ទោះមានកិច្ចព្រមព្រៀង ក្រុមប្រឆាំងអ៊ុយក្រែនទាមទារអោយប្រធានាធិបតីយ៉ានូកូវិចចុះពីតំណែង
ចុះផ្សាយនៅថ្ងៃ៖
ស្តាប់ - ០៥:៣១
នៅអ៊ុយក្រែន ក្រោយពីក្រុមប្រឆាំង និងប្រធានាធិបតីយ៉ានូកូវិច បានចុះហត្ថលេខា នៅថ្ងៃសុក្រម្សិលមិញ លើកិច្ចព្រមព្រៀងស្រោចស្រង់ប្រទេសអោយងើបផុតពីវិបត្តិនយោបាយជាង៣ខែមកនេះ នៅថ្ងៃសៅរ៍នេះ ក្រុមប្រឆាំងបានបន្តទាមទារអោយលោកយ៉ានូកូវិច លាលែងពីតំណែង។ បណ្តាមេដឹកនាំចលនាប្រឆាំងអ៊ុយក្រែន នឹងបញ្ចុះបញ្ចូលសភាអោយអនុម័តគំរោងច្បាប់ បង្ខំលោកយ៉ានូកូវិចអោយចុះពីតំណែង។ ដោយឡែក នៅថ្ងៃសៅរ៍នេះដែរ លោក វ៉ូឡូឌីមៀ រីបាក់ ជាប្រធានសភាអ៊ុយក្រែន បានប្រកាសលាលែងពីតំណែង ដោយសារតែស្ថានភាពសុខភាពលោកមិនអំណោយផល។ ក្រុមប្រឆាំងក៏បានទាមទារអោយរៀបចំការបោះឆ្នោតប្រធានាធិបតី អោយបានយ៉ាងយូរនៅថ្ងៃ២៥ឧសភាផងដែរ។
ទោះជាមានកិច្ចព្រមព្រៀងបញ្ចប់វិបត្តិនយោបាយ និងមានការចុះចាញ់ពីសំណាក់ប្រធានាធិបតីយ៉ានូកូវិច ក្រុមប្រឆាំងនៅមិនទុកចិត្ត និងបន្តទាមទារអោយលោកយ៉ានូកូវិចអោយចុះពីអំណាច
កិច្ចព្រមព្រៀងដែលសម្រេចបាននៅថ្ងៃសុក្រម្សិលមិញ រវាងក្រុមប្រឆាំងនិងប្រធានាធិបតីយ៉ានូកូវិច ថ្វីបើមានការស្វាគមន៍ពីអាមេរិក តែវាគ្មានលក្ខណៈរឹងមាំទេ។ ក្នុងក្រសែភ្នែកក្រុមប្រឆាំង លោកយ៉ានូកូវិច និងសមាជិកបក្សកាន់អំណាចរបស់លោក គឺជាអ្នកដែលបង្កអោយមានការបង្ហូរឈាម និងការស្លាប់របស់បាតុករជិត៨០នាក់ នៅសប្តាហ៍នេះ។ ហើយរដ្ឋធម្មនុញ្ញឆ្នាំ២០០៤ ដែលសភាបានគាំទ្រអោយអនុម័តទៀតសោត ក៏បង្ហាញថា ទោះជាអំណាចប្រធានាធិបតីត្រូវកាត់បន្ថយពិតមែន តែប្រធានាធិបតីនៅតែមានអំណាច។ ដូច្នេះ ក្រុមប្រឆាំងមិនងាយទុកចិត្តលោកយ៉ានូកូវិចស្រួលៗនោះទេ។ ម្យ៉ាងទៀត កិច្ចព្រមព្រៀងសំដៅបញ្ចប់វិបត្តិនយោបាយ ចុះហត្ថលេខាម្សិលមិញ ត្រូវបានបាតុករជាច្រើនរិះគន់។
ការសម្រេចកិច្ចព្រមព្រៀងម្សិលមិញ មិនមែនមានន័យថា ជាកិច្ចព្រមព្រៀងរវាងគ្រប់ចលនាបាតុកម្ម ជាមួយលោកយ៉ានូកូវិចនោះទេ។ ជាង៣ខែមកនេះ បាតុករដែលមកតវ៉ា នៅទីក្រុងគៀវ ស្របតាមការអំពាវនាវរបស់បក្សប្រឆាំង មានតែ៣ភាគរយប៉ុណ្ណោះ ក្នុង ចំណោមបាតុករដ៏សន្ធឹកសន្ធាប់។ បាតុករភាគច្រើនមកតវ៉ាប្រឆាំងរដ្ឋាភិបាល ដោយចិត្តខ្លួនឯង ដោយមធ្យោបាយផ្ទាល់ខ្លួន មិនមែនដោយសារបក្សប្រឆាំងហៅមកនោះទេ។
ក្នុងកិច្ចព្រមព្រៀងម្សិលមិញ ក្រុមបាតុករមិនពេញចិត្តនឹងការបោះឆ្នោតប្រធានាធិបតីដែលត្រូវរៀបចំ នៅខែធ្នូចុងឆ្នាំ២០១៤នោះទេ ព្រោះថា នៅចំពោះមុខស្ថានភាពដុនដាបសព្វថ្ងៃនេះ ខែធ្នូនៅយូរឆ្ងាយទៀតណាស់។
អាស្រ័យហេតុនេះ មេដឹកនាំចលនាប្រឆាំង ពិសេសលោក វិតាលី គ្លីតឆ្កូ Vitali Klitschko មកពីបក្សប្រឆាំងឈ្មោះថា Udar យល់ច្បាស់ណាស់ថា បើខ្លួនធ្វើអ្វីឆ្គាំឆ្គងបំពានបំណងក្រុមបាតុករភាគច្រើន នោះក្នុងរដ្ឋាភិបាលនៅអាណត្តិបន្ទាប់ បក្សប្រឆាំងគ្មានថ្ងៃគ្រប់គ្រងប្រទេសបានសុខស្រួលនោះឡើយ។ យោងតាមការស្ទាបស្ទង់មតិ លោក គ្លីតឆ្កូ មេបក្សប្រឆាំងនេះទៀតសោត ប្រហែលអាចត្រូវបានប្រជាជនបោះឆ្នោតអោយជាប់ធ្វើជាប្រធានាធិបតីទៀតផង។ ដូច្នេះ បក្សប្រឆាំងត្រូវតែបញ្ចុះបញ្ចូលសភា អោយបង្ខំលោកយ៉ានូកូវិច ចុះពីអំណាច។
ហេតុអ្វីលោកយ៉ានូកូវិច ចុះញ៉មស្រួលធ្វើសំណើដល់ក្រុមប្រឆាំង រហូតសម្រេចបានកិច្ចព្រមព្រៀងជាមួយក្រុមប្រឆាំង?
ចាប់តាំងពីអ៊ុយក្រែនធ្លាក់ក្នុងវិបត្តិ ប្រឈមនឹងចលនាបាតុកម្មមហិមា ក្នុងទីក្រុងគៀវមក រុស្ស៊ីដែលធ្លាប់តែជួយជ្រោមជ្រែងលោកយ៉ានូកូវិច ហាក់លែងរវីរវល់ និងបានបណ្តោយអោយលោកយ៉ានូកូវិចប្រឈមនឹងស្ថានភាពក្នុងស្រុកតែម្នាក់ឯង។ ក្នុងកិច្ចព្រមព្រៀងអ៊ុយក្រែន-រុស្ស៊ី រុស្ស៊ីធ្លាប់បានសន្យាជួយ១៥ពាន់លានដុល្លារ និងបញ្ចុះថ្លៃឧស្ម័នមួយភាគបីអោយអ៊ុយក្រែន។ រុស្ស៊ីបានផ្តល់ប្រាក់មួយចំនែកដល់រដ្ឋាភិបាលអ៊ុយក្រែនរួចហើយ តែក្រោយមកទៀត បានបដិសេធផ្តល់ប្រាក់ដែលនៅសេសសល់ ដូច្នេះ សេដ្ឋកិច្ចអ៊ុយក្រែននៅពេលនេះ ត្រូវប្រឈមនឹងបញ្ហាធ្ងន់ធ្ងរ។
លើសពីនេះ បាតុកម្មហិង្សា ក្នុងសប្តាហ៍នេះ បានសម្លាប់មនុស្សរហូតជិត៨០នាក់ ធ្វើអោយមានអន្តរាគមន៍ពីសហភាពអឺរ៉ុបនិងអាមេរិក។ សហភាពអឺរ៉ុបនិងអាមេរិក បានគម្រាមដាក់ទណ្ឌកម្មបន្ថែមលើអ៊ុយក្រែន។
មួយវិញទៀត បាតុកម្មហិង្សាសម្លាប់មនុស្ស គឺជាហេតុការណ៍បំបាក់មុខបក្សកាន់អំណាចក្នុងជួររដ្ឋាភិបាល ធ្វើអោយសមាជិករដ្ឋាភិបាល បែកបាក់គ្នា ព្រោះមានការយល់ឃើញផ្ទុយគ្នា។ ប្រធានសភាអ៊ុយក្រែនជាអ្នកជិតដិតនឹងលោកយ៉ានូកូវិច បានប្រកាសលាតំណែង ថ្ងៃសៅរ៍នេះ ដោយសារបញ្ហាសុខភាព តែវាអាចជាអ្វីផ្សេងវិញក៏ថាបាន។ ហើយកន្លងមក នាយករដ្ឋមន្ត្រីអ៊ុយក្រែន អាហ្សារ៉ូវ ក៏ធ្លាប់បានលាពីតំណែងដែរ។ លោកប្រាប់ថា មិនចង់អោយអ៊ុយក្រែនប្រឈមស្ថានភាពសេដ្ឋកិច្ចធ្ងន់ធ្ងរ។ ដោយសារការប៉ះទង្គិចរហូតមានមនុស្សស្លាប់ច្រើននាក់ ក្នុងសប្តាហ៍នេះ អគ្គមេបញ្ជាការរងកងទ័ពមួយរូប ក៏បានលាចេញពីតំណែងផងដែរ។ ប៉ូលិសជាច្រើន សំដែងការខកចិត្តចំពោះហេតុការណ៍ដែលឈានរហូតដល់មានមនុស្សស្លាប់នេះ។
ជាងនេះទៀត រដ្ឋមន្ត្រីការពារជាតិអ៊ុយក្រែន បានប្រកាសប្រាប់អាមេរិកថា កងទ័ពនឹងមិនលូកដៃអន្តរាគមន៍ក្នុងវិបត្តិអ៊ុយក្រែនទេ។ ពេលនេះ ប៉ូលិសនិងកងទ័ពស្ថិតនៅការពារប្រជាជនអ៊ុយក្រែនវិញ។ ដូច្នេះ ប្រធានាធិបតីយ៉ានូកូវិច មិនអាចបន្តធ្វើហាក់ដូចគ្មានអ្វីកើតឡើងនោះទេ ព្រោះថា ពេលនេះ កងទ័ពដែលកន្លងមកធ្លាប់ចង់អោយលោកចាត់វិធានការប្រឈមបាតុករ ឥលូវនេះ បានដកខ្លួនប្តូរជំហរវិញហើយ។ ដូច្នេះ លោកយ៉ានូកូវិច មានតែព្រមចុះចាញ់ ហើយម្សិលមិញនេះ លោកបានចុះហត្ថលេខាផ្តល់ផលប្រយោជន៍អោយក្រុមប្រឆាំង។
ឥលូវនេះ អាមេរិកនិងរុស្ស៊ីចង់អោយមានការអនុវត្តន៍កិច្ចព្រមព្រៀងថ្ងៃសុក្រម្សិលមិញអោយបានឆាប់បំផុត។ ក្រុមប្រឆាំងបានប្រាប់ថា លោកយ៉ានូកូវិចបានចាកចេញពីក្រុងគៀវ។ នៅថ្ងៃសៅរ៍នេះ ហើយដៃស្តាំរបស់ក្រុមប្រឆាំងមួយរូប គឺលោក ទួរឈីណូវ ត្រូវបានគេបោះឆ្នោតអោយធ្វើជាប្រធានសភាអ៊ុយក្រែន ហើយអ្នកជិតដិតក្រុមប្រឆាំងមួយរូបទៀត ឈ្មោះអាវ៉ាកូវ (Arsen Avakov) ក៏ត្រូវបានតែងតាំងជារដ្ឋមន្ត្រីស្តីទីក្រសួងមហាផ្ទៃផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ