កងទ័ពខ្មែរថៃបន្តឈរជើងលើទីតាំងដដែល មុនរដ្ឋាភិបាលទាំងពីរអនុវត្តសាលដីកាតុលាការឡាអេ
លោកស្រីនាយករដ្ឋមន្ត្រីថៃ យីងឡាក់ ស៊ីណាវ៉ាត់ បានថ្លែងអោយដឹងថា លោករដ្ឋមន្ត្រីការបរទេសថៃនឹងជួបគ្នាជាមួយសមភាគីកម្ពុជា ដើម្បីជជែកអំពីការអនុវត្តន៍សាលដីកាតុលាការក្រុងឡាអេ ទាក់ទងប្រាសាទព្រះវិហារ។ នៅពេលនេះ បើតាមការអះអាងរបស់មេបញ្ជការកងទ័ពរបស់កម្ពុជា លោកឧត្តមសេនីយឯក ស្រី ឌឹក កងកំលាំងរបស់ភាគីកម្ពុជា និងថៃ នៅព្រំដែន នៅបន្តឈរជើងនៅកន្លែងដដែល រហូតដល់មានការសម្រេចជាថ្មីរបស់រដ្ឋាភិបាលទាំងពីរ។
ចុះផ្សាយនៅថ្ងៃ៖
ស្តាប់ - ០១:៥៧
មេបញ្ជាការកងទ័ពទទួលបន្ទុកទិសប្រាសាទព្រះវិហារ លោកឧត្តមសេនីយ ស្រី ឌឹក បានប្រាប់វិទ្យុបារាំងអន្តរជាតិនៅថ្ងៃនេះថា ស្ថានភាពនៅតាមព្រំដែនប្រាសាទព្រះវិហារស្ងប់ស្ងាត់ធម្មតា ហើយទេសចរក៏ត្រូវបានអនុញ្ញាតអោយឡើងទៅទស្សនាលើប្រាសាទព្រះវិហារវិញជាធម្មតាដែរ។
ដោយបញ្ជាក់អំពីភាពប្រក្រតីនៅតាមព្រំដែន ក្រោយការប្រកាសសាលដីកាតុលាការយុត្តិធម៌អន្តរជាតិនោះ លោកឧត្តមសេនីយស្រី ឌឹក នៅក្នុងសន្និសីទកាសែតរួមគ្នាជាមួយមេបញ្ជាការកងទ័ពថៃ នៅថ្ងៃអង្គារម្សិលមិញ បានប្រាប់អោយដឹងថា កងកំលាំងរបស់កម្ពុជា និងថៃនៅបន្តឈរជើងនៅលើទីតាំងដដែល រហូតដល់មានការសម្រេចជាថ្មីពីខាងរដ្ឋាភិបាល។
យោងតាមសារព័ត៌មានថៃ The Nation ដែលចេញផ្សាយនៅថ្ងៃពុធនេះ លោកស្រីនាយករដ្ឋមន្ត្រីថៃ យីងឡាក់ ស៊ីណាវ៉ាត់ បានប្រាប់អោយដឹងថា ប្រមុខការទូតថៃនឹងជួបគ្នាជាមួយលោករដ្ឋមន្ត្រីការបរទេសកម្ពុជា ដើម្បីជជែកគ្នាអំពីការអនុវត្តន៍សាលដីកាតុលាការឡាអេនេះ។
អ្នកនាំពាក្យទីស្តីការគណៈរដ្ឋមន្ត្រីកម្ពុជា លោកផៃ ស៊ីផាន បានថ្លែងប្រាប់វិទ្យុបារាំងថា ក្រសួងការបរទេសទាំងពីរនឹងជួបគ្នា ដើម្បីបើកផ្លូវអោយក្រុមការងារបច្ចេកទេស ដែលប្រទេសទាំងពីរបានមានជាមួយគ្នាស្រាប់ហើយនោះ ផ្តើមធ្វើការងារតែម្តង។ មន្ត្រីរដ្ឋាភិបាលរូបនេះបន្តថា រដ្ឋាភិបាលជិតខាងទាំងពីរបានព្រមព្រៀងគ្នាលើផ្លូវនយោបាយរួចហើយ បញ្ហាផ្លូវច្បាប់ក៏មានស្រាប់ហើយអស់ទៀត ដូច្នេះនៅសល់តែក្រុមគណៈកម្មការចម្រុះព្រំដែន គណៈកម្មការធិការព្រំដែនទូទៅ និងក្រុមការងារចម្រុះនៃខេត្តជាប់ព្រំដែនដែលត្រូវបន្តការងាររបស់ពួកគេ ដោយយោងតាមសេចក្តីសម្រេចរបស់តុលាការយុត្តិធម៌អន្តរជាតិ។
តុលាការយុត្តិធម៌អន្តរជាតិដែលបានសម្រេចថា ដីជុំវិញប្រាសាទព្រះវិហារគឺស្ថិតនៅក្រោមអធិបតេយ្យភាពរបស់កម្ពុជា ហើយបានបញ្ជាអោយថៃដកកំលាំងសមត្ថកិច្ចរបស់ខ្លួនចេញពីតំបន់ទាំងនេះ។
គួររម្លឹកថា ក្រោយពីការប្រកាសសេចក្តីសម្រេចនេះហើយ មេបញ្ជាកងទ័ពជួរមុខប្រចាំតំបន់ប្រាសាទព្រះវិហារ កម្ពុជាថៃបានណាត់ជួបគ្នាភ្លាមដើម្បីបង្ហាញជំហរមិនផ្ទុះអាវុធ និងមិនបង្កភាពតានតឹងនៅតាមព្រំដែនឡើយ ដោយរង់ចាំអនុវត្តតាមបញ្ជារបស់រដ្ឋាភិបាលទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ