អ៊ុយក្រែន ៖ អនាគតដ៏ស្រពិចស្រពិលក្រោយជ័យជម្នះប្រជាធិបតេយ្យ
ចុះផ្សាយនៅថ្ងៃ៖
ស្តាប់ - ០៤:៤៣
ក្បាលម៉ាស៊ីនដឹកនាំអ៊ុយក្រែនថ្មីថ្មោង ចាប់ដំណើរការយ៉ាងត្រដាបត្រដួស។ ប្រទេសកំពុងស្ថិតនៅលើមាត់ជ្រោះនៃការក្ស័យធន។ រុស្ស៊ី ផ្តើមរករឿង ដោយមិនទទួលស្គាល់អ្នកកាន់អំណាចថ្មី។ នៅជ្រុងម្ខាងទៀត ប្រទេសប៉ូឡូញ និងអ្នកជិតខាងខ្លះទៀត ចង់បើកចិត្តឱ្យអ៊ុយក្រែនចូលជាសមាជិកសហភាពអឺរ៉ុប ប៉ុន្តែបារាំង និងប្រទេសសមាជិកអឺរ៉ុបផ្សេងទៀត មិនត្រូវការឮនិយាយពាក្យ “សមាជិកអឺរ៉ុប"ទេ។ សហគមន៍អន្តរជាតិលើកឡើង នៅពេលនេះ តែពីគ្រោះនៃការប្រេះឆាជាតិ។ ប្រជាធិបតេយ្យជាអ្នកឈ្នះ ប៉ុន្តែ អនាគតអ៊ុយក្រែននៅតែមិនច្បាស់លាស់ ហេលហាលរវាងជើងមេឃថ្មីអឺរ៉ុប និងរុស្ស៊ីមិត្តចាស់។
រុស្ស៊ីរបស់លោកវ្លាដេមៀ ពូទីន ចាប់ផ្តើមទទួលដឹងថាកំពុងបាត់បង់អ៊ុយក្រែន ! ហើយក៏មិនព្រម និងមិនបណ្តោយឱ្យបាត់ងាយៗដែរ។ នាយករដ្ឋមន្ត្រីរុស្ស៊ី មេតវេដេវ បានចេញមុខបរិហារ និងមិនទទួលស្គាល់របបដឹកនាំថ្មីនៅអ៊ុយក្រែន ដោយប្រើភាសា និងការព្រមានដដែលៗ “កុំឱ្យជ្រៀតជ្រែកកិច្ចការផ្ទៃក្នុង” ប្រទេសអ៊ុយក្រែន។ រុស្ស៊ីបានកោះហៅឯកអគ្គរដ្ឋទូតរបស់ខ្លួនចូលស្រុកវិញ មិនបានបង្ហើរពាក្យផ្អាកជំនួយហិរញ្ញវត្ថុដែលម៉ូស្គូសន្យាផ្តល់ឱ្យកាលពីពេលមុនផ្ទុះចលនាបះបោរ។
សេដ្ឋកិច្ចអ៊ុយក្រែនពឹងលើរុស្ស៊ី
តាំងពីសហភាពសូវៀតរលំរលាយទៅ នៅដើមឆ្នាំ១៩៩០ ម៉ូស្គូបានបាត់បង់ឥទ្ធិពលទៅប្រទេសជាច្រើនក្នុងតំបន់អឺរ៉ុបកណ្តាលនិងខាងកើត។ កាលពីជិត១០ឆ្នាំមុន អ៊ុយក្រែន ប្រទេសធំទីពីរនៅអឺរ៉ុបបើគិតពីផ្ទៃដី បានងាកមករកអឺរ៉ុបតាមរយៈការធ្វើបដិវត្តលឿងទុំ។ ប៉ុន្តែនៅឆ្នាំ២០១០ ក្រោយការបោះឆ្នោតប្រធានាធិបតីដែលលោក វិចទ័រ យ៉ានូកូវិច បានឈ្នះឆ្នោត ហើយរុញប្រមុខបក្សប្រឆាំង ជាអតីតនាយករដ្ឋមន្ត្រីចូលពន្ធនាគារមក រុស្ស៊ី ក៏ចាប់មានអំណាចលើអ៊ុយក្រែនវិញ។ រដ្ឋាភិបាលលោក វិចទ័រ យ៉ានូកូវិច រុំព័ទ្ធដោយអំពើពុករលួយ យកសេដ្ឋកិច្ចទៅរំពឹងលើតែរុស្ស៊ី រហូតទាល់តែលោកពូទីន អាចយកចំណេញទាញអ៊ុយក្រែនមិនឱ្យចុះហត្ថលេខាជាមួយសហភាពអឺរ៉ុប ដោយជ្រើសរើសអោបរុស្ស៊ី។ ភ្លើងបះបោរក៏ឆាបឆេះឡើងម្តងទៀត ...
រុស្ស៊ីខ្លាចចំហាយប្រជាធិបតេយ្យអ៊ុយក្រែន
រុស្ស៊ី ត្រូវការក្រសោបអ៊ុយក្រែន រក្សាអ៊ុយក្រែន ជួយឧបត្ថម្ភហិរញ្ញវត្ថុ មិនមែនគ្រាន់តែជាលេសយុទ្ធសាស្ត្រ និងការទូតប៉ុណ្ណោះទេ តែគឺដើម្បីប្រយោជន៍សំខាន់ផ្សេងសោះ។ នៅ ពីក្រោយពាក្យទាមទារការពារប្រវត្តិសាស្ត្រ វប្បធម៌ អរិយធម៌ ភាសាពូជសាសន៍ ម៉ូស្គូដ៏ប៉ិនប្រសព្វនេះ មានលាក់ការភ័យខ្លាចជាប់នឹងខ្លួន។ ខ្លាច ខ្យល់ប្រជាធិបតេយ្យ ដែលកំពុងបោកបក់ អង្រួនអំណាចអ៊ុយក្រែន ក្លាយជាគំរូ និងជាការលើកទឹកចិត្តសកម្មជនអ្នកប្រឆាំងរុស្ស៊ី ឱ្យងើបបះបោរដែរ “បណ្តាជនអ៊ុយក្រែនធ្វើកើត ដូច្នេះរុស្ស៊ីក៏អាចធ្វើបានដែរ!”
តាំងពីបាតុកម្មបានផ្ទុះឡើង រាលដាលជាអំពើហិង្សា មានស្លាប់ មានរបួស រុស្ស៊ីគ្មានប្តូរផ្លាស់ការពាររដ្ឋាភិបាលលោកយ៉ានូកូវិចជានិច្ច។ ឥលូវប្រធានាធិបតីរត់បាត់ កិច្ចព្រមព្រៀងដោះស្រាយវិបត្តិដែលរុស្ស៊ីនិងអឺរ៉ុបបានចូលរួមចំណែកគាំទ្ររួមគ្នា ត្រូវបានម៉ូស្គូទាត់ចោល និងមិនទទួលស្គាល់របបដឹកនាំថ្មីអ៊ុយក្រែនទេ។ កាន់តែគ្រោះថ្នាក់ជាងនេះទៅទៀត នៅក្នុងភាគខាងកើតអ៊ុយក្រែន ដែលនិយាយភាសារុស្ស៊ី ម៉ូស្គូបានប្រើមធ្យោបាយឃោសនាអូសទាញតាមកញ្ចក់ទូរទស្សន៍ រំលឹកអំពីប្រវត្តិអឺរ៉ុបខាងលិចមានសង្គ្រាមជាមួយប្លុកខាងកើត ... ព្រោះរុស្ស៊ីចង់ទប់ខ្យល់។ ខ្យល់ប្រជាធិបតេយ្យដែលកំពុងបក់ ពីលិចទៅកើត។
ហួសសមត្ថភាពសហភាពអឺរ៉ុប ?
វាប្រាកដណាស់ដែលថាពេលនេះ រុស្ស៊ីអង្គុយចាំចាប់កំហុសរដ្ឋាភិបាលថ្មី ! ជាក់ស្តែង កាលពីថ្ងៃចន្ទ រុស្ស៊ីបានបរិហារជាស្រេច ការសម្រេចលុបភាសារុស្ស៊ីជាភាសាផ្លូវការទីពីររបស់អ៊ុយក្រែន។ ម៉ូស្គូអាចនឹងប្រើក្បួនចាស់ដូចសម័យសហភាពសូវៀតទៀត ដោយសម្រួលការផ្តល់សញ្ជាតិរុស្ស៊ ដល់បណ្តាជនអ៊ុយក្រែន ដូចធ្លាប់បានធ្វើក្នុងឆ្នាំ២០០០ កាលមានទំនាស់ជាមួយប្រទេសហ្ស័កហ្ស៊ី និងអាប់ខាហ្ស៊ីព្រមទាំងអូសឺទីត។
ក្នុងពេលដែលរុស្ស៊ីបន្តធ្វើព្យុះភ្លៀង ញុះញង់ឱ្យមានភាពប្រេះឆា រវាងអ៊ុយក្រែនខាងលិច និងអ៊ុយក្រែនខាងកើតស្និទ្ធនឹងរុស្ស៊ី តើខាងសហភាពអឺរ៉ុបវិញ ? តើអឺរ៉ុបអាចបង្ហាញស្នាដៃនិងការជួយជ្រោមជ្រែងអ៊ុយក្រែនដែលស្រែកឃ្លានលទ្ធិប្រជាធិបតេយ្យយ៉ាងខ្លះ ?
សូមរំលឹកថា គឺដោយសារសម្ពាធរបស់ប៉ូឡូញ ប្រទេសជិតខាងអ៊ុយក្រែន និងជាអ្នកការពារបុព្វហេតុអ៊ុយក្រែន នៅក្រុងព្រុចសែល ដែលសហភាពអឺរ៉ុបបានស្នើកិច្ចព្រមព្រៀងយុទ្ធសាស្ត្រជាមួយក្រុងគៀវកាលពីខែ វិច្ឆិកា ២០១៣។ ប៉ុន្តែសហភាពអឺរ៉ុបដាក់លុយតិចពេកទើបចាញ់រុស្ស៊ី។ ទោះបីមានចេតនាពិតចង់ជួយស្វែងរកដំណោះស្រាយឱ្យអ៊ុយក្រែនមែន ប៉ុន្តែអឺរ៉ុប គ្មានសំឡេងរួមជុំវិញបេក្ខភាពអ៊ុយក្រែនជាសមាជិកសហភាព ឬផ្តល់ទស្សនៈវិស័យជាក្តីសង្ឃឹមសម្រាប់អនាគតឡើយ ព្រោះមិនមែនជាបញ្ហាអាទិភាព។
ម្យ៉ាងវិញទៀត សហភាពអឺរ៉ុប គ្មានលទ្ធភាពជួយអ៊ុយក្រែន ដែលត្រូវការជាបន្ទាន់ និងភ្លាមជំនួយហិរញ្ញវត្ថុ ដ៏សម្បើម សម្រាប់ត្រដររស់ទេ។ ជាឧទាហរណ៍ជាក់ស្តែង ប្រមុខការទូតបារាំង លោក ឡូរ៉ង់ ហ្វាប៊ូយូស បានងាកទៅរកម៉ូស្គូ ដើម្បីស្នើសុំឱ្យរុស្ស៊ីគោរពកិច្ចសន្យាផ្តល់ជំនួយ ១៥ពាន់លានជាមួយនឹងរដ្ឋាភិបាលចាស់។ សហភាពអឺរ៉ុបខ្លួនឯងបានជាប់គាំងនយោបាយតាំងពីច្រើនខែមក និងជួបវិបត្តិហិរញ្ញវត្ថុទៀត។ ដូច្នេះពិតជាគ្មានលទ្ធភាពជួយអ៊ុយក្រែនបានទាំងផ្ទាំងៗឡើយ។ ចង់មិនចង់ អ៊ុយក្រែនគ្មានជម្រើសអ្វីក្រៅពីត្រូវបន្តជិះទូកពីរ ពឹងរុស្ស៊ីផ្នែកហិរញ្ញវត្ថុ និងរកកន្លែងភ្ជាប់ខ្លួនជាមួយអឺរ៉ុបទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ