G៧ដាក់សម្ពាធលើរុស្ស៊ី ឯលោកពូទីនទាមទារឲ្យបង្ហាញភស្តុតាងពីការលូកដៃរបស់រុស្ស៊ីក្នុងវិបត្តិខាងកើតអ៊ុយក្រែន
ចុះផ្សាយនៅថ្ងៃ៖
ស្តាប់ - ០៥:៥៩
នៅល្ងាច ថ្ងៃពុធម្សិលមិញ ក្រុមប្រទេសមហាអំណាចឧស្សហកម្មហ្សេ៧ បានអនុម័តនូវសេចក្តីសម្រេច គំរាមដាក់ទណ្ឌកម្មថ្មីៗប្រឆាំងរុស្ស៊ីថែមទៀត។ ស្របពេលជាមួយគ្នានេះ លោកពូទីនបានទាមទារអោយអាមេរិកបង្ហាញភស្តុតាងដែលចោទ រុស្ស៊ី ថាលូកដៃចូលកិច្ចការផ្ទៃក្នុងអ៊ុយក្រែន។ ក្នុងពិធីខួបទី៧០ រំលឹកការចូលរួមប្រទេសសម្ព័ន្ធមិត្តរំដោះបារាំងចេញពីរបបហ្វាស៊ីស សម័យសង្គ្រាមលោក នៅថ្ងៃស្អែកនេះ លោកអូបាម៉ាបដិសេធមិនជួបនិយាយផ្ទាល់មាត់ ជាមួយលោកពូទីនទេ។
ប្រធានាធិបតីបារាំងនឹងជួបលោកអូបាម៉ា និងលោកពូទីន ក្នុងពិធីទទួលទានអាហារដាច់ដោយឡែកពីគ្នា។ នៅថ្ងៃសៅរ៍៧ មិថុនា ប្រធានាធិបតីប៉ូរ៉ូឆិនកូ នឹងចូលកាន់តំណែងផ្លូវការនៅអ៊ុយក្រែន។ លោកប៉ូរ៉ូឆិនកូ នឹងប្រកាសពីផែនការសន្តិភាពរបស់លោក មានទិសដៃៅបែងចែករំលែកអំណាចក្នុងស្រុក និងលើកលែងទោសដល់សកម្មជនផ្តាច់ទឹកដីនិយមគាំទ្ររុស្ស៊ី។
ការពិភាក្សាពីវិបត្តិអ៊ុយក្រែន ក្នុងជំនួបប្រទេសមហាអំណាចឧស្សាហកម្មហ្សេ៧ នៅក្រុងព្រុចសែល គ្មានវត្តមានរុស្ស៊ី
ការព្យួរវត្តមាន រុស្ស៊ីក្នុងជំនួបក្រុមប្រទេសហ្សេ៧នេះ គឺជាការដាក់ទណ្ឌកម្មលើរុស្ស៊ីដែលបានភ្ជាប់តំបន់គ្រីមេអ៊ុយក្រែន ចូលទឹកដីរុស្ស៊ី កាលពីខែមិនា។ គិតពីឆ្នាំ១៩៩៧មក នេះជាលើកទី១ហើយដែលរុស្ស៊ីគ្មានវត្តមានក្នុងកិច្ចប្រជុំក្រុម ប្រទេសអ្នកមាន។ ប្រទេសមហា អំណាចឧស្សាហកម្មមានវត្តមានក្នុងជំនួបម្សិលមិញ មានអាមេរិក កាណាដា អាល្លឺម៉ង់ បារាំង ជប៉ុន អ៊ីតាលី និងអង់គ្លេស។ ក្រៅពីបានគម្រាមដាក់ទណ្ឌកម្មថ្មីអោយធ្ងន់លើរុស្ស៊ីថែមទៀត នោះ ក្រុមប្រទេសហ្សេ៧ បានប្រកាសត្រៀមបើកកិច្ចប្រជុំមួយ នៅខែកក្កដាក្រោយនេះ ស្តីពីជំនួយដែលត្រូវផ្តល់អោយអ៊ុយក្រែន។ នៅចុងឆ្នាំ២០១៤នេះដែរ ក៏នឹងមានរៀបចំសន្និសីទអន្តរជាតិក្រុមប្រទេសផ្តល់ជំនួយផងដែរ។ ក្រុមប្រទេសហ្សេ៧ មានបំណងជួយប្រធានាធិបតីអ៊ុយក្រែន ដែលទើបជាប់ឆ្នោតថ្មី គឺលោកប៉ូរ៉ូឆិនកូ ជួយហិរញ្ញវត្ថុ សេដ្ឋកិច្ច និងនយោបាយអ៊ុយក្រែន អោយឈានទៅរកស្ថិរភាពឡើងវិញ។ ប្រធានគណៈកម្មការអឺរ៉ុប លោកម៉ានុយអែល បារ៉ូសូ បានបញ្ជាក់ថា សហភាពអឺរ៉ុបនឹងចុះហត្ថលេខាងលើកិច្ចព្រមព្រៀងផ្តោះប្តូរពាណិជ្ជកម្ម សេរី ជាមួយអ៊ុយក្រែន យ៉ាងយូរថ្ងៃ២៧មិថុនានេះហើយ។
ទាក់ទង ទណ្ឌកម្មប្រឆាំងរុស្ស៊ី ទណ្ឌកម្មដែលអាមេរិកនិងអឺរ៉ុបបានដាក់កន្លងមក មិនទាន់ឈានដល់ដំណាក់កាលទី៣ ជាដំណាក់កាលវាយប្រហារសេដ្ឋកិច្ចរុស្ស៊ីនៅឡើយទេ។ ទណ្ឌកម្មកន្លងមក នៅស្ថិតក្នុងដំណាក់កាលទី២នៅឡើយ ជាទណ្ឌកម្មបង្កកទ្រព្យសម្បត្តិ រឺមិនចេញទិដ្ឋាការធ្វើដំណើរអោយដល់អ្នកនយោបាយរុស្ស៊ី រួមនឹងអ្នកនយោបាយអ៊ុយក្រែនគាំទ្ររុស្ស៊ីផងដែរ។ ពេលនេះ យើងនៅមិនទាន់ដឹងថា តើទណ្ឌកម្មថ្មីៗដែលត្រូវដាក់ប្រឆាំងរុស្ស៊ី ជាទណ្ឌកម្មដំណាក់កាលទី៣រឺយ៉ាងណាទេ។ មុនជំនួបក្រុមប្រទេសហ្សេ៧ ម្សិលមិញ ប្រមុខដឹកនាំអាល្លឺម៉ង់ លោកស្រីមែរគែល បានគម្រាមដាក់ទណ្ឌកម្មថ្មីៗប្រឆាំងរុស្ស៊ីផងដែរ។ លោកស្រីមែរគែលចង់សំដៅពីទណ្ឌកម្មដំណាក់កាលទី៣ ដែលសហភាពអឺរ៉ុបចង់ដាក់ចេញនោះហើយ។
សហភាពអឺរ៉ុបនៅទើសទ័លចិត្ត ក្នុងការដំឡើងទណ្ឌកម្មដល់ដំណាក់កាលទី៣ប្រឆាំងរុស្ស៊ី ព្រោះថា រុស្ស៊ីបានបង្ហាញបំណងល្អ ដោយបានដកកងទ័ពចេញពីព្រំដែនអ៊ុយក្រែន និងទុកពេលបន្ថែមអោយអ៊ុយក្រែន ក្នុងការសងថ្លៃជំពាក់ឧស្ម័នរុស្ស៊ី។ ម្សិលមិញ ក្រុមប្រទេសហ្សេ៧ បានសុំអោយរុស្ស៊ីពន្លឿនការដកថយទ័ពពីព្រំដែនអ៊ុយក្រែនថែមទៀត។
លោកពូទីនចំអកនយោបាយការបរទេសរបស់លោកអូបាម៉ា
ក្នុង ពិធីរំលឹកខួបការរំដោះប្រទេសបារាំងពីរបបហ្វាស៊ីសអាល្លឺម៉ង់ សម័យសង្គ្រាមលោកលើកទី២ ដែលត្រូវធ្វើនៅថ្ងៃសុក្រនេះ លោកអូបាម៉ាមិនព្រមជួបនិយាយផ្ទាល់មាត់ជាមួយលោកពូទីនទេ ទោះជាលោកអូបាម៉ានិងលោកពូទីនមានវត្តមានក្នុងពិធីនេះជាមួយគ្នា ក្តី។ នេះបង្ហាញថា អាមេរិកនិងរុស្ស៊ីរឹងទទឹងដូចគ្នា ក្នុងការដោះស្រាយកិច្ចការអន្តរជាតិ។ ម្សិលមិញ ប្រធានាធិបតីរុស្ស៊ី បានផ្តល់បទសម្ភាសន៍ដល់ទូរទស្សន៍បារាំង និងវិទ្យុបារាំងមួយ។ ក្នុងបទសម្ភាសន៍នេះ លោកពូទីន បានអួតថា លោកមិនបានគិតថា មិនជួបអ្នកណាម្នាក់ក្នុងពិធីបុណ្យនៅបារាំងនេះទេ។ លោកពូទីនចង់ចំអកលោកអូបាម៉ា ដែលមិនព្រមជួបលោកនោះឯង។ លោកពូទីនប្រាប់ទៀត ត្រៀមជួបប្រធានាធិបតីអ៊ុយក្រែនថ្មីទៀតផង។
ថ្មីៗ នេះ អាមេរិកបានប្រាប់ថា មានភស្តុតាងបង្ហាញថា រុស្ស៊ីបង្កអស្ថិរភាពនៅអ៊ុយក្រែន ដោយបណ្តោយទុកអោយសកម្មជនប្រយុទ្ធ និងអាវុធជាច្រើន ហូរចូលទឹកដីអ៊ុយក្រែន។ លោកពូទីនបានលេងទៅលោកអូបាម៉ាវិញ ដោយទាមទារអោយអាមេរិកបង្ហាញភស្តុតាង រុស្ស៊ីពិតជាលូកដៃចូលកិច្ចការផ្ទៃក្នុងអ៊ុុយក្រែន។ ទាក់ទងនឹងភស្តុតាងនេះដែរ ប្រធានាធិបតីរុស្ស៊ីបានឆ្លៀតចំអកនយោបាយការបរទេសអាមេរិក នៅអ៊ីរ៉ាក់ ទាក់ទងនឹងការដែលអាមេរិកប្រឌិតភស្តុតាងរឿងអាវុធប្រល័យលោកនៅ អ៊ីរ៉ាក់ ដើម្បីធ្វើអន្តរាគមន៍យោធា រកផលប្រយោជន៍ប្រេងនោះ។
លោក ពូទីនលើកឡើងទៀតថា ការពិតគឺអាមេរិកទេដែលមាននយោបាយព្រៃផ្សៃ ព្រោះថា អាមេរិកមានកងទ័ព មានទីតាំងយោធានៅគ្រប់ទីកន្លែងក្នុងពិភពលោក។ រុស្ស៊ីវិញ គ្មានកងកម្លាំងអ្វីនៅបរទេសទេ។ លោកពូទីនដឹងច្បាស់ថា នយោបាយការបរទេសរបស់លោកអូបាម៉ា កំពុងរងការរិះគន់ថា ទន់ជ្រាយប្រឈមនឹងរុស្ស៊ី ក្នុងវិបត្តិអ៊ុយក្រែន។
ក្នុងរឿង អ៊ុយក្រែន លោកពូទីនតបទៅក្រុមប្រទេសហ្សេ៧ ម្សិលមិញដែរថា រុស្ស៊ីគ្មានគម្រោងភ្ជាប់គ្រីមេចូលទឹកដីរុស្ស៊ីទេ។ រុស្ស៊ីគោរពតាមការសម្រេចរបស់ប្រជាជនអ៊ុយក្រែន ហើយរុស្ស៊ីនឹងសហការជាមួយអាជ្ញាធរអ៊ុយក្រែន។ ម្សិលមិញ រុស្ស៊ីបានសម្រេចដាក់ដំណើរការគណៈកម្មការថ្មីមួយ ទទួលបន្ទុកបំភ្លឺបទឧក្រិដ្ឋសម្លាប់ប្រជាជនស្លូតត្រង់ នៅភាគខាងកើតអ៊ុយក្រែន។ ក្រុងម៉ូស្គូបានអំពាវនាវអោយប្រជាជនអ៊ុយក្រែនជួយវែកមុខឃាតករ ហើយសន្យាជួយប្រជាជនអ៊ុយក្រែនដែលភៀសខ្លួនពីអំពើហិង្សានៅភាគខាងកើត អ៊ុយក្រែន អោយបានប្តឹងតវ៉ាទៅតុលាការសិទ្ធិមនុស្សអឺរ៉ុបទៀតផង។
ប្រធានាធិបតីបារាំងសុខចិត្តជួបលោកអូបាម៉ា ដាច់ដោយឡែកពីលោកពូទីន ក៏ដើម្បីបន្ថយភាពតានតឹងរវាងបារាំងនិងអាមេរិកដែរ ព្រោះថា អាមេរិកមិនសប្បាយចិត្តឡើយ ចំពោះការដែលបារាំងមិនព្រមលុបចោលកិច្ចសន្យាលក់នាវាផ្ទុក ឧទ្ធម្ភាគចក្រប្រភេទមីស្ត្រាល់ ២គ្រឿងទៅអោយរុស្ស៊ីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ