យានអវកាសណាសា នឹងថតរូបអាចម៍ផ្កាយដ៏សែនឆ្ងាយពីផែនដី នៅថ្ងៃទី១មករាឆ្នាំថ្មីនេះ
ចុះផ្សាយនៅថ្ងៃ៖
ស្តាប់ - ០៣:៥៥
នៅថ្ងៃទី១មករា ដើមឆ្នាំ២០១៩ ឆ្នាំថ្មីនេះ យានអវកាស New Horizons នឹងហោះទៅកៀកអាចម៍ផ្កាយឈ្មោះUltima Thule ហើយថតរូបផ្ញើមកកាន់ផែនដី។ នេះគឺជាបេសកម្មក្នុងលំហដ៏សែនឆ្ងាយជាងគេបំផុត មិនធ្លាប់មានទេ នៅក្នុងប្រវត្តិសិក្សាអវកាស។ អាចម៍ផ្កាយនេះ មានចម្ងាយប្រមាណ ៦.៤ ពាន់លានគីឡូម៉ែត្រពីភពផែនដី។
ភ្នាក់ងារអវកាសណាសារបស់អាមេរិក បានបើកដំណើរការយានអវកាស New Horizons នៅឆ្នាំ២០០៦។ យានអវកាសនេះ ហោះយ៉ាងលឿនក្នុងល្បឿន ប្រមាណ ៥១.៥០០ គីឡូម៉ែត្រ ក្នុងមួយម៉ោង។ New Horizons បានសម្រេចកិច្ចការដ៏សំខាន់មួយកាលពីឆ្នាំ២០១៥ គឺបានថតយករូបភាពភព Pluton។
បីឆ្នាំក្រោយមក តាមគម្រោងរបស់អ្នកអវកាស ថ្ងៃទី១មករា២០១៩ គឺនៅសល់តែប៉ុន្មានថ្ងៃទៀតតែប៉ុណ្ណោះ ដែលយានអវកាស New Horizons នឹងសម្រេចបំបែកកំណត់ត្រាប្រវត្តិសាស្ត្រជាថ្មី ដោយនឹងត្រូវទៅថតយករូបភាពនៅអាចម៍ផ្កាយ Ultima Thule។ នៅលើកនេះ អ្នកវិទ្យាសាស្ត្រណាសា ប្រាប់ថា នឹងថតរូបអាចម៍ផ្កាយនេះ ឲ្យបានច្បាស់ជាងមុន គឺរូបភាព Ultima Thule នឹងច្បាស់ជាង៣ដងនៃការថតរូបភព Pluton។ ពីព្រោះថា នៅលើកនេះ គេនឹងបន្ទាបខ្លួនយានទៅកៀកអាចម៍ផ្កាយ Ultima Thule ប្រមាណជាចម្ងាយពី៣ពាន់៥រយគីឡូម៉ែត្រ ពីផ្ទៃដីរបស់អាចម៍ផ្កាយ។ រហូតមកទល់ពេលនេះ គេមិនទាន់អាចសន្និដ្ឋានបានពីទំហំរបស់អាចម៍ផ្កាយ Ultima Thule នេះបានទេ តែអ្នកវិទ្យាស្ត្រ វាយតម្លៃជាបឋមថា វាអាចមានអង្កត់ផ្ចិត ប្រមាណ២៥គីឡូម៉ែត្រ ហើយទំនងជាមានទំហំតូចជាង ១០០ ដង នៃភព Pluton ។
បេសកម្មដ៏ប្រឈមនឹងហានិភ័យ
ចំពោះដំណើរការហោះហើរនៃយានអវកាស New Horizons នៅពេលនេះ គឺគេអាចនិយាយបានថា ជាបេសកម្មដ៏ប្រថុយបំផុត ឬក៏គ្រោះថ្នាក់បំផុត ដែលជួបហានិភ័យត្រឹមតែមួយប៉ប្រិចភ្នែក។ ដោយសារថា យាននេះ ហោះលឿនយកតែមែនទែន គឺក្នុងកម្រិតល្បឿន ជាង៥ម៉ឺនគឺឡូម៉ែត្រក្នុងមួយម៉ោង។ នៅក្នុងកម្រិតល្បឿនលឿនដូច្នេះ ប្រសិនបើវាហោះទៅបុកប៉ះកម្ទេចកម្ទីអ្វីមួយតែបន្តិចបន្តួច សូម្បីតែបុកប៉ះគ្រាប់គ្រួស គ្រាប់ថ្មតូចត្រឹមប៉ុនគ្រាប់អង្ករ ក៏អាចធ្វើឲ្យវាខ្ទេចខ្ទីខូចខាតបានភ្លាមមួយរំពេចដែរ។ ចុះបើប្រថុយប្រថានដ៏ថ្នាក់ហ្នឹង តើហេតុអ្វីបានជាអ្នកវិទ្យាសាស្ត្រចាប់អារម្មណ៍ចង់ទៅសិក្សាពីទីនោះម្ល៉េះ?
លក្ខណៈពិសេសរបស់ Ultima Thule
គេចង់ទីសិក្សាពីនោះទីនោះ ព្រោះថា អាចម៍ផ្កាយUltima Thule មានលក្ខណៈពិសេស ដ្បិតតែវាឋិតនៅប៉ែកខាងក្រៅនៃប្រព័ន្ធព្រះអាទិត្យ ដែលសីតុណ្ហភាពក្រោមសូន្យជាច្រើនដង។ ហើយដោយសារតែវានៅឆ្ងាយពីពន្លឺនៃប្រពន្ធព្រះអាទិត្យ វាអាចនៅរក្សាទំហំរូបរាង និងប្រព័ន្ធជាទូទៅរបស់វាបានល្អ។ អ្នកវិទ្យាសាស្ត្រ រំពឹងទៅលើលក្ខណៈពិសេសនេះហើយ ដើម្បីសិក្សាប្រៀបធៀបនិងដើម្បីឈ្វេងយល់ពីភពផែនដី ប្រព័ន្ធភព និងផ្កាយផ្សេងៗ កាលពីរាប់សិបលានឆ្នាំមុន។
អ្នកគ្រប់គ្រង់គម្រោងអវកាស New Horizons លោក Alan Stern បានបញ្ជាក់ថា នៅក្នុងគម្រោងបេសកម្មនេះ មានសារៈសំខាន់ណាស់ចំពោះអ្នកវិទ្យាសាស្ត្រ ពីព្រោះថា តំបន់នៃអាចម៍ផ្កាUltima Thule នេះ វានៅឆ្ងាយសែនឆ្ងាយពីព្រះអាទិត្យ ដូច្នេះវានៅរក្សាបាននូវលក្ខណៈដើមរបស់វា ដូចដែលមានកាលពី ៤ពាន់៥សែន លាន ឆ្នាំមុន។
បើតាមអ្នកវិទ្យាសាស្ត្រដដែល តាមរយៈបេសកម្មរបស់យានអវកាស New Horizons លើកនេះ គឺនឹងអាចឲ្យគេយល់ជាទូទៅពី សមភាព សីតុណ្ហភាព កម្រិតឧស្ម័ន ព្រមទាំងបរិយាកាសជាមធ្យមរបស់អាចម៍ផ្កាយ Ultima Thule។ តាមគម្រោង យានអវកាស នឹងហោះសម្រេចដល់គោលដៅនៅវេលាម៉ោង៥និង៣០នាទីព្រឹកថ្ងៃទី១មករា និងថតយករូបភាព ហើយបញ្ជូនមកផែនដីជាបន្តបន្ទាប់ ដែលមនុស្សលោកអាចនឹងមើលឃើញរូបភាពទាំងនោះ ចាប់ពីថ្ងៃទី២មករាតទៅ។
បេសកម្មរបស់យានអវកាស New Horizons លើកនេះ គឺពុំមែនជាកិច្ចការចុងក្រោយនោះទេ។ យានអវកាសនេះនឹងហោះឆ្ពោះទៅទីកន្លែងកាន់តែឆ្ងាយថែមទៀត នៅឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ