរៀបចំកិច្ចប្រជុំអន្តរជាតិស្តីពីស្ថានភាពតំបន់ហ្កាហ្សា ដោយមានវត្តមានប្រមុខការទូតអាមេរិកអាមេរិក កាតា និងប្រទេសអឺរ៉ុបជាច្រើនចូលរួម។ កិច្ចប្រជុំមានទិសដៅសម្រេចអោយមានបទឈប់បាញ់រយៈពេលយូរអង្វែងនៅហ្កាហ្សា។ នៅក្រុងប៉ារីស ដោយខ្លាចមានអំពើហិង្សាស្មុគស្មាញ អាជ្ញាធរបារាំងបានហាមឃាត់មិនអោយមានបាតុកម្មប្រឆាំងអ៊ីស្រាអែល។ កាលពីថ្ងៃ១៣កក្កដា បាតុកម្មប្រឆាំងអ៊ីស្រាអែលនៅក្រុងប៉ារីស បានរាលដាលជាអំពើហិង្សា ធ្វើអោយមានមនុស្សរបួស៨នាក់។
បទឈប់បាញ់មនុស្សធម៌១២ម៉ោងថ្ងៃសៅរ៍នេះ នៅតែផុយស្រួយ
ដរាបណាសហគមន៍អន្តរជាតិគ្មានឥទ្ធិពលទប់ស្កាត់អ៊ីស្រាអែលទេនោះ បទឈប់បាញ់ថ្ងៃសៅរ៍នេះ ទោះជាអាចពន្យារដល់១សប្តាហ៍ តាមការចង់បានរបស់អាមេរិក ក៏គ្មានន័យអ្វីសម្រាប់ប្រជាជនប៉ាឡេស្ទីន ដែលស្លាប់ក្នុងការវាយលុករបស់យោធាអ៊ីស្រាអែលដែរ។ គេនៅចាំមើលថា កិច្ចប្រជុំអន្តរជាតិក្រុងប៉ារីសថ្ងៃនេះ អាចសម្រេចចេញអ្វីពិសេសទេ បើរដ្ឋាភិបាលបារាំងខ្លួនឯងក៏ហាមមិនអោយមានបាតុកម្មប្រឆាំងអ៊ីស្រាអែលផងនោះ។ អាមេរិកគ្មានទឹកមាត់ប្រៃលើអ៊ីស្រាអែលទេ។ ថ្ងៃសុក្រម្សិលមិញ អ៊ីស្រាអែលទាត់ចោលសំណើបទឈប់បាញ់១សប្តាហ៍របស់លោកឃែររី។
បទឈប់បាញ់មានលក្ខខណ្ឌចំនួន២៖
ទី១- បណ្តាប្រជាជន ដែលអ៊ីស្រាអែលសុំអោយចាកចេញពីផ្ទះសម្បែងកន្លងមក មិនត្រូវត្រលប់ទៅកាន់ផ្ទះសម្បែងខ្លួនវិញទេ។ ទី២- ក្នុងរយៈពេលនៃបទឈប់បាញ់នេះ បើប្រជាជនប៉ាឡេស្ទីនណាហ៊ានឆ្លៀតវាយប្រហារលើអ៊ីស្រាអែល អ៊ីស្រាអែលនឹងតបតវិញមិនខាន។
ក្នុងរយៈពេលនៃបទឈប់បាញ់នេះ អ៊ីស្រាអែលព្រមានដែរថា បន្តប្រតិបត្តិការកំទេចរូងក្រោមដីរបស់សកម្មជនប្រយុទ្ធប៉ាឡេស្ទីន។ អ៊ីស្រាអែលគំរាមបំពានបទឈប់បាញ់បែបនេះ សបង្ហាញថា អ៊ីស្រាអែលគ្មានចិត្តនឹងរកដំណោះស្រាយជាមួយប៉ាឡេស្ទីនទេ។
ដោយឡែក បទឈប់បាញ់១២ម៉ោងនេះ ប្រហែលជាអាចពន្យារពេលបានយូរពេលថែមបន្តិចទៀត។ ពេល១២ម៉ោងនេះ ប្រមុខការទូតអាមេរិក ចន ឃែររី មានឳកាសចរចាជាមួយភាគីនានា ដើម្បីជំរុញអោយមានបទឈប់បាញ់១សប្តាហ៍។ លោកឃែររីចង់អោយប្រជាជនប៉ាឡេស្ទីនអាចបិទបញ្ចប់បុណ្យសាសនាអ៊ីស្លាមរ៉ាម៉ាដង់ នៅហ្កាហ្សា ក្នុងភាពស្ងប់ស្ងាត់ ចៀសពីហិង្សា។ តែបំណងនេះគ្មានន័យអ្វីទេ ព្រោះបុណ្យរ៉ាម៉ាដង់ជាបុណ្យទឹកភ្នែកសម្រាប់ប៉ាឡេស្ទីនទៅវិញទេ។ ជាក់ស្តែង អ៊ីស្រាអែលព្រមអនុវត្តបទឈប់បាញ់ ថ្ងៃសៅរ៍នេះមែន តែយប់ថ្ងៃសុក្រ ឈានចូលព្រឹកថ្ងៃសៅរ៍នេះ ពោលគឺនៅមុនម៉ោង៨ព្រឹក មុនពេលអនុវត្តបទឈប់បាញ់ អ៊ីស្រាអែលបានបន្តប្រតិបត្តិការយោធា ធ្វើអោយប្រជាជនប៉ាឡេស្ទីនបន្តកន្ទុយគ្នាស្លាប់ដដែល។
ដោយសារបរាជ័យនិយាយជាមួយអ៊ីស្រាអែល ពេលនេះ លោកឃែររីចង់ងាកទៅរកក្រុមហាម៉ាសវិញ ចង់អោយក្រុមហាម៉ាសបន្ទន់ជំហរជាមួយអ៊ីស្រាអែលវិញ។ ប៉ុន្តែ ក្រុមហាម៉ាសប្រហែលជាពិបាកបន្ទន់ជំហរណាស់ ដរាបណាអ៊ីស្រាអែលនៅតែបិទខ្ទប់តំបន់ហ្កាហ្សាបិទខ្ទប់សេដ្ឋកិច្ចប៉ាឡេស្ទីនដូច្នេះ។
បទឈប់បាញ់២លើកកន្លងមក នៅហ្កាហ្សា ជួបបរាជ័យ
តាំងពីពេលអ៊ីស្រាអែលបើកការវាយលុកនៅហ្កាហ្សាថ្ងៃ៨កក្កដាមក មានបទឈប់បាញ់មនុស្សធម៌ចំនួន២ហើយ គឺបទឈប់បាញ់ថ្ងៃ១៧កក្កដា រយៈពេល៥ម៉ោង នៅហ្កាហ្សា និងបទឈប់បាញ់ថ្ងៃ២០កក្កដា រយៈពេល១ម៉ោង នៅជាយក្រុងហ្កាហ្សា។ ប៉ុន្តែ នៅតែរកច្រកចេញមិនបាន ព្រោះថានៅហ្កាហ្សា មិនមែនមានតែក្រុមហាម៉ាសតែមួយទេ គឺមានក្រុមប្រដាប់អាវុធច្រើនផ្សេងទៀត ដែលគេពិបាកគ្រប់គ្រងដឹងបាន។ ម្យ៉ាងទៀត អ៊ីស្រាអែលនៅតែចង់វាយប្រហារហ្កាហ្សា ដូច្នេះ លទ្ធផលនៃដំណោះស្រាយគឺសូន្យតែម្តង។
អ៊ីស្រាអែលចោទទៅក្រុមហាម៉ាសប៉ាឡេស្ទីន ថាយកប្រជាជនហ្កាហ្សា ធ្វើជាឈ្នាន់ ជាថ្មបាក់
អ៊ីស្រាអែលនិងក្រុមហាម៉ាស សុទ្ធតែជាតួអង្គប្រយុទ្ធនៅហ្កាហ្សា។ ភាគីនិមួយៗមិនងាយទទួលយកថា ខ្លួនជាឃាតករសម្លាប់មនុស្សទេ ពិសេសពេលនេះ ចំពេលអង្គការសហប្រជាជាតិ សម្រេចបើកការស៊ើបអង្កេតលើបទឧក្រិដ្ឋនៅហ្កាហ្សា ដែលអាចជាបទឧក្រិដ្ឋប្រឆាំងមនុស្សជាតិផងនោះ។ អ៊ីស្រាអែលចោទថាក្រុមហាម៉ាសលាក់អាវុធនៅតាមសាលារៀន និងមន្ទីរពេទ្យ ចោទថាក្រុមហាម៉ាសហាមប្រជាជនហ្កាហ្សាមិនអោយចេញពីទីកន្លែងដែលអ៊ីស្រាអែលប្រុងវាយប្រហារ។ ហេតុនេះហើយទើបមានជនស៊ីវិលស្លាប់ច្រើនយ៉ាងនេះ។
ក្នុងស្ថានភាពប្រយុទ្ធបែបនេះ គេពិបាករកភស្តុតាងចោទក្រុមហាម៉ាសថា យកជីវិតប្រជាជនប៉ាឡេស្ទីនធ្វើជាថ្មបាក់ណាស់។ ព្រោះថា ក្រុមហាម៉ាសស្ថិតក្នុងរដ្ឋាភិបាលរួបរួមជាតិប៉ាឡេស្ទីន ដូច្នេះក្រុមហាម៉ាសអាចមានវត្តមានគ្រប់ទីកន្លែង ជាមួយប្រជាជន នៅហ្កាហ្សាបាន។ បើអ៊ីស្រាអែលកំចាត់ក្រុមហាម៉ាស ក៏ដូចជាកំចាត់ប្រជាជនប៉ាឡេស្ទីនដូច្នោះដែរ។ ដោយឡែក ក្រុមហាម៉ាសគ្មានសិទ្ធិលាក់អាវុធនៅតំបន់សំបូរមនុស្ស ដូចជានៅសាលារៀន រឺមន្ទីរពេទ្យទេ។ ទោះយ៉ាងនេះក្តី យោងតាមអនុសញ្ញាក្រុងហ្សឺណែវ បើទោះជាក្រុមហាម៉ាសលួចលាក់អាវុធ ក៏អ៊ីស្រាអែលគ្មានសិទ្ធិបាញ់ប្រហារលើអគារ លើទីតាំងជនស៊ីវិលដែរ។ អ៊ីស្រាអែលវាយប្រហារបានតែលើទីតាំងយោធាក្រុមហាម៉ាសប៉ុណ្ណោះ គ្មានសិទ្ធិបាញ់រះលើកន្លែងមានជនស៊ីវិលរស់នៅច្រើនទេ។
ដោយឡែក អ៊ីស្រាអែលបានបិទខ្ទប់តំបន់ហ្កាហ្សា តាំងពីឆ្នាំ២០០៦មក។ ការបិទខ្ទប់បែបនេះ ធ្វើអោយប្រជាជនប៉ាឡេស្ទីនពិបាករត់គេចពីសកម្មភាពវាយប្រហាររបស់អ៊ីស្រាអែលណាស់ ព្រោះគ្មានច្រកចេញទៅណារួចទេ។ ដូច្នេះ គឺប្រជាជនប៉ាឡេស្ទីនមិនអាចគេចផុតពីការស្លាប់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ