តួកគីព្រមឱ្យដីអាមេរិកប្រើសម្រាប់ប្រយុទ្ធប្រឆាំងនឹងអង្គការរដ្ឋអ៊ីស្លាម ដោយមានលក្ខខណ្ឌ
ចុះផ្សាយនៅថ្ងៃ៖
ស្តាប់ - ០៦:២២
បន្ទាប់ពីរងការរិះគន់អស់មួយរយៈធំ នៅទីបំផុតតួកគីបានបោះដៃទៅរកកម្លាំងសម្ព័ន្ធអន្តរជាតិ ដែលដឹកនាំដោយសហរដ្ឋអាមេរិក ដើម្បីប្រយុទ្ធប្រឆាំងនឹងអង្គការរដ្ឋអ៊ីស្លាម នៅអ៊ីរ៉ាក់ និងស៊ីរី។ មន្រ្តីជាន់ខ្ពស់សហរដ្ឋអាមេរិកបានឲ្យដឹងកាលពីម្សិលមិញថា តួកគីបានអនុញ្ញាតឱ្យកងកម្លាំងសម្ព័ន្ធអន្តរជាតិ ប្រើប្រាស់មូលដ្ឋានទ័ព នៅភាគខាងត្បូងប្រទេសតួកគី ដែលជាទីតាំងសំខាន់ និងជាយុទ្ធសាស្ត្រ សម្រាប់ធ្វើយុទ្ធនាការហោះហើរទម្លាក់គ្រាប់បែកកម្ទេចចលនាជីហាតរដ្ឋអ៊ីស្លាម។ ជាសេចក្តីសម្រេចដែលសហរដ្ឋអាមេរិករីករាយស្វាគមន៍យ៉ាងខ្លាំង។
ទីប្រឹក្សាសន្តិសុខរបស់សេតវិមាន លោកស្រី Susan Rice បានប្រកាសឲ្យដឹងថាតួកគីបានព្រមព្រៀងសហការជាមួយសម្ព័ន្ធអន្តរជាតិ ដោយសុខចិត្តបើកមូលដ្ឋានទ័ព Incirlik នៅភាគខាងត្បូងតួកគីឱ្យអាមេរិកប្រើប្រាស់សម្រាប់ទៅទម្លាក់គ្រាប់បែកកម្ទេចពួកជីហាតរដ្ឋអ៊ីស្លាម នៅស៊ីរី និងអ៊ីរ៉ាក់។ លោកស្រី បានមានប្រសាសន៍ថា “ពេញចិត្តខ្លាំងណាស់” ដែលក្រុងអង់ការ៉ា ព្រមឱ្យអាមេរិកនិងប្រទេសផ្សេងទៀតជាសមាជិកសម្ព័ន្ធអន្តរជាតិ ប្រើប្រាស់មូលដ្ឋានទ័ព Incirlik និងប្រើប្រាស់ទឹកដីសម្រាប់បំពាក់បំប៉នកងកម្លាំងប្រឆាំងស៊ីរី មិនជ្រុលនិយម។
អាមេរិកធ្លាប់ប្រើប្រាស់ និងមានកងទ័ពប្រចាំការចំនួន ១៥០០នាក់ នៅមូលដ្ឋានទ័ព Incirlik របស់តួកគីនេះ តាំងពីយូរមកហើយ។ ប៉ុន្តែរហូតមកទល់នឹងថ្ងៃនេះ យន្តហោះអាមេរិកដែលធ្វើប្រតិបត្តិការទម្លាក់គ្រាប់បែកប្រឆាំងនឹងពួកចលនាជីហាតរដ្ឋអ៊ីស្លាម នៅអ៊ីរ៉ាក់ ឬនៅស៊ីរី តែងហោះចេញពីមូលដ្ឋានទ័ពអាមេរិកនៅប្រទេសអេមីរ៉ាតអារ៉ាបរួម ពីកូវ៉ែត ពីកាតា (នៅតំបន់ដើមបូព៌ានេះ អាមេរិកមានមូលដ្ឋានទ័ពសរុបក្នុងប្រទេសចំនួន២០)។
មូលដ្ឋានទ័ពអាមេរិកនៅតួកគី
មូលដ្ឋានទ័ពអាមេរិកនៅតួកគីនេះ មានផ្លូវចុះយន្តហោះវែង ៤,៥គីឡូម៉ែត្រ និងជាមជ្ឈមណ្ឌលចាត់ចែងភស្តុភារដ៏សំខាន់ ព្រមទាំងមានឃ្លាំងផ្ទុកអាវុធដ៏ធំមហាសាល។ យន្តហោះចម្បាំងអាមេរិកប្រភេទF16 ក៏អាចចុះចតនៅមូលដ្ឋាននេះដែរ។ នេះបើតាមការព្រមព្រៀងរបស់តួកគី ប្រកាសឡើងដោយភាគីអាមេរិក។ បូកផ្សំនឹងលទ្ធភាពនៃការប្រើប្រាស់មូលដ្ឋានទ័ពនៅក្នុងមហាសមុទ្ទឥណ្ឌា សម្រាប់បង្ហោះយន្តហោះទម្លាក់គ្រាប់B-52ទៀត អាមេរិកពិតជាមានគ្រប់មធ្យោបាយមកពីគ្រប់ទិសសម្រាប់កម្ទេចពួកជីហាត។
ផ្តល់មូលដ្ឋានទ័ពឱ្យប្រើប្រាស់ ជាប្រយោជន៍ប្រពៃសម្រាប់សម្ព័ន្ធអន្តរជាតិ ដែលពេលនេះត្រូវការតែធ្វើប្រតិបត្តិការផ្លូវអាកាសទម្លាក់គ្រាប់បែកប្រឆាំងនឹងអង្គការរដ្ឋអ៊ីស្លាម គ្មានឡើយផែនការប្រយុទ្ធ ជើងគោក។ មិនតែប៉ុណ្ណោះ តួកគីសុខចិត្តទទួលឱ្យជ្រកកោន និងទទួលបន្ទុកបង្វឹកបង្ហាត់កងកម្លាំងយុទ្ធជនស៊ីរី កណ្តាលនិយម ដែលជាក្រុមប្រឆាំងនឹងរដ្ឋាភិបាលក្រុងដាម៉ាសទៀតផង នៅក្នុងទឹកដីរបស់ខ្លួនទៀត។ ក្រុមដែលនឹងក្លាយជាកម្លាំងទីបីនេះ អាចមានចំនួនដល់ទៅ៤ពាន់នាក់ និងដែលតួកគីកំពុងចង់បំពាក់បំប៉ន សម្រាប់ប្រយុទ្ធប្រឆាំងនឹងពួកអង្គការរដ្ឋអ៊ីស្លាមផង និងផ្តួលរបបដឹកនាំស៊ីរីរបស់លោក បាស្ហាអាល់អាសាទផង។
“កម្លាំងទីបី” សម្រាប់ជួយស៊ីរី
បើតាមសម្តីរបស់ប្រមុខរដ្ឋាភិបាលតួកគី “កម្លាំងទីបី” ដែលជាកម្លាំងប្រមូលមកពីគ្រប់ភាគីប្រឆាំងនៅស៊ីរី គ្មានលាយលំកម្លាំងបរទេសនោះ បន្ទាប់ពីបានទទួលការហ្វឹកហ្វឺននៅតួកគី ហើយ ត្រូវមានភារកិច្ចទៅការពារប្រជាជនស៊ីរី ពីការគំរាមកំហែងរបស់ពួកជីហាតរដ្ឋអ៊ីស្លាមផង ពីរបបលោកបាស្ហា អាល់អាសាដផង។
តាំងពីវិបត្តិនៅស៊ីរីបានផ្ទុះឡើង ក្រុងអង់ការ៉ា បានអំពាវនាវឱ្យពិភពលោកជួយគាំទ្រផ្នែកយោធាដល់ក្រុមប្រឆាំងនៅស៊ីរី ដែលសុទ្ធសឹងជាអ្នកមិនជ្រុលនិយម ដើម្បីផ្តួលរំលំរបបលោកបាស្ហា អាល់អាសាដ។ ដូច្នេះ ការចូលចំណែករបស់តួកគីពេលនេះ គឺដូចជាបានស្រោចស្រង់ បេសកកម្មរបស់សម្ព័ន្ធជាតិស៊ីរី និងយោធាស៊ីរីសេរី ដែលហៀបនឹងស្លាប់លែងឮឈ្មោះទៅហើយ តាំងពីប៉ុន្មានខែចុងក្រោយនេះ។
ជាថ្នូរតបមកវិញ តួកគី ចង់ឱ្យមានការបង្កើតតំបន់ទ្រនាប់ពិសេស និងតំបន់ហោះហើរហាមឃាត់ សម្រាប់ទទួលជនភៀសខ្លួន និងទទួលបង្វិកបង្ហាត់យោធាស៊ីរីសេរី។
ប៉ុន្តែសំណើនេះមិនបានទទួលការស្វាគមន៍ទេ។ លោកស្រីទីប្រឹក្សាសន្តិសុខសេតវិមានរបស់អាមេរិក ដែលបានអបអរតួនាទីដ៏ចាំបាច់របស់តួកគី ក្នុងការបង្អាក់ផ្លូវមិនឱ្យយុទ្ធជនបរទេសចូលធ្វើជីហាត រាំងស្ទះពួកជ្រុលនិយមនៅស៊ីរី អង្គការរដ្ឋអ៊ីស្លាម និងពួកភេរវនិយមអាល់ណូស្រា មិនឱ្យទទួលផលនាំចេញប្រេងតាមរយៈតួកគីមែន តែបានច្រានចោលដាច់ខាតគំនិតចង់បង្កើតតំបន់ការពារពិសេសនៅភាគខាងជើងស៊ីរី។
យុទ្ធសាស្ត្រត្រីកោណរបស់តួកគី
តាំងពីក្រុង កូបាណេ ក្រុងសំខាន់ទីបីរបស់គួដនៅស៊ីរី ដែលនៅចម្ងាយមួយចំហាមពីតួកគីរងការវាយប្រហារពីសំណាក់ពួកចលនាជីហាតរដ្ឋអ៊ីស្លាមមក តួកគីបានរងសម្ពាធខ្លាំងណាស់ពីអន្តរជាតិ ឱ្យទៅជួយការពារស៊ីរី។ ក្រុមគួដស៊ីរីនៅក្រុងកូបាណេ កំពុងប្រយុទ្ធយ៉ាងស្វិតស្វាញតែម្នាក់ឯង និងទប់ទល់យ៉ាងត្រដាបត្រដួសនឹងពួកអង្គការរដ្ឋអ៊ីស្លាម។ តែតួកគីមិនត្រូវការជួយ។ ព្រំដែននៅតែបិទជាប់ជានិច្ច។ កងទ័ពតួកគីបានមកប្រមូលផ្តុំគ្នាឈរអោបដៃមើលផ្សែង និងសូរកាំភ្លើងនៅតាមបណ្តោយរបងខ័ណ្ឌចែកប្រទេសទាំងពីរ ព្រោះបញ្ហានៅត្រង់ថា សត្រូវទីពីរ បន្ទាប់ពីរបបលោកបាស្ហា អាល់អាសាដរបស់តួកគី គឺក្រុមគួដ។ ក្រុមគួដនៅស៊ីរីមានប្រវត្តិតែមួយជាមួយក្រុមគួដនៃបក្សពលករគួដនៅតួកគីដែលហៅកាត់ថា ក្រុមPKK ។ ថ្វីដ្បិតតែរដ្ឋាភិបាលតួកគីព្រមចរចាសន្តិភាពជាមួយនឹងPKKក៏ដោយ ក៏អង់ការ៉ានៅតែចាត់ទុកក្រុមនេះជាភេរវជនដដែល។
ឥឡូវនេះតួកគីព្រមចូលដៃជាមួយសម្ព័ន្ធអន្តរជាតិ ត្រូវជួយក្រុមស៊ីរីសេរី មិនជ្រុលនិយម ឱ្យទៅប្រយុទ្ធប្រឆាំងនឹងពួកជីហាតរដ្ឋអ៊ីស្លាមមែន តែគ្មានហេតុផលអ្វីត្រូវឱ្យពួកគួដបានចំណេញឡើយ។ ដូច្នេះហើយទើបតួកគីទទូចចង់បានតំបន់ការពារពិសេស សម្រាប់ទទួលបង្វិកបង្ហាត់ទាហានស៊ីរីសម្រាប់ផ្តួលពួកជីហាតរដ្ឋអ៊ីស្លាមផង តស៊ូផ្តួលរបបដឹកនាំស៊ីរីបច្ចុប្បន្នផង និងលើកតម្កើងទាហានស៊ីរីសេរីដើរតួនាទីសំខាន់ ក្នុងការប្រយុទ្ធប្រឆាំងនឹងពួកភេរវនិយម ដើម្បីជួយទប់កុំឱ្យក្រុមគួដ មានកម្លាំង លេចធ្លោ ផ្នែកនយោបាយខ្លាំងពេកផង។
បើតាមព័ត៌មានចុងក្រោយផ្តល់ដោយប្រភពស្និទ្ធនឹងរដ្ឋាភិបាលតួកគី ក្រុងអង់ការ៉ា ទំនងជាមិនបានព្រមព្រៀងផ្តល់មូលដ្ឋានទ័ពឱ្យអាមេរិកប្រើប្រាស់ទេ ដរាបណាសម្ព័ន្ធអន្តរជាតិមិនព្រមទទួលយកសំណើបង្កើតតំបន់ការពារពិសេស។ ព្រោះសម្រាប់តួកគី ប្រតិបត្តិការផ្លូវអាកាសមិនអាចយកឈ្នះពួកជីហាតបានឡើយ មានតែរុញច្រើនឱ្យពួកនេះបង្កើតកន្លែងលាក់ខ្លួន ចាំវាយឆ្មក់វិញទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ