រុស្ស៊ីបដិសេធមិនទទួលស្គាល់អាជ្ញាធរថ្មីនៅអ៊ុយក្រែន
លោក ឌីមីទ្រី ម៉េដវេដេវ (Dmitri Medvedev) នាយករដ្ឋមន្រ្តីរុស្ស៊ី បានបដិសេធមិនទទួលស្គាល់ស្ថាប័នថ្មីរបស់អ៊ុយក្រែន ដែលកើតឡើង ក្រោយពីលោកយ៉ានូកូវិច ត្រូវបានសភាអ៊ុយក្រែនបោះឆ្នោតទម្លាក់ពីតំណែង កាលពីថ្ងៃសៅរ៍។ នៅក្នុងពេលជាមួយគ្នានេះដែរ រុស្ស៊ីក៏បានព្រមានផងដែរថា រុស្ស៊ីអាចនឹងដំឡើងអត្រាពន្ធគយលើទំនិញអ៊ុយក្រែន ប្រសិនបើអ៊ុយក្រែនងាកទៅចុះកិច្ចព្រមព្រៀងជាដៃគូជាមួយសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
លោកឌីមីទ្រី ម៉េដេវេដវ បានលើកឡើង នៅថ្ងៃចន្ទថា ស្ថាប័ននយោបាយកំពូលៗរបស់អ៊ុយក្រែន ដែលកើតឡើង ក្រោយពីលោកយ៉ានូកូវិចត្រូវគេទម្លាក់ពីតំណែង មិនប្រាកដជាស្ថាប័នដែលមានភាពស្របច្បាប់នោះទេ ពីព្រោះវាកើតចេញពីលទ្ធផលនៃអំពើបះបោរ។ លោកនាយករដ្ឋមន្រ្តីរុស្ស៊ីក៏បានរិះគន់ផងដែរ ចំពោះបណ្តាប្រទេសលោកខាងលិច ដែលទទួលស្គាល់អាជ្ញាធរអ៊ុយក្រែនថ្មីនេះ។
នេះគឺជាលើកទីមួយហើយ ដែលមេដឹកនាំជាន់ខ្ពស់របស់រុស្ស៊ីបញ្ចេញប្រតិកម្មជាសាធារណៈ តបទៅនឹងការទម្លាក់លោកយ៉ានូកូវិចពីតំណែង។ កាលពីថ្ងៃអាទិត្យ រដ្ឋមន្រ្តីក្រសួងការបរទេសរុស្ស៊ី ធ្លាប់បានលើកឡើង នៅក្នុងកិច្ចសន្ទនាតាមទូរស័ព្ទជាមួយរដ្ឋមន្រ្តីការបរទេសអាមេរិកថា អ្វីដែលបានកើតឡើង នៅអ៊ុយក្រែន តាមពិត គឺក្រុមប្រឆាំងបានដណ្តើមអំណាចរដ្ឋយកទៅកាន់កាប់។
ចំពោះប្រាក់កម្ចី ១៥ពាន់លានដុល្លារ ដែលរុស្ស៊ីធ្លាប់បានព្រមព្រៀងផ្តល់ឲ្យអ៊ុយក្រែន នៅពេលលោកយ៉ានូកូវិច នៅកាន់អំណាច លោកម៉េដវេដេវបានអះអាងថា រុស្ស៊ីគោរពតាមកិច្ចព្រមព្រៀងនេះបាន លុះត្រាតែអ៊ុយក្រែនមានស្ថាប័នស្របច្បាប់មួយមកដឹកនាំប្រទេស។
គួររំឭកឡើងវិញថា លោកយ៉ានូកូវិច ត្រូវបានសភាបោះឆ្នោតទម្លាក់ពីតំណែងជាប្រធានាធិបតីអ៊ុយក្រែន កាលពីយប់ថ្ងៃសៅរ៍ ក្រោយពីតំណាងរាស្រ្តមួយចំនួន ដែលស្និទ្ធនឹងលោក បានងាកមកគាំទ្រក្រុមប្រឆាំង។ ឥស្សរជនស្និទ្ធនឹងក្រុមប្រឆាំងក៏បានឡើងមកកាន់តំណែងជាប្រធានាធិបតីស្តីទី ដោយរង់ចាំការបោះឆ្នោតប្រធានាធិបតីមុនអាណត្តិ ដែលគេគ្រោងធ្វើ នៅថ្ងៃទី២៥ ឧសភាខាងមុខ។
គ្រាន់តែបានឡើងកាន់តំណែងភ្លាម ប្រធានាធិបតីស្តីទីអ៊ុយក្រែនបានប្រកាសថា អាទិភាពរបស់អ៊ុយក្រែននៅពេលនេះ គឺចាប់ផ្តើមងាកទៅចរចាបង្កើតភាពជាដៃគូជាមួយនឹងសហភាពអឺរ៉ុវិញ។ កិច្ចព្រមព្រៀងដៃគូជាមួយសហភាពអឺរ៉ុប ដែលលោកយ៉ានូកូវិចបានបដិសេធមិនទទួលយក ដោយងាកទៅចាប់ដៃជាមួយរុស្ស៊ី។
នៅថ្ងៃចន្ទនេះដែរ រដ្ឋមន្រ្តីក្រសួងសេដ្ឋកិច្ចរុស្ស៊ីបានព្រមានអ៊ុយក្រែនទុកជាមុនថា ប្រសិនបើអ៊ុយក្រែនពិតជាងាកទៅចុះកិច្ចព្រមព្រៀងធ្វើជាដៃគូរបស់សហភាពអឺរ៉ុបមែន រុស្ស៊ីនឹងដំឡើងអត្រាពន្ធគយលើទំនិញ ដែលនាំចូលពីអ៊ុយក្រែនទៅរុស្ស៊ី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ